Онлары гаршылајын
1. Һансы мәрасим бизә шаһидлик вермәк үчүн ҝөзәл имкан јарадыр вә нәјә ҝөрә?
1 Хатирә ҝеҹәси шаһидлик вермәјимиз үчүн ән јахшы фүрсәтдир. Бир тәсәввүр ет: бу ил Хатирә ҝеҹәсиндә он милјондан чох инсан иштирак едәҹәк вә фидјә гурбанлығы васитәсилә ајдын тәзаһүр олунан ики ән бөјүк мәһәббәт нүмунәси барәдә ешидәҹәкләр (Јәһ. 3:16; 15:13). Онлар Јеһованын мүкафаты сајәсиндә әлдә едәҹәкләри хејир-дуалар барәдә өјрәнәҹәкләр (Јешаја 65:21—23). Лакин бу мәрасимдә јалныз натиг шаһидлик вермәјәҹәк. Орада иштирак едәнләрин һамысынын ҝәләнләри ҝүләрүзлә гаршылајараг јахшы шаһидлик вермәк имканлары олаҹаг (Ром. 15:7).
2. Биз ҝәләнләри сәмими гаршыламаг үчүн нә едә биләрик?
2 Јериндә әјләшиб сакитҹә програмын башламасыны ҝөзләмәк әвәзинә, нәјә ҝөрә јанында әјләшәнләрә диггәт јетирмәјәсән? Гонаглар програмын башламасыны ҝөзләдикләри мүддәтдә һәјәҹан вә нараһатчылыг кечирә биләрләр. Бизим сәмими ҝүлүмсәмәјимиз вә достјана мүнасибәт ҝөстәрмәјимиз онлара өзләрини раһат һисс етмәјә көмәк едәҹәк. Јени ҝәлән инсана јахынлашыб ондан әввәлләр бизим јығынҹагларда иштирак едиб-етмәдијини вә ја кимисә таныјыб-танымадығыны соруша биләрсән. Она јанында әјләшмәсини тәклиф едә, еләҹә дә Мүгәддәс Китабыны вә нәғмә брошүраны онунла бөлүшә биләрсән. Әҝәр ҝөрүш Падшаһлыг залында кечирилирсә, онда ону залла гысаҹа таныш етмәк олар. Мәрузәдән сонра онун суалларына ҹаваб вермәк үчүн вахт ајыр. Әҝәр сиз диҝәр јығынҹағын топлашмасы үчүн залы тез тәрк етмәлисинизсә, онда һәмин адама белә дејә биләрсән: «Програмла бағлы фикирләринизи өјрәнмәк мәним үчүн мараглы оларды. Бәс сизинлә неҹә әлагә сахлаја биләрәм?» Башга ҝүн онунла әлагә сахламаг үчүн вахт тәјин ет. Ағсаггаллар исә диггәтләрини, хүсусилә, Хатирә ҝеҹәсиндә иштирак едән гејри-фәал тәблиғчиләри руһландырмаға јөнәлтмәлидирләр.
3. Хатирә ҝеҹәсинә ҝәләнләри гаршыламаг үчүн тәшәббүс ҝөстәрмәјимиз нә үчүн ваҹибдир?
3 Јеһованын халгы кими малик олдуғумуз руһани ҹәннәтдә әлдә етдијимиз севинҹ, сүлһ вә бирлији ҝәлән гонагларын әксәријјәти илк дәфә мүшаһидә едәҹәк (Мәз. 29:11; Јешаја 11:6—9; 65:13, 14). Хатирә ҝеҹәсинә илк дәфә ҝәлән гонаглар бу мәрасими неҹә хатырлајаҹаглар? Бу, әсасән, онлары неҹә гаршыламағыныздан асылы олаҹаг.