“Һәр һәрәкәтиниздә мүгәддәс олун”

1. Нәјә ҝөрә һәр һәрәкәтимиздә мүгәддәслик әкс етдирмәк ваҹибдир?

¹ Мүгәддәс Аллаһ олан Јеһованын хидмәтчиләри олдуғумуз үчүн, биз һәр һәрәкәтимиздә мүгәддәс олмаға чалышырыг (1 Пет. 1:15, 16). Бу о демәкдир ки, биз һәјатымызын бүтүн саһәләриндә Јеһованын нормаларына риајәт етмәјә чалышырыг. Бу ил олаҹаг вилајәт конгреси һәр һәрәкәтимиздә мүгәддәс олдуғумузу ҝөстәрмәјә хүсуси имкан верәҹәкдир.

2. Меһманхананын ишчиләринә неҹә јахшы тәәссүрат бағышлаја биләрик?

² Меһманханаларда. Кечән ил конгрес нүмајәндәләринин јашадыглары меһманхананын саһиби демишдир: “Јеһованын Шаһидләринин биздә гонаг галмалары олдугҹа јахшыдыр! Каш һамы сизин кими оларды!” Нөвбәти хатырлатмалара риајәт етмәјимизлә јахшы адымызы мөһкәмләндирә биләрик: 1) лазым олдуғундан артыг отаг тутма вә нөмрәдә иҹазә верилдијиндән артыг адамын јашамасына јол вермә; 2) әҝәр сифариш етдијин јердән имтина етмәк лазым ҝәлирсә, буну етмәји ләнҝитмә; 3) биширмәк үчүн нәзәрдә тутулмајан отагда јемәк биширмә; 4) һәр ҝүн хидмәтчи персоналлара миннәтдарлығыны билдир; 5) меһманхананын ишчиләри илә сөһбәтиндә, хүсусилә дә меһманханаја чохлу гонаглар ҝириб-чыхан заман, руһун сәмәрәләрини тәзаһүр етдир (Галат. 5:22, 23).

3. Ушагларын өзләрини апармаг тәрзи башгаларына неҹә тәәссүрат бағышлаја биләр?

³ Биз јахшы рәфтарымызла да башгаларына шәһадәтлик едә биләрик. Кечән ил бир ҝәнҹ Шаһид меһманхананын ишчисиндән һансыса дәфтәрхана ләвазиматы истәмиш, сонра исә гадына тәшәккүрүнү билдирмишдир. Һәмин гадын гејд едир: “Бәли, инди белә тәрбијәли ҝәнҹә раст ҝәлмәк гејри-мүмкүндүр”. Буна бахмајараг, бә’зи һалларда мүшаһидә едилмишдир ки, нәзарәтсиз галан ушаглар лифтлә ојнајыр, сәс салыр вә дәһлиздә гачышырлар. Валидејнләр ушагларыны тәкбашына бурахмамалыдырлар. Онлара һәмишә нәзарәт етмәлидирләр. Јалныз о заман әмин олмаг олар ки, онлар һәрәкәтләри илә Јеһоваја иззәт ҝәтирирләр (Сүл. мәс. 29:15).

4. Ресторан вә ја кафедә олан заман башгаларына гаршы неҹә нәзакәтли ола биләрик?

⁴ Ресторан вә кафеләрдә. Кечән ил кечирилән вилајәт конгресинин јахынлығындакы ресторанын офисианты дејир: “Шаһидләр һамы кими дејилләр. Онлар башгаларына һөрмәт едирләр”. Һәмчинин башга мүштәриләрә мане олаҹаг тәрздә уҹадан данышмагдан вә ҝүлмәкдән дә гачынмаг ваҹибдир. Јејиб-ичдијимиз заман да биз һәр шеји Аллаһа иззәт ҝәтирмәк үчүн етмәк истәјирик (1 Кор. 10:31).

5. Конгресдә өзүнү нүмунәви апармаг нә демәкдир?

⁵ Конгресдә. Биз конгресдә өзүмүзү хүсусилә нүмунәви апармалыјыг. Хаһиш едирик, неҹә ки, дајанаҹагда, еләҹә дә залда хидмәтчиләрин ҝөстәришләринә риајәт един (Ибр. 13:17). Аиләләр бир јердә отурмалыдырлар, ушагларын, о ҹүмләдән јенијетмәләрин башга ҝәнҹләрлә бир јердә отурмаларына иҹазә вермәк лазым дејил. Конгресин електрик вә ја сәс системинә һеч бир сәсјазма гурғусуну гошмаг олмаз, јери ҝәлмишкән, бу ҹүр шејләрдән елә истифадә ет ки, башгаларына мане олмајасан. Әҝәр програм вахты шәкил чәкмәк истәјирсәнсә, онда фотоапаратын ишығындан истифадә етмә. Пејҹер вә ҹиб телефонларыны елә режимә кечирмәк лазымдыр ки, башгаларынын диггәтини јајындырмасын. Конгресин кечирилдији бинада нә исә баш версә, хидмәтчијә вә ја Илк јардыма хәбәр вер. Бу шө’бәнин көнүллү ишчиләри ихтисаслашдырылмыш тибби јардым ҝөстәрә биләрләр.

6. Конгрес заманы бизим давранышымыз Аллаһа неҹә иззәт ҝәтирир?

⁶ Давранышымыз бизи бу дүнјадакы инсанлардан фәргләндирир вә Аллаһымыза иззәт ҝәтирир (1 Пет. 2:12). Конгрес заманы Јеһованын Шаһидләри һамынын диггәт мәркәзиндә олаҹаг. Буна ҝөрә дә, ҝәлин һәр һәрәкәтимиздә мүгәддәс олмаға гәти гәрарлы олаг.

[5 сәһифәдәки чәрчивә]

Нүмунәви давраныш

◼ Меһманхананын бүтүн гајдаларына риајәт ет

◼ Ушагларына һәмишә нәзарәт ет

◼ Башгалары илә нәзакәтлә давран