2015-ҹи илин Теократик Хидмәт Мәктәби өјрәтмәк габилијјәтимизи тәкмилләшдирмәјә көмәк едир

¹ Мәзмурчу Давуд јазмышды: «Гој ағзымдан чыхан сөзләр, гәлбимдәки дүшүнҹәләр Сәни мәмнун етсин, еј Јеһова, гајам, хиласкарым!» (Мәз. 19:14). Биз дә сөзләримизин Јеһованы мәмнун етмәсини истәјирик. Чүнки јығынҹагда вә хидмәтдә һәгигәт һагда данышмағы өзүмүзә шәрәф билирик. Јеһова Аллаһ бизә хидмәт етмәји өјрәдир. Бунун үчүн Онун истифадә етдији васитәләрдән бири Теократик Хидмәт Мәктәбидир. Бу тәлим програмы һәр һәфтә бүтүн дүнјада 111 000-дән чох јығынҹагда кечирилир. Онун мәгсәди дүнјанын һәр јериндә мүхтәлиф милләтләрдән олан баҹы-гардашларымыза мәһарәтли мүждәчиләр олмаға, һәмчинин һәгигәти әминликлә, нәзакәтлә вә ҹәсарәтлә өјрәтмәјә көмәк етмәкдир (Һәв. 19:8; Кол. 4:6).

² 2015-ҹи илин мәктәб програмына Мүгәддәс Китабда олан «Мүгәддәс Китабла танышлыг» вә «Лүғәт» бөлмәләриндән, һәмчинин «Ҝөзәтчи гүлләси» журналынын күтләви нәшриндән вә jw.org сајтындан мөвзулар дахилдир. Бундан әлавә, Мүгәддәс Китабын мүталиәси вә 1-ҹи тапшырыг үчүн ајрылан вахта дәјишиклик едилиб. Нөвбәти абзасларда бу дәјишикликләрлә јанашы, програмын бәндләринин неҹә тәгдим олунаҹағы мүзакирә едилир.

³ Мүгәддәс Китабын мүталиәси. Бу бәндлә чыхыш едәҹәк гардаш ики дәгигәјә һәфтә әрзиндә охунан Мүгәддәс Китаб фәсилләриндән мараглы вә фајдалы бир фикри нәзәрдән кечирәҹәк. Јахшы һазырлашанда ајрылан вахт чәрчивәсиндә јығынҹаға лазыми мәлуматы чатдырмаг олар. Бундан сонра динләјиҹиләр галан алты дәгигә әрзиндә Мүгәддәс Китабын һәфтәлик мүталиәсиндән өзләри үчүн тапдыглары фајдалы фикирләри 30 санијәјә вә ја ондан аз вахта гысаҹа шәрһ едә биләрләр. 30 санијәјә долғун шәрһ вермәк үчүн јахшы һазырлашмаг вә низамлы олмаг тәләб олунур. Беләҹә, биз чох шеј өјрәнә биләрик. Һәмчинин бунун сајәсиндә башгалары да тапдыглары фикирләри бөлүшә биләрләр.

⁴ Тапшырыг № 1. Мүгәддәс Китабы охумаг үчүн ајрылан вахт артыг азалдылыб. Бу тапшырыг үч дәгигә вә ја ондан аз вахта јеринә јетириләҹәк вә Мүгәддәс Китабдан әввәлкиндән аз парча охунаҹаг. Оху тапшырығы алан шаҝирд бир нечә дәфә уҹадан охујуб мәшг етмәли, фикирләри ајдын чатдырмаг үчүн дүзҝүн тәләффүзә вә рәванлыға фикир вермәлидир. Јеһованын һәр бир хидмәтчиси јахшы охумағы баҹармалыдыр. Белә ки, охумаг бизим ибадәтимиздә ваҹиб амилләрдән биридир. Чох севиндириҹи һалдыр ки, ушагларымызын әксәријјәти сәлис охумағы баҹарыр. Валидејнләрин өвладларына охумағы өјрәтмәси тәрифәлајигдир.

⁵ Тапшырыг № 2. Бу беш дәгигәлик тапшырыг баҹыја вериләҹәк. Тапшырыг тәјин олунмуш мөвзу үзәриндә гурулмалыдыр. Тапшырыг һәм «Јени Дүнја Тәрҹүмәси»ндәки материала, һәм дә «Ҝөзәтчи гүлләси» журналынын күтләви нәшринә вә ја jw.org сајтына (ҺАГГЫМЫЗДА > ТЕЗ-ТЕЗ ВЕРИЛӘН СУАЛЛАР вә МҮГӘДДӘС ЈАЗЫЛАРЫН ТӘЛИМЛӘРИ > МҮГӘДДӘС ЈАЗЫЛАРА АИД СУАЛЛАРА ҸАВАБ) әсаслананда буну хидмәтин сизин әразиниз үчүн реал вә практики олан саһәсинә тәтбиг етмәк лазымдыр. Шаҝирд ујғун ҝәлән ајәләрдән истифадә етмәли вә материалын фајдасыны ҝөстәрмәлидир. Мөвзу илә әлагәли олан әлавә ајәләрдән дә истифадә етмәк олар. Мәктәбин нәзарәтчиси баҹыја көмәкчи тәјин етмәлидир.

⁶ Тапшырыг № 3. Бу беш дәгигәлик тапшырыг баҹыја, јахуд гардаша вериләҹәк. Әҝәр бу тапшырыг баҹыја һәвалә олунарса, ону һәмишә 2 №-ли тапшырыг кими һазырламаг лазымдыр. Тапшырыг гардаша вериләндә вә материал «Ҝөзәтчи гүлләси» журналына вә ја jw.org сајтына (ҺАГГЫМЫЗДА > ТЕЗ-ТЕЗ ВЕРИЛӘН СУАЛЛАР вә МҮГӘДДӘС ЈАЗЫЛАРЫН ТӘЛИМЛӘРИ > МҮГӘДДӘС ЈАЗЫЛАРА АИД СУАЛЛАРА ҸАВАБ) әсаслананда о, бу тапшырығы Падшаһлыг залында динләјиҹиләрә јөнәлән нитг кими сөјләмәлидир. Шаҝирд мөвзуну ачыгламалы, ујғун ҝәлән ајәләрдән истифадә етмәли вә бу материалын фајдасыны ҝөстәрмәлидир.

⁷ Үч нөмрәли тапшырыгдакы дәјишикликләр. Гардаша «Јени Дүнја Тәрҹүмәси»ндәки материала әсасланан тапшырыг вериләндә о, буну аиләви өјрәнмәнин вә ја тәблиғ хидмәтинин сәһнәләшдирилмәси кими тәгдим етмәлидир. Көмәкчиси ја онун аилә үзвләриндән бири, ја да гардаш олмалыдыр. Адәтән, көмәкчини вә шәрти вәзијјәти мәктәбин нәзарәтчиси тәјин едир. Һәмчинин мөвзу илә бағлы олан Мүгәддәс Китаб принсипләрини вурғулајан әлавә ајәләр дә дахил етмәк олар. Вахташыры бу тапшырыг ағсаггала верилә биләр. Ағсаггал көмәкчисини вә шәрти вәзијјәти өзү сечә биләр. Тәбии ки, ағсаггалларын аилә үзвү вә јахуд башга бир гардашла тәлим вермәјин үсулуну ҝөстәрмәси јығынҹағы руһландыраҹаг.

⁸ Мәсләһәт. Мәктәбин нәзарәтчиси һәр шаҝирдин тапшырығындан сонра ики дәгигә әрзиндә шаҝирди һәм тәрифләмәли, һәм дә «Теократик Хидмәт Мәктәбиндә тәлим алырыг» китабына әсасланан мәсләһәт вермәлидир. О, шаҝирдин һансы дәрс үзәриндә ишләдијини әввәлҹәдән елан етмәмәлидир. Лакин шаҝирд тапшырығы битирдикдән сонра мәктәбин нәзарәтчиси шаҝирди тәрифләјиб онун һансы дәрсин үзәриндә ишләдијини демәлидир. Шаҝирдин бу дәрсин өһдәсиндән јахшы ҝәлдијини ҝөстәрән конкрет мәгамлары вурғуламалы, јахуд нәзакәтлә изаһ етмәлидир ки, нәјә ҝөрә шаҝирдин бу дәрсин үзәриндә јенә дә ишләмәси јахшы оларды.

⁹ Шаҝирдин дәрс бланкы онун «Хидмәт Мәктәби» китабынын 79—81 сәһифәләриндә јерләшир. Шаҝирд тапшырығыны јеринә јетирдикдән сонра мәктәб нәзарәтчиси онун китабында лазыми гејдләри едәҹәк вә она тәјин олунан дәрсдәки чалышманы јеринә јетириб-јетирмәдијини тәкликдә сорушаҹаг. Ҝөрүшдән сонра вә ја башга вахт шаҝирди тәрифләмәк вә она әлавә мәсләһәтләр вермәк олар. Шаҝирдләр бу мәктәбдә алдыглары мәсләһәтләрә руһани инкишафлары үчүн бир фүрсәт кими бахмалыдырлар (1 Тим. 4:15).

¹⁰ Әҝәр шаҝирд вахтындан артыг данышарса, мәктәб нәзарәтчиси вә ја онун көмәкчиси вахтын битдијини билдирмәк үчүн нәзакәтлә она ишарә вермәлидир, мәсәлән, о зәнҝ чала, јахуд јавашҹа нәјисә таггылдата биләр. Шаҝирд дә ҹүмләсини битириб сәһнәни тәрк етмәлидир. («Хидмәт Мәктәби» китабынын 282-ҹи сәһифәсинин 4-ҹү абзасына бах.)

¹¹ Биз тәләбләрә ҹаваб верән һәр кәси Теократик Хидмәт Мәктәбинә јазылмаға дәвәт едирик. («Хидмәт Мәктәби» китабынын 282-ҹи сәһифәсинин 6-ҹы абзасына бах.) Бу мәктәбдә верилән биликләрин сајәсиндә Јеһованын халгы Падшаһлыг һаггында мүждәни әминликлә, ләјагәтлә вә севә-севә тәблиғ едир вә өјрәдир. Руһани тәһсилдән јарарланан һәр кәс Јеһова Аллаһы мәдһ едир. Шүбһәсиз, бу, Күлли-Ихтијар Аллаһымыз Јеһоваја хошдур (Мәз. 148:12, 13; Јешаја 50:4).