Нәјә ҝөрә Аллаһ бүтүн дуалары гәбул етмир?
Јараданымыз Јеһова Аллаһа бәндәләринин сидги-үрәкдән етдији дуалары ешитмәк хошдур. Амма мүәјјән сәбәбләрә ҝөрә О бәзи дуалары гәбул етмир. Бунлар һансы сәбәбләрдир? Дуа едәркән нәләри нәзәрә алмалыјыг? Ҝәлин бәзи ајәләрә бахаг.
«Дуа едәндә башга халглардан оланлар кими ејни сөзләри тәкрар-тәкрар демәјин» (Мәтта 6:7).
Јеһова Аллаһ әзбәрләнмиш дуалары, јахуд дуа китабындан охунан дуалары гәбул етмир. О истәјир ки, үрәјимиздәкиләри Она ачыб данышаг. Әҝәр достунуз сизә һәр ҝүн ејни шејләри сөјләсәјди, бу сизә неҹә тәсир едәрди? Јахын достлар адәтән бир-бири илә ачыг, сәмими үнсијјәт едирләр. Биз өз сөзләримизлә дуа едәндә ән мәһрәм һиссләримизи Аллаһла бөлүшүрүк вә ҝөстәририк ки, Она етибар едирик.
«Диләјәндә дә ала билмирсиниз, чүнки јахшы мәгсәдлә јох, нәфсинизи дојдурмаг үчүн диләјирсиниз» (Јагуб 4:3).
Әҝәр Аллаһа хош олмајан бир әмәл үчүн, јахуд Она мәгбул олмајан бир шеји әлдә етмәк үчүн дуа едириксә, сөзсүз ки, Аллаһын дуамыза ҹаваб верәҹәјини ҝөзләмәмәлијик. Мәсәлән, гумарбаз ојунда бәхтинин ҝәтирмәји үчүн дуа едирсә, Јеһова Аллаһ онун дуасыны ешидәр? Ахы Аллаһ бујуруб ки, тамаһкар олмајаг, бәхтә-талејә инанмајаг (Әшија 65:11; Лука 12:15). Сөзсүз ки, Аллаһ белә дуалары гәбул етмәз! Аллаһын дуаларымыза ҹаваб вермәси үчүн диләкләримиз Онун Кәламында дејиләнләрә ујғун олмалыдыр.
«Ким ки гулағыны тыхајыб гануну ешитмир Онун дуасы да ијрәнҹдир» (Мәсәлләр 28:9).
Гәдимдә Аллаһ Онун адил ганунларына итаәт етмәјәнләрин дуаларыны динләмирди (Әшија 1:15, 16). Аллаһ дәјишмәјиб (Мәлаки 3:6). Аллаһын дуаларымыза ҹаваб вермәсини истәјириксә, Онун ганунларына итаәт етмәлијик. Бәс әҝәр әввәлләр ҝүнаһа јол вермишиксә, онда неҹә? Бу о демәкдир ки, Јеһова Аллаһ даһа һеч вахт бизим дуаларымызы динләмәјәҹәк? Хејр! Әҝәр пис әмәлимиздән дөнүб, Аллаһы разы салмаг үчүн әлимиздән ҝәләни етсәк, Аллаһ бизи бағышлајаҹаг (Һәвариләрин ишләри 3:19).