Јеһова башыныздакы сачлары белә сајмышдыр
«Атанызын һөкмү олмадыгда, онлардан [сәрчәләрдән] һеч бири јерә дүшмәз. Сизин исә башыныздакы сачлар да белә сајылмышдыр» (МАТТА 10:29, 30).
1, 2. а) Әјјуб нәјә ҝөрә Аллаһын ону тәрк етдијини дүшүнүрдү? б) Әјјубун сөзләри онун Аллаһдан үз дөндәрдијинә ишарә едирми? Изаһ един.
«СӘНӘ јалварырам, [ја Рәбб], ҹаваб вермирсән, ајаға галхмағыма ҝөз гојурсан. Мәнә гаршы рәһмсизсән, ҝүҹлү әлләринлә мәни әзирсән». Бу сөзләри дејән адам чох изтираб чәкирди вә онун бу вәзијјәти тәәҹҹүблү дејил! О, бүтүн әмлакындан мәһрум олмуш, ушаглары мүәммалы шәкилдә өлмүш, өзү исә үзүҹү хәстәлијә тутулмушду. Бу инсан Әјјуб иди. Биз, Мүгәддәс Китабдан онун ағыр сынагларын өһдәсиндән ҝәлмәси һаггында охумагла, чохлу фајдалар әлдә едә биләрик (Әјјуб 30:20, 21).
2 Әјјубун сөзләриндән бә’зиләри елә нәтиҹәјә ҝәлә биләр ки, о, Аллаһдан үз дөндәрмишди, лакин бу һеч дә белә дејил. Садәҹә олараг, о, дәрин кәдәр һиссинә вә үмидсизлијә гапылмышды (Әјјуб 6:2, 3). Әјјуб өз изтирабларында Шејтанын ҝүнаһкар олдуғуну билмирди, буна ҝөрә дә, сәһв олараг, Аллаһын ону тәрк етдијини дүшүнүрдү. Һәтта бир дәфә Јеһовадан сорушмушду: «Нијә үзүнү ҝизләдирсән, Мәни дүшмән һесаб едирсән?» (Әјјуб 13:24)a.
3. Бизимлә бәдбәхтликләр баш верәндә, ағлымыза һансы фикирләр ҝәлә биләр?
3 Бу ҝүн Јеһованын бир чох хидмәтчиләри мүһарибәләр, сијаси вә иҹтимаи чеврилишләр, тәбии фәлакәтләр, гоҹалыг, хәстәликләр, јохсуллуг вә һакимијјәтин гојдуғу гадағалар нәтиҹәсиндә јаранан ҹидди чәтинликләриндән әзијјәт чәкирләр. Еһтимал ки, бу ҹүр чәтинликләрлә сән дә үзләширсән. Бә’зән сән дә дүшүнә биләрсән ки, Јеһова сәндән «үзүнү ҝизләдир». Јәһја 3:16 ајәсиндә јазылан сөзләр сәнә јахшы танышдыр: «Аллаһ дүнјаны елә севди ки, ваһид Оғлуну она верди». Бунунла белә, изтираб чәкән вә дәјишиклик ҝөзләнилмәјән заман, еһтимал ки, сән белә фикирләширсән: «Аллаһ мәни һәгигәтәнми севир? Чәкдијим изтираблары ҝөрүрмү? Шәхсән мәним гајғыма галырмы?»
4. Павел узун мүддәт нәјә таб ҝәтирмәли олду вә бу ҹүр вәзијјәт бизә неҹә тә’сир едә биләр?
4 Һәвари Павелин нүмунәсинә диггәт јетирәк. О јазмышдыр: «Бәдәнимә бир нештәр, шејтанын мәләји верилмишдир ки, мәни дилхор етсин... Үч дәфә Рәббә јалвардым ки, ону мәндән узаглашдырсын». Јеһова Павелин јалварышларыны ешитди. Буна бахмајараг, билдирди ки, проблеми мө’ҹүзәли сурәтдә арадан галдырмајаҹаг. Бунун әвәзинә, ‘бәдәниндәки нештәрә’ дөзмәк үчүн, Павел Аллаһын гүввәсинә ҝүвәнмәли идиb (2 Коринфлиләрә 12:7-9). Ола билсин, Павел кими, сән дә һансыса чәтинликдән изтираб чәкирсән. Чох еһтимал ки, сән белә фикирләширсән: «Әҝәр Јеһова мәнә көмәк етмирсә, јәгин О, мәним вәзијјәтимдән хәбәрсиздир вә ја бу, Ону нараһат етмир?» Бу әсла белә дејил! Јеһова шәфгәтлә һәр бир садиг хидмәтчисинин гајғысына галыр. Бу, һәвариләрини сечдикдән тез сонра Исанын дедији сөзләрдән бәллидир. Ҝәлин ҝөрәк Исанын сөзләри бу ҝүн бизи неҹә руһландырыр.
Нә үчүн «горхмајын» дејилиб?
5, 6. а) Иса шаҝирдләринә ҝәләҹәкдә гаршылашаҹаглары чәтинликләрдән горхмамаға неҹә көмәк етди? б) Павел, Јеһованын онун гајғысына галдығына әминлији неҹә ифадә етди?
5 Иса, «мурдар руһлары чыхармаг, һәр нөв хәстәлији вә һәр ҹүр нахошлуғу сағалтмаг сәлаһијјәтини» дә дахил етмәклә, һәвариләринә бөјүк гүввә вермишдир. Лакин бу о демәк дејилди ки, онларын артыг һеч бир сынағы вә ја чәтинлији олмајаҹагды. О, һәтта шаҝирдләри илә баш верәҹәк бә’зи шејләри тәфсилаты илә тәсвир етмишди. Бунунла белә Иса онлары руһландырараг демишди: «Бәдәни өлдүрүб ҹаны өлдүрә билмәјәнләрдән дә горхмајын; анҹаг даһа артыг ҹәһәннәмдә һәм бәдәни, һәм ҹаны һәлак етмәјә гадир Оландан горхун» (Матта 10:1, 16-22, 28).
6 Һәвариләрин нәјә ҝөрә горхмалы олмадыгларыны баша дүшмәләри үчүн, Иса ики әјани мәсәл ҝәтирди. О деди: «Мәҝәр ики сәрчә гушу бир ассаријә сатылмырмы? Вә Атанызын һөкмү олмадыгда, онлардан һеч бири јерә дүшмәз. Сизин исә башыныздакы сачлар да белә сајылмышдыр. Одур ки, горхмајын; сиз бир чох сәрчәдән даһа дәјәрлисиниз» (Матта 10:29-31). Диггәт јетирин ки, Иса ағыр шәраитләр гаршысында горхмамагла, Јеһованын шәхсән бизим гајғымыза галдығына әминлик арасында бағлылыг олдуғуну ҝөстәрди. Ҝөрүнүр, һәвари Павел дә белә әминлијә малик иди. О јазмышдыр: «Әҝәр Аллаһ бизимләдирсә, ким бизә гаршы ола биләр? Мәҝәр Өз Оғлуну әсирҝәмәјиб һамымыз үчүн тәслим едән, Онунла бәрабәр бүтүн шејләри бизә еһсан етмәјәҹәкдирми?» (Ромалылара 8:31, 32). Јадда сахла: һансы чәтинликләрлә үзләширсән үзләш, Јеһоваја садиглијини горудуғун мүддәтдә О, сәнә гајғы ҝөстәрәҹәк. Исанын һәвариләринә дедији сөзләр үзәриндә дәриндән дүшүнсәк, бу фикир даһа ајдын олар.
Сәрчәнин дәјәри
7, 8. а) Исанын ҝүнләриндә сәрчәләрә неҹә јанашырдылар? б) Матта 10:29 ајәсиндә «балаҹа сәрчәҹикләр» мә’насыны верән ифадәнин истифадә едилмәси нә илә изаһ едилир?
7 Исанын ҝәтирдији әјани нүмунәдән ајдын ҝөрүнүр ки, Јеһова Өз хидмәтчиләринин гајғысына галыр. Бәс сәрчәнин дәјәри нә гәдәр иди? Исанын ҝүнләриндә бу гушлары гида кими истифадә едирдиләр, мәһсула зијан вурдуглары үчүн исә онлар әсасән зәрәрвериҹи сајылырдылар. Сәрчәләрин сајы-һесабы јох иди, буна ҝөрә дә онлар чох уҹуз гијмәтә идиләр: буҝүнкү өлчү илә икисини беш сентдән ашағы гијмәтә сатырдылар. Икигат гијмәтә исә дөрд јох, беш сәрчә алмаг оларды — бешинҹи гушу исә һеч бир дәјәри јох имиш кими мүфтә верирдиләр (Лука 12:6).
8 Бу гушун өлчүсүнә ҝәлдикдә исә, һәтта бөјүк сәрчә белә диҝәр гушларла мүгајисәдә чох кичикдир. Бундан башга, Матта 10:29 ајәсиндә «сәрчәләр» кими тәрҹүмә олунан јунан сөзү илк нөвбәдә балаҹа сәрчәҹикләрә аиддир. Еһтимал ки, Иса истәјирди ки, һәвариләр ән балаҹа вә ҝөзә чарпмајан гушу тәсәввүрләринә ҝәтирсинләр. Бир арајыш әсәриндә гејд едилдији кими, «Иса садәҹә балаҹа јох, чох балаҹа гушу нәзәрдә тутурду!»
9. Исанын сәрчәләрә бағлы ҝәтирдији әјани нүмунә һансы ваҹиб һәгигәти баша дүшмәјә көмәк едир?
9 Исанын сәрчәләрлә бағлы ҝәтирдији нүмунә ваҹиб бир һәгигәти баша дүшмәјә көмәк едир: инсанлар үчүн дәјәрсиз сајылан шеј Јеһова Аллаһын ҝөзүндә чох ваҹибдир. Јеһованын хәбәри олмадан «онлардан [сәрчәләрдән] һеч бири јерә дүшмәз» демәклә Иса бу фикри хүсусилә вурғуладыc. Онун нә демәк истәдији ајдындыр: әҝәр ән балаҹа вә ҝөзә чарпмајан гушҹуғаз белә Јеһова Аллаһын ҝөзүндән јајынмырса, онда ҝөр Она хидмәт едән адамын таб ҝәтирмәли олдуғу шејләрә ҝөрә О, неҹә дә нараһат олур!
10. «Сизин исә башыныздакы сачлар да белә сајылмышдыр» сөзләри нә демәкдир?
10 Бу мәсәлдән әлавә Иса һәмин мөвзуја аид башга бир мәсәл дә чәкди: «Сизин исә башыныздакы сачлар да белә сајылмышдыр» (Матта 10:30). Неҹә дә дәрин вә ајдын фикирдир! Инсанын башында 100 000-ә јахын сач вар. Үмуми һесабла сачларын һамысы ејнидир, буна ҝөрә дә диггәтә лајиг олмајан бир шеј кими ҝөрүнүр. Буна бахмајараг, Јеһова Аллаһ онларын һәр биринә диггәт јетирмиш вә сајмышдыр. Инди исә фикирләшәк: һәјатымызда елә бир шеј вармы ки, Јеһова ону билмәсин? Шүбһәсиз, Јеһова Өз хидмәтчиләри һагда һәр шеји билир. О, инсанын үрәјиндә оланлардан да хәбәрдардыр (1 Шамуел 16:7).
11. Давуд, Јеһованын шәхсән онун гајғысына галдығына әминлијини неҹә ифадә етди?
11 Чох әзијјәтләр чәкмиш Давуд Јеһованын она диггәт јетирдијинә әмин иди. О јазырды: «Ја Рәбб, мәни јохлајараг таныдын, отурушуму-дурушуму Өзүн билирсән, фикирләрими узагдан дујурсан» (Мәзмур 139:1, 2). Сүбһә етмә ки, Јеһова сәни дә таныјыр (Јеремја 17:10). Сәнин әһәмијјәтсиз инсан олдуғуну вә Јеһованын һәр шеји ҝөрән ҝөзләринин сәни ҝөрмәјәҹәјини дүшүнмә!
«Ҝөз јашларымы тулуғуна јығ»
12. Һарадан билирик ки, Јеһова хидмәтчиләринин чәкдикләри бүтүн әзијјәтләрдән хәбәрдардыр?
12 Јеһова хидмәтчиләрини шәхсән танымагла бәрабәр, онларын һәр биринин чәкдији бүтүн әзијјәтләрдән дә хәбәрдардыр. Мәсәлән, исраиллиләр көләликдә мисирлиләр тәрәфиндән сыхышдырыланда Јеһова Мусаја демишдир: «Һәгигәтән, Мән Мисирдә олан халгымын әзијјәтини ҝөрдүм, нәзарәтчиләрин әлиндән етдикләри фәрјадларыны ешитдим вә дәрдләринә нәзәр салдым» (Чыхыш 3:7). Бизим үчүн чәтин оланда Јеһованын һәр шеји ҝөрдүјүнү вә ешитдијини билмәк неҹә дә тәсәлливериҹидир! О, бизим чәкдијимиз изтираблара лагејд гала билмәз!
13. Нәдән ҝөрүнүр ки, Јеһова хидмәтчиләринин дәрдинә шәрикдир?
13 Јеһова Онунла хүсуси мүнасибәтләри олан адамларын гајғысына галыр; бу, Онун исраиллиләрә бәсләдији һиссләрдән бәллидир. Онлар чох вахт өз инадкарлыглары уҹбатындан әзијјәт чәксәләр дә, ҝөрүн Јеһова һагда Јешаја нә јазмышдыр: «Онлар әзијјәт чәкдикдә о да әзијјәт чәкди» (Јешаја 63:9). Әҝәр сән Јеһованын садиг хидмәтчисисәнсә, изтираб чәкән заман Јеһованын да сәнинлә бирҝә изтираб чәкдијинә шүбһә етмә. Мәҝәр бу сәни чәтинликләри ҹәсарәтлә гаршыламаға вә хидмәтдә әлиндән ҝәләни етмәјә тәшвиг етмирми? (1 Петер 5:6, 7).
14. 56-ҹы мәзмур һансы шәраитдә бәстәләнмишдир?
14 Давуд падшаһ Јеһованын онун гајғысына галдығына вә дәрдинә шәрик олдуғуна әмин иди. Бу, ону өлдүрмәк истәјән Шаулдан гачыб ҝизләндији заман Давудун бәстәләдији 56-ҹы мәзмурдан ҝөрүнүр. Давуд Гат шәһәринә гачды, лакин филиштлиләрин ону таныдыглары үчүн тутулаҹағындан горхурду. О јазырды: «Ҝүн боју дүшмәнләрим сел кими үстүмә ҹумур, әлејһимә галхан мәғрур дөјүшчүләр чохдур». Белә сыхынтылы вәзијјәтдә Давуд Јеһоваја мүраҹиәт едәрәк деди: «Һәр ишимә онлар зијан вурурлар, һәмишә мәнә гәсд-гәрәз гурурлар» (Мәзмур 56:2, 5).
15. а) Давуд ҝөз јашларыны тулуға вә ја китаба јығмағы Јеһовадан хаһиш едәндә нәји нәзәрдә тутурду? б) Иманымыз сынаға чәкиләндә нәјә әмин ола биләрик?
15 Даһа сонра Давудун Мәзмур 56:8 ајәсиндә јаздығы вә һеч кими лагејд гојмадығы сөзләри охујуруг: «Дәрдләрими сајдын, ҝөз јашларымы тулуғуна јығ. Бунлар Сәнин китабында јазылмајыбмы?» Јеһованын шәфгәт долу гајғысынын неҹә дә тә’сирли тәсвиридир! Бизә чәтин оланда ҝөз јашлары ичәрисиндә Јеһоваја јалвара биләрик. Һәтта камил инсан олан Иса да белә етмишдир (Ибраниләрә 5:7). Давуд әмин иди ки, Јеһова онун изтирабларыны ҝөрүр вә јадда сахлајыр, санки онун ҝөз јашларыны тулуға јығыр вә ја китаба јазырd. Ола билсин, дүшүнүрсән ки, сәнин ҝөз јашларын тулуғун чох һиссәсини вә ја китабын әксәр сәһифәләрини тутарды. Бу белә олса да, руһдан дүшмә! Мүгәддәс Китаб бизи әмин едир: «Рәбб гәлбисыныглара јахындыр, О, руһән әзилмишләри гуртарыр» (Мәзмур 34:18).
Јеһова илә јахын мүнасибәтләр
16, 17. а) Һарадан билирик ки, Јеһова хидмәтчиләринин гаршылашдығы чәтинликләрә лагејд дејил? б) Хидмәтчиләри Онунла јахын мүнасибәтләрдә олсунлар дејә, Јеһова нә едир?
16 Јеһованын башымыздакы сачлары да сајдығыны билмәјимиз, бу гәдәр диггәтли вә гајғыкеш Аллаһа хидмәт етмәк шәрәфинә лајиг ҝөрүлдүјүмүзү анламаға көмәк едир! Ағры вә изтирабларын олмадығы јени дүнја һәлә ҝәлмәсә дә, Јеһова Өз халгы үчүн мәһз индидән тәәҹҹүблү бир шеј едир. Давуд јазмышдыр: «Рәбб Ондан горханлара [«Онунла јахын мүнасибәтдә оланлара», ЈД] сиррини ачар, онлара Өз әһдини өјрәдәр» (Мәзмур 25:14).
17 «Јеһова илә јахын мүнасибәт» — гејри-камил инсана буну тәсәввүр етмәк белә чәтиндир! Бунунла белә, Јеһова Ондан горханлары чадырында мәскән салмаға дә’вәт едир (Мәзмур 15:1-5). Бәс онлар үчүн нә едир? Давудун сөзләриндән мә’лум олдуғу кими, онлара Өз әһдини ачыр. Јеһова онлара е’тибар едир вә Өз сиррини пејғәмбәрләринә ачыр ки, онлар Онун ирадәсинин нәдән ибарәт олдуғуну вә ону неҹә иҹра едәҹәкләрини билсинләр (Амос 3:7).
18. Биз һарадан билирик ки, Јеһова бизим Онунла јахын мүнасибәтләрдә олмағымызы истәјир?
18 Биз гејри-камил инсанларын Күлл-Ихтијар Јеһова Аллаһын достлары олмаг имканына малик олдуғумузу дәрк етмәк неҹә дә хошдур! О, һәтта Өзү бизи дә’вәт едир: «Аллаһа јахынлашын, О да сизә јахынлашар» (Јагуб 4:8). Јеһова истәјир ки, биз Онунла сых мүнасибәтдә олаг. Бунун үчүн О, мүәјјән аддымлар атыб. Исанын фидијә гурбанлығы Күлли-Ихтијар Аллаһын досту олмаг имканы ачмышдыр. Мүгәддәс Јазыларда дејилир: «Биз Ону севирик, чүнки О бизи биринҹи севмишдир» (1 Јәһја 4:19).
19. Сынаглара тәһәммүл етмәк Јеһова илә олан мүнасибәтләримизи неҹә мөһкәмләндирир?
19 Ағыр сынаглара таб ҝәтирәндә, Аллаһла јахын мүнасибәтләримиз мөһкәмләнир. Шаҝирд Јагуб јазмышдыр: «Тәһәммүл исә өз әмәлини икмал етсин ки, сиз һеч бир нөгсаны олмајан, камил вә там адамлар оласыныз» (Јагуб 1:4). Сынаглара тәһәммүл етмәјимиз һансы ‘әмәлләрә’ ҝәтириб чыхарыр? Павелин ‘бәдәниндәки нештәри’ јада салаг. Тәһәммүл етмәјин сајәсиндә о, нәјә наил олду? Павел өз сынаглары һагда демишдир: «Буна ҝөрә, даһа чох өз зәифликләримлә мәмнунијјәтлә өјүнәҹәјәм ки, Мәсиһин гүдрәти ичимдә сакин олсун. Бу сәбәбдән мән, Мәсиһ уғрунда зәифликләрә, тәһгирләрә, еһтијаҹа, тә’гибләрә вә сыхынтылара таб ҝәтирмәјә разыјам; чүнки мән зәиф олдуғум заман гүввәтлијәм» (2 Коринфлиләрә 12:9, 10). Павел өз тәҹрүбәси әсасында өјрәнди ки, сынаглара тәһәммүл едә билмәк үчүн Јеһова лазыми гүдрәти, бә’зән исә «ән үстүн гүдрәт»и верир. Бу исә ону Јеһова Аллаһа вә Мәсиһә даһа да јахынлашдырды (2 Коринфлиләрә 4:7; Филипилиләрә 4:11-13).
20. Чәтинликләрлә гаршылашанда Јеһованын бизә дајаг вә тәсәлли олаҹағына нә үчүн әмин олмаг олар?
20 Ола билсин, Јеһова сәнин сынагларынын давам етмәсинә һәлә дә јол верир. Белә исә, Ондан горханлара етдији вә’ди јадда сахла: «Сәни һеч бурахмајаҹағам вә әсла тәрк етмәјәҹәјәм» (Ибраниләрә 13:5). Сән Онун көмәк вә тәсәллисини һисс едә биләрсән. Јеһова сәнин ‘башындакы сачлары белә сајмышдыр’. О, сәнин тәһәммүлүнү ҝөрүр. Ағрыларыны һисс едир. Шәфгәтлә сәнин гајғына галыр. О, һеч вахт сәнин ‘ишини вә Онун ады наминә ҝөстәрдијин мәһәббәтини унутмајаҹаг’ (Ибраниләрә 6:10).
[Һашијәләр]
a Буна бәнзәр сөзләри салеһ Давуд вә садиг Гораһ оғуллары да демишдиләр (Мәзмур 10:1; 44:24).
b Мүгәддәс Китабда Павелин «бәдәниндәки нештәрин» нә олдуғу һагда дејилмир. Бу, ҝөзләринин зәифлији кими һәр һансы бир хәстәлик ола биләрди. Вә ја бу ифадә Павелин һәвари кими хидмәт етмәк һүгугуну суал алтына гојан јаланчы һәвариләрә вә ја башга инсанлара да ишарә едә биләрди (2 Коринфлиләрә 11:6, 13-15; Галатијалылара 4:15; 6:11).
c Бә’зи алимләр ҝүман едирләр ки, сәрчәнин јерә дүшмәси јалныз онун өлүмүнү нәзәрдә тутмур. Онлар дејирләр ки, бурада орижиналын дилиндә истифадә олунан сөз гушун јем ахтармаг үчүн јерә енмәсинә дә ишарә едә биләр. Әҝәр бу беләдирсә, демәли, Аллаһ садәҹә гушун өлүмүнә диггәт јетурмәклә кифајәтләнмир, һәм дә онун ҝүндәлик тәләбатларынын гајғысына галыр (Матта 6:26).
d Гәдим дөврдә тулуғу гојунларын, кечиләрин вә инәкләрин ашыланмыш дәриләриндән һазырлајырдылар вә онларда сүд, јағ, пендир јахуд су сахлајырдылар. Даһа чох ашыламаја мә’руз галмыш дәриләр исә јағ вә ја шәраб сахламаг үчүн истифадә едилирди.
Јадыныздадырмы?
• Нәјә ҝөрә бә’зиләри Аллаһын онлары тәрк етдијини дүшүнә биләрләр?
• Биз Исанын сәрчәләр вә башымыздакы сачларын сајылмасына даир ҝәтирдији әјани мәсәлләрдән нә өјрәнирик?
• Киминсә ҝөз јашларынын Јеһованын ‘тулуғуна јығылмасы’ вә ја ‘китабына јазылмасы’ нә демәкдир?
• Јеһова илә јахын мүнасибәтләри неҹә инкишаф етдирмәк олар?
[23-ҹү сәһифәдәки шәкил]
Исанын сәрчәләрә бағлы мәсәлиндән нә өјрәнирик?
[Иҹазә илә]
© J. Heidecker/VIREO
[24-ҹү сәһифәдәки шәкил]
Нәјә ҝөрә Јеһова Павели ‘бәдәниндәки нештәрдән’ азад етмәди?
[25-ҹи сәһифәдәки шәкил]
Мүгәддәс Китабы һәр ҝүн охумагла Аллаһын шәхсән бизим гајғымыза галдығына әмин олуруг.