Дәјишкән дүнјада тәблиғ етмәк
1 Һәр шеј неҹә дә сүр’әтлә дәјишир! Гәфил баш вермиш тәбии фәлакәт, игтисади бөһран, сијаси чеврилиш вә ја дүнјаја сәс салан фаҹиә сөһбәтин әсас мөвзусу ола биләр. Тезликлә исә, инсанларын диггәтини башга бир шеј ҹәлб едә биләр (Һәв. иш. 17:21; 1 Кор. 7:31). Бу дәјишкән дүнјада инсанларын диггәтини Падшаһлыг һаггындакы хәбәрә неҹә ҹәлб етмәк олар?
2 Инсанлары нараһат едән сәбәбләри анламаға чалыш. Һәмсөһбәтинин диггәтини ҹәлб етмәк үсулларындан бири, һазырда ҹәрәјан едән һадисәләрә истинад етмәкдир. Бир дәфә, динләјиҹиләрини Аллаһ гаршысындакы мөвгеләри үзәриндә ҹидди шәкилдә дүшүнмәјә тәшвиг едәрәк, Иса онлара јахшы таныш олан фаҹиәләри хатырлатды (Лука 13:1-5). Ејни тәрздә бизим дә, хош хәбәри чатдыраркән әразимиздә јашајан инсанлары нараһат едән сон хәбәрләрә вә ја һадисәләрә истинад етмәјимиз фајдалы оларды. Лакин бу ҹүр мөвзулары мүзакирә едәркән еһтијатлы олмалыјыг ки, сијаси вә ја иҹтимаи мәсәләләрдә киминсә тәрәфини тутмајаг (Јәһ. 17:16).
3 Инсанлары һал-һазырда нараһат едән шејләр барәдә неҹә өјрәнә биләрик? Ҝүман ки, буну мүәјјән етмәјин ән јахшы јолу, инсана суал вериб, сонра ону диггәтлә динләмәкдир (Мат. 12:34). Һәмсөһбәтимизлә сәмими гәлбдән марагланараг, онун нөгтеји-нәзәрини баша дүшмәјә вә фикрини нәзакәтлә өјрәнмәјә чалышаҹағыг. Инсанын гејри-иради олараг сөјләдији һансыса бир фикир, бу әразидәки инсанлары нараһат едән сәбәбләри баша дүшмәкдә вә сәмәрәли сурәтдә шаһидлик етмәкдә бизә көмәк едә биләр.
4 Тәгдимәнин һазырланмасы. Бу дәјишкән дүнјада тәблиғ етмәкдә бизә “Мүгәддәс Китаб әсасында сөһбәтә башламағын вә давам етмәјин үсулу” брошүрасы (рус.) көмәк едә биләр. Ҹәрәјан едән һадисәләрә истинад едән тәгдимәләрин јахшы вариантларыны 5, 6-ҹы сәһифәләрдә, “Ҹинајәт/тәһлүкәсизлик” вә “Ҹәрәјан едән һадисәләр” башлығы алтында тапмаг олар. Әлавә мә’луматы, “Бизим Падшаһлыг Хидмәтимиз”ин 2000-ҹи ил, сентјабр сајынын (рус.) 4-ҹү сәһифәсиндә тапмаг олар. Мүтләг, тәгдимәјә мүвафиг ҝәлән Мүгәддәс Китаб ајәси дахил един.
5 Бизим әразидә јашајан инсанлары нараһат едән сәбәбләри билдикдән сонра, хош хәбәрә даир тәгдимәмизи буна ујғунлашдырмалыјыг. Инсанларла, онларын үрәјинә јахын олан шејләр барәдә сөһбәт етмәклә, хүсусијјәтләриндә вә нормаларында дәјишиклик Олмајаны даһа јахындан танымагда чохларына көмәк едәрик (Јаг. 1:17).