Үчҝүнлүк руһани зијафәтин ҝәтирдији тәравәт
1. Буилки вилајәт конгресиндән һансы фајданы әлдә едәҹәјик?
1 Руһани ҹәһәтдән гурумуш торпагларда — Шејтанын дүнјасында Јеһова Өз хидмәтчиләрини тәравәтләндирмәјә давам едир (Јешаја 58:11). Јеһованын бизи мөһкәмләндирмәк үчүн истифадә етдији тәдбирләрдән бири һәр ил кечирилән вилајәт конгресидир. Буилки конгрес јахынлашдығындан биз руһән тәравәтләнмәјә вә башгаларыны руһландырмаға неҹә һазырлаша биләрик? (Сүл. мәс. 21:5).
2. Конгреслә бағлы һансы һазырлыглары ҝөрмәк лазымдыр?
2 Әҝәр буну һәлә етмәмисәнсә, конгресин һәр үч ҝүнүндә иштирак етмәк үчүн индидән ишләрини гајдасына сал. Конгресин кечирилдији јерә ҝедиб чатмаг вә програм башламамышдан габаг өзүнә јер тапмаг үчүн нә гәдәр вахт лазым ҝәлдијини ҝөтүр-гој етмисәнми? Јеһованын бизим үчүн һазырладығы гүввәтләндириҹи руһани зијафәтдән, ҹүзи дә олса, һеч нәји гачырмаг истәмәздик! (Јешаја 65:13, 14). Һарада галаҹағыны вә нә илә ҝедәҹәјини дәгигләшдирмисәнми?
3. Сән вә аилән програмдан нәјин сајәсиндә там фајда әлдә едә биләр?
3 Програм заманы фикрини топламаға нә көмәк едә биләр? Имкан дахилиндә, һәр ҝүн конгресдән сонра ахшамлар динҹәлмәјә кифајәт гәдәр вахт ајыр. Конгресдә ҝөзләрини чыхыш едән мәрузәчидән ајырма. Бүтүн ајәләри Мүгәддәс Китабындан излә. Гыса гејдләр апар. Јахшы оларды ки, аиләләр бир јердә отурсунлар, бу заман валидејнләр ушагларына диггәтләрини ҹәмләмәкдә көмәк едә биләрләр (Сүл. мәс. 29:15). Һәр ахшам аиләликҹә програмын әсас фикирләрини мүзакирә едә биләрсиниз. Аиләниз һәтта конгресдән сонра да програмдан фајдалана биләр, мәсәлән, аиләви ибадәт ахшамларында аиләнизин тәтбиг едә биләҹәји мүәјјән фикирләри мүзакирә етмәк үчүн вахт ајырмаг олар.
4. Јығынҹағымызда башгаларынын да руһән тәравәтләнмәсинә неҹә көмәк едә биләрик?
4 Башгаларына руһән тәравәтләнмәјә көмәк ет. Биз башгаларынын да руһән тәравәтләнмәсини истәјирик. Конгресә ҝетмәк үчүн көмәјә еһтијаҹы олан јашлы вә ја башга тәблиғчиләр вармы? Сән онлара көмәк едә биләрсәнми? (1 Јәһ. 3:17, 18). Ағсаггаллар, хүсусилә дә груп нәзарәтчиләри беләләринә көмәк ҝөстәрилдијинә әмин олмалыдырлар.
5. Конгрес заманы әдәб-әркан гајдаларына неҹә риајәт едә биләрик?
5 Әдәб-әрканлы давраныш тәравәт ҝәтирир. Бизим ҝүнләрдә инсанлар «худбин» олдуғундан вә башгаларынын һиссләринә биҝанә јанашдығындан јахшы хүсусијјәтләр тәзаһүр етдирән мәсиһчиләр арасында олмаг неҹә дә хошдур! (2 Тим. 3:2). Конгрес залы сәһәр саат 8:00-да ачылыр; дахил оларкән сакитлијә вә низам-интизама риајәт етмәклә, јалныз бир јердә галдығымыз вә ја бир машында ҝәлдијимиз, јахуд да Мүгәддәс Китабы өјрәтдијимиз инсанлара отурмаг үчүн јер тутмагла әдәб-әркан гајдаларына риајәт етдијимизи ҝөстәририк. Програмын сәдри һәр һиссәнин әввәлиндә сәсләндирилән мусигинин башландығыны елан едиб јерләримизи тутмағы хаһиши едәндә онун ҝөстәришләринә әмәл етмәлијик. Програм заманы башгаларыны јајындырмамаг үчүн мобил телефонларымызы вә башга ҹиһазларымызы мүвафиг режимә кечирмәклә, һәмчинин данышмамагла, СМС-ләшмәмәклә, јемәк јемәмәклә вә јахуд бош-бошуна ҝәзмәмәклә әдәб-әрканлы олдуғумузу ҝөстәрә биләрик.
6. Гардашларымызла үнсијјәт гаршылыглы руһланмаға неҹә көмәк едир?
6 Руһландырыҹы үнсијјәт. Конгресләр сајәсиндә биз тәравәтләндириҹи мәсиһчи бирлијиндән вә гардашлығындан әсил севинҹ дујуруг (Мәз. 133:1—3). Ҝәлин үрәјимизи ҝенишләндирәрәк башга јығынҹаглардан олан баҹы-гардашларымызы саламлајаг (2 Кор. 6:13). Һәр ҝүн ән азы бир нәфәрлә вә ја бир аилә илә таныш олмағы гаршына мәгсәд гоја биләрсән. Наһар фасиләси бунун үчүн ҝөзәл имкан јарадыр. Мағазадан јемәк алмаға ҝетмәк вә ја кафедә отуруб јемәк әвәзинә, әввәлҹәдән өзүнлә јүнҝүлвары јемәк ҝәтир ки, башгалары илә үнсијјәт етмәк үчүн кифајәт гәдәр вахтын олсун. Бунунла сән өзүнә јени вә јахшы достлар тапа биләҹәксән.
7. Нәјә ҝөрә конгресдә көнүллү кими хидмәт етмәлијик вә буну неҹә едә биләрик?
7 Һәмиманлыларла чијин-чијинә бу севиндириҹи ишдә иштирак етмәк неҹә дә хошдур! Сән мүхтәлиф шөбәләрдә өз көмәјини тәклиф едә вә ја јығынҹағынла бирликдә тәмизлик ишиндә иштирак едә биләрсәнми? (Мәз. 110:3). Әҝәр һәлә һеч бир ишин јохдурса, зәһмәт олмаса, конгресдә Көнүллүләрин хидмәти шөбәсинә јахынлаш. Адам нә гәдәр чох олса, иш бир о гәдәр мәмнунедиҹи вә асан олар — неҹә дејәрләр, ҝүҹ бирликдәдир.
8. Конгрес заманы давранышымыза вә хариҹи ҝөрүнүшүмүзә нәјә ҝөрә хүсуси диггәт јетирмәлијик?
8 Давраныш тәрзимиз башгаларына тәравәт ҝәтирир. Биз тәкҹә програм заманы дејил, програмдан сонра да үч ҝүн әрзиндә конгресин нүмајәндәси һесаб олунуруг. Конгрес кечирилән шәһәрдә олдуғумуздан мүшаһидә едәнләр бизимлә Јеһованын Шаһиди олмајанлар арасында фәрги ајдын ҝөрмәлидирләр (1 Пет. 2:12). Конгресдә, галдығымыз јердә вә кафедә ҝејимимиз вә хариҹи ҝөрүнүшүмүз Јеһоваја иззәт ҝәтирмәлидир (1 Тим. 2:9, 10). Әҝәр плакетләримизи дөшүмүзә тахсаг, әтрафдакылар бизим Јеһованын Шаһиди олдуғумузу ҝөрәҹәкләр. Бунун сајәсиндә конгресимизин кечдији барәдә демәк вә әлавә шаһидлик вермәк имканымыз јаранаҹаг.
9. Мәсиһчи давранышымызын јахшы шаһидлик вердијини һансы һадисәдән ҝөрмәк олар?
9 Конгрес заманы јахшы давранышларымыз башгаларына неҹә тәсир бағышлаја биләр? Гәзетдә олан бир мәгаләјә әсасән, бир меһманхана саһиби бу сөзләри демишди: «Онлар чох нәзакәтли инсанлардыр. Биз һәр ил онлары ҝөзләјирик». Кечән ил конгрес нүмајәндәләри меһманханада галаркән Јеһованын Шаһиди олмајан бир нәфәр пул кисәсини итирмишди. Пул кисәсинин һәр шеј ичиндә гајтарылдығыны ҝөрән меһманхана саһиби һәмин адама деди: «Јахшы ки, јахынлыгда Јеһованын Шаһидләринин конгреси кечирилирди вә меһманханада, демәк олар ки, онлардан башга һеч ким јох иди. Јохса пул кисәнизи сизә гајтаран олмазды».
10. Конгрес јахынлашдығындан гаршымыза һансы мәгсәди гојмалыјыг вә нәјә ҝөрә?
10 Буилки конгрес сүрәтлә јахынлашыр. Програмын һазырланмасы вә конгресдә руһландырыҹы аб-һаванын һөкм сүрмәси үчүн чохлу вахт вә ҝүҹ сәрф олунуб. Гаршына мәгсәд гој ки, конгресин һәр үч ҝүнүндә дә иштирак едәсән, Јеһованын вә Онун тәшкилатынын сәнин үчүн ҝөрдүјү тәдбирә һазыр оласан, нәзакәтли олмагла, хош үнсијјәтлә вә јахшы давранышла башгаларыны тәравәтләндирәсән. О заман сән дә дахил олмагла, һамы кечәнилки конгресдә олан бир нәфәрин сөзләринә шәрик олаҹаг. О демишди: «Мән өмрүмдә белә үрәкачан һадисә ҝөрмәмишдим!»
[6-ҹы сәһифәдәки јазы]
Конгресдә, галдығымыз јердә вә кафедә ҝејимимиз вә хариҹи ҝөрүнүшүмүз Јеһоваја иззәт ҝәтирмәлидир
[7-ҹи сәһифәдәки јазы]
Гаршына мәгсәд гој ки, нәзакәтли олмагла, хош үнсијјәтлә вә јахшы давранышла башгаларыны тәравәтләндирәсән
[4-7-ҹи сәһифәләрдәки чәрчивә]
2011-ҹи илин вилајәт конгреси илә бағлы хатырлатмалар
◼ Конгресин ҹәдвәли. Програм һәр ҝүн саат 9:20-дә башланаҹаг. Гапылар саат 8:00-дан ачыг олаҹаг. Падшаһлыг мелодијалары сәсләнмәјә башлајанда һәр биримиз јерләримизи тутмалыјыг ки, програм лајигли тәрздә башлансын. Програм ҹүмә вә шәнбә ҝүнү 16:55-дә, базар ҝүнү исә саат 15:40-да гуртараҹаг.
◼ Машын дајанаҹағы. Зәһмәт олмаса, инсанлары дүшүртмәк үчүн нәглијјат васитәләрини дүз конгрес залынын ҝиришиндә сахламајын. Истисна анҹаг јашлы вә әлил сәрнишинләр үчүндүр. Мүхтәлиф јерләрдә шәраит фәргли ола биләр, буна ҝөрә дә бүтүн сүрүҹүләрдән хидмәтчиләрин ҝөстәришләринә әмәл етмәләри тәләб олунур.
◼ Јерләр. Әлавә јерләри анҹаг бир машында ҝәлдијиниз вә ја ејни мәнзилдә галдығыныз, јахуд да Мүгәддәс Китабы өјрәтдијиниз адамлар үчүн тутмаг олар (1 Кор. 13:5).
◼ Наһар. Фасилә заманы наһар етмәк үчүн башга јерә ҝетмәк әвәзинә, хаһиш олунур ки, өзүнүзлә јемәк ҝәтирәсиниз. Лазым ҝәлсә, өз отураҹағынызын алтына гоја биләҹәјиниз кичик сојудуҹу чанта ҝәтирмәк олар. Конгресә бөјүк аиләви чанталар, шүшә габлар вә спиртли ичкиләр ҝәтирмәк олмаз.
◼ Көнүллү ианәләр. Вилајәт конгресләринин тәшкилинә мүәјјән гәдәр вәсаит сәрф едилир. Буна ҝөрә миннәтдарлығымызы конгресдә үмумдүнја ишинә көнүллү ианә етмәклә ҝөстәрә биләрик.
◼ Бәдбәхт вә ҝөзләнилмәз һадисәләр. Әҝәр конгресин кечирилдији јердә тәҹили јардыма еһтијаҹ дујуларса, јахында олан хидмәтчи илә әлагә сахла. О, дәрһал илк јардым шөбәсинә мәлумат верәҹәк. Конгресин кечирилдији јердә олан ихтисаслы тибби һејәт јаранан вәзијјәтин нә дәрәҹәдә ҹидди олдуғуну мүәјјәнләшдирәҹәк вә јардым ҝөстәрәҹәк. Лазым ҝәлсә, тәҹили јардым чағырылаҹаг.
◼ Дәрманлар. Әҝәр сиз давамлы шәкилдә дәрман гәбул едирсинизсә, зәһмәт олмаса, онлары өзүнүзлә ҝөтүрмәји унутмајын, чүнки конгресдә дәрманлар верилмир.
◼ Ајаггабы. Һәр ил ајаггабыја ҝөрә чохлу сајда адам зәдә алыр. Пилләкәнләрдә, торлу дәмир дөшәмәләрдә вә башга јерләрдә раһат јеримәјә көмәк едән садә ајаггабы ҝејмәк јахшы оларды.
◼ Ушаг вә әлил арабасы. Конгресин кечирилдији јерә ушаг вә әлил арабасы ҝәтирмәк олмаз. Анҹаг валидејнин отурдуғу јерин јанындакы јерә ушаг отураҹағыны јерләшдирмәк олар.
◼ Әтирләр. Тәнәффүс јоллары вә бу кими хәстәликләрдән әзијјәт чәкән баҹы-гардашлары нәзәрә алараг кәскин гохусу олан әтир вә одеколонларын истифадәсини мәһдудлашдырмаг бизим тәрәфимиздән хејирхаһлыг оларды (1 Кор. 10:24).
◼ «Бу адама баш чәк» бланкы. Конгрес заманы гејри-рәсми шаһидлик верәркән мараг ҝөстәрән һәр бир адам һаггында мәлумат вермәк үчүн «Зәһмәт олмаса, бу адама баш чәк» (S-43) бланкындан истифадә ет. Тәблиғчиләр һәмин бланкдан бир-ики әдәд өзләри илә конгресә ҝәтирә биләрләр. Бланклары әдәбијјат шөбәсиндән дә ҝөтүрмәк олар. Долдурулмуш бланклары ја бу шөбәјә, ја да конгресдән гајыдандан сонра јығынҹағын катибинә вермәк олар. («Бизим Падшаһлыг Хидмәтимиз» вәрәгәсинин 2009-ҹу ил апрел сајынын 6-ҹы сәһифәсинә бахын.)
◼ Јерләшдирилмә. Шәхси мәнзилдә галмағы сифариш етдикдә нөвбәти мәгамлары нәзәрә алмаг лазымдыр:
1) бүтүн һалларда мәнзил сифариши үчүн «Хүсуси тәләбатлы шәхсләр үчүн мәнзил сорғусу» (CO-5) бланкындан истифадә един («Заявка на размещение лиц с особыми потребностями»);
2) мәнзил шөбәсиндән јерләшдирилмә барәдә алынан «Мәнзил» (CO-4) бланкы башга тәблиғчиләрә верилмәмәлидир;
3) хаһиш олунур јадда сахлајын ки, галмаг үчүн евләр анҹаг конгрес мүддәтинә тәгдим олунур;
4) ушагларыныза нәзарәт един вә онлары һеч вахт тәк бурахмајын;
5) һәмиманлыларымызын гонагпәрвәрлијиндән истифадә едәркән миннәтдар олмағы унутмајын;
6) әҝәр мәнзилинизи тәгдим етмәкдән имтина етмәк мәҹбуријјәтиндәсинизсә, ләнҝимәдән бу һагда мәнзил шөбәсинә мәлумат вермәји унутмајын.
◼ Көнүллүләрин хидмәти. Конгресдә лазым олан ишдә көнүллү олараг көмәк етсәк, орада иштирак етмәјимиздән әлдә етдијимиз севинҹ бирә-беш артаҹаг (Һәв. иш. 20:35). Бу ишдә көмәк етмәк истәјән һәр кәс конгресин Көнүллүләрин хидмәти шөбәсинә мүраҹиәт етмәлидир. 16 јашындан ашағы олан ушаглар да валидејнләринин, јахуд онлара ҹавабдеһ олан башга бөјүкләрин нәзарәти алтында ишләјәрәк өз төһфәләрини верә биләрләр.