«Илаһи мүждә» брошүрасындан неҹә истифадә етмәк олар?
Јени брошүра тәкрар башчәкмәләр етмәк вә Мүгәддәс Китаб өјрәнмәси башламаг үчүн нәшр олунуб
1. «Үрәјини гору!» адлы вилајәт конгресиндә һансы јени брошүра тәгдим олунду?
1 «Үрәјини гору!» адлы вилајәт конгресиндә тәкрар башчәкмәләр етмәјә вә Мүгәддәс Китаб өјрәнмәси башламаға көмәк едән јени брошүра алмағымыз бизи чох руһландырды. «Илаһи мүждә» брошүрасы, «Аллаһ тәләб едир» брошүрасы кими, јығҹам дәрсләрдән ибарәтдир вә ону әвәз едир. Гапы ағзында Мүгәддәс Китаб өјрәнмәси башламаг үчүн бу брошүра еффективдир. «Аллаһ тәләб едир» брошүрасында јени өјрәнәнин мәнимсәмәјә чәтинлик чәкә биләҹәји мәсиһчи тәләбләри мүзакирә олундуғу һалда, јени брошүрада әсас диггәт Мүгәддәс Китабдакы хош хәбәрә ҹәмләниб (Һәв. иш. 15:35).
2. «Илаһи мүждә» брошүрасы нәјә ҝөрә нәшр олунуб?
2 Бу брошүра һансы мәгсәдлә нәшр олунуб? Дүнјанын мүхтәлиф јерләриндән олан һәмиманлыларымыз инсанлары һәгигәтә ҹәлб етмәк вә «Мүгәддәс Китаб өјрәдир» китабына кечид алмаг үчүн садә бир нәшрин бурахылмасыны хаһиш етмишләр. Галын китаблары ҝөрүб горхан бир чох инсанлар брошүра васитәсилә Мүгәддәс Китабы өјрәнмәјә разылыг верирләр. Үстәлик, о, бир чох дилләрә асанлыгла тәрҹүмә олунуб.
3. Бу брошүра диҝәр тәлим үчүн нәзәрдә тутулан нәшрләрдән нә илә фәргләнир?
3 Брошүранын тәртибаты. Бир чох тәлим нәшрләри елә тәртиб олунуб ки, инсан һеч бир көмәклик ҝөстәрилмәдән ону охуја вә һәгигәти баша дүшә биләр. Бу нәшр исә фәрглидир. Бу брошүраны охујан инсан ҝәрәк ону Мүгәддәс Китабы өјрәдән тәблиғчи илә бәрабәр арашдырсын. Буна ҝөрә дә кимәсә бу брошүраны тәклиф едәндә бир вә ја ики абзас мүзакирә етмәк јахшы оларды. Абзаслар гыса олдуғундан онлары инсанла истәр гапы ағзында, истәрсә дә иш јериндә мүзакирә етмәк олар. Биринҹи дәфә дәрс кечәндә брошүранын истәнилән мәгаләсиндән өјрәнмәјә башлаја биләрик.
4. Бу брошүра бизә бирбаша Мүгәддәс Китабдан өјрәтмәјә неҹә көмәк едир?
4 Бир чох әдәбијјатларымызда чап олунмуш суалларын ҹавабыны бирбаша абзаслардан тапмаг олар. Бу брошүрада исә суалларын ҹавабы әсасән Мүгәддәс Китабда јерләшиб. Әксәр инсанлар суалларынын ҹавабыны бизим әдәбијјатларымыздан јох, мәһз Мүгәддәс Китабдан өјрәнмәк истәјирләр. Буна ҝөрә дә бу брошүрада Мүгәддәс Китабдан һеч бир ситат ҝәтирилмир. Онлар ајәни бирбаша Мүгәддәс Китабдан охуја биләрләр. Бу, өјрәнән инсана өјрәндикләринин Аллаһдан олдуғуну анламаға көмәк едәҹәк (Јешаја 54:13).
5. Нә үчүн тәблиғчи һәр өјрәнмәдән өнҹә јахшыҹа һазырлашмалыдыр?
5 Брошүрада бүтүн ајәләрә изаһат верилмир. Нәјә ҝөрә? Бу, өјрәнәни суаллар вермәјә вә тәблиғчини исә өјрәтмә габилијјәтиндән истифадә етмәјә тәшвиг едир. Буна ҝөрә һәр өјрәнмәдән өнҹә, јахшыҹа һазырлашмаг лазымдыр. Бир шеји јаддан чыхарма: һәддән чох данышмаг лазым дејил. Адәтән, биз Мүгәддәс Китабдан ајәләри изаһ етмәји хошлајырыг. Анҹаг өјрәнәни садәҹә ајәни неҹә баша дүшдүјүнү изаһ етмәјә тәшвиг етмәмәлијик. Һәмчинин суаллардан мәһарәтлә истифадә едәрәк өјрәнән инсана һәр бир ајәнин мәғзини баша дүшмәјә көмәк едә биләрик (Һәв. иш. 17:2).
6. Биз бу брошүрадан а) Аллаһа вә Мүгәддәс Китаба инанмајан инсанларла сөһбәт едәркән, б) евдән-евә тәблиғдә, ҹ) бирбаша Мүгәддәс Китаб өјрәнмәсинә башламаг үчүн вә ч) тәкрар башчәкмә едәркән неҹә истифадә едә биләрик?
6 Һәмин ај һансы әдәбијјатын тәгдим олунмасындан асылы олмајараг, Мүгәддәс Китаб өјрәнмәси кечирмәк үчүн нәзәрдә тутулан диҝәр нәшрләр кими бу брошүраны да истәнилән вахт тәгдим едә биләрик. Гапы ағзында бирбаша Мүгәддәс Китаб өјрәнмәси башламаг үчүн бу брошүрадан истифадә едәнләрин бир чоху севинҹ әлдә едәҹәк. Үстәлик, вилајәт конгресиндә дејилдији кими, мараг ҝөстәрән инсана јенидән баш чәкәркән «[бу брошүранын] сајәсиндә тәкрар башчәкмәләри даһа мараглы етмәк олар!» (5, 6 вә 7-ҹи сәһифәләрдәки чәрчивәләрә бах.)
7. Брошүрадан истифадә едәрәк Мүгәддәс Китаб өјрәнмәсини неҹә кечирә биләрик?
7 Өјрәнмәни неҹә кечирә биләрик? Мүзакирәјә нөмрәләнмиш вә галын шрифтлә јазылмыш суаллары охумагла башлаја биләрик. Сонра абзасы вә курсивлә јазылмыш ајәни (ајәләри) оху. Суаллардан мәһарәтлә истифадә едәрәк өјрәнәнә ајәнин мәғзини баша дүшмәјә көмәк ет. Нөвбәти һиссәјә кечмәздән өнҹә, инсанын баша дүшдүјүнә әмин олмаг үчүн галын шрифтлә јазылмыш суала ҹаваб вермәсини хаһиш ет. Илк башчәкмәнин гыса олмасы үчүн галын шрифтлә јазылмыш јалныз бир суалы мүзакирә етмәк јахшы оларды. Бир мүддәтдән сонра исә вахты узадараг дәрсин һамысыны кечә биләрик.
8. Ајәләри неҹә тәгдим етмәлијик вә нәјә ҝөрә?
8 Һансы ајәләрдән сонра «охујун» јазылыбса, о ајәләр галын шрифтлә верилмиш суалын бирбаша ҹавабыдыр. Диггәти ајәләрә јөнәлдәркән «һәвари Павел јазмышды» вә ја «ҝөр Јеремја һансы пејғәмбәрлији едиб» кими ифадәләрдән гачынмалыјыг. Һәмин инсана елә ҝәлә биләр ки, биз ади инсанларын сөзләрини охујуруг. Бунун әвәзинә, «ҝөрүн пејғәмбәрин Аллаһдан илһам алараг гәләмә алдығы пејғәмбәрликдә нә дејилир» вә ја «ҝөрүн Төвратда, Зәбурда вә ја Инҹилдә нә дејилир» кими сөзләрдән истифадә етсәк, даһа јахшы олар.
9. Өјрәнмә заманы ситат ҝәтирилән ајәләрин һамысыны охумаг лазымдыр?
9 Ситат ҝәтирилән бүтүн ајәләри, јохса јалныз «охујун» јазылан ајәләри охумаг лазымдыр? Шәраити нәзәрә ал. Ситат ҝәтирилән ајәнин һеч бири садәҹә Мүгәддәс Китабда олдуғу үчүн брошүраја салынмајыб. Онларын һәр бириндә мүзакирә олунмаға дәјән дәјәрли фикирләр вар. Анҹаг бәзи вәзијјәтләрдә, мәсәлән, өјрәнәнин вахты вә марағы аздырса, еләҹә дә охумаг габилијјәти зәифдирсә, бу заман јалныз «охујун» ајәләринә диггәт јетирмәк лазымдыр.
10. «Мүгәддәс Китаб өјрәдир» китабына нә вахт кечә биләрик?
10 «Мүгәддәс Китаб өјрәдир» китабына нә вахт кечә биләрик? Бир вә ја бир нечә мүзакирәдән сонра өјрәнмәнин мүнтәзәм олуб-олмадығыны дәгигләшдириб ја «Мүгәддәс Китаб өјрәдир» китабына кечә, ја да «Илаһи мүждә» брошүрасыны ахыра гәдәр арашдыра биләрик. Тәблиғчиләр нөвбәти нәшрә нә заман кечәҹәкләрини өзләри гәрарлашдыра биләрләр. Бәс әҝәр «Мүгәддәс Китаб өјрәдир» китабына кечсәк, ону арашдырмаға әввәлдән башламалыјыг? Бунунла бағлы һеч бир ҝөстәриш јохдур. Инсанлар бир-бириндән фәрглидир. Лакин бир чох инсанлар ејни мөвзуну «Мүгәддәс Китаб өјрәдир» китабындан јенидән арашдыранда даһа чох мәлумат әлдә едирләр.
11. Нәјә ҝөрә бу јени брошүрадан јахшы истифадә етмәлијик?
11 Хош хәбәрин надир һалларда ешидилдији бир дүнјада бизә ән јахшы хәбәри — Аллаһын Падшаһлығынын рәһбәрлији вә бу Падшаһлығын салеһлијин өмүр сүрәҹәји јени бир дүнја јарадаҹағы хәбәрини тәблиғ етмәк шәрәфи верилиб (Мат. 24:14; 2 Пет. 3:13). Биз әминик ки, хош хәбәри ешидән чохлары нөвбәти сөзләрлә разылашаҹаглар: «Сүлһ хәбәри ҝәтирән, дағлары ашыб-ҝәлән мүждәчинин гәдәмләри неҹә дә ҝөзәлдир! О, хош мүждә ҝәтирир, гуртулуш хәбәри верир, Сион халгына “Аллаһыныз һөкм сүрүр!” бәјан едир» (Јешаја 52:7). Ҝәлин бу јени брошүрадан истифадә едәрәк Аллаһдан ҝәлән илаһи мүждәни әразимиздә јашајан руһани һәгигәтләрә сусајан инсанлара чатдыраг.
[5–ҹи сәһифәдәки чәрчивә]
Аллаһа вә Мүгәддәс Китаба инанмајан инсанларла сөһбәт едәркән
● Бәзи әразиләрдә тәблиғчиләр мүшаһидә етмишләр ки, «Аллаһ» вә «Мүгәддәс Китаб» сөзләрини истифадә етмәк инсанлар тәрәфиндән етираза сәбәб олур. Јахшы оларды ки, илк башчәкмә заманы әразинизә ујғун мөвзу барәдә сөһбәтә башлајасыныз. Мәсәлән, еһтијаҹ дујулан ҝөзәл һакимијјәтдән, аиләләрә көмәк үчүн практики мәсләһәтләрдән вә ҝәләҹәкдә бизи нәләрин ҝөзләдијиндән даныша биләрик. Марагланан инсанла бир нечә дәфә сөһбәт етдикдән сонра «Илаһи мүждә» брошүрасыны тәгдим едәрәк Аллаһын мөвҹудлуғуна даир сүбутлары вә Мүгәддәс Китабын нәјә ҝөрә етибаралајиг олдуғуну изаһ етмәк олар.
[6–ҹы сәһифәдәки чәрчивә]
Евдән-евә тәблиғдә
● «Гапынызы дөјмәкдә мәгсәдим одур ки, сизә Аллаһын бәшәријјәтә даир нијјәтини билмәјин нә гәдәр асан олдуғуну ҝөстәрим. Аллаһын әзаб-әзијјәтләримизи нә вахтса арадан галдыраҹағы барәдә һеч дүшүнмүсүнүзмү? [Ҹаваб вермәсинә изин вер.] Бу брошүра һәмин суала Мүгәддәс Китабын һансы ајәсиндән ҹаваб тапаҹағымызы ҝөстәрир. [Брошүраны она вер вә биринҹи фәслин биринҹи абзасыны, еләҹә дә Јеремја 29:11 ајәсини оху.] Бу ајәдән Аллаһын бизим үчүн даһа јахшы ҝәләҹәк арзуладығы ҝөрүнүр? [Ҹаваб вермәсинә изин вер.] Әҝәр истәјирсинизсә, бу брошүранын бир нүсхәсини сизә верә биләрәм. Ҝәлән дәфә икинҹи абзасы мүзакирә едә биләрик вә: “Аллаһ тезликлә әзаб-әзијјәтин көкүнү неҹә кәсәҹәк?” — суалынын ҹавабыны Мүгәддәс Китабдан тапа биләрик». Әҝәр илк башчәкмә заманы ев саһибинин сөһбәт етмәк үчүн вахты варса, онда икинҹи абзасы вә үч ајәни дә охујуб мүзакирә едә биләрсән. Нөвбәти дәфә баш чәкәркән бу фәслин икинҹи суалыны мүзакирә етмәк олар.
● «Бир чох инсанлар дуа едирләр, хүсусилә дә чәтинликләри оланда. Бәс сиз дуа едирсиниз? [Ҹаваб вермәсинә изин вер.] Неҹә дүшүнүрсүнүз, Аллаһ бүтүн дуалары динләјир, јохса бәзи дуалар она мәгбул дејил? [Ҹаваб вермәсинә изин вер.] Мәндә Мүгәддәс Китабын бу суаллара неҹә ҹаваб вердијини ҝөстәрән брошүра вар. [Бир нүсхәсини она вер вә бирликдә 12-ҹи фәслин биринҹи абзасыны вә «охујун» ајәләрини мүзакирә един.] Мәҝәр Аллаһын бизи динләмәк истәмәси һејрәтамиз дејил? Дуаларымызын Аллаһ тәрәфиндән гәбул олунмасыны истәјириксә, Ону даһа јахшы танымалыјыг. [Брошүранын 2-ҹи фәслини ач вә орадакы јарымбашлыглары вурғула.] Әҝәр истәсәниз, бу брошүраны сизә верә биләрәм вә нөвбәти дәфә бурадакы мараглы суаллара Мүгәддәс Китабын вердији ҹаваблары арашдырарыг».
● «Бу ҝүн инсанлары дүнјанын ҝедишаты нараһат едир. Бу барәдә сизин фикринизи дә билмәк мараглы оларды. Неҹә фикирләширсиниз, һәр шеј нә вахтса јахшылыға доғру дәјишәҹәкми? [Ҹаваб вермәсинә изин вер.] Бир чохлары Мүгәддәс Китабда бизә үмид верәҹәк хош хәбәрин олдуғуну өјрәнәндә тәәҹҹүбләнирләр. Бу брошүрада Мүгәддәс Китабын ҹавабландырдығы бир чох суаллар вар». Брошүраны она вер, арха сәһифәдәки суаллары ҝөстәр вә ону марагландыран суалы сечмәсини хаһиш ет. Онун сечдији фәсли ач вә өјрәнмәнин неҹә кечирилдијини ҝөстәр. Ҝәлән дәфә һәмин фәслин нөвбәти суалыны мүзакирә етмәк үчүн вахт тәјин ет.
[7–ҹи сәһифәдәки чәрчивә]
Бирбаша Мүгәддәс Китаб өјрәнмәсинә башламаг үчүн
● «Сизи сахламагда мәгсәдим Мүгәддәс Китаб өјрәнмәси тәклиф етмәкдир. Бу брошүрадакы 15 фәслин көмәјилә ваҹиб суалларын ҹавабыны Мүгәддәс Китабдан тапа биләрсиниз. [Брошүранын үз габығыны вә арха сәһифәсини ҝөстәр.] Нә вахтса Мүгәддәс Китаб тәлимләрини баша дүшмәјә чалышмысынызмы? [Ҹаваб вермәсинә изин вер.] Иҹазә верин, орадакы тәлимләрин неҹә асан олдуғуну сизә ҝөстәрим. [3-ҹү фәслин 3-ҹү суалынын 1-ҹи абзасыны вә Вәһј 21:4, 5 ајәләрини охујун вә мүзакирә един. Әҝәр шәраит јол верирсә, нөвбәти абзасы вә «охујун» ајәләрини дә арашдырын.] Әҝәр истәјирсинизсә, мән бу брошүраны сизин үчүн сахлаја биләрәм. Мәсләһәт ҝөрүрүк ки, һеч олмаса бир дәфә Мүгәддәс Китаб өјрәнмәси кечәсиниз. Хошунуза ҝәлсә, Мүгәддәс Китабы өјрәнмәји давам етдирә биләрсиниз. Ҝәлән дәфә 1-ҹи фәсли сизинлә мүзакирә едә биләрик. Гејд етмәк истәрдим ки, бу фәсил ҹәми бирҹә сәһифәдир».
[7–ҹи сәһифәдәки чәрчивә]
Тәкрар башчәкмә едәркән
● Марагланан инсана тәкрар баш чәкәркән белә демәк олар: «Сизи јенидән ҝөрмәјимә шадам. Мән сизә бу брошүраны ҝәтирмишәм, орада чохлу мараглы суаллара Мүгәддәс Китаб васитәсилә ҹаваб верилир. [Брошүраны она вер вә арха сәһифәсинә бахмағы тәклиф ет.] Бу мөвзулардан һансы сизи даһа чох марагландырыр? [Ҹаваб вермәсинә изин вер. Сонра онун сечдији фәсли ач.] Иҹазә верин, бу брошүрадан Мүгәддәс Китабын вердији ҹаваблары тапмаг үчүн неҹә истифадә едә биләҹәјимизи ҝөстәрим». Мүгәддәс Китаб өјрәнмәсинин неҹә кечирилдијини ҝөстәрмәк үчүн бир вә ја ики абзасы, еләҹә дә «охујун» ајәләрини мүзакирә един. Будур, сән артыг Мүгәддәс Китаб өјрәнмәсинә башладын! Брошүраны ев саһибинә вер вә нөвбәти дәфә баш чәкмәк үчүн вахт тәјин ет. Бу фәсли битирдикдән сонра ја ев саһибинин сечдији нөвбәти фәсли кечә, ја да брошүранын биринҹи фәсилдән башлаја биләрсән.