РӘҺБӘРЛИК ШУРАСЫНЫН МӘКТУБУ

Әзиз һәмиманлыларымыз!

Һәвари Павел һәмиманлыларына өз мәһәббәтини вә миннәтдарлығыны билдирмәк үчүн һәр фүрсәтдән истифадә едирди. О, Ромадакы мәсиһчиләрә јазмышды: «Һамыныз үчүн Иса Мәсиһ васитәси илә Аллаһыма шүкр едирәм ки, иманыныз бүтүн дүнјада елан олунур» (Ром. 1:8). Бәли, биринҹи әсрдәки мәсиһчиләр сәјлә тәблиғ етдикләринә, һәмчинин мөһкәм иманларына ҝөрә Рома империјасынын уҹгарларынадәк танынырдылар (1 Салон. 1:8). Павелин өз һәмиманлыларына белә дәрин һиссләр бәсләмәси һеч дә тәәҹҹүблү дејил!

Биз дә һәр дәфә сизи дүшүнәндә, Павел кими, Јеһоваја миннәтдарлығымызы билдиририк. Биз һамынызы чох севирик! Јеһованын да сизи шәхсән севдијинә әмин ола биләрсиниз! Бәзиләриниз ҝүҹлү мүгавимәтләрлә гаршылашдығыныза бахмајараг, тәблиғ етмәјә давам едирсиниз. Тәзаһүр етдирдијиниз ҹәсарәт Јеһованын үрәјини неҹә дә севиндирир! (Сүл. мәс. 27:11).

«Иллик мәҹмуә»дә инсаны һәјәҹанландыран вә иманыны мөһкәмләндирән «Јеһованын Шаһидләринин мүасир фәалијјәти» рубрикасыны диггәтлә вә дүшүнәрәк охујанда, Иса Мәсиһин «фәтһ етмәк үчүн фатеһ кими јола чыхмасы»нын вә Мәсиһин давамчыларына гаршы ишләнән һеч бир силаһын ишә јарамадығынын чохсајлы сүбутларыны ҝөрүрүк (Вәһј 6:2; Јешаја 54:17).

Павел Филипидәки мәсиһчиләрә јазмышды: «Аллаһыма шүкүр едирәм... Чүнки... Мүждәни јајмагда иштирак етдиниз» (Филип. 1:3-5). Биз, Рәһбәрлик Шурасынын үзвләри дә сизә ҝөрә Аллаһа шүкүр едирик. 2007-ҹи хидмәт илиндә 6 691 790 тәблиғчи 236 өлкә вә әразидә хош хәбәрин тәблиғинә 1 431 761 554 саат сәрф етмишдир. Хош хәбәрин јајылмасы үчүн ҝөстәрдијиниз сәј олдугҹа бөјүкдүр! Бир дүшүнүн, Јеһованын иззәти үчүн бирликдә ҝөстәрдијимиз сәјин нәтиҹәсиндә јүз минләрлә адамын һәјаты дәјишиб!

Башга һалда исә, Павел һәмиманлыларына гаршы дәрин шәфгәт һисси кечирдијини салониклиләрә јаздығы мәктубунда ҝөстәрмишди: «Атамыз Аллаһ һүзурунда... Иса Мәсиһә бағладығыныз үмиддән доған мәтанәтинизи дурмадан јада салырыг» (1 Салон. 1:2, 3). Дүздүр, һәјат проблемсиз дејил. Проблемләр гачылмаздыр, анҹаг онлара дөзмәк ҝәрәкдир. Сиз һансы чәтинликләрлә гаршылашырсыныз? Јеһоваја хидмәт етмәк имканынызы әһәмијјәтли дәрәҹәдә мәһдудлашдыран ҹидди хәстәлијә ҝөрә руһдан дүшмүсүнүзмү? Олдугҹа аҹҝөз дүшмән олан Шеол, узун илләр бирҝә өмүр сүрдүјүнүз севимли һәјат јолдашынызы әлиниздән алыбмы? (Сүл. мәс. 30:15, 16). Мүгәддәс Јазыларын јалныз Рәббә бағлы оланла аилә гурмаг әмринә табе олдуғунуз үчүн, ахтарышыныз бир нәтиҹә вермәјәҹәк кими ҝөрүнсә дә, сизин кими Јеһованы севән һәјат јолдашы ахтарырсынызмы? (1 Кор. 7:39). Ағыр игтисади шәраитдә ушагларынызы тәмин етмәк үчүн чох чалышырсынызмы? Һансы проблемлә үзләшдијинизә бахмајараг, Падшаһлығын марагларыны биринҹи јерә гојурсунузса, әмин олун ки, Јеһова ‘Онун ады наминә ҝөстәрдијиниз мәһәббәти’ унутмајаҹаг. Баҹылар вә гардашлар, хаһиш едирик, ‘јахшылыг едәркән руһдан дүшмәјин’ (Ибр. 6:10; Галат. 6:9).

Дөзмәјимизә нә көмәк едә биләр? Салониклиләрлә олдуғу кими, ‘Иса Мәсиһә бағладығымыз үмид’. Тәәҹҹүблү дејил ки, Павел «хилас үмидини» мәсиһчини мәнфи фикирләрдән вә даими шүбһәләрдән горујан мөһкәм дәбилгә илә мүгајисә етди (1 Салон. 5:8).

Һәгигәтән дә, сиз севинҹлә тәһәммүл етмәклә Каинатда али һөкмранлыға даир Шејтанын галдырдығы мүбаһисәли суала ҹаваб верирсиниз. Шејтан иддиа едир ки, Аллаһын хидмәтчиләри әслиндә худбиндирләр вә Аллаһа узун мүддәт хидмәт етмәјә мејлли дејилләр вә әҝәр чәтинлијә дүшәрләрсә, јахуд бу систем ҝөзләдикләриндән чох давам едәрсә, хидмәтдә сәјләрини азалдаҹаглар. Сиз, Иблисин һәгигәтән дә мәнфур јаланчы олдуғуну сүбут етмәк кими надир имкана маликсиниз! Јашанылан һәр бир ҝүн сизи үмидинизин ҝерчәкләшмәсинә даһа да јахынлашдырыр.

Павел һәмиманлыларынын мөһкәм вә ҹанлы иманларына, тәблиғ ишиндә әлләриндән ҝәләни етдикләринә вә сарсылмаз олдугларына ҝөрә тәрифләмәк үчүн һәр фүрсәтдән истифадә етдији кими, биз дә бу фүрсәтдән севинҹлә истифадә едәрәк, сизи тәрифләмәк вә өз мәһәббәтимизә әмин етмәк истәјирик. Бу хејирхаһ иши давам етдирин!

Гој гаршыдакы ил бизә бол хејир-дуалар ҝәтирсин. Хош арзуларла

Сизин гардашларыныз, Јеһованын Шаһидләринин Рәһбәрлик шурасы