Груп һалында хидмәт севинҹ ҝәтирир
1 Иса 70 шаҝирдини тәблиғ етмәјә ҝөндәрәркән, онлара нә демәк лазым олдуғуну өјрәтди вә ики-ики ајырараг хош хәбәри чатдыраҹаглары әразијә јоллады. Хидмәт шаҝирдләрә бөјүк севинҹ ҝәтирди (Лука 10:1-17). Буна бәнзәр тәрздә бу ҝүн дә груп һалында кечирилән хидмәт Аллаһын халгыны руһландырыр вә низамлы сурәтдә тәблиғ етмәјә өјрәдир.
2 Ағсаггалларын рәһбәрлији алтында. Тәблиғ ишиндә һамынын мүнтәзәм олараг иштирак етмәси үчүн ағсаггалларын көмәји чох ваҹибдир. Хидмәти нәзарәтчи һәфтәнин ара ҝүнләриндә тәблиғ хидмәти үчүн ҝөрүшләр тәшкил едир. Һәр бир китабөјрәнмә нәзарәтчиси өз групунун, хүсусән дә истираһәт ҝүнләри үчүн олан фәалијјәтинә рәһбәрлик едир. Әҝәр тәблиғ хидмәти үчүн кечирилән ҝөрүшдә бүтүн јығынҹаг иштирак едирсә (мәсәлән, “Ҝөзәтчи Гүлләси”нин өјрәнилмәсиндән сонра), һәр бир китабөјрәнмә нәзарәтчиси өз групунун хидмәти үчүн гајғы ҝөстәрмәлидир.
3 “Әдәблә вә низамла”. Тәблиғ хидмәти үчүн ҝөрүшү кечирән гардаш ҝөрүшү вахтында башламалы вә 10-15 дәгигә әрзиндә кечирмәлидир. О, тәблиғчиләри груплара вә әразиләрә ајырыр (әҝәр јухарыда дејилдији кими, буну китабөјрәнмәнин нәзарәтчиләри етмәјибсә) вә ҝөрүшү дуа илә баша чатдырыр. Бу ҹүр низам-интизам сајәсиндә тәблиғчиләрин әразидә топланмасына еһтијаҹ галмајаҹаг, бу да өз нөвбәсиндә хидмәтимизин дәјәрини азалтмајаҹаг. Һәм дә бу ҹүр мүнасибәт Павелин мәсләһәтинә мүвафигдир: “Гој һәр шеј әдәблә вә низамла едилсин” (1 Кор. 14:40). Тәблиғчиләр вахтында ҝәлмәклә, ҝөрүшү кечирән гардашын ҝөстәришләринә һазырлыгла риајәт етмәклә вә ҝөрүш баша чатан кими әразијә јола дүшмәклә һәмин ҝөрүшүн мүвәффәгијјәтлә кечирилмәсинә көмәк етмәлидирләр.
4 Груп һалында хидмәт јахынлашдырыр. Груп һалында хидмәт етмәк јығынҹағын үзвләри илә таныш олмағын ҝөзәл үсулудур. Хидмәт етмәк үчүн киминләсә габагҹадан данышмағымызда сәһв бир шеј олмаса да, бу ҝөрүшә габагҹадан киминләсә данышмадан ҝәлмәјимиз дә фајдалы оларды. Еһтимал ки, бизи, һәлә јахшы танымадығымыз кәслә тә’јин етсинләр, беләликлә дә биз мәһәббәтимиздә ‘ҝенишләнәрик’ (2 Кор. 6:11-13, И-93).
5 Груп һалында хидмәт бизи руһландырыр вә “һәгигәт уғрунда һәмкарлар” кими јахынлашдырыр (3 Јәһ. 8). Ҝәлин хидмәтин бу нөвүндә фәал сурәтдә иштирак едәк!