Суаллар гутусу

◼ Јығынҹаг ҝөрүшләри вә хидмәт заманы мобил телефонларын истифадәсинә даир һансы Мүгәддәс Китаб принсипләрини тәтбиг етмәк олар?

«Һәр шејин өз вахты вар» (Ваиз 3:1). Мобил телефон васитәсилә инсанлар истәдикләри заман месажлаша вә зәнҝләшә билирләр. Лакин бәзи һалларда мәсиһчиләр һеч нәјин онлары јајындырмасыны истәмирләр. Мәсәлән, јығынҹаг ҝөрүшләри Јеһоваја ибадәт етмәк, руһани рәһбәрлик алмаг вә бир-биримизи руһландырмаг үчүндүр (Ганун. т. 31:12; Мәз. 22:22; Ром. 1:11, 12). Јығынҹаға ҝәләндә телефонларымызы сөндүрүб, месажларымызы ҝөрүш гуртарандан сонра залдан чыханда охуја биләрик. Әҝәр тәҹили зәнҝ ҝөзләјириксә, башгаларына мане олмамаг үчүн телефонумузу сәссиз режимә гојмалыјыг.

«Бүтүн бунлары хош хәбәр уғрунда [ет]» (1 Кор. 9:23). Һәрдән хидмәтдә телефондан истифадә етмәк үчүн әсаслы сәбәбимиз олур. Мисал үчүн, тәблиғдә група нәзарәт едән гардаш саһәнин диҝәр һиссәсиндәки вәзијјәтдән һалы олмаг үчүн телефондан истифадә етмәли олур. Бәзән тәблиғчиләр мараглананлара вә Мүгәддәс Китабы өјрәтдикләри инсанлара, әсасән дә узагда јашајанлара баш чәкмәздән өнҹә онларла телефон васитәсилә әлагә сахлајырлар. Әҝәр үстүмүздә телефон варса, диггәтли олмалыјыг ки, ев саһиби илә сөһбәтимизә мане олмасын (2 Кор. 6:3). Диҝәр тәблиғчиләри ҝөзләјәркән достумуза зәнҝ етмәк вә месаж јазмаг әвәзинә, диггәтимизи хидмәтә вә әмәкдашымыза јөнәлтмәк даһа јахшы олмаздымы?

Башгаларына гаршы диггәтли ол (1 Кор. 10:24; Филип. 2:4). Биз һеч вахт истәмәздик ки, һәр дәфә групун һарада тәблиғ етдијини зәнҝ вә ја месажла өјрәнәҹәјимизә үмид едәрәк тәблиғ хидмәти ҝөрүшләринә вахтында ҝәлмәјә етинасыз јанашаг. Чох еһтимал ки, биз ҝеҹ ҝәләндә групу јенидән бөлмәк лазым ҝәлир. Әлбәттә, бәзән биздән асылы олмајан сәбәбләр уҹбатындан ҝеҹикирик. Анҹаг вахтында ҝәлмәји вәрдиш етсәк, Јеһоваја, мәсул гардаша вә диҝәр тәблиғчиләрә һөрмәт ҝөстәрмиш олаҹағыг.