Ојаг дурун — һөкм вахты ҝәлди!
Бу мәгалә, 2004-2005-ҹи ил әрзиндә бүтүн дүнја үзрә кечирилән вилајәт конгресиндә е’лан олунан «Ојаг дурун!» брошүрасына әсасланыб.
«Ојаг дурун; чүнки Рәббинизин һансы ҝүн ҝәләҹәјини билмәзсиниз» (МАТТА 24:42).
1, 2. Иса өз ҝәлишини ујғун олараг нә илә мүгајисә етди?
ЈАШАДЫҒЫНЫЗ әразидә оғрунун евләри таламаг үчүн фүрсәт ахтардығыны билсәјдиниз, неҹә давранардыныз? Јәгин ки, сиз әзизләринизи вә дәјәрли әшјаларынызы горумаг үчүн еһтијатлы олмаға чалышаҹагсыныз, ахы оғру нә вахт ҝәлдијини хәбәр вермир. Әксинә, о, ҝизлинҹә вә ҝөзләмәдијин вахтда ҝәлир.
2 Иса Мәсиһ өз тәблиғиндә оғру образындан дәфәләрлә истифадә етмишдир (Лука 10:30; Јәһја 10:10). О, ахыр ҝүнләрдә Аллаһын һөкмүнү иҹра етмәк үчүн ҝәлмәздән габаг баш верәҹәк һадисәләр һаггында данышаркән, хәбәрдарлыг етмишдир: «Ојаг дурун; чүнки Рәббинизин һансы ҝүн ҝәләҹәјини билмәзсиниз. Амма буну билин ки, әҝәр ев саһиби оғрунун һансы саатда ҝәләҹәјини билсәјди, ојаг галыб өз евини оғурламаға гојмазды» (Матта 24:42, 43). Беләликлә Иса да өз ҝәлишинин оғрунун ҝәлиши кими ҝөзләнилмәдән олаҹағыны билдирди.
3, 4. а) Иса Мәсиһин ҝәлиши илә бағлы онун хәбәрдарлығына диггәт јетирмәк нә демәкдир? б) Бунунла әлагәдар һансы суаллар мејдана чыхыр?
3 Исанын чәкдији нүмунә ајдын шәкилдә ҝөстәрир ки, онун ҝәлишинин вахты мә’лум олмајаҹаг. Бир гәдәр әввәл һәмин пејғәмбәрликдә Иса демишди: «О ҝүнү вә о сааты нә ҝөјләрин мәләкләри, нә дә Оғул билир; Атадан башга һеч ким билмир» (Матта 24:36). Буна ҝөрә дә, Иса өз динләјиҹиләрини тәшвиг едирди: «Һазыр олун» (Матта 24:44). Мәсиһин хәбәрдарлығына диггәт јетирәнләр, онун Аллаһын һөкмүнүн Иҹрачысы кими нә вахт ҝәлмәсиндән асылы олмајараг, һәр заман еһтијатлы вә лазыми тәрздә давранырлар.
4 Бунунла әлагәдар нөвбәти ваҹиб суаллар мејдана чыхыр: Мәсиһин хәбәрдарлығы јалныз бу дүнјанын адамларына аиддир, јохса һәгиги мәсиһчиләр дә ојаг дурмалыдырлар? Ојаг дурмаг нә үчүн ваҹибдир вә бу нә демәкдир?
Хәбәрдарлыг кимләрә үнванланыб?
5. Нәдән билирик ки, Иса «ојаг дурун» хәбәрдарлығыны һәгиги мәсиһчиләрә үнванландырмышды?
5 Јахынлашан фәлакәт һаггындакы хәбәрдарлыға гаршы гулагларыны тыхајан инсанлар үчүн, Иса һәгигәтән дә оғру кими ҝөзләнилмәдән ҝәләҹәк (2 Петер 3:3-7). Бәс һәгиги мәсиһчиләр үчүн? Һәвари Павел һәмиманлыларына јазырды: «Сиз өзүнүз дәгиг билирсиниз ки, Рәббин Ҝүнү оғру ҝеҹә ҝәлән кими ҝәләҹәк» (1 Салониклиләрә 5:2). Биз ‘Рәббин Ҝүнүнүн’ ҝәләҹәјинә зәррә гәдәр дә шүбһә етмирик. Бәс бу, ојаг дурмағын бир о гәдәр дә ваҹиб олмадығынымы ҝөстәрир? Диггәт јетирәк ки, нөвбәти сөзләри дејәркән, Иса мәһз өз шаҝирдләринә мүраҹиәт етмишди: «Инсан Оғлу сизин зәнн етмәдијиниз саатда ҝәләҹәкдир» (Матта 24:44). Даһа өнҹә Иса шаҝирдләрини илк нөвбәдә Падшаһлығы ахтармаға тәшвиг едәндә, онлара хәбәрдарлыг етмишди: «Сиз дә һазыр олун; чүнки Инсан Оғлу сизин зәнн етмәдијиниз саатда ҝәләҹәкдир» (Лука 12:31, 40). Мәҝәр ајдын дејилми ки, «ојаг дурун» хәбәрдарлығыны Иса өз давамчыларына үнванландырмышды?
6. Нәјә ҝөрә ојаг дурмаг лазымдыр?
6 Биз нәјә ҝөрә ојаг дурмалы вә һазыр олмалыјыг? Иса Мәсиһ изаһ етди: «О заман тарлада ики нәфәр олаҹаг; бири алынаҹаг, бири исә галаҹагдыр. Дәјирманда дән үјүдән ики гадын олаҹаг; бири алынаҹаг, бири исә галаҹагдыр» (Матта 24:40, 41). Бу аллаһсыз дүнја мәһвә уғрајан заман һазыр оланлар «алынаҹаг», јә’ни хилас олаҹаглар. Диҝәрләри исә, егоистҹәсинә јалныз өз мәнфәәтләрини ҝүддүкләри үчүн «галаҹаг», јә’ни мәһв олаҹаглар. Бу кими инсанларын арасында бир заманлар руһани биликләр алмыш, сонра исә ојаг галмајанлар да ола биләр.
7. Сонун нә заман ҝәләҹәјини билмәмәјимиз бизә һансы имканы верир?
7 Һал-һазырда мөвҹуд олан системин сонунун нә заман ҝәләҹәјини дәгиг билмәмәјимиз, Аллаһа хидмәтимизин тәмәннасыз олдуғуну сүбут етмәјә имкан јарадыр. Нәјә ҝөрә? Биздә елә тәәссүрат јарана биләр ки, сон һәлә ҝеҹ ҝәләҹәк. Тәәссүфләр олсун ки, бу ҹүр дүшүнән мәсиһчиләрдән бә’зиләри Јеһоваја хидмәтдәки сә’јләринин сојумасына јол вермишләр. Лакин биз һәјатымызы Аллаһа һәср етмәклә, өзүмүзү гејри-шәртсиз олараг Она хидмәтә тәгдим етмишик. Јеһованы таныјанлар баша дүшүрләр ки, сон анда сә’ј ҝөстәрмәклә Аллаһда тәәссүрат јаратмаг мүмкүн дејил. О, үрәјимиздә оланлары ҝөрүр (1 Шамуел 16:7).
8. Јеһоваја олан мәһәббәтимиз, бизи ојаг дурмаға неҹә тәшвиг едир?
8 Биз Јеһованы сәмими гәлбдән севдијимиз үчүн, Онун ирадәсини јеринә јетирмәк арзусу илә алышыб јанырыг (Мәзмур 40:8; Матта 26:39). Биз Она әбәдијјән хидмәт етмәк истәјирик. Вә бу ҹүр ҝәләҹәји умдуғумуздан бир гәдәр артыг ҝөзләмәли олдуғумуз үчүн, о өз дәјәрини итирмир. Ојаг дурмағымызын ән әсас сәбәби одур ки, Јеһованын ҝүнүнүн Онун нијјәтләринин һәјата кечирилмәсиндә ојнадығы ваҹиб ролу дәрк едирик. Сәмими гәлбдән Аллаһы разы салмаг истәјимиз бизи Онун Кәламына диггәт јетирмәјә вә әввәлҹә Падшаһлығы ахтармаға тәшвиг едир (Матта 6:33; 1 Јәһја 5:3). Ҝәлин мүзакирә едәк, ҝөрәк ојаг дурмағымыз гәрарларымызда вә һәјат тәрзимиздә неҹә әкс олунмалыдыр.
Һәјатыныз нәјә јөнәлдилмишдир?
9. Инсанларын һансы зәманәдә јашадығымызы дәрк етмәләри нәјә ҝөрә ваҹибдир?
9 Бир чох инсанлар ҹидди проблемләрин вә бәдбәхтликләрин ади бир һала чеврилдијини ҝөрүр вә еһтимал ки, онлар һәјатларынын ҝедишатындан мәмнун дејилләр. Бәс онлар дүнја һадисәләринин әслиндә бизим үчүн һансы мә’наны дашыдығыны билирләрми? Онлар ‘дөврүн сонунун’ јахынлашдығы бир заманда јашадығымызы билирләрми? (Матта 24:3). Бәс егоизмин, зоракылығын вә һәтта Аллаһа мәгбул олмајан дүшүнҹә тәрзинин бу гәдәр ҝениш јајылмасынын ‘ахыр ҝүнләрин’ әламәти олдуғуну е’тираф едирләрми? (2 Тимотејә 3:1-5). Онлар ајылмалы, баш верәнләрин мәғзини баша дүшмәли вә һәјатларынын нәјә јөнәлдилдијинин үзәриндә дүшүнмәлидирләр.
10. Ојаг дурдуғумуза әмин олмаг үчүн нә едә биләрик?
10 Бәс биз ојаг дуруругму? Ҝүндәлик һәјатымызда сағламлыг, аилә вә ибадәтимизлә бағлы гәрарлар гәбул етмәли олуруг. Биз Мүгәддәс Китаб принсипләрини билир вә онлара әсасән јашамаға ҹан атырыг. Буна ҝөрә дә өзүмүзә нөвбәти суаллары вермәк јахшы оларды: «Һәјат гајғыларынын мәни Аллаһа хидмәтдән јајындырмасына јол верирәмми? Бу дүнјанын фәлсәфәси, јә’ни дүшүнҹә тәрзи мәним гәрарларыма тә’сир ҝөстәрирми?» (Лука 21:34-36; Колослулара 2:8). Һәр ан әмәлләримиздән ҝөрүнмәлидир ки, биз бүтүн гәлбимизлә Јеһоваја ҝүвәнир вә Онун идракына е’тибар едирик (Сүлејманын мәсәлләри 3:5). Бу бизим һәгиги һәјатдан — Аллаһын јени дүнјасындакы әбәди һәјатдан бәрк јапышмағымыза көмәк едәҹәк (1 Тимотејә 6:12, 19).
11-13. а) Нуһун ҝүнләриндә вә б) Лутун ҝүнләриндә баш верәнләрдән нә өјрәнә биләрик?
11 Мүгәддәс Китабда ојаг дурмағымыза көмәк едән бир чох ибрәт ала биләҹәјимиз нүмунәләр вар. Нуһун ҝүнләриндә баш верәнләри јада салаг. Дашгындан чох-чох әввәл Аллаһ инсанлара хәбәрдарлыг етмишди. Анҹаг Нуһ вә онун аиләсиндән башга гулаг асан олмады (2 Петер 2:5). Иса Мәсиһ бу барәдә демишдир: «Нуһун ҝүнләри неҹә идисә, Инсан Оғлунун ҝәлиши дә елә олаҹагдыр. Чүнки Нуһун ҝәмијә ҝирдији ҝүнә гәдәр, туфандан әввәлки ҝүнләрдә, инсанлар јејиб, ичиб, евләниб, әрә ҝедирдиләр. Вә туфан ҝәлиб һамысыны апарынҹаја гәдәр неҹә бихәбәр идиләрсә, Инсан Оғлунун ҝәлиши дә бу ҹүр олаҹагдыр» (Матта 24:37-39). Биз бу нүмунәдән нә өјрәнә биләрик? Әҝәр бизләрдән ким исә һәјатын гајғыларынын, һәтта ҝүндәлик ишләрин Аллаһын биринҹи јерә гојмағымызы истәдији руһани ишләри сыхышдырыб чыхармасына јол верирсә, һәмин адамын өз һәјат тәрзи үзәриндә ҹидди дүшүнмәси ҝәрәкдир (Ромалылара 14:17).
12 Даһа бир нүмунә үзәриндә дүшүнәк. Лут вә аиләсинин јашадыглары Содом шәһәри мадди ҹәһәтдән чичәкләнән, руһән исә солмуш бир вәзијјәтдә иди. Јеһова мәләкләри ҝөндәрмишди ки, бу шәһәри мәһв етсинләр. Мәләкләр Лута вә аиләсинә Содомдан гачмағы вә дөнүб ҝеријә бахмамағы тапшырмышдылар. Мәләкләрин тәшвиги илә онлар шәһәри тәрк етдиләр. Лакин Лутун арвады Содомдакы евләри үчүн һејфсиләнирди. О, Аллаһын әмрини позараг, ҝери дөндү вә бу, она һәјаты баһасына баша ҝәлди (Јарадылыш 19:15-26). Иса ҝәләҹәкдән данышаркән, хәбәрдарлыг етмишдир: «Лутун арвадыны хатырлајын». Биз бу хәбәрдарлыға диггәт јетиририкми? (Лука 17:32).
13 Аллаһын хәбәрдарлығына гулаг асанлар мәһвдән гачдылар. Нуһ аиләси илә бирликдә, һәмчинин Лут вә гызлары хилас олдулар (2 Петер 2:9). Биз бу нүмунәләрдәки хәбәрдарлыға ҹидди јанашсаг, салеһлији севәнләрә јөнәлән хилас хәбәри бизи дә тәшвиг едә биләр. Аллаһын ‘салеһлик өмүр сүрән’ «јени ҝөјләр вә јени јер» һаггындакы вә’динин јеринә јетәҹәји вахты әминликлә ҝөзләјирик (2 Петер 3:13).
‘Һөкм вахты ҝәлди!’
14, 15. а) Һөкм «вахты» өзүнә нәји дахил едир? б) ‘Аллаһдан горхмаг вә Она иззәт вермәк’ нә демәкдир?
14 Әҝәр ојаг галарыгса, биз нәјә үмид едә биләрик? Аллаһын нијјәтинин неҹә јеринә јетәҹәји «Вәһј» китабында аддымбааддым тәсвир олунмушдур. Бу китабда јазыланлара ујғун һәрәкәт етмәклә, биз өз һазырлығымызы ҝөстәрәҹәјик. Орадакы пејғәмбәрликләрдә 1914-ҹү илдә Мәсиһ һакимијјәтә ҝәлдикдән сонра башлајан «Рәббин ҝүнүндә» баш верән һадисәләр ҹанлы сурәтдә тәсвир олунур (Вәһј 1:10). «Вәһј» китабы диггәтимизи «әбәди бир Мүждә» һәвалә олунан мәләјә јөнәлдир. Һәмин мәләк јүксәк бир сәслә бәјан едирди: «Аллаһдан горхун! Она иззәт верин! Чүнки Онун һөкмүнүн вахты ҝәлди» (Вәһј 14:6, 7). Һөкм «вахты» — пејғәмбәрликдә тәсвир олунан Аллаһын һөкмләринин һәм бәјан едилдији, һәм дә иҹра олундуғу гыса вахт мүддәтидир. Һазырда биз мәһз һәмин дөврдә јашајырыг.
15 Инди, һөкм вахты һәлә баша чатмамышдан әввәл, тәшвиг олунуруг: «Аллаһдан горхун! Она иззәт верин!» Бу сөзләр нә мә’на дашыјыр? Аллаһ гаршысында сағлам горхуја малик олмаг бизи пислијә нифрәт етмәјә тәшвиг етмәлидир (Сүлејманын мәсәлләри 8:13). Әҝәр Аллаһа һөрмәт едириксә, онда Ону еһтирам һисси илә динләјәҹәјик. «Онун Кәламыны — Мүгәддәс Китабы мүнтәзәм олараг охумаға вахтымыз јохдур» дејә өзүмүзә һагг газандырмајаҹаг вә мәсиһчи ҝөрүшләринә ҝетмәк мәсләһәтинә е’тинасызлыг ҝөстәрмәјәҹәјик (Ибраниләрә 10:24, 25). Биз Аллаһын Хиласкар Падшаһлығы һаггындакы хош хәбәри бәјан етмәк шәрәфини гијмәтләндирәҹәк вә өз мәс’улијјәтимизи сә’јлә јеринә јетирәҹәјик. Бүтүн гәлбимизлә һәр заман Јеһоваја архаланаҹағыг (Мәзмур 62:8). Јеһованын Күлл-Ихтијар Аллаһ олдуғуну гәбул етдијимиз үчүн, һәјатымызы һазырлыгла Онун ирадәсинә табе етдирәрәк Она еһтирам бәсләдијимизи ҝөстәририк. Бәс сән һәгигәтән дә Аллаһ горхусуна маликсәнми вә һәр аддымынла Она мәһз бу ҹүр иззәт верирсәнми?
16. Нәјә ҝөрә демәк олар ки, Вәһј 14:8 ајәсиндә дејилән Бөјүк Бабил үзәриндәки һөкм артыг јеринә јетиб?
16 «Вәһј» китабынын 14-ҹү фәслиндә һөкм вахты баш вермәли олан сонракы һадисәләр тәсвир едилир. Әввәлҹә јалан динин дүнја империјасы олан Бөјүк Бабил хатырланыр. Биз охујуруг: «Башга бир мәләк дә ардынҹа ҝәлиб дејирди: “Јыхылды! ...бөјүк Бабил шәһәри јыхылды!”» (Вәһј 14:8). Аллаһын ҝөзүндә Бөјүк Бабил шәһәри һәгигәтән дә јыхылыб. 1919-ҹу илдә Јеһованын мәсһ едилмиш хидмәтчиләри, минилликләр әрзиндә инсанларын үзәриндә һаким кәсилән Бабил еһкамларынын вә ән’әнәләринин әсарәтиндән азад олдулар (Вәһј 17:1, 15). Һәмин андан е’тибарән онлар әлләриндән ҝәләни етмишләр ки, һәгиги ибадәт ҝениш јајылсын. Беләликлә, Аллаһын Падшаһлығы һаггындакы хош хәбәрин тәблиғи о вахтдан е’тибарән бүтүн јер үзүндә сәсләнир (Матта 24:14).
17. Бөјүк Бабилдән чыхмаг нә демәкдир?
17 Аллаһын Бөјүк Бабил үзәриндәки мәһкәмәси јалныз јухарыда садаланан һадисәләрлә сона јетмир. Тезликлә ону тамамилә мәһв ҝөзләјир (Вәһј 18:21). Мүгәддәс Китаб там әсасла һәр бир кәси тәшвиг едир: «Еј халгым, орадан [Бөјүк Бабилдән] чыхын ки, онун ҝүнаһларына шәрик олмајасыныз» (Вәһј 18:4, 5). Бөјүк Бабилдән чыхмаг нә демәкдир? Бу, садәҹә јалан динлә бүтүн әлагәни кәсмәкдән даһа артыг мә’на дашыјыр. Бөјүк Бабилин тә’сири бир чох мәшһур бајрам вә ән’әнәләрдә, бу ҝүн ҝениш јајылмыш ҹинси әхлагсызлыгда, спиритизмлә бағлы әјләнҹәләрдә вә бир чох башга шејләрдә ҝөрүнүр. Ојаг галмаг үчүн, Бөјүк Бабилдән һәгигәтән дә ајрылдығымызы һәм әмәлләримизлә, һәм дә үрәјимизин арзулары илә сүбут етмәлијик.
18. Ојаг дуран мәсиһчиләр Вәһј 14:9, 10 ајәләриндәки сөзләри јадда сахлајараг, нәдән гачмаға чалышырлар?
18 Вәһј 14:9, 10 ајәләриндә ‘һөкм вахтынын’ даһа бир хүсусијјәти ачыгланыр. Башга мәләк дејир: «Ким ҹанавара вә онун сурәтинә сәҹдә едиб, алнына, јахуд әлинә дамға вурулмасыны гәбул едәрсә, О да, Аллаһын һиддәт касасында саф олараг һазырланмыш Өз гәзәбинин шәрабындан ичәҹәкдир». Нәјә ҝөрә? ‘Ҹанавар вә онун сурәти’ — Јеһованын һакимијјәтини гәбул етмәјән инсан һөкумәтләринин символудур. Ојаг дуран мәсиһчиләр диггәтли олмаға чалышырлар ки, һәгиги Аллаһ Јеһованы Күлл-Ихтијар Һөкмдар кими гәбул етмәјәнләрин тә’сири алтына дүшмәсинләр. Фикирләримизин вә әмәлләримизин бу ҹүр тә’сир алтына дүшмәсинә јол вермәјимиз, ‘алына, јахуд әлә вурулан’ көләлик дамғасына бәнзәјәрди. Мәсиһчиләр Аллаһын Падшаһлығынын артыг ҝөјләрдә гурулдуғуну билирләр. Бу Падшаһлыг бүтүн инсан рәһбәрликләринә сон гојаҹаг, өзү исә әбәдијјән дураҹаг (Даниел 2:44).
Вахтын јахын олдуғуну унутмајын
19, 20. а) Ахыр ҝүнләр сона јахынлашдыгҹа, Шејтан, шүбһәсиз ки, нә етмәјә чалышаҹагдыр? б) Биз нәјә гәтијјәтли олмалыјыг?
19 Ахыр ҝүнләрин сонуна јахынлашдыгҹа, сынаглар вә ширникдириҹи тә’сирләр дә ҝет-ҝедә артыр. Һәлә ки, гејри-камилик вә бу көһнә системдә јашајырыг хәстәликләр, гоҹалыг, әзизләримизин өлүмү, инҹиклик һиссләри, Аллаһын Кәламыны тәблиғ етдијимиз инсанларын е’тинасызлығы вә бир чох башга шејләр бизә әзаб вермәјә давам едәҹәк. Шејтан бизим хош хәбәри тәблиғ етмәјә вә Аллаһын нормаларына әсасән јашамаға сон гојмағымызы ҝөзләјир (Ефеслиләрә 6:11-13). Һансы дөврдә јашадығымызы гәтијјән унутмамалыјыг!
20 Ҹидди проблемләрлә гаршылашаҹағымызы биләрәк, Иса Мәсиһ бизи тәшвиг етмишдир: «Ојаг дурун; чүнки Рәббинизин һансы ҝүн ҝәләҹәјини билмәзсиниз» (Матта 24:42). Беләликлә, ҝәлин һәр заман ајыг олаг вә һансы дөврдә јашадығымызы унутмајаг. Шејтанын бизи өз тәләсинә салмасына јол вермәјәк: хидмәтдә сојумајаг вә һәгигәти тәрк етмәјәк. Аллаһын Падшаһлығы һаггындакы хош хәбәри даһа да сә’јлә вә ҹәсарәтлә тәблиғ едәк. Нә олурса-олсун, ҝәлин вахтын ҝөзләмәдијини унутмајаг вә Исанын ојаг дурмаг әмринә диггәт јетирәк. Беләликлә биз Јеһоваја иззәт верәҹәк вә әбәди хејир-дуалар алаҹағыг.
Сиз неҹә ҹаваб верәрдиниз?
• Нәдән ҝөрүнүр ки, ојаг дурмаг хәбәрдарлығы һәгиги мәсиһчиләрә аиддир?
• Һансы хәбәрдаредиҹи нүмунәләр ојаг дурмағымыза көмәк едир?
• Һөкм вахты нәдир вә бу вахт сона чатмамыш биз нә етмәлијик?
[23-ҹү сәһифәдәки шәкил]
Иса өз ҝәлишини оғрунун ҝәлиши илә мүгајисә етди.
[24-ҹү сәһифәдәки шәкил]
Бөјүк Бабилин мәһви јахындыр.
[25-ҹи сәһифәдәки шәкилләр]
Ҝәлин даһа да сә’ј вә гәтијјәтлә тәблиғ едәк.