‘Фәалијјәт үчүн ҝениш гапыданʼ ҝирә биләрсәнми?
1. Өнүмүздә фәалијјәт үчүн һансы ҝениш гапы ачылыб?
1 Һәвари Павелин гаршысында «фәалијјәт үчүн ҝениш гапы» ачыланда, бир чох әлејһдарларын олмасына бахмајараг, о, хош хәбәри тәблиғ етмәк фүрсәтиндән бөјүк мәмнунијјәтлә истифадә етмишдир (1 Кор. 16:9). Бу ҝүн дә тәхминән 642 000 тәблиғчи, даими пионер кими хидмәт едәрәк фәалијјәт үчүн ачылмыш ҝениш гапыдан ҝирмишдир.
2. Нә үчүн вахташыры өз шәраитимизи јохламалыјыг?
2 Шәраитләр дәјишир. Индики вәзијјәтимиз фәалијјәтимизи мәһдудлашдырса да, шәраитләр дәјишә биләр. Буна ҝөрә дә вахташыры өз шәраитимизи јохламаг вә шәраитләримизин нә вахтса идеал олаҹағыны ҝөзләмәмәк мүдрик давранышдыр (Ваиз 11:4). Сән мәктәби битирмәк үзрәсән? Бәлкә өвладларын тезликлә мәктәбә ҝедәҹәк? Бәлкә бу јахынларда тәгаүдә чыхаҹагсан? Бу кими дәјишикликләр сәнин даими пионер кими хидмәт етмәјинә јол ачаҹаг. Әввәлләр сәһһәти илә проблеми олан бир баҹымыз 89 јашында пионер хидмәтинә башламағы гәрара алмышдыр. Нә үчүн? Чүнки баҹынын сәһһәти јахшылашмыш вә бир илдән артыгдыр ки хәстәханада јатмамышдыр; о һисс едирди ки, пионер кими хидмәт едә биләр.
3. Даими пионер кими хидмәт етмәк үчүн бә’зи мәсиһчиләр һансы дәјишикликләри етмишләр?
3 Бир дәфә Павел Коринфдәки гардашларына баш чәкмәји планлашдырмышды. Лакин хош хәбәр наминә өз планыны дәјишди. Бу ҝүн бир чох мәсиһчиләр даими пионер кими хидмәт етмәк үчүн һәјатларында мүәјјән дәјишикликләр етмишләр. Бә’зиләри өзләрини тә’мин етмәк үчүн јарымҝүнлүк ишә дүзәләрәк, һәјатларыны садәләшдирмишләр. Онлар хидмәтләриндән мәмнунлуг дујурлар (1 Тим. 6:6-8). Бә’зи әр-арвадлар елә дәјишикликләр етмишләр ки, јалныз әр ишләјир, арвад исә пионер кими хидмәт едир.
4. Тәләб олунан сааты јеринә јетирә биләҹәјимизә әмин дејиликсә, нә едә биләрик?
4 Тәләб олунан сааты јеринә јетирә билмәјәҹәјиндән горхараг, пионер олмаг фикрини тез-тәләсик инкар етмә. Ҝүн әрзиндә ики саатдан бир гәдәр артыг вахт лазымдыр. Әҝәр буну едәҹәјинә әмин дејилсәнсә, онда бир-ики ај көмәкчи пионер кими хидмәт етмәјә сә’ј ҝөстәр, амма ајда 70 саат хидмәт етмәји гаршына мәгсәд гој. Бунун сајәсиндә, пионер хидмәтинин ҝәтирдији севинҹи дада биләҹәксән (Мәз. 34:8). Һазырда пионер оланларла сөһбәт ет. Ола билсин, онлар артыг сәнин гаршылашдығын чәтинликләрин өһдәсиндән ҝәлмишләр (Сүл. мәс. 15:22). Јеһовадан хаһиш ет ки, хидмәтини ҝенишләндирмәк ҹәһдинә хејир-дуа версин (1 Јәһ. 5:14).
5. Нәјә ҝөрә даими пионер хидмәти дәјәрли мәгсәддир?
5 Дәјәрли мәгсәд. Даими пионер хидмәти бир чох хејир-дуалар ҝәтирир. Бу, даһа чох вермәкдән һасил олан бөјүк бәхтијарлыг һиссидир (Һәв. иш. 20:35). Пионер хидмәти сәнин Мүгәддәс Китаб һәгигәтини доғрулугла өјрәтмәк габилијјәтини тәкмилләшдирәҹәк (2 Тим. 2:15). Сән Јеһованын көмәк әлини тез-тез һисс едәҹәксән (Һәв. иш. 11:21; Филип. 4:11-13). Пионер хидмәти руһани хүсусијјәтләри, о ҹүмләдән дөзүмлүлүк хүсусијјәтини јетишдирмәјә вә Јеһоваја јахынлашмаға көмәк едир (Јаг. 4:8). Сән фәалијјәт үчүн ачылмыш бу ҝениш гапыдан ҝирә вә даими пионер ола биләрсәнми?