Аллаһын гурулушунда Мәсиһин ролуну таныјаг

«БАШЛАНҒЫҸДА Аллаһ ҝөјү вә јери јаратды» вә јаратдығы һәр шеј чох јахшы иди (Јар. 1:1, 31). Јеһова Аллаһ инсанлары хошбәхт олмаг үчүн јаратмышды, онлары гаршыда ҝөзәл ҝәләҹәк ҝөзләјирди. Әфсус ки, Әдән бағында баш галдыран үсјан бәшәријјәтин хошбәхтлијини јарыда гојду. Анҹаг Јеһова Јер күрәси вә бәшәријјәтлә бағлы нијјәтиндән дөнмәди. Аллаһ Адәмин итаәткар өвладларына гуртулуш бәхш етмәјә гәрар верди. Јеһова пак ибадәти бәрпа едәҹәк, Шәрири вә онун шәр әмәлләрини мәһв едәҹәк (Јар. 3:15). Бир ҝүн јенә һәр шеј чох јахшы олаҹаг. Јеһова буну Оғлу Иса Мәсиһ васитәсилә едәҹәк (1 Јәһ. 3:8). Буна ҝөрә дә Аллаһын гурулушунда Иса Мәсиһин ролуну танымаг мүтләгдир (Һәв. 4:12; Филип. 2:9, 11).

МӘСИҺИН РОЛУ

² Аллаһын гурулушунда Мәсиһин ролу чохшахәлидир. О, һәм бәшәријјәтин Хиласкары, һәм Баш каһин, һәм дә мәсиһи јығынҹағынын башыдыр. Һазырда исә о, Аллаһын Падшаһлығынын Падшаһыдыр. Исанын ролунун бу ҹәһәтләри барәдә дүшүнәндә Аллаһын гурулушуна ҝөрә миннәтдарлығымыз артыр вә Иса Мәсиһә мәһәббәтимиз ҝүҹләнир. Мүгәддәс Китабда онун бу ҹәһәтләриндән бир нечәси барәдә сөз ачылыр.

³ Мәсиһ јердә јашајанда ајдын олду ки, бәшәријјәт онун васитәсилә Аллаһла барышаҹаг (Јәһ. 14:6). Бәшәријјәтин Хиласкары Иса Мәсиһ чохлары уғрунда һәјатыны фидјә верди (Мәт. 20:28). Бу сәбәбдән, демәк олар ки, Иса садәҹә мөминлик нүмунәси дејил. О, Јеһованын нијјәтинин һәјата кечмәсиндә әсас јер тутур. Биз јалныз онун васитәсилә Аллаһын лүтфүнү газана биләрик (Һәв. 5:31; 2 Кор. 5:18, 19). Исанын өлүмү вә дирилмәси итаәткар бәшәријјәтә Аллаһын сәмави Падшаһлығынын идарәси алтында јашајыб әбәди немәтләр дадмаға јол ачды.

⁴ Баш каһин кими Иса Мәсиһ зәифликләримизи анлајыр вә һәјатыны Аллаһа һәср етмиш инсанларын ҝүнаһларынын кәффарәсини верир. Һәвари Булус буну белә изаһ едир: «О, елә баш каһин дејил ки, зәифликләримизи анлаја билмәсин, һалымыза аҹымасын, ахы о да бизим кими, һәр ҹәһәтдән сынаныб, лакин ҝүнаһ етмәјиб». Сонра Булус Иса Мәсиһә иман ҝәтирәнләри Аллаһын тәгдим етдији бу имкандан там јарарланмаға тәшвиг едир: «Ҝәлин Аллаһын лүтф тахтына јахынлашыб Она ҹәсарәтлә дуа едәк ки, дара дүшәндә Аллаһдан мәрһәмәт вә лүтф ҝөрәк» (Ибр. 4:14—16; 1 Јәһ. 2:2).

⁵ Иса Мәсиһ һәмчинин мәсиһи јығынҹағынын башыдыр. Биринҹи әсрдәки мәсиһиләр кими, бизим дә инсан рәһбәрә еһтијаҹымыз јохдур. Иса мүгәддәс руһ вә ағсаггаллар васитәсилә бизә рәһбәрлик едир. Ағсаггаллар да Аллаһын халгына ҝөрә Мәсиһин вә Аллаһын гаршысында мәсулијјәт дашыјырлар (Ибр. 13:17; 1 Бут. 5:2, 3). Јеһова Иса һаггында демишди: «Будур! Мән ону халглара шаһид, үммәтләрә өндәр вә сәрдар етмишәм» (Әшј. 55:4). Бу, пејғәмбәрлик иди. Шаҝирдләринә дедији нөвбәти сөзләрлә Иса бу пејғәмбәрлијин јеринә јетдијини тәсдиг етди: «Гојмајын сизи рәһбәр адландырсынлар, чүнки бир Рәһбәриниз вар, о да Мәсиһдир» (Мәт. 23:10).

⁶ Мәсиһ бизә көмәк етмәји үрәкдән арзулајыр. Буна ҝөрә дә о бизи дәвәт едир: «Еј бүтүн зәһмәткешләр вә јүкү ағыр оланлар, јаныма ҝәлин, мән сизә тәравәт верәҹәјәм. Бојундуруғуму үзәринизә ҝөтүрүн вә мәндән өјрәнин, чүнки мән һәлим вә гәлбән тәвазөкарам. Онда ҹаныныз тәравәтләнәр. Чүнки бојундуруғум раһат, јүкүм јүнҝүлдүр» (Мәт. 11:28—30). Иса Мәсиһ јығынҹаға һәлимликлә рәһбәрлик едир, онун башчылығы бизә тәравәт ҝәтирир вә бунунла о, сүбут едир ки, Атасы Јеһова Аллаһ кими «јахшы чобан»дыр (Јәһ. 10:11; Әшј. 40:11).

⁷ Коринфлиләрә биринҹи мәктубунда Булус Иса Мәсиһин ролунун диҝәр бир ҹәһәти барәдә белә дејир: «Аллаһ бүтүн дүшмәнләри онун ајаглары алтына атанадәк о һакимијјәт сүрмәлидир. Һәр шеј она табе едиләндән сонра Оғул өзү дә она һәр шеји табе едәнә табе олаҹаг ки, Аллаһ һәр кәс үчүн һәр шеј олсун» (1 Кор. 15:25, 28). Иса Аллаһын хәлг етдији илк варлыг олдуғу үчүн јерә ҝәлмәздән өнҹә Аллаһын јанында уста кими чалышырды (Мәс. 8:22—31). Јер үзүндә дә Иса һәр заман Аллаһын ирадәсини јеринә јетирирди. О, ән ағыр сынаглара таб ҝәтирди вә өләнә гәдәр Атасына садиг галды (Јәһ. 4:34; 15:10). Өләнәдәк садиг галдығы үчүн Аллаһ Исаны дирилдиб Өз дәрҝаһына галдырды вә сәмави Падшаһлыгда һакимијјәт һаггыны она верди (Һәв. 2:32—36). Иса Мәсиһ Аллаһдан мөһтәшәм тапшырыг алыб: о, сајсыз-һесабсыз мәләклә бирликдә јер үзүндән инсан һакимијјәтини вә бүтүн писликләри силмәлидир (Мәс. 2:21, 22; 2 Салон. 1:6—9; Вәһј 19:11—21; 20:1—3). О заман Иса Мәсиһин башчылығы алтында Аллаһын Падшаһлығы јер үзүндә јеҝанә һакимијјәт олаҹаг (Вәһј 11:15).

МӘСИҺИН РОЛУНУ ТАНЫМАГ НӘ ДЕМӘКДИР?

⁸ Нүмунәмиз олан Иса Мәсиһ камил вә гүсурсуздур. Она бизим гејдимизә галмаг бујрулуб. Мәсиһин мәһәббәтини вә гајғысыны дадмаг үчүн Јеһоваја садиг галмалы вә даим ирәли ҝедән тәшкилаты илә ајаглашмалыјыг.

⁹ Биринҹи әсрдәки мәсиһиләр Мәсиһин Аллаһын гурулушундакы ролуну там гәбул едирдиләр. Онлар буну Мәсиһин башчылығы алтында чијин-чијинә чалышмагла вә онун мүгәддәс руһ васитәсилә вердији ҝөстәришләрә әмәл етмәклә ҝөстәрирдиләр (Һәв. 15:12—21). Һәвари Булус мәсһ олунмуш мәсиһиләрин арасындакы бирлији нәзәрдә тутараг јазмышды: «Ҝәлин һәгигәти сөјләјәрәк бәдәнин башы олан Мәсиһә доғру һәр шејдә мәһәббәтлә инкишаф едәк. Онун васитәсилә бүтүн бәдән үзвләри һәмаһәнҝ сурәтдә бирләшиб. Һәр бир үзв мүхтәлиф ваҹиб роллары јеринә јетирән ојнаглар васитәсилә гаршылыглы фәалијјәт ҝөстәрир. Һәр бир үзв өз ишини дүзҝүн ҝөрәндә бу, бәдәнин бөјүмәсинә вә мәһәббәтдә мөһкәмләнмәсинә көмәк едир» (Ефес. 4:15, 16).

¹⁰ Јығынҹагда һәр кәс Мәсиһин башчылығы алтында бир-бири илә әмәкдашлыг едәндә, сүлһдә оланда камил бирлик јарадан мәһәббәт артыр вә ҝүҹләнир (Јәһ. 10:16; Кол. 3:14; 1 Кор. 12:14—26).

¹¹ Мүгәддәс Китаб пејғәмбәрликләринин јеринә јетдијини ҝөстәрән дүнја һадисәләри сүбут едир ки, 1914-ҹү илдә Иса Мәсиһ Падшаһ олуб. О, һал-һазырда дүшмәнләри арасында һакимијјәт сүрүр (Зәб. 2:1—12; 110:1, 2). Бунун һазырда јердә јашајан инсанлара һансы аидијјәти вар? Иса тезликлә падшаһлар Падшаһы вә ағалар Ағасы кими дүшмәнләринә гаршы Аллаһын һөкмүнү иҹра едәҹәк (Вәһј 11:15; 12:10; 19:16). Онда Јеһова Аллаһын үсјандан сонра вердији вәд јеринә јетәҹәк вә бу, Мәсиһин лүтфүнү газанмыш инсанлара гуртулуш ҝәтирәҹәк (Мәт. 25:34). Аллаһын гурулушунда Мәсиһин ролуну гәбул етдијимиз үчүн биз чох бәхтәвәр инсанларыг! Одур ки ҝәлин бу ахырзаманда әл-әлә вериб Мәсиһин башчылығы алтында бүтүн дүнјаны әһатә едән ибадәтимизи иҹра едәк.