Бинада тәблиғ етмәклә «әсаслы сурәтдә» шаһидлик ет

1. ‘Мүждәјә әсаслы сурәтдә шәһадәт етмәк’ өзүнә нәји дахил едир?

¹ Һәвари Павел кими, бизим дә арзумуз ‘Мүждәјә [«әсаслы сурәтдә», ЈД] шәһадәт етмәкдир’ (Һәв. иш. 20:24). Буна ҝөрә дә саһәмиздә мүмкүн гәдәр чох адама Падшаһлыг хәбәрини чатдырмаға чалышырыг. Бура бина евләриндә јашајан чохлу сајда адамлар да дахилдир. Һәрдән белә јашајыш биналарына дахил олмаг чәтин олур. Лакин биналарда чохлу адам јашадығындан бизим үчүн хош хәбәри јајмаға чохлу имканлар ачылыр.

2. Нә үчүн бина евиндә тәблиғ едәркән узагҝөрән вә еһтијатлы олмаг лазымдыр?

² Ҹинајәткарлыг вә зоракылыг уҹбатындан ҝетдикҹә даһа чох бина евләринин гапылары кодлашдырылыр вә гапычы, јахуд нәзарәт камерасы гојулур (2 Тим. 3:1, 2). Рәһбәрлик дәвәт олунмамыш адамларын ичәри дахил олмасына гадаға гоја биләр. Ҝөзәтчи, јахуд нәзарәтчи, хүсусилә дә сакинләрдән кимсә шикајәт едәндә, биздән бинаны тәрк етмәји хаһиш едә биләр. Буна ҝөрә дә узагҝөрән вә еһтијатлы олмаг ваҹибдир.

3. Бинада тәблиғ етмәк үчүн ән мүнасиб вахт нә вахтдыр вә нә үчүн?

³ Нә заман тәблиғ етмәли? Башга саһәләрдә олдуғу кими, бина евләриндә дә сакинләрин евдә олдуғу вахт тәблиғ етмәк јахшы оларды. Әҝәр сакинләрин әксәријјәтинин евдә олмадығы вахт ҝәлсәк, башгаларында шүбһә ојада биләрик. Бир чох тәблиғчиләр сакинләри ахшамүстү, еләҹә дә шәнбә вә базар ҝүнләри ҝүнорта евдә тапырлар. Бинада, хүсусилә дә һәфтәсонлары сәһәр тездән тәблиғ етсәк, сакинләр ҝөзәтчијә шикајәт едә биләрләр.

4, 5. Гапысы кодлашдырылмыш биналара неҹә дахил ола биләрик?

⁴ Бинаја неҹә дахил ола биләрик? Тәблиғчиләрә хидмәтә башламаздан әввәл ҝөзәтчи илә, јахуд бинанын башга ишчиләри илә әлагә јаратмаг лазым дејил. Әҝәр гапысы кодлашдырылмыш бинанын ҝиришиндә данышыг апараты варса, онун васитәсилә сөһбәт етмәк үчүн бизи ичәри бурахаҹаг адам тапа биләрик. Неҹә бина олмасындан асылы олараг, ичәри ҝирмәјә иҹазә верән адамла данышандан сонра башга гапылары да дөјмәјә имканымыз ола биләр. Лакин диҝәр һалларда бинадан чыхмаг вә башга сакин илә данышыг апараты васитәсилә әлагә јаратмаг мүдриклик оларды. Бир дәфәјә нечә сакинлә бу үсулла әлагә јарадаҹағымызы планлашдыраркән узагҝөрән олмалыјыг.

⁵ Ола биләр, бәзи сакинләр данышыг апараты васитәсилә онларла сөһбәт етмәјинизин мәгсәдини билмәк истәсинләр. Белә олса, достјана тәрздә өзүнүзү тәгдим един. Әҝәр данышыг апаратынын јанында сакинләрин адларынын сијаһысында ев саһибинин ады варса, сөһбәт заманы онун адыны чәкин. Ајдын шәкилдә мәгсәдинизи сөјләјин. Бәзиләри бирбаша олараг тәгдимәни «Мүгәддәс Китаб әсасында сөһбәтә башламағын вә давам етмәјин үсуллары» брошүрасындан охујурлар.

6. Гапычысы олан биналарда тәблиғ едәркән нә етмәлијик?

⁶ Әҝәр гапычы бизи бинада тәблиғ етмәјә гојмурса, она шаһидлик етмәјә чалыша биләрик. Бир чох гапычылар бизим әдәбијјаты мәмнунијјәтлә охујурлар. Һәтта Мүгәддәс Китаб өјрәнмәсинә башлајыб, һоллда ону давам етдирә биләрик. Әҝәр гапычы мараг ҝөстәрән мүәјјән сакинләрә баш чәкмәјимизә иҹазә верәрсә, јахшы оларды ки, буна башга гапылары да дөјмәк фүрсәти кими бахмајаг.

7. Тәблиғ чантасы илә әлагәдар нәји јадда сахламалыјыг?

⁷ Хариҹи ҝөрүнүш вә әдәб гајдалары. Бөјүк чанта тез нәзәрә чарпа биләр. Буна ҝөрә ҝәлин өзүмүзлә даһа мүнасиб чанта ҝөтүрәк, ја да һеч ҝөтүрмәјәк. Бәзи тәблиғчиләр тәгдим етмәк истәдикләри әдәбијјаты назик говлуға гојур, Мүгәддәс Китабы исә әлләриндә тутур вә ја ҹибләриндә сахлајырлар.

8. Бинада тәблиғ едән груп неҹә тәшкил едилмәлидир?

⁸ Јахшы олар ки, хүсусилә дә дәһлиздә вә автомобил дајанаҹагларында чох тәблиғчи бир јерә јығылмасын, чүнки бу лазымсыз јерә диггәт ҹәлб едәҹәк. Ҹинајәтин чох олдуғу әразиләрдәки биналарда тәблиғ едәркән еһтијатлы олмаг лазымдыр (Сүл. мәс. 22:3). Мәсәлән, ики вә ја үч ҹүт тәблиғчи тәблиғ едәркән бир-бирини ешидәҹәк гәдәр јахын мәсафәдә тәблиғ етмәли, бир ҹүт гапыны дөјәндә о бириләр ҝөзләмәлидир.

9. Неҹә әдәбли даврана биләрик вә бу нә үчүн ваҹибдир?

⁹ Бинаја дахил оларкән ајагларынызы силин вә гапыны арханызҹа јахшы өртүн. Бу ҹүр әдәбли давраныш сакинләрин шикајәт етмәк үчүн сәбәбләрини азалдаҹаг. Ичәри дахил оланда ҝиришдә ләнҝимәјин, мәгсәдјөнлү тәрздә ја лифтә минин, ја да тәблиғ едәҹәјиниз мәртәбәјә галхын. Бу, әтрафдакыларын шүбһәләрини дағыдаҹаг.

10. Дәһлиздә бош јерә сәс салмагдан неҹә гача биләрик?

¹⁰ Бир чох биналарда сәс дәһлизә јајылыр. Буна ҝөрә дә ев саһибинин ешитмәси үчүн лазым оландан һүндүр данышма. Јанындакы тәблиғчи илә данышанда алчагдан, лакин сакит, тәлашсыз даныш ки, әтрафдакыларда шүбһә јаратмајасан. Сакинләрин һәддән артыг нараһат олмамалары үчүн бәзи тәблиғчиләр гапылары далбадал дөјмүр, мәртәбәдәки евләр гуртарана кими дәһлизин бир бу башындакы, бир о бири башындакы евин гапысыны дөјүрләр. Бундан башга, гапыны бәркдән, јахуд һөкмлә дөјмәк ичәридәкиләри горхуда биләр.

11. Һансы мәсләһәт ҝөзлүклү гапылары дөјән заман бизә көмәк едә биләр?

¹¹ Әҝәр гапыда ҝөзлүк варса, елә дур ки, бахан сәни вә әмәкдашыны ҝөрә билсин. Дүз ҝөзлүјә бах вә киминсә бахдығыны ҝөрәндә меһрибанлыгла саламла вә тәгдимәнә башла. Әҝәр ичәридәки: «Кимдир?» — дејә сорушса, өзүнүн вә әмәкдашынын адыны дејә биләрсән. Белә олдугда ев саһиби гапыны чәкинмәдән ача биләр. Ачмаса да тәгдимәни гапыдан сөјләмәк олар.

12. Евдә олмајанлар үчүн әдәбијјат сахлајанда проблемләрдән неҹә гача биләрик?

¹² Евдә олмајанлар. Ҝөзәтчиләр дәһлиздән вә ја јердән әдәбијјат јығдыгларына ҝөрә тез-тез шикајәтләнирләр. Гапыда гојулан әдәбијјат јерә дүшүб, дәһлизин сәлигәсини поза биләр. Буна ҝөрә дә евдә олмајанлар үчүн сахланылан әдәбијјаты ҝәлиб-ҝедәнләрин нәзәринә чарпмајан јерә гојмаг лазымдыр.

13. Әсәби сакинләрлә растлашанда нә етмәлијик?

¹³ Әсәби сакинләр. Ҝөзәтчини чағырмаг истәјән әсәби ев сакинләри илә гаршылашанда јахшы олар ки, һәмин мәртәбәни тәрк едәк вә башга вахт гајыдаг. Диҝәр һалларда исә, ҝөзәтчи илә мүбаһисәдән гачмаг үчүн бинадан тамамилә чыхмаг мүдриклик оларды. Ев саһиби она бир дә баш чәкмәмәји конкрет олараг тәләб етмәсә дә, јахшы олар ки, һәмин мәнзилә баш чәкмәк лазым олмадығыны гејд едәк вә саһә карточкасынын ичинә гојаг. Баш чәкилмәјәҹәк башга үнванлар кими, бу үнванлара да ев саһибинин фикрини өјрәнмәк үчүн вахташыры баш чәкилмәлидир.

14, 15. Бинанын нүмајәндәси биздән ҝетмәји тәләб едәндә нә етмәлијик?

¹⁴ Чыхыб ҝетмәји тәләб едирләрсә. Бинада тәблиғ едәркән ҝөзәтчи, мүһафизәчи, тәмир ишинә баханлар, јахуд бинанын башга нүмајәндәси чыхыб ҝетмәјимизи тәләб едәрсә, јубанмадан дејиләнә гулаг асмаг дүзҝүн оларды. Мүмкүн олан јердә биз ганунла һәдә-горху ҝәлмәк вә полис чағырмагла нәтиҹәләнән гаршыдурмалардан гачмаг истәјирик. Әксәр һалларда бина ишчиләри Јеһованын Шаһидләринә гаршы гәрәзли фикирдә олмурлар, садәҹә вәзифәләрини јеринә јетирирләр.

¹⁵ Һәрдән бинанын нүмајәндәси чыхыб ҝетмәјинизи тәләб едәндә меһрибанлыгла вә нәзакәтлә ҝәлишинизин мәгсәдини изаһ етмәјә имкан јарана биләр (1 Пет. 3:15). Биз баша дүшүрүк ки, сакинләрин әмин-аманлығыны вә тәһлүкәсизлијини горумаг онун вәзифәсидир. Бәлкә дә, о, бинада галмағыныза иҹазә верди. Анҹаг вермәсә, мүбаһисә етмәдән бинадан чыхын. Әҝәр шәраит јол верирсә, мүнтәзәм олараг әдәбијјат ҝәтириб дәһлиздә, јахуд почт гутусунда сахламағы хаһиш етмәк олар (Колос. 4:6). Һәр белә һадисә һагда хидмәти нәзарәтчијә мәлумат вермәк лазымдыр.

16. Бина евиндә, јахуд комплексиндә проблем һәлл олунмурса, нә етмәлијик?

¹⁶ Ола биләр, кифајәт гәдәр вахт кечәндән сонра тәблиғчи еһтијатла бинада тәблиғ етмәјә ҹәһд ҝөстәрсин. Тәблиғчиләрин бинанын сакинләринә тәблиғ етмәләри алынмырса, онлара башга үсулларла, мәсәлән телефонла, јахуд мәктубла әлагә јаратмаға чалыша биләрләр. Бәзи тәблиғчиләр сәһәр вә ахшам саатларында, адамларын ишә ҝедиб, евә гајытдығы вахтларда бинанын гаршысында, јахуд әтрафында тәблиғ едир.

17. Бина евләриндә тәблиғ етмәк нә үчүн ваҹибдир?

¹⁷ Тезликлә бу пис системин сону ҝәләҹәк. Јалныз Јеһованын адыны чағыранлар хилас олаҹаглар. «Бәс иман етмәдикләри о Кимсәни неҹә чағыраҹаглар? Ешитмәдикләри Кимсәјә неҹә иман едәҹәкләр?» (Ром. 10:13, 14). ‘Әбәди һәјата мејлли оланларын’ (ЈД) әксәријјәти бина евләриндә јашајыр (Һәв. иш. 13:48). Еһтијатлы вә узагҝөрән олмагла онлара хош хәбәри чатдыра биләрик.