Һәгигәт һаггында ҝүҹлү шаһидлик верән вилајәт конгресләримиз
1. Иллик бајрамлар исраиллиләрә һансы ваҹиб руһани һәгигәтләрин үзәриндә дүшүнмәјә вә онлары мүзакирә етмәјә имкан јарадырды?
1 Гәдим исраиллиләр илдә үч дәфә бајрамлары гејд етмәк үчүн мүнтәзәм олараг бир јерә топлашырдылар. Јерусәлимдә кечирилән бу севиндириҹи бајрамларда анҹаг кишиләрин иштиракы тәләб олунса да, чох вахт онлар аиләләрини дә өзләри илә ҝөтүрүрдүләр (Ганун. т. 16:15, 16). Бу бајрамлар онлара ваҹиб руһани һәгигәтләр үзәриндә дүшүнмәјә вә онлары мүзакирә етмәјә имкан верирди. Бу һәгигәтләрдән бәзиләри һансылардыр? Бунлардан бири Јеһованын әлиачыг вә мәһәббәтли Ата олмасыдыр (Ганун. т. 15:4, 5). Диҝәри исә ондан ибарәтдир ки, Јеһова етибарлы Аллаһдыр вә Онун рәһбәрлијинә вә мүдафиәсинә ҝүвәнмәк олар (Ганун. т. 32:9, 10). Һәмчинин онлар Јеһованын ады наминә тәшкил олунмуш бир халг олдуглары үчүн Онун салеһ нормаларыны өз һәјатларында мүвафиг тәрздә әкс етдирмәли олдуглары үзәриндә дә дүшүнә биләрдиләр (Ганун. т. 7:6, 11). Һәр ил кечирилән вилајәт конгресләри дә бизә ејни фајданы ҝәтирир.
2. Вилајәт конгресинин програмы Мүгәддәс Китаб һәгигәтләринин үзәринә неҹә ишыг сачаҹаг?
2 Конгрес програмы һәгигәтә ишыг сачыр. Вилајәт конгресләримиздә сәсләнән мәрузәләр, драмлар, сәһнәҹикләр вә мүсаһибәләр ваҹиб Мүгәддәс Китаб һәгигәтләринин үзәринә ишыг сачараг онлары даһа јахшы баша дүшмәјә вә тәтбиг етмәјә көмәк едир (Јәһ. 17:17). Үзүмүзә ҝәлән конгресин програмыны һазырламаг үчүн артыг ишин бөјүк һиссәси ҝөрүлүб. Јеһованын тәшкилаты тәрәфиндән һазырланан бу програм үмумдүнја саһәнин һазыркы тәләбатларына ујғунлашдырылыб (Мат. 24:45—47). Бүтүн бунлары өз ҝөзләринлә ҝөрүб, гулагларынла ешитмәк истәмәздинми?
3. Конгресин програмы бизә нә вахт фајда ҝәтирәҹәк?
3 Сөзсүз ки, биз јалныз үч ҝүнүн һамысында иштирак етдијимиз вә програма диггәтлә гулаг асдығымыз тәгдирдә ондан там фајдаланаҹағыг. Әҝәр сән һәлә дә ишдән иҹазә алмамысанса, бу барәдә мүдиринлә данышмағы тәхирә салма. Конгресдән сонра һәр ахшам јахшы динҹәл ки, нөвбәти ҝүн програма диггәтлә гулаг аса биләсән. Бир чохларына ҝөзләрини натигдән ајырмамаг вә гыса гејдләр апармаг фикирләрини програма ҹәмләмәјә көмәк едир. Мобил телефонунун, јахуд буна бәнзәр диҝәр ҹиһазларын сәнә вә башгаларына мане олмасына јол вермә. Чалыш ки, програм заманы сөһбәт етмәјәсән, месажлашмајасан вә ја јемәк јемәјәсән.
4. Конгресдән фајдаланмалары үчүн валидејнләр ушагларына неҹә көмәк едә биләрләр?
4 Шәнбә илләриндә исраиллиләр аиләләри илә бирликдә Чардаглар бајрамыны гејд етмәк вә Ганунун охунмасыны динләмәк үчүн бир араја јығыланда араларында ушаглары да вар иди. Онлар да һамы илә бирликдә ешидиб өјрәнмәли идиләр (Ганун. т. 31:12). Конгрес заманы аиләнин бүтүн үзвләринин бир јердә отурдугларыны вә ушагларын фикирләрини програма ҹәмләјәрәк диггәтлә гулаг асдыгларыны ҝөрмәк неҹә дә руһландырыҹыдыр! Конгресдән сонра ахшамлар нәјә ҝөрә гејдләринизә нәзәр салмајасыныз вә програмдан хошунуза ҝәлән мәгамлары бирликдә мүзакирә етмәјәсиниз? Мүгәддәс Китабда дејилир: «Сәфеһлик ушағын гәлбиндән јапышар». Буна ҝөрә дә валидејнләр балаҹа вә јенијетмә јашларында олан ушагларына фасилә заманы вә галдыглары јердә оларкән нәзарәт етмәлидирләр ки, онлар «өзбашына» олмасынлар (Сүл. мәс. 22:15; 29:15).
5. Галдығымыз јердә өзүмүзү апармаг тәрзимиз һәгигәти неҹә бәзәјәҹәк?
5 Јахшы давранышымыз һәгигәти бәзәјир. Конгресин кечирилдији шәһәрдә өзүмүзү јахшы апармагла һәгигәти бәзәјә биләрик (Тит. 2:10). Бүтөв бир груп меһманхана ишчиләри илә сәбирлә вә мүлајимликлә даврананда бу, онларын нәзәриндән јајынмыр (Колос. 4:6). Кечән ил филиалын тәмсилчиләри бир меһманхана илә данышыглар апаранда менеҹер онлара демишди: «Сизин адамларынызы меһманханамызда гәбул етмәк бизим үчүн чох хошдур, чүнки онлар јахшы инсанлардыр. Онлар бизим ишчиләрә гаршы нәзакәтли, меһрибан вә һөрмәтҹилдирләр, һәмчинин меһманхананын әмлакы илә һәмишә еһтијатла давранырлар».
6. Конгресин кечирилдији шәһәрдә оларкән өз ҝејимимизлә һәгигәти неҹә бәзәјә биләрик?
6 Јахамыза тахдығымыз плакетләр иштирак етдијимиз конгрес һагда хәбәр вермәклә вә һәмиманлыларымызын бизи танымаларына көмәк етмәклә јанашы, бизи мүшаһидә едән башга инсанлар үчүн ҝөзәл шаһидликдир. Конгресин кечирилдији шәһәрин сакинләри ҝөрәҹәкләр ки, плакетләр тахан бизләр дүнјаја хас олан тәрздә, јәни ачыг-сачыг вә сәлигәсиз јох, сәлигәли вә әдәбли ҝејинмишик (1 Тим. 2:9, 10). Буна ҝөрә дә биз конгресин кечирилдији шәһәрдә олдуғумуз мүддәтдә, еләҹә дә галдығымыз јердә оларкән ҝејимимизә вә хариҹи ҝөрүнүшүмүзә фикир вермәлијик. Әјнимиздә шортик вә гысагол көјнәк галаҹағымыз јерә ҝәлмәк биз мәсиһчиләрә јарашмыр. Конгрес ачыг һавада вә ја үстүачыг әразидә кечирилсә белә, биз мәсиһчиләрә јарашан тәрздә ҝејинмәлијик. Әҝәр биз конгресин програмы гуртарандан сонра әјнимизи дәјишмәк вә ресторана ҝетмәк истәјириксә, јадда сахламалыјыг ки, биз һәлә дә конгрес иштиракчысыјыг вә бу сәбәбдән неҹә ҝәлди ҝејинмәмәлијик.
7. Конгрес заманы мәсиһчи бирлијиндән фајдаланмағын үсулларындан бири һансыдыр?
7 Иллик бајрамлар заманы Јерусәлимә ахышан исраиллиләрин өлкәнин диҝәр ҝушәләриндән вә башга халглардан олан һәмиманлылары илә үнсијјәт етмәк имканы варды вә бу, араларындакы бирлији даһа да мөһкәмләндирирди (Һәв. иш. 2:1, 5). Ејнилә вилајәт конгреси заманы бизим гејри-ади мәсиһчи гардашлығымыз там шәкилдә өзүнү бүрузә верир. Руһани ҹәннәтимизин бу ҝөзәл ҹәһәти бизи мүшаһидә едәнләрә чох вахт дәрин тәәссүрат бағышлајыр (Мәз. 133:1). Јемәк алмаг үчүн конгресин кечирилдији әразини тәрк етмәк әвәзинә, јахшы оларды ки, өзүмүзлә јүнҝүл наһар ҝөтүрәк вә јанымызда отуран баҹы-гардашларла таныш олмаг вә үнсијјәт етмәк имканындан јарарланаг!
8. Әҝәр шәраитимиз јол верирсә, конгресдә көнүллү кими хидмәт етмәк үчүн һансы сәбәбләримиз вар?
8 Чох вахт кәнар мүшаһидәчиләр конгресләримизин мүтәшәккил шәкилдә тәшкил олундуғуну, програм заманы низам-интизамын һөкм сүрдүјүнү вә хүсусилә дә бүтүн бу ишләрин көнүллүләр тәрәфиндән ҝөрүлдүјүнү биләндә һејрәтә ҝәлирләр. Сән дә конгресләрдә көнүллү кими хидмәт едә биләрсәнми? (Мәз. 110:3). Чох вахт аиләләр конгресдә ушаглары илә бирҝә көнүллү кими хидмәт едирләр ки, онлар башгаларына хидмәт етмәји өјрәнсинләр. Әҝәр сән утанҹагсанса, конгрес заманы көнүллү кими хидмәт етмәк сәнә һәмиманлыларымызла таныш олмағын үчүн јахшы имкан јарадаҹаг. Бир баҹы гејд едир: «Аилә үзвләримдән вә бир-ики достларымдан савајы, мән орада һеч кими танымырдым. Лакин тәмизлик ишиндә иштирак едәркән чохлу баҹы-гардашларла таныш олдум. Вахтымыз чох шән кечди!» Конгресдә көнүллү кими хидмәт етмәклә јени достлар газанмаг бизә чохлу севинҹ ҝәтирәҹәк (2 Кор. 6:12, 13). Әҝәр сән һеч вахт көнүллү кими хидмәт етмәмисәнсә, ағсаггаллардан бунун үчүн нә тәләб олундуғуну өјрән.
9. Башгаларыны конгресә неҹә дәвәт едәҹәјик?
9 Гој башгалары да һәгигәти ешитсин. Башгаларыны вилајәт конгресимизә дәвәт етмәк үчүн хүсуси дәвәтнамә һазырланыб. Бүтүн јығынҹаглара кифајәт гәдәр дәвәтнамә ҝөндәриләҹәк вә һәр тәблиғчијә максимум 5 дәвәтнамә дүшәҹәк. Бу дәвәтнамәләри, гоһумларымыз, гоншуларымыз, иш јолдашларымыз, Мүгәддәс Китабы өјрәтдијимиз вә ја һәгигәтә мараг ҝөстәрән инсанлар да дахил олмагла, конгресдә иштирак етмәк истәјән һәр кәсә вермәк олар. Бу дәвәтнамәләри пајлајаркән базар ҝүнү сөјләниләҹәк ачыг мәрузәни хүсусилә вурғуламалыјыг. Ағсаггаллар гејри-фәаллара да дәвәтнамә верилмәсинин гајғысына гала биләрләр.
10. Дәвәтнамә пајламағын јахшы нәтиҹәләр вердијини ҝөстәрән нүмунәләр данышын.
10 Вилајәт конгресләринин бириндә хидмәтчи гардаш бир әр-арвада јер тапмаға көмәк етмишди. Онлар гардаша дедиләр ки, дәвәтнамә онларда мараг ојатды. Бу әр-арвад конгресин кечирилдији јерә ҝәлмәк үчүн 320 километр мәсафә гәт етмишдиләр. Башга бир баҹы исә евдән-евә тәблиғ едәркән конгреслә марагланан бир кишијә дәвәтнамә вермишди. Баҹы онунла бирликдә дәвәтнамәни мүзакирә етди. Бир нечә ҝүндән сонра баҹы һәмин кишини досту илә бирликдә конгресдә ҝөрдү вә онларын әлиндә јени нәшр вар иди!
11. Нәјә ҝөрә һәр ил кечирилән вилајәт конгресиндә иштирак етмәк ваҹибдир?
11 Јеһованын мәһәббәтлә тәсис етдији иллик бајрамларын мәгсәди исраиллиләрә Она «сәмимијјәтлә вә сәдагәтлә» хидмәт етмәјә көмәк етмәк иди (Јешуа 24:14). Ибадәтимизин ајрылмаз һиссәси олан вилајәт конгресләриндә иштирак етмәјимиз дә «һәгигәт јолунда» јеримәјимизә көмәк едир (3 Јәһ. 3). Гој Јеһова һәгигәти севән инсанларын һамысынын бу конгресдә иштирак етмәк вә ондан там фајдаланмаг сәјләринә хејир-дуа версин!
[4 сәһифәдәки шәкил]
Конгресин кечирилдији шәһәрдә өзүмүзү јахшы апармагла һәгигәти бәзәјә биләрик
2012-Ҹи Илин Вилајәт Конгреси Илә Бағлы Хатырлатмалар
◼ Конгресин ҹәдвәли. Програм һәр ҝүн саат 9:20-дә башлајаҹаг. Гапылар саат 8:00-дан ачыг олаҹаг. Падшаһлыг мелодијаларынын сәсләнәҹәји һагда елан едиләндә һәр биримиз јерләримизи тутмалыјыг ки, програм лајигли тәрздә башласын. Програм ҹүмә вә шәнбә ҝүнү 16:55-дә, базар ҝүнү исә саат 15:40-да гуртараҹаг.
◼ Машын дајанаҹағы. Зәһмәт олмаса, инсанлары дүшүртмәк үчүн нәглијјат васитәләрини дүз конгрес залынын ҝиришиндә сахламајын. Истисна анҹаг јашлы вә әлил сәрнишинләр үчүндүр. Мүхтәлиф јерләрдә шәраит фәргли ола биләр, буна ҝөрә дә бүтүн сүрүҹүләрдән хидмәтчиләрин ҝөстәришләринә әмәл етмәләри тәләб олунур.
◼ Јерләр. Әлавә јерләри анҹаг бир машында ҝәлдијиниз вә ја ејни мәнзилдә галдығыныз, јахуд да Мүгәддәс Китабы өјрәтдијиниз адамлар үчүн тутмаг олар (1 Кор. 13:5).
◼ Наһар. Фасилә заманы наһар етмәк үчүн башга јерә ҝетмәк әвәзинә, хаһиш олунур ки, өзүнүзлә јемәк ҝәтирәсиниз. Лазым ҝәлсә, өз отураҹағынызын алтына гоја биләҹәјиниз кичик сојудуҹу чанта ҝәтирмәк олар. Конгресә бөјүк аиләви чанталар, шүшә габлар вә спиртли ичкиләр ҝәтирмәк олмаз.
◼ Көнүллү ианәләр. Вилајәт конгресләринин тәшкилинә мүәјјән гәдәр вәсаит сәрф едилир. Буна ҝөрә миннәтдарлығымызы конгресдә үмумдүнја ишинә көнүллү ианә етмәклә ҝөстәрә биләрик.
◼ Бәдбәхт вә ҝөзләнилмәз һадисәләр. Әҝәр конгресин кечирилдији јердә тәҹили јардыма еһтијаҹ дујуларса, јахында олан хидмәтчи илә әлагә сахла. О, дәрһал илк јардым шөбәсинә мәлумат верәҹәк. Конгресин кечирилдији јердә олан ихтисаслы тибби һејәт јаранан вәзијјәтин нә дәрәҹәдә ҹидди олдуғуну мүәјјәнләшдирәҹәк вә јардым ҝөстәрәҹәк. Лазым ҝәлсә, тәҹили јардым чағырылаҹаг.
◼ Дәрманлар. Әҝәр сиз давамлы шәкилдә дәрман гәбул едирсинизсә, зәһмәт олмаса, онлары өзүнүзлә ҝөтүрмәји унутмајын, чүнки конгресдә дәрманлар верилмир. Шәкәр хәстәләри үчүн олан ијнәләр тәһлүкәли тулланты олдуғундан онлары истифадә етдикдән сонра атаркән ҝөстәришләрә ујғун һәрәкәт етмәк лазымдыр, лакин онлары галдығымыз евин вә ја конгресин кечирилдији залын зибил гутуларына атмаг олмаз.
◼ Ајаггабы. Һәр ил ајаггабыја ҝөрә чохлу сајда адам зәдә алыр. Пилләкәнләрдә, торлу дәмир дөшәмәләрдә вә башга јерләрдә раһат јеримәјә көмәк едән садә ајаггабы ҝејмәк јахшы оларды.
◼ Ушаг арабалары вә ачылыб-јығылан стуллар. Конгресин кечирилдији јерә ушаг арабасы вә ачылыб-јығылан стуллар ҝәтирмәк олмаз. Анҹаг валидејнин отурдуғу јерин јанындакы јерә тәһлүкәсиз ушаг отураҹағыны јерләшдирмәк олар.
◼ Әтирләр. Тәнәффүс јоллары вә бу кими хәстәликләрдән әзијјәт чәкән баҹы-гардашлары нәзәрә алараг кәскин гохусу олан әтир вә одеколонларын истифадәсини мәһдудлашдырмаг бизим тәрәфимиздән хејирхаһлыг оларды (1 Кор. 10:24).
◼ «Зәһмәт олмаса, бу адама баш чәк» (S-43) бланкы. Конгрес заманы гејри-формал шаһидлик верәркән мараг ҝөстәрән һәр бир адам һаггында мәлумат вермәк үчүн «Зәһмәт олмаса, бу адама баш чәк» (S-43) бланкындан истифадә ет. Долдурулмуш бланклары ја әдәбијјат шөбәсинә, ја да конгресдән гајыдандан сонра јығынҹағын катибинә вермәк олар. («Бизим Падшаһлыг Хидмәтимиз» вәрәгәсинин 2011-ҹи ил мај сајынын 3-ҹү сәһифәсинә бахын.)
◼ Кафе вә ресторанлар. Белә јерләрдә ҝөзәл давранышынла Јеһованын адыны иззәтләндир. Әҝәр белә бир адәт варса, хидмәт ҝөстәрәнләрә чајпулу сахла.
◼ Јерләшдирилмә. Шәхси мәнзилдә галмағы сифариш етдикдә нөвбәти мәгамлары нәзәрә алмаг лазымдыр:
1) бүтүн һалларда мәнзил сифариши үчүн «Хүсуси тәләбатлы шәхсләр үчүн мәнзил сорғусу» (CO-5а) бланкындан истифадә един;
2) хаһиш олунур, јадда сахлајын ки, галмаг үчүн евләр анҹаг конгрес мүддәтинә тәгдим олунур;
3) ушагларыныза нәзарәт един вә онлары һеч вахт тәк бурахмајын;
4) һәмиманлыларымызын гонагпәрвәрлијиндән истифадә едәркән миннәтдарлығынызы билдирмәји јаддан чыхармајын;
5) әҝәр сиз мәнзил сифаришинизи ләғв етмәк мәҹбуријјәтиндәсинизсә, бу һагда ләнҝимәдән јығынҹағынызын катибинә мәлумат вермәји унутмајын
◼ Көнүллүләрин хидмәти. Конгресдә лазым олан ишдә көнүллү олараг көмәк етсәк, орада иштирак етмәјимиздән әлдә етдијимиз севинҹ бирә-беш артаҹаг (Һәв. иш. 20:35). Конгресдә көнүллү кими хидмәт етмәк истәјән һәр кәс конгресин Көнүллүләрин хидмәти шөбәсинә мүраҹиәт етмәлидир. 16 јашындан ашағы олан ушаглар да валидејнләринин, јахуд онлара ҹавабдеһ олан башга бөјүкләрин нәзарәти алтында ишләјәрәк өз төһфәләрини верә биләрләр.