Инсанлара Аллаһа гулаг асмаға көмәк един
1. «Гој Аллаһын Падшаһлығы ҝәлсин!» вилајәт конгресиндә һансы брошүралар ишыг үзү ҝөрдү вә онлары фајдалы вәсаит едән нәдир?
1 «Гој Аллаһын Падшаһлығы ҝәлсин!» вилајәт конгресиндә «Аллаһын сөзүнә гулаг ас вә әбәдијјән јаша», еләҹә дә онун садәләшдирилмиш формасы олан «Аллаһын сөзүнә гулаг ас» адланан ики брошүра ишыг үзү ҝөрдү. Бу брошүраларын мәтни аз олдуғу үчүн онлары асанлыгла вә тез тәрҹүмә етмәк олар. Һәмин вахт «Аллаһын сөзүнә гулаг ас вә әбәдијјән јаша» брошүрасынын тәрҹүмәсинә 431 дилдә иҹазә верилмишди.
2. Бу брошүралар кимләр үчүн јарарлы олаҹаг?
2 Бу брошүралар хүсусилә кимләр үчүн јарарлы олаҹаг? Тәблиғ заманы бүтүн дүнјада тез-тез јаранан нөвбәти вәзијјәтләрә диггәт јетирин:
• Тәблиғчи илк вә ја тәкрар башчәкмә заманы ҝөрүр ки, ев саһиби охуја билмир вә ја охума габилијјәти зәифдир.
• Тәблиғчи нәшрләримизин аз вә ја үмумијјәтлә тәрҹүмә олунмадығы дилдә данышан инсанлара тәблиғ едир. Јахуд да һәмин әразидә јашајан инсанларын әксәријјәти сәлис данышдығы дилдә охумағы баҹармыр.
• Тәблиғчи лал-кар инсанлара жест дилиндә шаһидлик верир.
• Валидејн һәлә охумағы баҹармајан балаҹа ушағына һәгигәти өјрәтмәк истәјир.
3. «Аллаһын сөзүнә гулаг ас» брошүрасы неҹә тәртиб олунуб?
3 Брошүраларын тәртибаты. «Аллаһын сөзүнә гулаг ас» брошүрасынын мәтни чох аздыр. Демәк олар ки, һәр сәһифәнин ашағы һиссәсиндә әсас фикирләри вурғулајан садә ҹүмлә вә бир Мүгәддәс Китаб ајәси ҝәтирилиб. Нәјә ҝөрә? Тәсәввүр един ки, сизә билмәдијиниз дилдә вә ја әлифбада јазылан брошүра тәклиф едирләр. Ҝөзәл шәкилләри олмасына бахмајараг, о, сизин үчүн мараглы олаҹаг? Чох ҝүман ки, јох. Ејнилә, охумағы баҹармајан инсанлар мәтни олан нәшрләри ҝөрәндә өзләрини нараһат һисс едирләр. Бу сәбәбдән һәр сәһифәдә инсанын нәзәринә илк өнҹә диггәтлә һазырланмыш шәкилләр чарпыр вә һәр шәкилдә нөвбәти шәкилә јөнәлдән ох ишарәси вар.
4. «Аллаһын сөзүнә гулаг ас вә әбәдијјән јаша» брошүрасы неҹә тәртиб олунуб?
4 «Аллаһын сөзүнә гулаг ас вә әбәдијјән јаша» брошүрасындакы шәкилләр «Аллаһын сөзүнә гулаг ас» брошүрасындакы шәкилләрлә ејнидир. Бу брошүра пис охујан вә ја охумағы тәзә-тәзә өјрәнән инсанлар үчүн нәзәрдә тутулуб. «Аллаһын сөзүнә гулаг ас» брошүрасынын көмәјилә башгасына дәрс кечән тәблиғчи «Аллаһын сөзүнә гулаг ас вә әбәдијјән јаша» брошүрасындан мүәллим вәсаити кими истифадә едә биләр. Ики сәһифә бир дәрсдир вә јухарыдакы сол күнҹдә ҹавабы һәмин сәһифәләрдә верилән суал јерләшир. Шәкилләр ајә вә шәрһләрлә мүшајиәт олунур. Әксәр дәрсләрин сонунда әлавә фикир вә Мүгәддәс Китаб ајәләринин јерләшдији чәрчивә вар. Һәмин фикир вә суаллары шаҝирдин баҹарыглары нәзәрә алынараг мүзакирә олуна биләр.
5. Биз бу брошүралары нә заман вә неҹә тәклиф едә биләрик?
5 Истифадә гајдалары. Сиз бу брошүралары мүнасиб сандығыныз һалларда, һәтта онлар һәмин ајда пајланан әдәбијјатлар сијаһысында олмајанда белә евдән-евә тәблиғ едәркән тәклиф едә биләрсиниз. («Онлары неҹә тәклиф етмәк олар?» чәрчивәсинә бахын.) Һәмин брошүраны тәгдим етмәк үчүн тәкрар башчәкмә заманы марагланан инсана дејә биләрсиниз ки, сиздә онун үчүн мараглы ола биләҹәк мәлумат вар, сонра да брошүраны она вермәк олар.
6. Биз бу ики брошүранын көмәјилә инсанлара Мүгәддәс Китабы неҹә өјрәдәҹәјик?
6 «Аллаһын сөзүнә гулаг ас» брошүрасында чап олунмуш суаллар олмадығы үчүн мүзакирә «Мүгәддәс Китаб өјрәдир» китабынын өјрәнилмәси кими суал-ҹаваб шәклиндә олмајаҹаг. Һәр мәдәнијјәтдә инсанлар һекајәләрә гулаг асмағы хошлајырлар. Буна ҝөрә дә брошүрадакы шәкилләрин көмәјилә Мүгәддәс Китаб һекајәләрини даныш. Шәкилдә тәсвир олунан һадисәләри изаһ ет. Буну шөвглә ет. Һәмсөһбәтиндән өз фикирләрини вә ҝөрдүкләрини данышмағы хаһиш ет. Сәһифәләрин сонундакы ајәләри оху вә онларын әсасында мүлаһизә јүрүт. Һәмсөһбәтини сөһбәтә ҹәлб етмәк үчүн суаллар вер вә она материалы анламаға көмәк ет. Әҝәр о, «Аллаһын сөзүнә гулаг ас вә әбәдијјән јаша» брошүрасындан истифадә едирсә, шәкилләри мүзакирә едәркән шәрһләри вә ајәләри бирҝә охујун.
7. Мүгәддәс Китабы өјрәтдијимиз инсанлара руһән инкишаф етмәјә неҹә көмәк едә биләрик?
7 Мүгәддәс Китабы өјрәнәнләрә руһән инкишаф етмәјә көмәк ет. Үмидварыг ки, мүзакирә һәмсөһбәтинизи охумағы өјрәнмәјә тәшвиг едәҹәк вә о, сәрбәст шәкилдә Јеһова һаггында өзү билик әлдә етмәјә давам едәҹәк (Мат. 5:3; Јәһ. 17:3). Буна ҝөрә дә әҝәр сиз мүзакирәләринизи «Аллаһын сөзүнә гулаг ас» брошүрасы әсасында едирсинизсә, мүнасиб вахтда она јазыб-охумағы өјрәтмәји тәклиф едә биләрсиниз вә сонра «Аллаһын сөзүнә гулаг ас вә әбәдијјән јаша» брошүрасына кечмәк олар. Һансы брошүрадан истифадә етмәјиниздән асылы олмајараг, ону кечиб гуртарандан сонра шаҝирд һәлә вәфтизә һазыр дејил. Шаҝирдин даһа әтрафлы Мүгәддәс Китаб биликләринә јијәләнмәси үчүн она «Мүгәддәс Китаб өјрәдир» китабындан вә ја бу кими диҝәр мүнасиб вәсаитдән кечмәк лазымдыр.
8. Нәјә ҝөрә биз јени вәсаитләрә ҝөрә миннәтдарыг?
8 Инсанлар әбәди јашамаг үчүн Каинатын Али Һөкмдарына гулаг асмалыдырлар (Јешаја 55:3). Јеһованын ирадәси одур ки, охумағы баҹармајан инсанлар да дахил олмагла, «һәр ҹүр инсан» Она гулаг асмағы өјрәнсин (1 Тим. 2:3, 4). Биз неҹә дә миннәтдарыг ки, әлимиздә инсанлара Аллаһа гулаг асмағы өјрәтмәјә көмәк едән белә ҝөзәл вәсаитләр вар!
[3–ҹү сәһифәдәки чәрчивә]
Онлары неҹә тәклиф етмәк олар?
Ев саһибинә 2 вә 3-ҹү сәһифәләри ҝөстәрин вә сорушун: «Сиз белә дүнјада јашамаг истәрдинизми? [Ҹаваб вермәсинә изин верин.] Мүгәддәс Јазыларда [вә ја бу мүгәддәс китабда] вәд олунур ки, Аллаһ тезликлә Јер күрәсинин һеч кәсин хәстәликдән вә ја касыбчылыгдан әзијјәт чәкмәдији ҝөзәл вә сакит бир јерә чевирәҹәк. Ҝөрүн орада јашамаг үчүн биздән нә тәләб олунур. [3-ҹү сәһифәнин јухары башында ситат ҝәтирилән Јешаја 55:3 ајәсини охујун.] Бу ајә бизи Аллаһын јанына ҝәлиб Она гулаг асмаға тәшвиг едир. Бәс биз Аллаһа неҹә гулаг аса биләрик?» 4 вә 5-ҹи сәһифәләри ачын вә ҹавабы онунла бирҝә мүзакирә един. Әҝәр онун вахты јохдурса, брошүраны она верин вә нөвбәти дәфә ҝәлиб суалы мүзакирә етмәк үчүн вахт тәјин един.