Марагланан инсанлара јенидән нә вахт баш чәкмәк лазымдыр?
1. Шаҝирдләр һазырламаг ишинә нә дахилдир?
1 Шаҝирдләр һазырламаг ишинә Јеһованын Падшаһлығы һаггында өјрәнмәк истәјән кәсләрә баш чәкмәк дә дахилдир (Мат. 28:19, 20). Тәкрар башчәкмә етмәк үчүн мүнасиб вахт тәјин едәркән өзүмүзүн вә марагланан кәсин вәзијјәтини нәзәрә алмалыјыг. Бәс биз нәјә ҝөрә илк башчәкмәдән сонра тез бир мүддәтдә јенидән гајытмалыјыг?
2, 3. Нәјә ҝөрә инсанлара мүмкүн гәдәр тез баш чәкмәјә чалышмалыјыг?
2 Нәјә ҝөрә тезликлә ҝери гајытмаг лазымдыр? ‘Падшаһлыг һаггында олан Мүждәнин’ тәблиғ иши тезликлә сона чатаҹаг, чүнки бу дүнјанын мәһвинә чох аз галыб (Мат. 24:14; 1 Пет. 4:7). Буна ҝөрә дә нә гәдәр ки, инди марагланан кәсләр үчүн «хилас ҝүнүдүр», биз «вахтлы ја вахтсыз һазыр ол» мәсләһәтинә ҹидди јанашмалыјыг, бу исә өзүнә инсанларын марағыны артырмаг үчүн онлара мүмкүн гәдәр тез баш чәкмәји дахил едир (2 Кор. 6:1, 2; 2 Тим. 4:2).
3 Шејтан чалышыб-вурушур ки, марагланан инсанын үрәјинә сәпә биләҹәјимиз истәнилән Падшаһлыг тохумуну мәһв етсин (Марк 4:14, 15). Чох вахт аилә үзвләри, иш јолдашлары вә башгалары мараг ҝөстәрәнләри әлә салырлар. Тез бир заманда онлара баш чәкмәк бизә имкан верир ки, башгалары онларын үрәјиндәки мараг гығылҹымларыны сөндүрмәмиш биз онлары аловландыраг.
4. Илк ҝәлишимиздә тәкрар башчәкмәнин тәмәлини неҹә гоја биләрик?
4 Вахт тәјин ет. Елә биринҹи ҝөрүшдән ҝәләҹәк башчәкмә үчүн мүәјјән тәдбирләр ҝөрмәк јахшы оларды. Нөвбәти дәфә ҹаваб верәҹәјин бир суал галдыр. Илк дәфәдән гејдләр етмәк вә ҝәләҹәјин ҝүнү тәјин етмәк ваҹибдир. Имканын јол верирсә, нөвбәти ҝүн вә ја гыса мүддәтдән сонра ҝәлмәк үчүн иҹазә ала биләрсән. Әҝәр илк башчәкмә һәфтәсону олубса вә марагланан инсан ара ҝүнләри ишләјирсә, ола билсин, нөвбәти һәфтәсону ҝәлмәјинә разы олаҹаг. Вахт тәјин едәркән сөзүнүн үстүндә дур (Мат. 5:37).
5. Ҝүнү ҝүнә сатмадан ҝери гајытмаг Исанын шаҝирд һазырламаг тапшырығыны јеринә јетирмәкдә бизә неҹә көмәк едир?
5 Марагланан кәсләрин јанына мүмкүн гәдәр тез ҝәлмәк үчүн тутарлы сәбәбләримиз вар. Буна ҝөрә дә вахт тәјин ет вә ‘вахт азалдығы’ үчүн тез бир заманда онлара баш чәк (1 Кор. 7:29). Падшаһлыг хәбәринә мараг ҝөстәрәнләрә нә гәдәр тез баш чәксәк, еһтимал ки, сәјләримиз бир о гәдәр сәмәрәли олаҹаг.