Јеһова илә сых мүнасибәти неҹә инкишаф етдирмәк олар?
1. Руһани фәалијјәтинә даир бир баҹы нәји дәрк етди?
1 “Сон 20 ил әрзиндә мән һәгигәтә садәҹә олараг сәтһи мүнасибәт ҝөстәрмишәм: садәҹә јығынҹаға ҝедир вә тәблиғ едирдим” — дејәрәк бир баҹы е’тираф едир. Лакин о давам едир: “Мән баша дүшдүм ки, мәсиһчи фәалијјәтиндә иштирак етмәк ваҹиб олса да, бу өз-өзлүјүндә чәтинликләрин өһдәсиндән ҝәлмәкдә мәнә көмәк етмәјәҹәк. [...] Јеһованы јахшы танымаг, Ону севмәк вә Онун Оғлунун бизим үчүн нә етдијини дәрк етмәк үчүн ҝөрүрәм ки, мән һәр шеји јенидән гурмалы вә мә’налы өјрәнмә планлашдырмалыјам”.
2. Јеһова илә сых мүнасибәтләри инкишаф етдирмәк нә үчүн ваҹибдир?
2 Јеһова илә сых мүнасибәтләрә малик олмаг үчүн сә’ј тәләб олунур. Бунун үчүн садәҹә олараг ади мәсиһчи фәалијјәтини давам етдирмәк кифајәт дејил. Бә’зән олур ки, достларымызла мүнасибәтләримиз сојујур вә биз артыг онлары јахын дост адландыра билмирик. Әҝәр биз Јеһова илә мүнтәзәм үнсијјәтдә олмуругса, онда да тәдриҹән һәмән шеј баш верә биләр (Вәһј 2:4). Ҝәлин ҝөрәк шәхси Мүгәддәс Китаб өјрәнмәси вә дуа Јеһова илә сых мүнасибәтләри инкишаф етдирмәкдә бизә неҹә көмәк едә биләр (Мәз. 25:14).
3. Нә етмәк лазымдыр ки, шәхси өјрәнмә Јеһоваја јахынлашмағымыза көмәк етсин?
3 Дуа етмәк вә дүшүнмәк ваҹибдир. Шәхси өјрәнмә заманы өјрәндикләримиз гәлбимизә тохунсун дејә өјрәнилән материалын әсас фикирләринин садәҹә алтындан хәтт чәкмәк вә ҝөстәрилән ајәләри нәзәрдән кечирмәк кифајәт дејил. Өјрәндикләримизин Јеһованын јоллары, Онун нормалары вә шәхсијјәти һаггында бизә нәләри ашкар етдији үзәриндә дүшүнмәк зәруридир (Чых. 33:13). Руһани мәсәләләри дәрк етмәјимиз емосијаларымыза тә’сир ҝөстәрир вә бизи һәјатымыз һаггында дүшүнмәјә тәшвиг едир (Мәз. 119:35, 111). Шәхси өјрәнмәнин мәгсәди Јеһоваја јахынлашмагдыр (Јаг. 4:8). Кејфијјәтли өјрәнмә үчүн вахт вә мүнасиб шәраит тәләб олунур. Мүнтәзәм өјрәнмәк үчүн интизамлы олмаг ҝәрәкдир (Дан. 6:10). Чох мәшғул олдуғунуза бахмајараг, Јеһованын фөвгәл’адә хүсусијјәтләри һаггында дүшүнмәк үчүн вахт ајырырсынызмы? (Мәз. 119:147, 148; 143:5).
4. Шәхси өјрәнмә заманы едилән дуа Јеһова илә сых мүнасибәтләри инкишаф етдирмәкдә бизә неҹә көмәк едир?
4 Сәмими дуа — кејфијјәтли шәхси өјрәнмәнин ваҹиб һиссәсидир. Мүгәддәс Китаб һәгигәтләринин үрәјимизә јол тапмасы вә “Аллаһа мәгбул еһтирам вә ихласкарлыгла Она” хидмәт етмәјә тәшвиг етмәси үчүн бизә Аллаһын мүгәддәс руһу лазымдыр (Ибр. 12:28). Буна ҝөрә һәр өјрәнмәдән өнҹә биз ҝәрәк Јеһовадан Онун мүгәддәс руһуну диләјәк (Мат. 5:3). Мүгәддәс Јазылар үзәриндә дүшүнәркән вә Аллаһын тәшкилатынын тәгдим етдији вәсаитләрдән истифадә едәркән биз үрәјимизи Јеһоваја ачмыш олуруг (Мәз. 62:8). Кејфијјәтли өјрәнмә Аллаһа етдијимиз хидмәтин бир һиссәсидир вә бунунла биз Јеһоваја сәдагәтимизи ифадә едир вә Она олан бағлылығымызы мөһкәмләндиририк (Јәһуда 20, 21).
5. Нәјә ҝөрә Аллаһын Кәламы үзәриндә һәр ҝүн дүшүнмәк ваҹибдир?
5 Инсанлар арасында олдуғу кими, Јеһова илә олан мүнасибәтләримизи даима мөһкәмләндирмәк лазымдыр ки, онлар һәјатымыз боју инкишаф етсин. Буна ҝөрә Аллаһа јахынлашмаг үчүн ҝәлин һәр ҝүн вахты сатын алаг вә о заман, Јеһова да бизә јахынлашаҹагдыр! (Мәз. 1:2, 3; Ефес. 5:15, 16).