«Буну һәмишә един» Хатирә ҝеҹәси апрелин 5-и гејд олунаҹаг
1. Хатирә ҝеҹәсини гејд етмәк нәјә ҝөрә олдугҹа ваҹибдир?
1 «Хатирәми јад етмәк үчүн буну һәмишә един» (Лука 22:19). Иса Мәсиһ бу сөзләри демәклә шаҝирдләринә һәјатыны гурбан вердији ҝүнү гејд етмәләрини тапшырды. Фидјә там шәкилдә өдәнилдијинә ҝөрә мәсиһчиләр үчүн һәр ил Хатирә ҝеҹәсини гејд етмәк гәдәр ваҹиб вә әзиз һеч нә јохдур. Апрел ајынын 5-и артыг јахынлашыр, бәс биз Јеһоваја миннәтдарлығымызы неҹә ҝөстәрә биләрик? (Колос. 3:15).
2. Арашдырма апармағын вә дүшүнмәјин сајәсиндә Хатирә ҝеҹәсинә ҝөрә миннәтдар олдуғумузу неҹә ҝөстәрә биләрик?
2 Һазырлаш. Адәтән, ваҹиб сајдығымыз шејләрә габагҹадан һазырлашырыг. Биз Иса Мәсиһин јерүзү һәјатынын сон ҝүнләриндә баш вермиш һадисәләри аиләликҹә нәзәрдән кечирмәклә вә онларын үзәриндә дүшүнмәклә үрәјимизи Хатирә ҝеҹәсинә һазырлаја биләрик (Езра 7:10, КМ). Тәгвимдә вә «Мүгәддәс Јазылары һәр ҝүн арашдырын» брошүрасында Мүгәддәс Китабдан бәзи парчалар, «Ҝөзәтчи гүлләси»нин 2011-ҹи ил апрел—ијун сајынын 21—24-ҹү сәһифәләриндә исә там сијаһы илә бирликдә «Иса Мәсиһин һәјаты вә хидмәти» китабындан мүнасиб фәсилләр ҝәтирилир.
3. Хидмәтдә даһа чох иштирак етмәклә Хатирә ҝеҹәсинә ҝөрә миннәтдарлығымызы неҹә ҝөстәрә биләрик?
3 Тәблиғ ет. Биз Хатирә ҝеҹәсинә ҝөрә миннәтдар олдуғумузу хидмәтдә әлимиздән ҝәлдији гәдәр чох иштирак етмәклә дә ҝөстәрә биләрик (Лука 6:45). Хидмәтдә даһа чох иштирак етмәк үчүн, һәтта, ола билсин, көмәкчи пионер хидмәти ҝөтүрмәк үчүн графикиндә дәјишикликләр едә биләрсәнми? Нәјә ҝөрә нөвбәти аиләви ибадәт заманы буну аиләнизлә мүзакирә етмәјәсиниз?
4. Хатирә ҝеҹәсини гејд етмәјимиз бизә һансы фајданы ҝәтирә биләр?
4 Һәр ил Хатирә ҝеҹәсиндә иштирак етмәк бизә бөјүк фајда ҝәтирир! Јеһованын јеҝанә Оғлуну фидјә кими тәгдим етмәклә ҝөстәрдији фәдакарлығын үзәриндә дүшүнсәк, хидмәтдә севинҹимиз вә Аллаһа мәһәббәтимиз артаҹаг (Јәһ. 3:16; 1 Јәһ. 4:9, 10). Бу, бизи вадар едәҹәк ки, артыг өзүмүз үчүн јашамајаг (2 Кор. 5:14, 15). Ејни заманда, бу, биздә инсанлар гаршысында Јеһоваја һәмд етмәк истәји ојадаҹаг (Мәз. 102:19—21). Әлбәттә, Јеһованын јахшылыг билән хидмәтчиләри бөјүк сәбирсизликлә ҝөзләјирләр ки, апрелин 5-и Хатирә ҝеҹәси заманы Ағамызын өлүмүнү бәјан етсинләр (1 Кор. 11:26).