«Мүгәддәс Китаб өјрәдир» нәшри васитәсилә өјрәнмәјә башламағын үсуллары
Бизләрдән чоху бөјүк мәмнунијјәтлә Мүгәддәс Китаб өјрәнмәсини кечирәрди, амма чох вахт өјрәнмәјә башламаг чәтин олур. «Мүгәддәс Китаб әслиндә нә өјрәдир?» китабы бизә көмәк едә биләр. 3-дән 7-јә кими олан сәһифәләр бу нәшрдән истифадә едәрәк инсаны Мүгәддәс Китаб һаггында сөһбәтә ҹәлб етмәк үчүн тәртиб олунуб. Хидмәтдә тәҹрүбәси аз оланлар үчүн дә өјрәнмәјә башламаг асан олаҹаг.
◼ 3-ҹү сәһифәдән истифадә едәрәк сөһбәтә белә башламаг олар:
Әразиниздәки инсанлары нараһат едән проблеми, јахуд хәбәрләрдән ешитдијин бир һадисәни хатырлатдыгдан сонра инсанын диггәтини 3-ҹү сәһифәдә галын шрифтлә чап олунмуш суаллара јөнәлт вә фикрини соруш. Сонра 4, 5-ҹи сәһифәләри ач.
◼ Јахуд диггәти 4, 5-ҹи сәһифәләрә јөнәлдәрәк сөһбәтә башламаг олар:
Дејә биләрсән: «Шәкилдә тәсвир олунан дәјишикликләр һәгигәт олсајды, неҹә дә ҝөзәл оларды, елә дејилми?» Јахуд соруша биләрсән: «Бу вәдләрдән һансынын јеринә јетмәсини өз ҝөзләринизлә ҝөрмәк истәјәрдиниз?» Ҹаваба диггәтлә гулаг ас.
Әҝәр инсан һансыса ајәјә хүсусилә мараг ҝөстәрсә, китабдан һәмин ајәни изаһ едән абзаслары арашдырараг Мүгәддәс Китабын бу мөвзуја даир нә өјрәтдијини ҝөстәр. (Әлавә вәрәгәнин бу сәһифәсиндәки чәрчивәјә бах.) Өјрәнмәдә неҹә едирсәнсә, материалы елә арашдыр. Буну илк ҝәлишдә беш-он дәгигә әрзиндә гапынын ағзында етмәк олар.
◼ Диҝәр үсул 6-ҹы сәһифәдән истифадә едәрәк инсаны сөһбәтә ҹәлб етмәкдир:
Һәмсөһбәтинин диггәтини сәһифәнин ашағысындакы суаллара јөнәлдәрәк соруш: «Бу суаллардан һансыса сизи һеч нараһат едибми?» Әҝәр суаллардан һансы иләсә марагланса, диггәти суала ҹаваб верән абзаслара јөнәлт. (Әлавә вәрәгәнин бу сәһифәсиндәки чәрчивәјә бах.) Материалы бирҝә арашдыранда Мүгәддәс Китаб өјрәнмәси кечирмиш олурсан.
◼ Мүгәддәс Китаб өјрәнмәсинин неҹә кечирилдијини ҝөстәрмәк үчүн 7-ҹи сәһифәдән истифадә едәрәк сөһбәтә башламаг олар:
Сәһифәдәки илк үч ҹүмләни оху, сонра 3-ҹү фәсли ачараг 1-дән 3-ә кими абзасларын көмәјилә өјрәнмәнин неҹә кечирилдијини ҝөстәр. 3-ҹү абзасдакы суаллары арашдырмаг мәгсәдилә тәкрар башчәкмә үчүн тәмәл гој.
◼ Тәкрар башчәкмә үчүн неҹә тәмәл гојмаг олар?
Илк мүзакирәни јекунлашдыраркән сөһбәти давам етдирмәк үчүн вахт тәјин ет. Садәҹә демәк олар: «Бир нечә дәгигә әрзиндә биз Мүгәддәс Китабын мүһүм мәсәләјә даир нә өјрәтдијини арашдырдыг. Ҝәлән дәфә өјрәнә биләрик ки,.. [мүзакирә едәҹәјин суалы гејд ет.]». Олар, ҝәлән һәфтә елә бу вахт сизин јаныныза ҝәлим?
Јеһованын тәјин етдији вахт јахынлашдыгҹа, тапшырдығы иши иҹра етмәк үчүн О, бизи лазым олан һәр шејлә тәмин едир (Мат. 28:19, 20; 2 Тим. 3:17). Ҝәлин бу ҝөзәл вәсаитдән дүзҝүн истифадә едәрәк Мүгәддәс Китаб өјрәнмәләринә башлајаг.
[4-ҹү сәһифәдәки чәрчивә]
4, 5-ҹи сәһифәләрдәки ајәләрин мүзакирәси
◻ Вәһј 21:4 (сәһ. 27, 28, абз. 1-3)
◻ Јешаја 33:24; 35:5, 6 (сәһ. 36, абз. 22)
◻ Јәһја 5:28, 29 (сәһ. 72, 73, абз. 17-19)
◻ Мәзмур 72:16 (сәһ. 34, абз. 19)
6-ҹы сәһифәдәки суалларын ҹаваблары
◻ Биз нә үчүн изтираб чәкирик? (сәһ. 108, 109, абз. 6-8)
◻ Һәјатын гајғыларынын өһдәсиндән неҹә ҝәлмәк олар? (сәһ. 184, 185, абз. 1-3)
◻ Аиләдә хошбәхтлијә неҹә наил ола биләрик? (сәһ. 142, 143 абз. 20)
◻ Инсан өләндә нә баш верир? (сәһ. 58, 59, абз. 5, 6)
◻ Өлән әзизләримизлә нә вахтса ҝөрүшә биләрикми? (сәһ. 72, 73, абз. 17-19)
◻ Аллаһын бүтүн вәдләрини јеринә јетирәҹәјинә неҹә әмин ола биләрик? (сәһ. 25, абз. 17)