Јеһова «Ону ахтаранлара мүкафат верир»
«Аллаһа јахынлашан иман етмәлидир ки, О вар вә Ону ахтаранлара мүкафат верир» (ИБРАНИЛӘРӘ 11:6).
1, 2. Нәјә ҝөрә Јеһованын бә’зи хидмәтчиләриндә гәмҝин фикирләр ојана биләр?
«АРТЫГ 30 илдир ки, Јеһованын Шаһидијәм, лакин һәлә дә мәнә елә ҝәлир ки, бу ада лајиг дејиләм. Пионерлик етмәјимә вә бир чох шәрәфли мәс’улијјәтләримә бахмајараг, бу ады дашымаға лајиг олдуғума инана билмирәм» — дејә Барбараa адлы бир баҹы е’тираф едир. Кит адлы гардаш да буна бәнзәр фикирлә бөлүшүр: «Һәрдән өзүмү дәјәрсиз һисс едирдим, чүнки Јеһованын хидмәтчиләринин хошбәхт олмаг үчүн чохлу сәбәбләри олдуғу һалда мән хошбәхт дејилдим. Буна ҝөрә өзүмү ҝүнаһкар һисс едирдим, бу исә вәзијјәти даһа да писләшдирирди».
2 Јеһованын һәм кечмишдәки, һәм дә мүасир дөврдәки бир чох садиг хидмәтчиләри буна бәнзәр һиссләри јашамышлар. Бәс нә вахтса сән дә бу ҹүр һиссләрлә мүбаризә апармысанмы? Һәмиманлыларын илк бахышдан гајғысыз вә хошбәхт јашадыглары һалда, сәндә, ола билсин, проблемләр бир-биринин далынҹа ҝәлир. О заман сәнә елә ҝәлә биләр ки, Јеһованы һансыса һәрәкәтинлә наразы салмысан вә артыг Онун диггәтинә лајиг дејилсән. Анҹаг бу ҹүр фикирләшмәјә тәләсмә. Мүгәддәс Китаб бизи әмин едир ки, Јеһова «мәзлумун дәрдинә хор бахмады, ондан икраһ едәрәк үзүнү ҝизләтмәди, имдада чағыранда сәсинә ҹаваб верди» (Мәзмур 22:24). Мәсиһ һаггында јазылмыш бу пејғәмбәрлик Јеһованын Өз садиг хидмәтчиләрини нәинки динләдијинә, һәтта онлара бол-бол хејир-дуа вердијинә бизи әмин едир.
3. Биз нәјә ҝөрә бу системин тә’сиринә дүшә биләрик?
3 Бу систем бүтүн инсанлара, о ҹүмләдән Јеһованын хидмәтчиләринә дә тәзјиг ҝөстәрир. Биз, Јеһованын баш дүшмәни Шејтан Иблисин идарә етдији дүнјада јашајырыг (2 Коринфлиләрә 4:4; 1 Јәһја 5:19). Јеһоваја хидмәт едәнләр хүсуси тәрздә гејри-ади мүдафиәјә малик дејилләр, әксинә, онлар Шејтанын әсас һәдәфидирләр (Әјјуб 1:7-12; Вәһј 2:10). Буна ҝөрә дә, нә гәдәр ки, Аллаһын тә’јин етдији вахт ҝәлмәјиб, Јеһованын бизим гејдимизә галдығына гәтијјән шүбһә етмәдән «сыхынтыја дөзүмлү, дуада мәтанәтли» олмаг лазымдыр (Ромалылара 12:12). Аллаһымыз Јеһованын бизи севдијинә даир бир дамҹы да олсун, шүбһә олмалы дејил!
Мәтанәтли олмаға даир гәдим дөврүн нүмунәләри
4. Јеһованын гәдимдә јашајан вә бәдбәхтликләрлә үзләшән садиг хидмәтчиләринин нүмунәләрини ҝәтирин.
4 Кечмишдә Јеһованын бир чох хидмәтчиләри бәдбәхтликләрлә үзләшмәли олурдулар. Мисал үчүн, Ханна өвлады олмадығы үчүн гәм едирди. Она елә ҝәлирди ки, Аллаһ ону унудуб (1 Шамуел 1:9-11). Падшаһ арвады олан гатил Изевел Илјасы тә’гиб едәркән о, горхуја дүшүб Јеһоваја белә дуа етмишди: «Бәсдир, ја Рәбб, инди мәним ҹанымы ал, чүнки мән аталарымдан јахшы дејиләм» (1 Падшаһлар 19:4). Һәр шејдән ҝөрүндүјү кими, һәвари Павел дә өз гејри-камиллијинә ҝөрә дәрин нараһатчылыг һисси кечирирди. «Јахшылыг етмәк истәркән, мәндә пислик һазыр олур, — дејә о вурғуламыш, сонра исә әлавә етмишди: — Нә заваллы адамам!» (Ромалылара 7:21-24).
5. а) Јеһова Ханнаны, Илјасы вә Павели неҹә мүкафатландырды? б) Бизи мәнфи һиссләр бүрүјән заман, Аллаһын Кәламындан һансы тәсәллини әлдә едә биләрик?
5 Билдијимиз кими, Ханна, Илјас вә Павел Јеһоваја хидмәт етмәјә мәтанәтлә давам едирдиләр. Буна ҝөрә дә, Аллаһ онлары бол-бол мүкафатландырырды (1 Шамуел 1:20; 2:21; 1 Падшаһлар 19:5-18; 2 Тимотејә 4:8). Бунунла белә, онлар мүхтәлиф ҹүр һиссләрлә — үмидсизлик, чарәсизлик вә горху кими һиссләрлә мүбаризә апармалы олурдулар. Тәәҹҹүблү дејил ки, һәрдән бизи дә мәнфи һиссләр бүрүјүр. Һәјатында баш верән нараһатчылыглара ҝөрә Јеһованын сәни севмәдијини дүшүнүрсәнсә, нә етмәк олар? Аллаһын Кәламындан тәсәллини әлдә етмәк олар. Мәсәлән, әввәлки мәгаләдә Јеһованын башымыздакы сачлары белә сајдығына даир Исанын дедикләрини мүзакирә етмишдик (Матта 10:30). Бу руһландырыҹы сөзләр Јеһованын Өз хидмәтчиләри илә дәриндән марагландығыны ҝөстәрир. Бәс сәрчәләрлә бағлы әјани нүмунә неҹә? Јеһованын һөкмү олмадан, бу сәрчәләрдән бири дә јерә дүшмүр. Белә олан һалда, Јеһова Аллаһ сәнин ағыр вәзијјәтинә е’тинасыз јанаша биләрми?
6. Гәмҝин фикирләрлә мүбаризә апаран инсанлара Мүгәддәс Китаб неҹә тәсәлли верир?
6 Биз гејри-камил инсанлар, һәр шејә Гадир Јарадан Јеһова Аллаһын ҝөзүндә һансыса дәјәрә малик ола биләрикми? Бәли! Буна бизи Мүгәддәс Китабдан бир чох парчалар әмин едир. Онларын үзәриндә дүшүнәрәк, биз бүтүн үрәкдән мәзмурчунун сөзләри илә разылашырыг: «Мән дахилән чох нараһат оларкән тәсәлли верәрәк мәни фәрәһләндирирсән» (Мәзмур 94:19). Ҝәлин Аллаһын Кәламындан бә’зи тәсәлливериҹи фикирләри нәзәрдән кечирәк. Бу фикирләр Онун бизи гијмәтләндирдијини вә әҝәр бундан сонра да Аллаһын ирадәсини јеринә јетирмәјә давам едәриксә, мүтләг мүкафатландыраҹағыны дәриндән баша дүшмәјә көмәк едир.
Јеһованын «хүсуси мүлкү»
7. Јеһова Малакинин васитәсилә позғун халга һансы руһландырыҹы пејғәмбәрлији чатдырды?
7 Б. е. ә. В әсрдә јәһудиләр руһани ҹәһәтдән аҹынаҹаглы вәзијјәтдә идиләр. Каһинләр инсанларын Јеһоваја гүсурлу һејванлары гурбан ҝәтирмәләринә разылыг верирдиләр. Һакимләр үзҝөрәнлик едирдиләр. Инсанлар ҹадуҝәрлијә, јалана, фырылдагчылыға вә зинаја гәрг олмушдулар (Малаки 1:8; 2:9; 3:5). Малаки бу позғун халга тәәҹҹүблү бир пејғәмбәрлик едир: вахт ҝәләҹәк ки, онлар јенидән Јеһованын ҝөзүндә лүтф тапаҹаглар. Пејғәмбәрлик белә сәсләнирди: «Фәалијјәтә кечдијим ҝүн онлар Мәнә мәхсус халг олаҹаг. Бир ата өзүнә хидмәт едән оғлуна неҹә рәһм едәрсә, Мән дә онлара елә рәһм едәҹәјәм» (Малаки 3:17).
8. Малаки 3:17 ајәсиндәки пејғәмбәрлик бөјүк издиһама неҹә аид едилә биләр?
8 Малакинин пејғәмбәрлији бизим ҝүнләрдә дә јеринә јетир. Бу, 144 000 нәфәрдән ибарәт олан руһла мәсһ едилмиш мәсиһчиләрә — руһани халга аиддир. Бу халг Јеһованын «мүлкијјәти» — Онун ‘хүсуси мүлкүдүр’ (1 Петер 2:9, ЈД). ‘Ағ либас ҝејиб, әлләриндә палма будағы, тахтын вә Гузунун гаршысында дуран’ ‘бөјүк бир издиһамдан’ ибарәт инсанлар да Малакинин пејғәмбәрлијиндән руһланырлар (Вәһј 7:4, 9). Онлар мәсһ едилмишләрлә бирликдә үзәрләриндә Иса Мәсиһ кими бир Чобаны олан сүрүнү тәшкил едирләр (Јәһја 10:16).
9. Нәјә ҝөрә Јеһова Өз хидмәтчиләрини «хүсуси мүлк» һесаб едир?
9 Јеһова Она хидмәт етмәк истәјәнләрә неҹә мүнасибәт бәсләјир? Малаки 3:17 ајәсинә әсасән, севән атанын өз оғлуна бәсләдији мүнасибәт кими. Ҝөрүн Јеһова Өз халгы һаггында неҹә сәмими сөзләр дејиб: Јеһова ону «[Өзүнә] мәхсус халг» адландырыб. Мүгәддәс Китабын диҝәр тәрҹүмәләриндә бу ифадә «хүсуси мүлкүм», «гијмәтли мүлкүм», «даш-гашларым» кими тәрҹүмә едилир. Јеһова Өз хидмәтчиләрини нәјә ҝөрә бу гәдәр гијмәтли һесаб едир? Илк нөвбәдә она ҝөрә ки, Јеһова миннәтдар Аллаһдыр (Ибраниләрә 6:10). О, үрәкдән Она хидмәт едәнләри Өзүнә јахынлашдырыр вә јүксәк гијмәтләндирир.
10. Јеһова Өз хидмәтчиләрини неҹә мүдафиә едир?
10 Һәр бир инсан, онун үчүн хүсуси дәјәри олан нәјә исә маликдир. Мәҝәр сәнин үчүн бу гәдәр дәјәрли олан бир шеји горумајаҹагсанмы? Јеһова да Өзүнүн «хүсуси мүлкүнү» горујур. Доғрудур, О Өз хидмәтчиләрини һәјатын бүтүн чәтинликләриндән вә фәлакәтләриндән мүдафиә етмир (Ваиз 9:11). Лакин Јеһова садиг хидмәтчиләрини руһани мә’нада мүдафиә едә биләр вә едир дә. О, мүхтәлиф сынаглара таб ҝәтирә билмәләри үчүн онлара ҝүҹ верир (1 Коринфлиләрә 10:13). Гәдим вахтларда Муса Аллаһын халгына, исраиллиләрә нәсиһәт верирди: «Ҹәсарәтли вә мөһкәм олун... Аллаһыныз Рәбб сизинлә ҝедир. О сизи атмаз, тәрк етмәз!» (Ганунун тәкрары 31:6). Јеһова Өз хидмәтчиләрини гијмәтләндирир. Онлар Онун «хүсуси мүлкүдүрләр».
Јеһова «мүкафат верир»
11, 12. Јеһованын мүкафат вердијини баша дүшмәк шүбһәләрлә мүбаризә апармаға неҹә көмәк едир?
11 Јеһованын Өз хидмәтчиләрини севдијинә диҝәр сүбут онлара мүкафат вермәсидир. О, исраиллиләрә тәклиф етмишдир: «Бүтүн ондабирләринизи анбара ҝәтирин ки, мә’бәдимдә әрзаг олсун. Ордулар Рәбби дејир: “Сиз бунунла Мәни сынајын. Ҝөрәҹәксиниз ки, ҝөјләрин пәнҹәрәләрини сизә ачаҹағам, үзәринизә еһтијаҹларыныздан да чох бәрәкәт јағдыраҹағам”» (Малаки 3:10). Нәтиҹәдә Јеһова Өз хидмәтчиләрини әбәди һәјатла мүкафатландыраҹаг (Јәһја 5:24; Вәһј 21:4). Бу ҹүр бол мүкафат Јеһованын һәдсиз мәһәббәтиндән бәһс едир. О, Она хидмәт етмәк гәрарына ҝәлән һәр бир кәси һәгигәтән дә гијмәтләндирир. Әҝәр биз Јеһованы сәхавәтли Мүкафатчы кими ҝөрмәји өјрәнсәк, онда бизи бәјәндијинә даир һәр бир шүбһәнин өһдәсиндән ҝәлә биләҹәјик. Јеһованын Өзү бизим Ондан мүкафат ҝөзләмәјимизи истәјир! Павел јазырды: «Аллаһа јахынлашан иман етмәлидир ки, О вар вә Ону ахтаранлара мүкафат верир» (Ибраниләрә 11:6).
12 Сөзсүз ки, биз Јеһоваја тәкҹә вә’д етдији хејир-дуалары алмаг наминә дејил, мәһәббәтдән ирәли ҝәләрәк хидмәт едирик. Лакин мүкафат алаҹағымыза үмид етмәкдә дүзҝүн олмајан вә ја худбинликлә бағлы һеч бир шеј јохдур (Колослулара 3:23, 24). Јеһова бүтүн үрәји илә Ону ахтаранлары јүксәк гијмәтләндирир вә мәһәббәтдән ирәли ҝәләрәк онлара мүкафат верир.
13. Нәјә ҝөрә фидијә гурбанлығы Јеһованын бизи севдијинә ән бөјүк сүбутдур?
13 Јеһованын инсанлары гијмәтләндирдијинә ән инандырыҹы сүбут Иса Мәсиһин фидијә гурбанлығыдыр. Һәвари Јәһја демишдир: «Аллаһ дүнјаны елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун» (Јәһја 3:16). Тәгдим едилмиш фидијә бүтүн шүбһәләри арадан галдырыр вә бизи Јеһованын ҝөзүндә бөјүк дәјәрә малик олдуғумуза әмин едир. Әҝәр Јеһова ваһид Оғлуну гурбан верәрәк бизә ҝөрә бу ҹүр бөјүк фәдакарлыг етмишдирсә, Онун бизә олан мәһәббәтинә шүбһә етмәк олармы?
14. Павел фидијәјә неҹә мүнасибәт бәсләјирди?
14 Буна ҝөрә дә, руһдан дүшәндә фидијә үзәриндә фикирләш. Ону Јеһованын шәхсән сәнә тәгдим етдији һәдијјә кими гијмәтләндир. Һәвари Павел мәһз бу ҹүр давранмышдыр. О, фидијә һагда хатырладараг дејирди: «Нә заваллы адамам!» Сонра исә әлавә едирди: «Иса Мәсиһ васитәси илә Аллаһа шүкүр едирәм!» Павел өзү-өзлүјүндә белә мүлаһизә јүрүдүрдү: ‘[Аллаһын Оғлу] мәни севиб, уғрумда Өзүнү фәда едиб’ (Ромалылара 7:24, 25; Галатијалылара 2:20). Павелин сөзләриндә худбинлијә ишарә едән һеч бир шеј јохдур. О садәҹә олараг Јеһованын шәхсән ону гијмәтләндирдијинә әминлијини билдирир. Павел кими, сән дә фидијәни Аллаһдан шәхсән сәнә тәгдим едилән бир һәдијјә кими гијмәтләндирмәји өјрәнмәлисән. Јеһова јалныз ҝүҹлү Гуртарыҹы дејил, һәм дә мәһәббәтли Мүкафатландырыҹыдыр.
Шејтанын һијләләриндән горун
15-17. а) Иблис шүбһәси олан инсанларын һиссләри илә неҹә ојнајыр? б) Әјјубун башына ҝәлән һадисә бизи нәјә тәшвиг едир?
15 Буна бахмајараг, Аллаһын Кәламында јазылан тәсәлливериҹи фикирләрин шәхсән сәнә аид олдуғуна инанмаг асан олмур. Сәнә елә ҝәлә биләр ки, Аллаһын јени дүнјасындакы әбәди һәјат мүкафаты башгалары үчүндүр, сән исә буна лајиг дејилсән. Белә фикирләр јаранырса, нә етмәк олар?
16 Шүбһәсиз ки, Павелин ефеслиләрә вердији мәсләһәтлә јахшы танышсан: «Иблисин һијләләринә гаршы дура билмәк үчүн Аллаһын бүтүн зиреһләрини ҝејинин» (Ефеслиләрә 6:11). Сирр дејил ки, Шејтанын әсас һијләләри мадди шејләрә мејл вә әхлагсызлыгдыр. Бу ҹүр һијләләрә Аллаһын кечмишдә јашамыш вә мүасир дөврдә јашајан чох хидмәтчиләри дүчар олмушлар. Лакин Шејтанын даһа бир һијләсини унутмаг лазым дејил: о, вар гүввәси илә чалышыр ки, инсанлары, Јеһова Аллаһын онлары севмәдијинә инандырсын.
17 Иблис инсанлары Аллаһдан узаглашдырмаға чалышараг, бу ҹүр һиссләрдән мәһарәтлә истифадә едир. Билдадын Әјјуба сөјләдикләрини јада салын: «Фани инсан Аллаһ гаршысында неҹә салеһ ола биләр? Гадындан доғулан неҹә тәмиз ола биләр? Бах Онун ҝөзүндә ај белә, парлаг дејилсә, улдузлар белә, пак дејилсә, торпаг гурдуна бәнзәр фани инсан неҹә ола биләр? Ахы бәшәр оғлу бир ҹүҹүјә бәнзәр» (Әјјуб 25:4-6; Јәһја 8:44). Бу ҹүр нитги ешидән Әјјубун һансы һиссләри кечирдијини бирҹә тәсәввүр ет! Шејтанын ирадәни сындырмасына јол вермә. Онун фитнәләрини унутма, бу да сәнә там гәтијјәтлә дүзҝүн давранмаг үчүн ҝүҹ вә ҹәсарәт верәҹәкдир (2 Коринфлиләрә 2:11). Әјјубун дүзәлишә еһтијаҹы олса да, о, сарсылмазлығына ҝөрә мүкафатландырылды: итирдикләрини Јеһова она икигат артыгламасы илә верди (Әјјуб 42:10).
Јеһова «үрәјимиздән үстүндүр»
18, 19. Һансы мә’нада «Аллаһ үрәјимиздән үстүндүр вә һәр шеји билир»?
18 Е’тираф етмәк лазымдыр ки, әҝәр дарыхдырыҹы фикирләр үрәјин дәринликләринә көк салыбса, онлардан јаха гуртармаг асан дејил. Лакин Јеһованын руһу вахт өтдүкҹә «истеһкамлары... вә Аллаһын билијинә гаршы дуран һәр әнҝәли» јыхмаға көмәк едәҹәк (2 Коринфлиләрә 10:4, 5). Дарыхдырыҹы фикирләр сәнә ҝүҹ ҝәләндә, һәвари Јәһјанын сөзләри үзәриндә дүшүн: «Биз һәгигәтә аид олдуғумузу бундан билирик вә үрәјимиз нә хүсусда бизи мәһкум едирсә, үрәјимизи Аллаһын гаршысында сакитләшдиририк. Чүнки Аллаһ үрәјимиздән үстүндүр вә һәр шеји билир» (1 Јәһја 3:19, 20).
19 Һансы мә’нада «Аллаһ үрәјимиздән үстүндүр»? Бә’зән үрәјимиз бизи мүһакимә едир, хүсусән дә нөгсанларымыз уҹбатындан кәдәрләнәндә вә гејри-камиллијимиз өзүнү бүрузә верәндә. Јахуд да алдығымыз тәрбијә уҹбатындан өзүмүзә олдугҹа тәнгиди јанашыр вә Јеһоваја мәгбул олмаг гүввәсиндә олмадығымыз дүшүнүрүк. Һәвари Јәһјанын сөзләри әмин едир ки, Јеһова вәзијјәти һәртәрәфли ҝөрәҹәк дәрәҹәдә бөјүкдүр. О, диггәтини бизим сәһвләримизә ҹәмләшдирмир, онларын архасында олан ҝизли имканларымызы ҝөрүр. Бундан әлавә, О бизим мотивләримизи вә мејлләримизи баша дүшүр. Давуд јазырды: «Неҹә јарандығымызы билир, торпагдан дүзәлмәјимизи унутмур» (Мәзмур 103:14). Бәли, Јеһова бизи өзүмүздән јахшы таныјыр!
«Шәрәф таҹы» вә «падшаһлыг чәләнҝи»
20. Јешајанын исраиллиләрин ҝери гајытмасы илә әлагәдар сөјләдији пејғәмбәрликдән Јеһованын хидмәтчиләринә олан мүнасибәти һаггында нә өјрәнирик?
20 Кечмишдә Јешаја пејғәмбәрин васитәсилә Јеһова Өз хидмәтчиләринә ҝеријә дөнәҹәкләри илә әлагәдар үмид вермишдир. Бабил әсарәтинә дүшәндә онлар үмидсизлик һисс едир вә бу ҹүр тәсәллијә чох еһтијаҹ дујурдулар. Халгынын вәтәнә гајыдаҹағы вахт һаггында данышараг, Јеһова габагҹадан демишдир: «Сән Рәббин әлиндә шәрәф таҹы, Аллаһынын овҹунда падшаһлыг чәләнҝи олаҹагсан» (Јешаја 62:3). Бу сөзләрлә Јеһова Өз халгыны иззәтә вә еһтишама гәрг етди. Ејнилә бизим ҝүнләрдә дә руһани Исраили бүтүн халглар гаршысында јүксәлдәрәк, Јеһова она иззәт вә еһтишам верди.
21. Јеһованын садиглик вә сарсылмазлыға ҝөрә мүтләг мүкафатландырдығына неҹә әмин олмаг олар?
21 Бу пејғәмбәрлик әсас е’тибары илә мәсһ едилмиш мәсиһчиләрә аид олса да, Јеһованын Она хидмәт едәнләрин һамысыны јүксәлтдијини ҝөрүрүк. Буна ҝөрә дә шүбһәләр сәнә ҝүҹ ҝәләндә јадда сахла ки, гејри-камиллијинә бахмајараг, Јеһованын ҝөзүндә «шәрәф таҹы» вә «падшаһлыг чәләнҝи» кими бөјүк гијмәтә маликсән. Аллаһын ирадәсини сә’јлә јеринә јетирәрәк, Онун үрәјини севиндирмәјә давам ет (Сүлејманын мәсәлләри 27:11). Әҝәр садиг вә сарсылмаз олсан, Јеһова сәни мүкафатсыз гојмајаҹаг!
[Һашијә]
a Бә’зи адлар дәјишдирилиб.
Хатырлајырсанмы?
• Јеһова бизи нәјә ҝөрә «хүсуси мүлк» һесаб едир?
• Јеһованын мүкафат вердијини нәјә ҝөрә јадда сахламаг ваҹибдир?
• Шејтанын һансы һијләләриндән гачмалыјыг?
• «Аллаһ үрәјимиздән үстүндүр» сөзләри нә демәкдир?
[27-ҹи сәһифәдәки шәкил]
Павел
[27-ҹи сәһифәдәки шәкил]
Илјас
[27-ҹи сәһифәдәки шәкил]
Ханна
[28-ҹи сәһифәдәки шәкил]
Аллаһын Кәламы әсл тәсәлли мәнбәјидир.