Ҝәнҹләр, һансы руһани мәгсәдләриниз вар?
1 Јеһова хошбәхтлијә наил олмаг үчүн фајдалы ишин вә реал мәгсәдләрин нә гәдәр ваҹиб олдуғуну јахшы билир (Јарадылыш 1:28; 2:15, 19 ајәләринә бах.) Бу ҝүн Јеһова Өз халгына тәблиғ етмәк вә өјрәтмәк тапшырығыны вериб. Бундан әлавә, бизим јекун мәгсәдимиз — Ҹәннәтдә әбәди һәјата наил олмагдыр. Амма ҝүҹүмүзү вә баҹарыгларымызы бош јерә сәрф етмәк истәмириксә, инкишафымыза көмәк едәҹәк руһани мәгсәдләр гојмалыјыг (1 Кор. 9:26).
2 Ҝәнҹләр үчүн реал мәгсәдләр. Јахшы оларды ки, ҝәнҹләр өз баҹарыгларыны нәзәрә алараг әлчатан теократик мәгсәдләр гојсунлар (1 Тим. 4:15). Бәзи ушаглар һәлә охумағы өјрәнмәмишдән әввәл Мүгәддәс Јазыларда олан китабларын адыны әзбәрдән демәји өјрәнмишләр. Аиләви ибадәт заманы ушаглар ҝөрүшләрә һазырлашмағы өјрәнирләр, белә ки, онлар јығынҹагда мараглы ҹаваблар вермәји вә Теократик Хидмәт Мәктәбинә јазылмағы мәгсәд гоја биләрләр. Ушаглар валидејнләри илә хидмәтә ҝедәндә онлар шаһидлик етмәји өјрәнирләр вә бунунла да вәфтиз олунмамыш тәблиғчи олмаг мәгсәдинә доғру ирәлиләјирләр. Валидејнләр ушагларын диггәтини һәср олунуб вәфтиз олмаг мәгсәдинә јөнәлтмәлидирләр.
3 Әҝәр сән јенијетмәсәнсә, гаршына һансы руһани мәгсәдләр гојмусан? Һәјатда һәгигәтән дә дәјәрли мәгсәдләр гојмагла «сәни Јараданы хатырла» (Ваиз 12:1; Мәз. 71:17). Нәјә ҝөрә тәтил олан ајларда көмәкчи пионер кими хидмәт етмәјәсән? Һеч даими пионер олуб таммүддәтли хидмәт һагда дүшүнмүсән? Бәс хариҹи дил өјрәниб ҝәләҹәкдә сизин әразиниздә вә ја башга бир јердә әҹнәбидилли групда, јахуд јығынҹагда хидмәт етмәк һаггында неҹә, дүшүнмүсән? Инди Бет-Елдә хидмәт едән, сәјјар нәзарәтчиси, јахуд миссионер олан баҹы-гардашларын әксәријјәти һәлә мәктәбдә охујаркән гаршыларына таммүддәтли хидмәт етмәк мәгсәдини гојмушлар. Нәјә ҝәрә сән дә белә етмәјәсән?
4 Јенијетмә олсан да, Исанын нүмунәсини изләмәјә чалыш. О, ҹәми он ики јашы оланда руһани мөвзулар һаггында сәрбәст данышырды (Лука 2:42—49, 52). Гаршына шәхси өјрәнмә кечирмәк, Мүгәддәс Китабы һәр ҝүн охумаг, јеткин мәсиһчиләрлә јығынҹагда вә хидмәтдә мүнтәзәм әмәкдашлыг етмәк кими фајдалы мәгсәдләр гојсан, Иса кими, башгаларына Падшаһлыг һаггында даһа мәһарәтлә өјрәтмәји баҹараҹагсан.