Ҝәлин Јеһоваја миннәтдар олдуғумузу ҝөстәрәк Хатирә Ҝеҹәси — 17 апрел
1. Мәзмурчунун ифадә етдији һансы һиссләр Хатирә Ҝеҹәси илә әлагәдар хүсусилә јериндәдир?
1 Јеһованын она дәфәләрлә мәрһәмәт ҝөстәрдијинә вә ону хилас етдијинә ҝөрә миннәтдар олан мәзмурчу белә демәјә тәшвиг олунмушду: «Мәнә етдији ҹомәрдлијә ҝөрә Рәббин борҹуну неҹә гајтара биләрәм?» (Мәз. 116:12). Бу ҝүн Аллаһын хидмәтчиләринин миннәтдар олмаг үчүн даһа чох сәбәбләри вар. Аллаһдан илһам алмыш бу сөзләр гәләмә алындыгдан јүзилликләр сонра Јеһова бәшәријјәтә бөјүк бир һәдијјә — фидјә гурбанлығыны бәхш етди. Биз Мәсиһин өлүмүнүн ил дөнүмүнү апрелин 17-дә гејд етмәјә һазырлашырыг вә бу, Јеһоваја миннәтдарлығымызы билдирмәк үчүн ҝөзәл имкандыр (Колос. 3:15).
2. Фидјә гурбанлығына ҝөрә нә үчүн миннәтдар олмалыјыг?
2 Фидјәнин ҝәтирдији хејир-дуалар. Фидјә гурбанлығы васитәсилә ‘ҝүнаһларымыз бағышланыр’ (Колос. 1:13, 14). Онун сајәсиндә биз Јеһоваја тәмиз виҹданла ибадәт едә билирик (Ибр. 9:13, 14). Дуа едәркән Јеһованын гаршысында ҹәсарәтлә данышмаг имканына маликик (Ибр. 4:14—16). Фидјә гурбанлығына иман ҝәтирәнләри гаршыда әбәди һәјат ҝөзләјир! (Јәһ. 3:16).
3. Фидјә гурбанлығына ҝөрә Јеһоваја миннәтдарлығымызы неҹә билдирә биләрик?
3 Миннәтдарлығын тәзаһүрү. Үрәкдән миннәтдар олдуғумузу билдирмәјин үсулларындан бири Хатирә Ҝеҹәси үчүн нәзәрдә тутулмуш Мүгәддәс Китаб парчаларыны һәр ҝүн охујуб үзәриндә дүшүнмәкдир. «Ҝөзәтчи Гүлләси» журналынын 2011-ҹи ил 1 феврал сајындакы «Илин ән мүһүм һадисәсинә һазырсынызмы?» (рус.) адлы мәгалә бу саһәдә бизә көмәк етмәк үчүн нәзәрдә тутулуб. Һәмчинин биз фидјәјә ҝөрә нә гәдәр миннәтдар олдуғумузу сәмими дуамызда Јеһоваја билдирә биләрик (1 Салон. 5:17, 18). Хатирә Ҝеҹәсиндә иштирак етмәклә Исанын миннәтдарлыг тәзаһүр етдирмәк ҝөстәришинә әмәл етдијимизи ҝөстәририк (1 Кор. 11:24, 25). Үстәлик, биз Јеһованын бол мәһәббәтини тәглид едәрәк мүмкүн гәдәр даһа чох инсаны бу мәрасимә дәвәт едә биләрик (Јешаја 55:1—3).
4. Биз нәјә гәти гәрарлы олмалыјыг?
4 Јеһоваја миннәтдар олан мәсиһчиләр Хатирә Ҝеҹәсинә ади ҝөрүш кими јанашмырлар. Бу, илин ән мүһүм һадисәсидир! Хатирә Ҝеҹәси јахынлашдыгҹа ҝәлин биз дә мәзмурчу кими гәтијјәтли олаг: «Рәббә алгыш ет, еј көнлүм, унутма етдији јахшылыглары» (Мәз. 103:2).