Вилајәт Конгреси — Јеһоваја Севинҹлә Ибадәт Етмәјин Вахты
1. Исраилдә кечирилән бајрамларла бизим ҝүнләрдә кечирилән вилајәт конгресләри арасында һансы охшарлыг вар?
1 Јусиф, Мәрјәм, онларын ушаглары вә диҝәрләри һәр ил кечирилән бајрамларда иштирак етмәк үчүн мүнтәзәм олараг Јерусәлимә ҝедирдиләр. Һәм онлар, һәм дә Аллаһын диҝәр хидмәтчиләри ҝүндәлик проблемләр һаггында дүшүнмәјә чалышмыр, әксинә, диггәтләрини һәјатларында даһа ваҹиб олан руһани шејләрә ҹәмләјирдиләр. Бајрамлар Јеһованын хејирхаһлығы үзәриндә дүшүнмәјә, бу һагда данышмаға вә Онун Ганунуну нәзәрдән кечирмәјә имкан верирди. Гаршыдан ҝәлән вилајәт конгресимиз дә бизә Јеһоваја севинҹлә ибадәт етмәк үчүн ејни имканы верәҹәк.
2. Гаршыдан ҝәлән вилајәт конгреси үчүн һансы һазырлыглары ҝөрмәлијик?
2 Һазырлаш. Назаретдән Јерусәлимә ҝедиб, ҝери гајытмаг үчүн Исанын аиләси 200 километр јол гәт етмәли иди. Исанын нечә баҹысы вә гардашы олдуғуну билмәсәк дә, һазырлашмаг үчүн Јусифлә Мәрјәмдән нә гәдәр сәј тәләб олундуғуну тәсәввүр едә биләрик. Бәс сән гаршыдан ҝәлән вилајәт конгресинин һәр үч ҝүнүндә иштирак етмәк үчүн лазыми һазырлыглар ҝөрмүсәнми? Бунун үчүн ишдән мәзунијјәт ҝөтүрә вә ја мүдирлә сөһбәт едә биләрсән. Һәмчинин ушағынын мүәллиминә һәмин ҝүнләрдә онун дәрсә ҝәлмәјәҹәјини дә демәк олар. Һарада галаҹағыны дүшүнмүсәнми? Конгресдә иштирак етмәк үчүн хүсуси тәләбаты олан баҹы-гардашлара көмәк едә биләрсәнми? (1 Јәһ. 3:17, 18).
3. Исраилдә кечирилән бајрамлар руһландырыҹы үнсијјәтә неҹә имкан ачырды?
3 Руһландырыҹы үнсијјәт. Јәһудиләрин кечирдикләри бајрамлар Аллаһын диҝәр хидмәтчиләри илә руһландырыҹы үнсијјәт етмәк үчүн неҹә дә ҝөзәл имкан иди! Шүбһәсиз ки, Исанын аиләси көһнә достларла бир јердә олмағы сәбирсизликлә ҝөзләјирдиләр. Һәмчинин онларын бајрамда иштирак едәнләр, Јерусәлимә ҝедиб-ҝәлән јәһудиләр вә прозелитләр арасындан јени достлар тапмаг имканы вар иди.
4. Мәсиһчи гардашлығымызы јүксәк гијмәтләндирдијимизи неҹә ҝөстәрә биләрик?
4 Садиг вә ағыллы гулун вилајәт конгресиндәки чыхышлары чап олунмуш шәкилдә тәгдим етмәк әвәзинә динләмәк үчүн бизим бир јерә топлашмағымызы тәшкил етмәсинин сәбәбләриндән бири дә одур ки, бир-биримизи руһландыраг (Ибр. 10:24, 25). Буна ҝөрә дә һәр үч ҝүндә конгресә тез ҝәлмәји планлашдыр ки, програмын сәдри өз јеримиздә әјләшмәјин вахты олдуғуну ҝөстәрән мусигинин сәсләнәҹәјини елан едәнәдәк башгалары илә үнсијјәт едә биләсән. Фасилә заманы наһар етмәк үчүн башга јерә ҝетмәк әвәзинә, әтрафымызда оланларла ҝөрүшүб сөһбәт етмәкдән өтрү, хаһиш олунур ки, өзүнүзлә јемәк ҝәтириб орада галасыныз. Мәсиһчи гардашлығымыз Јеһованын әнамы олдуғундан ону јүксәк гијмәтләндирмәлијик (Мик. 2:12).
5. Програмдан там фајда әлдә етмәјә бизә нә көмәк едә биләр?
5 Өјрәнмәк вахты. Иса ҝәнҹ јашларындан сәмави Атасы һаггында өјрәнмәк үчүн бајрамларда јаранан имкандан истифадә едирди (Лука 2:41—49). Бәс програмын һиссәләриндән там фајда әлдә етмәјә бизә вә аиләмизә нә көмәк едәҹәк? Програм заманы јериндән дурма вә лазымсыз јерә данышма. Мобил телефонунун, јахуд буна бәнзәр диҝәр ҹиһазларын сәнә вә башгаларына мане олмасына јол вермә. Диггәтини натигә ҹәмлә вә гыса гејдләр ет. Ушагларынын да динләдијинә әмин олмаг үчүн аиләликҹә бир јердә әјләшин. Хошунуза ҝәлән фикирләри бир јердә арашдырмаг үчүн ахшамчағы вахт ајырын.
6. Ҝејим вә хариҹи ҝөрүнүшлә бағлы нәји јадымызда сахламалыјыг?
6 Ҝејим вә хариҹи ҝөрүнүш. Исанын аиләсинин вә Аллаһын диҝәр јәһуди хидмәтчиләринин бајрама ҝетдикләрини вә ҝәлдикләрини јолда ҝөрән башга халгдан олан тиҹарәтчиләр онлары асанлыгла таныја биләрди. Чүнки онларын палтарларынын әтәкләриндә готаз, готазын үзәриндә исә бәнөвшәји гајтан олурду (Сај. 15:37—41). Бу ҝүн биз хүсуси палтар ҝејинмәсәк дә, садә, сәлигәли вә тәмиз ҝејимимизлә танынырыг. Конгресә ҝедиб-ҝәләркән вә конгрес кечирилән шәһәрдә олдуғумуз мүддәтдә хариҹи ҝөрүнүшүмүзә хүсусилә фикир вермәлијик. Һәтта конгрес програмындан сонра палтарымызы дәјишсәк дә, ҝејимимиз Јеһоваја иззәт ҝәтирмәли вә плакетләри тахмалыјыг. Белә етсәк, биз Јеһованын Шаһиди олмајан инсанлардан фәргләнәҹәк вә бизи мүшаһидә едәнләрә хош тәәссүрат бағышлајаҹағыг.
7. Нәјә ҝөрә биз конгресдә көнүллү ишләмәк һаггында дүшүнмәлијик?
7 Көнүллүләр. Конгресин јахшы кечмәси үчүн чохлу ишчиләрә еһтијаҹ олур. Сән көнүллү олараг көмәк едә биләрсәнми? (Мәз. 110:3). Конгресдә етдијимиз истәнилән иш мүгәддәс хидмәтимизин бир һиссәси сајылыр вә бунунла ҝөзәл шаһидлик верилир. Бир конгресин кечирилдији јерин мүдиринә ораны тәмизләјән көнүллүләр бөјүк тәәссүрат ојатдығындан о демишди: «Бу тәдбирә ҝөрә сизә чох миннәтдарам. Индијәдәк бурада белә тәдбир олмајыб. Јеһованын Шаһидләринин башгаларындан фәргләндијини чох ешитмишәм. Онлар ҝөрүшләринин кечирилдији јерләри әввәлкиндән даһа тәмиз сахламалары илә чохдандыр ки танынырлар. Һәм сиз, һәм дә тәшкилатыныз бу јери башгалары үчүн даһа да ҝөзәл етдиниз. Сиз индијәдәк таныш олдуғумуз инсанлардан ән хејирхаһысыныз вә сизи таныдығымыза ҝөрә чох мәмнунуг».
8. Конгрес кечирилән шәһәрдә олдуғумуз мүддәтдә шаһидлик вермәк үчүн һансы имканымыз јарана биләр?
8 Шаһидлик вермәк үчүн имкан. Конгрес кечирилән шәһәрдә бир чох инсанлар бизим ҝејимимизә вә хариҹи ҝөрүнүшүмүзә, еләҹә дә тахдығымыз плакетләрә фикир верәҹәкләр. Еһтимал ки, бу, онларда мараг ојадаҹаг вә онлара конгрес һаггында данышмаға имканымыз јаранаҹаг. Дөрдјашлы оғлан конгресдән сонра јениҹә тәгдим олунан әдәбијјатын бир нүсхәсини ресторана ҝәтирди вә орада офисиант гадына ҝөстәрди. Бунун сајәсиндә онун валидејнләри гадыны конгресә дәвәт едә билдиләр.
9. Исанын аиләси кими биз дә Јеһованын һазырладығы руһани зијафәти неҹә гијмәтләндирә биләрик?
9 Кечмишдә кечирилән бајрамлар Јеһова һаггында даһа чох өјрәнмәк истәјән јәһудиләрин сәбирсизликлә ҝөзләдији севиндириҹи һадисә иди (Ганун. т. 16:15). Исанын аиләси бајрамларда иштирак етмәк вә ондан там фајда әлдә етмәк үчүн әлләриндән ҝәләни етмәјә һазыр иди. Биз дә вилајәт конгресләрини ејни ҹүр гијмәтләндирир вә онлара бизи севән сәмави Атамызын бир әнамы кими бахырыг (Јаг. 1:17). Јеһоваја севинҹлә ибадәт етмәк үчүн һәр ил јаранан бу имкандан истифадә етмәк истәјириксә, артыг индидән һазырлашмалыјыг!