Јахшы мүәллим олмаг үчүн ән ваҹиб хүсусијјәт
1. Јахшы мүәллим олмаг үчүн ән ваҹиб хүсусијјәт һансыдыр?
1 Јахшы Мүгәддәс Китаб мүәллими олмаг үчүн нә лазымдыр? Али тәһсил? Тәҹрүбә, јохса фитри истедад? Әслиндә, бу, Ганунун иҹрасы олан, Исанын шаҝирдләрини танымаға көмәк едән, еләҹә дә Јеһованын дөрд әсас хүсусијјәти арасында үстүнлүк тәшкил едән ән ваҹиб хүсусијјәтдир (Јәһ. 13:35; Галат. 5:14; 1 Јәһ. 4:8). Бу хүсусијјәт мәһәббәтдир. Јахшы мүәллим мәһәббәт тәзаһүр етдирмәлидир.
2. Инсанлары севмәк нә үчүн ваҹибдир?
2 Инсанлара мәһәббәт. Бөјүк мүәллим Иса инсанлара мәһәббәтлә јанашырды вә бу да, өз нөвбәсиндә, инсанлары она гулаг асмаға тәшвиг едирди (Лука 5:12, 13; Јәһ. 13:1; 15:13). Әҝәр биз дә инсанлары севириксә, онда һәр бир фүрсәтдән истифадә едәрәк онлара тәблиғ едәҹәјик. Тәгибләр вә инсанларын лагејд мүнасибәти бизә әнҝәл олмајаҹаг. Биз тәблиғ етдијимиз инсанлара сәмими мараг ҝөстәрәҹәк вә тәгдимәмизи онлары нараһат едән шејләрә ујғунлашдыраҹағыг. Мүгәддәс Китабы өјрәтдијимиз инсана тәкҹә дәрс кечмәклә јох, һәм дә кечәҹәјимиз дәрсә габагҹадан һазырлашмагла вахт ајыраҹағыг.
3. Мүгәддәс Китаб һәгигәтләрини севмәк хидмәтимиздә бизә неҹә көмәк едир?
3 Мүгәддәс Китаб һәгигәтләринә мәһәббәт. Иса Мәсиһ һәмчинин Мүгәддәс Китаб һәгигәтләрини дә севир вә онлара дәјәрли бир хәзинә кими јанашырды (Мат. 13:52). Әҝәр биз һәгигәти севириксә, шөвглә данышаҹағыг, бунун да сајәсиндә инсанлар бизә даһа һәвәслә гулаг асаҹаглар. Бу ҹүр мәһәббәт бизә диггәтимизи өз мәһдудијјәтләримизә ҹәмләмәк әвәзинә, чатдырдығымыз хәбәрин ваҹиблијинә јөнәлтмәјә көмәк едәҹәк. Бунунла да хидмәтдә бир о гәдәр һәјәҹанланмајаҹағыг.
4. Мәһәббәти неҹә инкишаф етдирә биләрик?
4 Мәһәббәт инкишаф етдирмәк. Өзүмүздә инсанлара гаршы мәһәббәти неҹә јетишдирә биләрик? Јеһова вә Оғлунун ҝөстәрдији мәһәббәтин үзәриндә дүшүнмәклә вә әразимиздәки инсанларын руһани ҹәһәтдән дәһшәтли вәзијјәтдә олдуғуну унутмамагла (Марк 6:34; 1 Јәһ. 4:10, 11). Мүгәддәс Китаб һәгигәтләринә мәһәббәтимиз мүнтәзәм олараг шәхси өјрәнмә кечирмәјин вә өјрәндикләримизин үзәриндә дәриндән дүшүнмәјин сајәсиндә артаҹаг. Мәһәббәт руһун бәһрәсидир (Галат. 5:22). Буна ҝөрә дә, биз Јеһовадан мүгәддәс руһ диләјә вә мәһәббәтимизи артырмасы үчүн көмәк истәјә биләрик (Лука 11:13; 1 Јәһ. 5:14). Али тәһсилимиздән, һәгигәтдә нечә ил олмағымыздан вә габилијјәтләримиздән асылы олмајараг, биз мәһәббәт тәзаһүр етдирмәклә јахшы Мүгәддәс Китаб мүәллими ола биләрик.