Хиласын үчүн Јеһованын етдикләрини гијмәтләндирирсәнми?
«Исраилин Аллаһы Рәббә һәмд олсун ки, Өз халгынын јардымына ҝәлиб ону хилас еләди» (ЛУКА 1:68).
1, 2. Һал-һазыркы вәзијјәтимизин ҹиддилијини һансы нүмунә әсасында ҝөстәрә биләрик вә һансы суаллары мүзакирә едәҹәјик?
ТӘСӘВВҮР ет ки, хәстәханада јатырсан. Сәнин олдуғун палатада мүалиҹәси олмајан ејни өлүмҹүл хәстәликдән әзијјәт чәкән диҝәр хәстәләр дә вар. Бирдән хәбәр тутурсан ки, бир һәким һәмин хәстәлијин әлаҹыны тапмаг үчүн әлиндән ҝәләни едир вә бу ан үрәјиндә үмид јараныр. Ирәлиләјиш барәдә истәнилән мәлуматы бөјүк сәбирсизликлә ҝөзләјирсән. Нәһајәт, севиндириҹи хәбәр ешидирсән: хәстәлијинә чарә тапылыб! Дәрманы тапан һәким бунун үчүн бөјүк гурбан вериб. Бу заман һансы һиссләри кечирәрдин? Сөзсүз ки, үрәјиндә сәнин вә бир чох башга инсанларын өлүмдән хилас олмаларына јол ачан шәхсә гаршы еһтирам вә дәрин миннәтдарлыг һисси јаранарды.
2 Бу нүмунә шиширдилмиш кими ҝөрүнсә дә, биз һамымыз һәмин инсанын вәзијјәтиндәјик. Амма бизим вәзијјәтимиз о инсанын вәзијјәтиндән даһа ҹиддидир. Хиласкара олан еһтијаҹымыз олдугҹа бөјүкдүр. (Ромалылара 7:24 ајәсини оху.) Бизи гуртармаг үчүн Јеһова чох шејләрдән кечди. Онун Оғлу да бөјүк гурбанлар верди. Буна ҝөрә дә ҝәлин дөрд әсас суала ҹаваб тапаг: хиласа нәјә ҝөрә еһтијаҹымыз вар? Хиласымыз Исаја нәјин баһасына баша ҝәлди? Јеһова нәләрдән кечмәли олду? Аллаһын хиласымыз наминә ҝөрдүјү тәдбирләри гијмәтләндирдијимизи неҹә ҝөстәрә биләрик?
Хиласа нәјә ҝөрә еһтијаҹымыз вар?
3. Һансы мәнада ҝүнаһы пандемијаја бәнзәтмәк олар?
3 Бу јахынларда апарылан һесабламаја әсасән, бәшәр тарихинин ән дәһшәтли пандемијаларындан бири 1918-ҹи илдә башлајан вә он милјонларла инсанын өлүмүнә сәбәб олан испанка грипидир. Лакин ондан да дәһшәтли хәстәликләр мөвҹуддур. Белә хәстәликләрә јолухан инсанларын әксәријјәти өлүрa. Сизҹә, өлүмү пандемијаја бәнзәтмәк олармы? Ромалылара 5:12 ајәсинин сөзләрини хатырлајын: «Неҹә ки, ҝүнаһ тәк бир адам васитәсилә вә өлүм ҝүнаһ васитәсилә дүнјаја ҝирди, еләҹә дә өлүм бүтүн инсанлара кечди; чүнки һамы ҝүнаһ ишләтмишдир». Гејри-камил инсанларын һамысы ҝүнаһ ишләтдији үчүн демәк олар ки, һамы ҝүнаһа јолухуб (Ромалылара 3:23 ајәсини оху.) Бу хәстәлијә јолухан инсанларын нечә фаизи өлүр? Павелин дили илә десәк, ‘бүтүн инсанлар’.
4. Јеһованын нијјәтинә әсасән, биз нә гәдәр јашамалыјыг вә Онун нөгтеји-нәзәри чохларынкындан неҹә фәргләнир?
4 Бу ҝүн бир чох инсанлар ҝүнаһ вә өлүмә ади јанашырлар. Онлары ән чох нараһат едән вахтсыз өлүмдүр, амма инсанлар гоҹалдыгҹа јахынлашан өлүмү тәбии просес кими гәбул едирләр. Инсанлар чох асанлыгла Јараданын нијјәтини унудурлар. Бизим өмрүмүз Онун нәзәрдә тутдуғундан олдугҹа гысадыр. Тәәҹҹүблү олса да, Јеһованын ҝөзүндә һеч бир инсан «бир ҝүн» белә јашамајыб (2 Пет. 3:8). Буна ҝөрә дә Аллаһын Кәламында дејилир ки, һәјатымыз бир мүддәт бөјүјән, сонра да солуб ҝедән от кимидир, јахуд да нәфәс кимидир (Мәз. 39:5; 1 Пет. 1:24). Биз буну һәмишә јадда сахламалыјыг. Нәјә ҝөрә? Әҝәр биз јолухдуғумуз «хәстәлијин» ҹиддилијини анласаг, онун «әлаҹыны», јәни хиласымызы даһа јүксәк гијмәтләндирәҹәјик.
5. Ҝүнаһ уҹбатындан һәр биримиз нәдән мәһрум олмушуг?
5 Ҝүнаһын ҹиддилијини вә онун төрәтдији фәсадлары дәрк етмәк үчүн нәји итирдијимизи анламаға чалышмалыјыг. Бу, әввәлҹә чәтин ола биләр, чүнки ҝүнаһлы олдуғумуз үчүн улу валидејнләримизин малик олдуглары шеј һеч вахт биздә олмајыб. Лап башланғыҹда Адәмлә Һәвваја камил һәјат бәхш едилмишди. Әгли вә физики ҹәһәтдән камил олан бу илк инсан ҹүтү фикирләринә, һиссләринә вә һәрәкәтләринә һаким ола билирди. Беләликлә, онлар, Јеһова Аллаһын хидмәтчиләри кими, дахили потенсиалларынын үзә чыхмасы үчүн өзләриндә ҝөзәл хүсусијјәтләр јетишдирә биләрдиләр. Лакин онлар бу ҝөзәл әнамы рәдд етдиләр. Јеһоваја гаршы ҝүнаһ ишләтмәклә онлар өзләрини вә ҝәләҹәк өвладларыны Аллаһын инсанлар үчүн нәзәрдә тутдуғу һәјатдан мәһрум етдиләр (Јар. 3:16-19). Бунунла онлар јухарыда мүзакирә етдијимиз дәһшәтли «хәстәлијә» тутулдулар, сонра да ону бизә өтүрдүләр. Тамамилә һаглы олараг Јеһова онлара гаршы һөкм чыхартды. Бизә исә хилас олмағымыз үчүн үмид јери гојду (Мәз. 103:10).
Хиласымыз Исаја нәјин баһасына баша ҝәлди?
6, 7. а) Јеһова хиласымызын чох баһа баша ҝәләҹәјини неҹә ҝөстәрди? б) Исраил халгына Ганун верилмәздән өнҹә јашамыш Һабилин вә диҝәр садиг кишиләрин гурбан ҝәтирмәсиндән нә өјрәнирик?
6 Јеһова Адәмлә Һәвванын өвладларыны хилас етмәјин Она чох баһа баша ҝәләҹәјини билирди. Јарадылыш 3:15 ајәсиндә јазылмыш пејғәмбәрликдән Онун хиласымыз үчүн нә етдији барәдә өјрәнирик. Јеһова бир ҝүн Шејтаны мәһв едәҹәк «өвлад» — хиласкар ҝөндәрәҹәкди. Анҹаг һәмин хиласкар јер үзүндә олдуғу заман, мәҹази диллә десәк, дабанындан санҹылараг әзаб чәкмәли иди. Иланын дабандан санҹмасы чох ағрылы олур вә һәтта инсанын фәалијјәтини мәһдудлашдыра вә ја ону зәифләдә биләр. Бәс бу пејғәмбәрликдә өвладын дабанындан санҹылмасы нә демәкдир? Јеһованын Сечилмиши нәләрә гатлашмалы иди?
7 Хиласкар бәшәријјәти ҝүнаһдан азад етмәк үчүн фидјә, јәни ҝүнаһын нәтиҹәләрини арадан галдырараг инсанлары Аллаһла барышдыран бир васитә тәгдим етмәли иди. Бу, өзүнә нәји дахил етмәли иди? Бәшәр тарихинин илк чағларында ајдын иди ки, бунун үчүн гурбан тәләб олунаҹаг. Илк садиг инсан Һабил һејван гурбаны ҝәтирәндә Јеһова ондан разы галдығыны билдирди. Аллаһын Нуһ, Ибраһим, Јагуб вә Әјјуб кими диҝәр садиг хидмәтчиләри дә Она мәгбул гурбанлар ҝәтирирдиләр (Јар. 4:4; 8:20, 21; 22:13; 31:54; Әјј. 1:5). Сонралар Мусанын Ганунунда гурбан мәсәләсинә даир әлавә изаһатлар верилди.
8. Баш каһин иллик Кәффарә ҝүнүндә нә едирди?
8 Гануна әсасән тәләб олунан ән ваҹиб гурбанлар арасында иллик Кәффарә ҝүнүндә тәгдим олунан гурбанлар да варды. Һәмин ҝүн баш каһин бир нечә символик аддым атырды. О, илк нөвбәдә каһин синфинин, сонра исә бу синфә дахил олмајан гәбиләләрин ҝүнаһларынын јујулмасы үчүн Јеһоваја гурбанлар тәгдим едирди. Бунун үчүн о, мүгәддәс мәскәнин вә ја мәбәдин Ән Мүгәддәс јер адланан һиссәсинә дахил олурду. Бу һүгуг јалныз она мәхсус иди вә о, буну илдә бир дәфә едә биләрди. Бурада баш каһин Әһд сандығынын өнүндә гурбанларын ганыны чиләјирди. Бәзән мүгәддәс сандығын үзәриндә парлаг булуд пејда олурду ки, бу да Јеһова Аллаһын иштиракынын рәмзи иди (Чых. 25:22; Лев. 16:1-30).
9. а) Кәффарә ҝүнүндә баш каһин кими тәмсил едирди вә онун тәгдим етдији гурбанлар һансы мәнаны дашыјырды? б) Баш каһинин Ән Мүгәддәс јерә дахил олмасы нәјин рәмзи иди?
9 Һәвари Павел Аллаһдан илһам алараг баш каһинин символик һәрәкәтләринин мәнасыны изаһ едир. О ҝөстәрир ки, баш каһин Мәсиһ Исаны, гурбанларын тәгдим едилмәси исә Мәсиһин гурбанлыг өлүмүнү тәмсил едирди (Ибр. 9:11-14). Бу мүкәммәл гурбан ики груп инсанын — Мәсиһин руһла мәсһ олунмуш 144 000 гардашындан ибарәт каһин синфинин вә ‘башга гојунларын’ ҝүнаһларыны јумалы иди (Јәһ. 10:16). Баш каһинин Ән Мүгәддәс јерә дахил олмасы Исанын ҝөјләрә — фидјә гурбанлығынын дәјәрини Јеһова Аллаһа тәгдим етмәк үчүн ҝөјүн өзүнә ҝирмәсини тәмсил едирди (Ибр. 9:24, 25).
10. Мүгәддәс Китаб пејғәмбәрликләринә әсасән, Мәсиһин башына нәләр ҝәләҹәкди?
10 Ајдындыр ки, Адәмлә Һәвванын өвладларынын хиласы үчүн бөјүк гурбан тәләб олунурду. Мәсиһ һәјатыны гурбан вермәли иди! Ибраниҹә Мүгәддәс Јазылары гәләмә алан пејғәмбәрләр бу һәгигәти парлаг сурәтдә тәсвир етмишдиләр. Мәсәлән, Даниел пејғәмбәр ачыг-ајдын јазмышдыр ки, ‘мәсһ олунмуш һөкмдар’ «һәлак олаҹаг», јәни өлдүрүләҹәк ки, ‘тәгсирләр үчүн кәффарә версин’ (Дан. 9:24-26). Јешајанын исә пејғәмбәрлик етдији кими, Мәсиһ гејри-камил инсанларын ҝүнаһыны үзәринә ҝөтүрәҹәк, рәдд олунаҹаг, тәгиб едиләҹәк вә сонда онун бәдәни дешиләҹәк, башга сөзлә, о едам едиләҹәк (Јешаја 53:4, 5, 7).
11. Јеһованын Оғлу хиласымыз наминә өзүнү гурбан вермәјә һазыр олдуғуну неҹә ҝөстәрди?
11 Аллаһын ваһид Оғлу бизи хилас етмәк үчүн нәләрдән кечәҹәјини јер үзүнә ҝәлмәздән өнҹә билирди. Әввәлҹә о, әзаб-әзијјәтә мәруз галмалы, сонра исә өлдүрүлмәли иди. Атасы она бунлары сөјләјәндә о бојун гачырдымы вә ја Она гаршы чыхдымы? Јох, Оғул Атасынын ҝөстәришләринә тамамилә вә ҹанла-башла риајәт едирди (Јешаја 50:4-6). Ејнилә, јер үзүндә оланда о, Атасынын ирадәсини итаәткарлыгла иҹра едирди. Буну етмәјә ону нә тәшвиг едирди? Иса дејир: «Мән Атаны севирәм». Бу суалын диҝәр ҹавабы исә будур: «Һеч кимдә, бир нәфәрин достлары уғрунда ҹаныны вермәсиндән даһа бөјүк мәһәббәт јохдур» (Јәһ. 14:31; 15:13). Беләликлә, бизим хиласымыз, әсас етибарилә, Јеһованын Оғлунун ҝөстәрдији мәһәббәт сајәсиндә мүмкүн олуб. Бу, онун камил инсан һәјаты баһасына баша ҝәлсә дә, о, бизим хиласымыз наминә көнүллү олараг ҹанындан кечди.
Јеһова нәләрдән кечмәли олду?
12. Фидјә гурбанлығынын тәшәббүскары кимдир вә О, буну нәјә ҝөрә тәгдим етди?
12 Фидјә гурбанлығынын тәшәббүскары Иса олмамышдыр. Хилас тәдбири Јеһованын ирадәсинин ваҹиб бир һиссәси иди. Һәвари Павел ҝөстәрир ки, үзәриндә гурбан тәгдим олунан мәбәддәки гурбанҝаһ Јеһованын ирадәсини тәмсил едирди (Ибр. 10:10). Беләликлә, Мәсиһин гурбанлығы сајәсиндә әлдә етдијимиз хиласа ҝөрә илк нөвбәдә вә даһа чох Јеһоваја борҹлујуг (Лука 1:68). Бу, Онун камил ирадәсинин вә бәшәријјәтә бәсләдији бөјүк мәһәббәтинин тәзаһүрүдүр. (Јәһја 3:16 ајәсини оху.)
13, 14. Ибраһимин нүмунәси Јеһованын бизим уғрумузда етдикләрини анламаға вә гијмәтләндирмәјә неҹә көмәк едир?
13 Бизә бәсләдији мәһәббәти бу ҹүр тәзаһүр етдирмәк үчүн Јеһова нәләрдән кечмәли олду? Буну дәрк етмәк бизим үчүн чәтиндир. Лакин Мүгәддәс Китабда јазылан бир мәлумат буну баша дүшмәкдә бизә көмәк едәҹәк. Јеһова садиг хидмәтчиси Ибраһимдән һәддән артыг чәтин олан бир иши ҝөрмәји — өз оғлу Исһагы гурбан вермәји хаһиш етди. Сөзсүз ки, Исһаг атасы үчүн чох әзиз иди. Јеһова Ибраһимлә сөһбәтиндә Исһагы онун ‘севдији јеҝанә оғлу’ адландырды (Јар. 22:2). Буна бахмајараг, Ибраһим анлајырды ки, Јеһованын ирадәси һәтта онун Исһага олан мәһәббәтиндән даһа ваҹибдир. Ибраһим Јеһованын бир сөзүнү ики етмәди. Амма Јеһова Өзүнүн бир ҝүн едәҹәји шеји Ибраһимин етмәсинә јол вермәди. Ибраһим оғлуну гурбан ҝәтирмәјә һазырлашырды ки, Аллаһын ҝөндәрдији мәләк онун әлини сахлады. Ибраһим бу чәтин сынагда Аллаһына табе олмаға о дәрәҹәдә гәти гәрарлы иди ки, үмиди јалныз дирилмәјә иди. Вә о, Аллаһын Исһагы дирилдәҹәјинә зәррә гәдәр дә шүбһә етмирди. Павел јазыр ки, Ибраһим «бир нүмунә олараг» (ЈД) Исһагы дирилмә васитәсилә ҝери алды (Ибр. 11:19).
14 Оғлуну гурбан ҝәтирмәјә һазырлашанда Ибраһимин кечирдији ағры-аҹыны тәсәввүрүнә ҝәтирә биләрсәнми? Ибраһимлә баш верән бу һадисә Јеһованын ‘севимли Оғлум’ адландырдығы кәси гурбан ҝәтирәҹәјини әјани шәкилдә ҝөстәрди (Мат. 3:17). Бир шеји унутмамалыјыг ки, Јеһованын кечирдији һиссләр Ибраһиминкиндән дә ағыр иди. О вә Оғлу милјонларла, ола билсин, һәтта милјардларла илләр бирҝә үнсијјәт етмәкдән зөвг алырдылар. Оғул Атасынын јанында севимли «маһир уста» (ЈД) вә Нүмајәндә, јәни «Кәлам» кими фәрәһлә хидмәт едирди (Сүл. мәс. 8:22, 30, 31; Јәһ. 1:1). Оғлуна әзаб вериләндә, ришхәнд едиләндә вә сонда бир ҹани кими едам едиләндә Јеһованын нәләр һисс етдијини тәсәввүрүмүзә ҝәтирмәк белә чәтиндир. Бәли, бизим хиласымыз наминә Јеһова бөјүк гурбан вериб! Бәс биз бу хилас тәдбирини гијмәтләндирдијимизи неҹә ҝөстәрә биләрик?
Аллаһын хиласымыз наминә ҝөрдүјү тәдбирләри гијмәтләндирдијимизи неҹә ҝөстәрә биләрик?
15. Иса мөһтәшәм фидјә тәдбирини неҹә тамамлады вә бунун сајәсиндә нә мүмкүн олду?
15 Ҝөјләр һәјатына дириләндән сонра Иса мөһтәшәм фидјә тәдбирини тамамлады. Севимли Атасына говушанда фидјә гурбанлығынын дәјәрини Она тәгдим етди. Бу, бөјүк хејир-дуалара сәбәб олду. Бунун сајәсиндә илк нөвбәдә Мәсиһин мәсһ олунмуш гардашларынын, сонра исә «бүтүн дүнјанын» ҝүнаһларынын тамамилә бағышланмасы мүмкүн олду. Ҝүнаһларына ҝөрә үрәкдән төвбә едән вә Мәсиһин һәгиги давамчысы олан һәр бир инсанын бу гурбанлыг сајәсиндә Јеһова илә сых мүнасибәт гурмаг имканы вар (1 Јәһ. 2:2). Бу, сәнә неҹә аиддир?
16. Јеһоваја хилас тәдбиринә ҝөрә миннәтдар олдуғумузун сәбәбини һансы нүмунә әсасында ҝөстәрә биләрик?
16 Мәгаләнин әввәлиндәки нүмунәјә гајыдаг. Тәсәввүр ет ки, хәстәлијин әлаҹыны тапан һәким сәнинлә ејни палатада јатан хәстәләрә јахынлашыб дејир: «Ким мүалиҹәни гәбул едәрсә вә бүтүн ҝөстәришләрә риајәт едәрсә, һөкмән сағалаҹаг». Бәс палата јолдашларындан әксәријјәти дәрманы гәбул етмәјин вә пәһриз сахламағын чәтин олдуғундан шикајәтләнсәләр вә һәкимин дедикләрини рәдд етсәләр, онда неҹә? Бу мүалиҹә үсулунун һәгигәтән дә еффектив олдуғуна даир әлиндә инандырыҹы сүбутун олса, палата јолдашларын кими давранаҹагсанмы? Әлбәттә, јох! Шүбһә јохдур ки, бу мүалиҹәјә ҝөрә өз миннәтдарлығыны билдирәҹәк вә һәкимин бүтүн ҝөстәришләринә хырдалығынадәк риајәт едәҹәксән вә ола билсин, гәрарыны башгаларына да данышаҹагсан. Оғлуну гурбан верәрәк хиласымызын гејдинә галдығы үчүн һәр биримиз Јеһоваја даһа чох миннәтдар олмалы дејиликми? (Ромалылара 6:17, 18 ајәләрини оху.)
17. Јеһоваја хилас тәдбиринә ҝөрә миннәтдар олдуғумузу неҹә ҝөстәрә биләрик?
17 Јеһованын вә Онун Оғлунун бизи ҝүнаһ вә өлүмдән гуртармаг үчүн етдикләрини гијмәтләндирмәјимиз әмәлләримиздә өзүнү бүрузә верәҹәк (1 Јәһ. 5:3). Биз ҝүнаһа олан мејилимизлә мүбаризә апараҹаг, биләрәкдән ҝүнаһ ишләтмәјәҹәк вә чох вахт онун нәтиҹәси олан икили һәјат тәрзи сүрмәкдән гачынаҹағыг. Бунун әксинә даврансаг, бу, фидјә гурбанлығына үмумијјәтлә гијмәт вермәдијимизә дәлаләт едәҹәк. Аллаһын ҝөзүндә тәмиз галмаг үчүн бүтүн гүввәмизи сәфәрбәр етмәклә нашүкүр олмадығымызы ҝөстәрәҹәјик (2 Пет. 3:14). Һәмчинин башгаларынын Јеһова илә сых мүнасибәти вә әбәди ҝәләҹәјә үмидләри олсун дејә һејрәтамиз хилас үмиди барәдә онлара данышмагла да миннәтдарлығымызы тәзаһүр етдирәҹәјик (1 Тим. 4:16). Әлбәттә, Јеһова вә Онун Оғлу онлары иззәтләндирмәк үчүн имканымызын јол вердији гәдәр вахт вә гүввә сәрф етмәјимизә лајигдирләр! (Марк 12:28-30). Бу барәдә бир дүшүн! Биз ҝүнаһдан тамамилә «сағалаҹағымыз» ҝүнү һәсрәтлә ҝөзләјә биләрик. Биз, Аллаһын нәзәрдә тутдуғу кими, камил олаҹаг вә әбәди јашајаҹағыг. Бүтүн бунлар Јеһованын хиласымыз үчүн ҝөрдүјү тәдбирләр сајәсиндә мүмкүндүр! (Ром. 8:21).
[Һашијә]
a Дејиләнләрә ҝөрә, бүтүн јер күрәсинә јајылмыш испанка грипинә о вахт дүнја әһалисинин 20-50 фаизи јолухмушду. Вируса јолуханларын тәхминән 1-10 фаизи һәјатыны итирмишди. Ондан фәргли олараг, Ебола вирусуна чох надир һалларда раст ҝәлинир. Бәзи јерләрдә бу вирусун төрәтдији хәстәликдән өләнләрин сајы тәхминән 90 фаиз тәшкил етмишди.
Неҹә ҹаваб верәрдиниз?
• Нәјә ҝөрә хиласа сон дәрәҹә еһтијаҹ дујуруг?
• Исанын фәдакарлығы сәнә неҹә тәсир бағышлајыр?
• Јеһованын тәгдим етдији фидјә әнамы барәдә нә дүшүнүрсән?
• Јеһованын хиласын үчүн етдикләри сәни нәјә тәшвиг едир?
[27-ҹи сәһифәдәки шәкил]
Кәффарә ҝүнүндә Исраилин баш каһини Мәсиһин ҹанлы рәмзи олурду
[28-ҹи сәһифәдәки шәкил]
Ибраһимин оғлуну гурбан ҝәтирмәјә һазыр олмасындан Јеһованын вердији даһа бөјүк гурбан барәдә чох шеј өјрәнирик