‘Мүждәјә шәһадәт един’
1. Бизим бәјан етмәли олдуғумуз мүждәјә нә дахилдир?
1 Бу ҝүн јахшы хәбәрләри надир һалларда ешитмәк олар. Белә бир зәманәдә бизә ‘Аллаһын лүтфү һаггындакы Мүждәјә шәһадәт етмәк’ һәвалә едилиб (Һәв. иш. 20:24). Бу мүждәјә нә дахилдир? ‘Ахыр ҝүнләри’ тезликлә Јеһованын јени салеһ дүнјасы әвәз едәҹәк вә ‘әввәлки шејләр кечиб ҝедәҹәк’ (2 Тим. 3:1-5; Вәһј 21:4). О заман артыг хәстәликләр дә олмајаҹаг (Јешаја 33:24). Өләнләр дирилиб өз әзизләринә, достларына говушаҹаглар (Јәһ. 5:28, 29). Бүтүн јер үзү ҝөзәл Ҹәннәтә чевриләҹәк (Јешаја 65:21-23). Бәли, биз бунлары вә бир чох башга шејләри бәјан етмәлијик!
2. Нәјә ҝөрә Хатирә Ҝеҹәси дөврү мүждәјә шәһадәт етмәк үчүн чох ҝөзәл имкандыр?
2 Март, апрел вә мај ајлары бу ҝөзәл мүждәни бәјан етмәк үчүн әла имкан верәҹәк. Бу ајларда дүнјанын бир чох јерләриндә һавалар јахшы кечдији вә ҝүнләр узандығы үчүн даһа чох хидмәт етмәк имканымыз олаҹаг. Үстәлик, илин ән мүһүм һадисәси олан Хатирә Ҝеҹәси бүтүн дүнјада шәнбә ҝүнү мартын 22-дә, ҝүн батандан сонра гејд едиләҹәк. Инди даһа чох хидмәт етмәјә һазырлашмағын әсл вахтыдыр.
3. Бүтүн аилән хидмәтдә даһа фәал неҹә ола биләр?
3 Көмәкчи пионер хидмәти. Ҹәдвәлиндә дәјишикликләр едәрәк бир, ики, јахуд бүтүн үч ај әрзиндә көмәкчи пионер кими хидмәт едә биләрдинми? Нәјә ҝөрә бу мәсәләни нөвбәти аиләви өјрәнмәдә мүзакирә етмәјәсиниз? Јахшы әмәкдашлығын сајәсиндә аиләнин бир, јахуд бир нечә үзвү көмәкчи пионер кими хидмәт едә биләр (Сүл. мәс. 15:22). Бу һагда Јеһоваја дуа ет вә әмин ол ки, О сәнин сәјинә хејир-дуа верәҹәк (Сүл. мәс. 16:3). Әҝәр аиләндән һеч ким көмәкчи пионер кими хидмәт едә билмәјәҹәксә, бүтүн аилә хидмәтдә даһа фәал олмаг үчүн гаршысына конкрет мәгсәдләр гоја вә пионерләрлә әмәкдашлыг едә биләр.
4. Там иш ҝүнү ишләјириксә, көмәкчи пионер кими хидмәт етмәк үчүн ҹәдвәлимиздә һансы дәјишикликләри едә биләрик?
4 Там иш ҝүнү ишләјирсәнсә, јахшы ҹәдвәлин сајәсиндә көмәкчи пионер кими хидмәт едә биләрсән. Ола билсин, наһар фасиләсинин бир һиссәсини хидмәтә сәрф едәсән. Јахуд евинин вә ја иш јеринин јахынлығында саһә ҝөтүрүб ишдән әввәл, јахуд сонра бир саат тәблиғ етмәк олар. Ҹәдвәлиндә хидмәтә даһа чох вахт ајырмаг үчүн бир о гәдәр дә ваҹиб олмајан ишләри нөвбәти аја кечирмәк, һәмчинин шәнбә вә базар ҝүнләриндә бүтүн ҝүн хидмәт етмәк олар. Бәзиләри хидмәтдә иштирак етмәк үчүн бир-ики ҝүнлүк мәзунијјәтә чыхмышлар.
5. Јаша долмуш, јахуд сәһһәти зәиф олан көмәкчи пионерләрә неҹә көмәк едә биләрсән?
5 Ола билсин, јашын чохдур, сәһһәтин зәифдир, јахуд тез тагәтдән дүшүрсән. Онда көмәкчи пионер олмаг үчүн һәр ҝүн аз-аз хидмәт едә биләрсән. Дуаларында Јеһовадан «үстүн гүдрәт» истә (2 Кор. 4:7). Бир баҹы һәтта 106 јашында көмәкчи пионер кими хидмәт етмишдир! О, иманда олан гоһумларынын вә диҝәр баҹы-гардашларын көмәјилә евдән-евә тәблиғ едир, тәкрар башчәкмәләр едир, Мүгәддәс Китаб өјрәнмәләринә ҝедир вә хидмәтин диҝәр саһәләриндә иштирак едирди. Онун көмәјилә он нәфәр Мүгәддәс Китабы өјрәнмәјә башламышды. О демишди: «Көмәкчи пионер кими хидмәт етмәк имканым барәдә фикирләшәндә мәним үрәјим Јеһоваја, Онун Оғлу вә севҝи долу тәшкилатына мәһәббәтдән вә миннәтдарлыгдан ҹошуб-дашыр. Мән бүтүн үрәкдән “Јеһова, чох сағ ол!” демәк истәјирәм».
6. Вәфтиз олунмуш мәктәблиләр көмәкчи пионер кими неҹә хидмәт едә биләрләр?
6 Әҝәр мәктәбдә охујан вәфтиз олунмуш ҝәнҹ мәсиһчисәнсә, сән дә көмәкчи пионер ола биләрсән. Там иш ҝүнү ишләјәнләр кими, ола билсин, сәнин дә, әсас етибарилә, шәнбә вә базар ҝүнләри хидмәт етмәк имканын олсун. Ҝүман ки, сән бәзи ҝүнләрдә дә мәктәбдән сонра бир-ики саат тәблиғ едә биләрсән. Бу ајларда тәтилин олаҹагмы? Нәјә ҝөрә бу вахтыны да хидмәтә сәрф етмәјәсән? Әҝәр көмәкчи пионер олмаг истәјирсәнсә, валидејнләринлә сөһбәт ет.
7. Ағсаггаллар Хатирә Ҝеҹәси дөврү јығынҹағы хидмәтдә даһа фәал олмаға неҹә тәшвиг едә биләрләр?
7 Һәвәсләндир. Ағсаггаллар өз нүмунәләри илә јығынҹағы һәвәсләндирә биләрләр (1 Пет. 5:2; 3). Онлар сәһәр тездән, дәрсләрдән вә ја ишдән сонра хидмәт етмәк истәјәнләрә тәблиғ үчүн әлавә ҝөрүшләр тәшкил едә биләрләр. Хидмәти нәзарәтчи бу ҝөрүшләри апармаг үчүн мүнасиб тәблиғчиләрин, бу ајлар үчүн кифајәт гәдәр саһәләрин, журналларын вә диҝәр әдәбијјатларын олуб-олмадығыны јохламалыдыр.
8. Бир јығынҹағын нүмунәсиндән нә өјрәнә биләрик?
8 Бир ағсаггал Хатирә Ҝеҹәсинә бир нечә ај галмыш јығынҹаг үзвләрини көмәкчи пионер кими хидмәт етмәјә тәшвиг етмишди. О, нечә тәблиғчинин көмәкчи пионер хидмәтинә башладығыны һәр һәфтә елан едирди. Бу, тәблиғдә даһа фәал олмаг истәјәнләри әмин етди ки, онлара көмәк едә биләҹәк кифајәт гәдәр баҹы-гардашлар вар. Һәмчинин сәһәрләр вә ахшамлар тәблиғ үчүн ҝөрүшләр тәшкил олунмушду. Нәтиҹәдә апрел ајында 53 нәфәр көмәкчи пионер кими хидмәт етмишдир, бу исә јығынҹағын, демәк олар ки, јарысыны тәшкил едир!
9. Нәјә ҝөрә Хатирә Ҝеҹәси дөврү мүәјјән тәләбләрә ҹаваб верәнләрин мүждәни бәјан етмәјә башламасы үчүн чох ҝөзәл вахтдыр?
9 Башгаларына тәблиғ етмәјә көмәк ет. Мүгәддәс Китабы өјрәнәнләр вә ҝәнҹләр тәблиғчи оланда тәҹрүбәли тәблиғчиләрлә хидмәтә ҝедә биләрләр. Белә бир имкан јығынҹағын бир чох үзвләри Хатирә Ҝеҹәси дөврүндә хидмәтдә даһа фәал оланда јарана биләр. Һәјатыны Јеһованын әдаләтли нормаларына ујғунлашдырмыш Мүгәддәс Китаб өјрәнмән, јахуд өзүнү јахшы апаран вә руһани наилијјәтләр әлдә етмиш, амма һәлә тәблиғчи олмајан ушағын вармы? Әҝәр онлар тәблиғчи олмаг истәјирләрсә вә онларын мүәјјән тәләбләрә ҹаваб вердијини ҝөрүрсәнсә, онда ағсаггалын биринә јахынлаш. Сәдрлик едән нәзарәтчи ики ағсаггалдан хаһиш едәҹәк ки, сизинлә ҝөрүш тәшкил етсин.
10. Ағсаггаллар гејри-фәал тәблиғчиләрә неҹә көмәк едә биләрләр?
10 Гејри-фәал тәблиғчиләрин јенидән хидмәтә гајытмалары үчүн март, апрел вә мај ајлары ҝөзәл вахтдыр. Китабөјрәнмәнин нәзарәтчиләри вә диҝәр ағсаггаллар белә инсанлара мәгсәдјөнлү шәкилдә баш чәкмәли вә онлары сәмимијјәтлә хидмәтә дәвәт етмәлидирләр. Әҝәр белә тәблиғчи узун мүддәтдир ки, јығынҹаға ҝәлмир вә хидмәт етмирсә, ики ағсаггал онун мүәјјән тәләбләрә ҹаваб вериб-вермәдијини јохламалыдыр (км 11/00 с. 2, рус.).
11. «Аллаһын лүтфү»нүн ән бөјүк тәзаһүрү нәдир?
11 Хатирә Ҝеҹәсинә һазырлыг. Фидијә гурбанлығы «Аллаһын лүтфү»нүн ән бөјүк тәзаһүрүдүр (Һәв. иш. 20:24). Бүтүн дүнјада милјонларла миннәтдар инсанлар шәнбә ҝүнү, мартын 22-дә, ҝүн батандан сонра Иса Мәсиһин өлүмүнүн Хатирә Ҝеҹәсини гејд едәҹәкләр. Биз бүтүн сәмими инсанлары Јеһованын бәшәријјәтә ҝөстәрдији лүтфүнә шәһадәт едән бу мәрасимә дәвәт етмәк вә онларын ҝәлмәләринә көмәк етмәк истәјирик.
12. Кимләри Хатирә Ҝеҹәсинә дәвәт етмәлијик?
12 Дәвәт етмәк истәдијин инсанларын сијаһысыны тут. Шүбһәсиз, бу сијаһыја гоһумларын, гоншуларын, синиф, јахуд иш јолдашларын, диҝәр танышларын, әввәлләр вә инди Мүгәддәс Китабы өјрәтдијин вә мүнтәзәм олараг баш чәкдијин инсанлар да дахил олаҹаг. Әҝәр дәвәт етдијин адамын Хатирә Ҝеҹәсинә даир суаллары оларса, «Мүгәддәс Китаб өјрәдир» нәшринин «Әлавәләр» бөлмәсинин 206-208-ҹи сәһифәләриндә јерләшән мәлуматдан истифадә едә биләрсән. Бунун нәтиҹәсиндә инсанла өјрәнмәјә башлаја биләрсән, чүнки бу сәнә Мүгәддәс Китаб өјрәнмәләри кечирдијимиз китабы тәгдим етмәк имканыны верәҹәк.
13. Јеһова инсанлары Хатирә Ҝеҹәсинә дәвәт едән ики тәблиғчини неҹә хејир-дуаландырды?
13 Бир баҹы 48 аиләнин сијаһысыны тутмушду. Адларынын гаршысында онлары нә вахт дәвәт етдијини гејд етмишди. Бу сијаһыдан 26 нәфәр Хатирә Ҝеҹәсинә ҝәләндә о неҹә дә севинмишди! Мағаза саһиби олан бир гардаш әввәлләр кешиш олан иш јолдашыны бу мәрасимә дәвәт етди. О ҝәлди вә сонра севинҹлә деди: «Мән бу бир саат әрзиндә 30 ил католик килсәсиндә өјрәндијимдән даһа чох шеј өјрәндим». Хатирә Ҝеҹәсиндән сонра о, «Мүгәддәс Китаб өјрәдир» нәшри васитәсилә Аллаһын Кәламыны өјрәнмәјә разы олду.
14. Мартын 1-дә һансы үмумдүнја кампанија башлајаҹаг?
14 Кампанија. Бүтүн дүнјада мартын 1-дән мартын 22-дәк Хатирә Ҝеҹәсинә хүсуси дәвәтнамәләрин пајланмасы үзрә кампанија кечириләҹәк. Һамы бу ваҹиб кампанијада бүтүн ҝүҹү илә иштирак етмәк истәјәҹәк. Јахшы оларды ки, дәвәтнамәләри гапынын арасына гојмаг әвәзинә, ев сакинләринин өзләринә верәк. Амма саһән бөјүкдүрсә, ағсаггаллар гәрара ҝәлә биләрләр ки, дәвәтнамәләри гапыларын арасында сахламаг олар. Шәнбә вә базар ҝүнләриндә биз журналлары да тәклиф едәҹәјик.
15. Хатирә Ҝеҹәси дәвәтнамәләрини неҹә тәклиф едә биләрик?
15 Дәвәтнамәләри пајламаг үчүн вахтымызын аз олдуғуну нәзәрә алараг, јахшы оларды ки, гыса тәгдимәдән истифадә едәк. Меһрибанҹасына вә шөвглә даныш. Мисал үчүн, белә демәк олар: «Биз сизи, аилә үзвләринизи вә достларынызы мартын 22-дә кечириләҹәк ваҹиб мәрасимә дәвәт етмәк истәјирик. Бујурун, дәвәтнамәниз. Бүтүн тәфсилатлары бурадан өјрәнә биләрсиз». Ҝүман ки, һәмсөһбәтинин суаллары јаранаҹаг. Јахуд, ола биләр, о, дәвәтнамәни гәбул етсин вә һәтта Хатирә Ҝеҹәсинә ҝәлмәк истәсин. Мараг ҝөстәрәнләри гејд ет вә онлара мүтләг тәкрар баш чәк.
16. Һансы нүмунә ҝөстәрир ки, саһәдә Хатирә Ҝеҹәсинә дәвәтнамә пајламаг олдугҹа ваҹибдир?
16 Кечән ил бир әсҝәр гапысынын арасында Хатирә Ҝеҹәсинә дәвәтнамә тапды. О бу мәрасимә ҝетмәк гәрарына ҝәлди, анҹаг чавушундан иҹазә алмалы иди. О, дәвәтнамәни чавушуна ҝөстәрәндә, чавуш бир ан сүкута ҝетди вә деди ки, онун валидејнләри Јеһованын Шаһидләридир вә о да әввәлләр онларла бирликдә ҝөрүшләрә ҝедирди. Чавуш нәинки әсҝәрә Хатирә Ҝеҹәсинә ҝетмәјә иҹазә верди, һәтта өзү дә онунла бирҝә ҝетди!
17. Аллаһын лүтфүнү бош јерә гәбул етмәдијимизи неҹә ҝөстәририк?
17 Миннәтдарлыг ҝөстәр. Ҝәлин 2008-ҹи ил Хатирә Ҝеҹәси дөврүндә һамымыз Јеһованын ҝөстәрдији лүтфү үзәриндә дүшүнәк. Павел јазмышды: «Биз... сизә јалварырыг ки, Аллаһын лүтфүнү бош јерә гәбул етмәјәсиниз» (2 Кор. 6:1). Аллаһын лүтфүнү гијмәтләндирдијимизи неҹә ҝөстәрә биләрик? Павел давам едир: «Һәр шејдә өзүмүзү Аллаһын хидмәткарлары кими тәгдим едирик» (2 Кор. 6:4). Буна ҝөрә дә, нүмунәви давранмагла вә мүждәни сәјлә тәблиғ етмәклә Јеһованын әнамына ҝөрә миннәтдар олдуғумузу ҝөстәририк. Хатирә Ҝеҹәси дөврүндә мүждәјә шәһадәт етмәклә хидмәтдә даһа фәал олмағымыза ҝөзәл имкан јаранаҹаг.
[3-ҹү сәһифәдәки чәрчивә]
Кимләр көмәкчи пионер кими хидмәт едә биләр?
◼ Аиләләр
◼ Там иш ҝүнү ишләјәнләр
◼ Јашлылар вә сәһһәти зәиф оланлар
◼ Мәктәблиләр
[4-ҹү сәһифәдәки чәрчивә]
Хатирә Ҝеҹәсинә дәвәтнамәни верәркән:
◼ гыса вә шөвглә даныш
◼ мараг ҝөстәрәнләри гејд ет вә тәкрар баш чәк
◼ һәфтәсонлары журналлар пајла