Мүгәддәс руһун Јеһованын нијјәтиндәки ролу
«Ағзымдан чыхан кәлмә... ону ҝөндәрдијим иш иҹра олунсун дејә һәјата кечирәр» (ЈЕШАЈА 55:11).
1. Планла нијјәт арасындакы фәрги әјани нүмунә әсасында ҝөстәрин.
МАШЫНЛА сәјаһәтә чыхмаға һазырлашан ики нәфәри тәсәввүр едәк. Онлардан бири ҝедәҹәји јолун әтрафлы маршрутуну ҹызыр. Диҝәри исә һәмин јери фикриндә тутур вә ора ҝетмәјин бир нечә јолуну билир. Ҝөзләнилмәз һаллар баш верәрсә, о, өз маршрутуну дәјишмәјә һазырдыр. Мүәјјән мәнада, бу ики адамын нүмунәсиндән планла нијјәт арасындакы фәрги ҝөрмәк олур. Планы ҝедиләҹәк јолун хырдалығына гәдәр дүшүнүлмүш маршруту илә мүгајисә етмәк олар, нијјәт исә бир нәфәрин гаршысына гојдуғу мәгсәддир вә она мүхтәлиф үсулларла наил олмаг олар.
2, 3. а) Јеһованын нијјәтинә нә дахилдир вә Адәмлә Һәвва ҝүнаһ ишләтдикдән сонра јаранан вәзијјәти дүзәлтмәк үчүн О, һансы тәдбири ҝөрдү? б) Нәјә ҝөрә биз Аллаһын Өз нијјәтини неҹә һәјата кечирдијини билмәли вә онунла ајаглашмалыјыг?
2 Јеһованын ирадәсинин јеринә јетирилмәсинә ҝәлдикдә исә, Онун хырдалығына гәдәр дүшүнүлмүш планы јох, тәдриҹән һәјата кечирдији нијјәти вар (Ефес. 3:11). Бу нијјәтә Онун башланғыҹда бәшәријјәт вә јер үчүн нәзәрдә тутдуғу — Јер күрәсинин ҹәннәтә чеврилмәси вә камил инсанларын орада әбәдијјән сүлһ вә әмин-аманлыг ичиндә хошбәхт јашамасы дахилдир (Јар. 1:28). Адәмлә Һәвва ҝүнаһ ишләтдикдән сонра Јеһова јаранмыш вәзијјәтә биҝанә галмады вә нијјәтинә наил олмаг үчүн лазыми тәдбирләр ҝөрдү. (Јарадылыш 3:15 ајәсини оху.) Јеһова гәрара алды ки, Онун символик гадыны бир «өвлад», јәни Оғул дүнјаја ҝәтирәҹәк вә бу өвлад пислијин сәбәбкары олан Шејтаны мәһв едиб онун вурдуғу бүтүн зәрәри арадан галдыраҹаг (Ибр. 2:14; 1 Јәһ. 3:8).
3 Нә јердә, нә дә ҝөјдә елә бир гүввә јохдур ки, Аллаһын нијјәтинин һәјата кечирилмәсинә мане олсун (Јешаја 46:9—11). Нәјә ҝөрә белә демәк олар? Чүнки бу ишдә Јеһованын мүгәддәс руһу иштирак едир. Ән гүдрәтли гүввә олан мүгәддәс руһ Аллаһын нијјәтинин ‘јеринә јетириләҹәјинә’ зәманәтдир (Јешаја 55:10, 11). Биз Аллаһын Өз нијјәтини неҹә һәјата кечирдијини билмәли вә онунла ајаглашмалыјыг. Чүнки ҝәләҹәјимиз һәмин нијјәтин һәјата кечмәсиндән асылыдыр. Бундан әлавә, Јеһованын мүгәддәс руһундан неҹә истифадә етдијини ҝөрмәк иманы мөһкәмләндирир. Буна ҝөрә дә ҝәлин Јеһованын нијјәтинин һәјата кечирилмәсиндә мүгәддәс руһун кечмишдәки, индики вә ҝәләҹәкдәки ролунун нәдән ибарәт олдуғуну нәзәрдән кечирәк.
Мүгәддәс руһун кечмишдәки ролу
4. Јеһова Өз нијјәтини тәдриҹән неҹә ачыглајырды?
4 Мүгәддәс Китабын јазылдығы дөврләрдә Јеһова Өз нијјәтини тәдриҹән ачыглајырды. Башланғыҹда вәд олунмуш Өвладын ким олдуғу ‘мүгәддәс сирр’ иди (1 Кор. 2:7, ЈД). Јеһова тәхминән 2 000 илдән сонра өвлад барәдә бир даһа хатырлатды. (Јарадылыш 12:7; 22:15—18 ајәләрини оху.) Онун Ибраһимә вердији вәд бу мәсәләјә хејли ајдынлыг ҝәтирди. Јеһованын «сәнин нәслинин [өвладын] васитәсилә» демәси ајдын ҝөстәрир ки, бу Өвлад Ибраһимин нәслиндән ҝәләҹәкди. Шүбһәсиз, Шејтан бу сиррин ачылмасыны диггәтлә изләјирди вә Аллаһын бу баш Дүшмәни Ибраһимин нәслини мәһв етмәк вә ја аздырмаг истәјирди ки, Аллаһын нијјәти баш тутмасын. Анҹаг Аллаһын фәалијјәтдә олан ҝөзәҝөрүнмәз руһу буна јол вермәди. Неҹә?
5, 6. Јеһова мүгәддәс руһун васитәсилә Өвладын нәсил шәҹәрәсинә дахил олан инсанлары неҹә мүдафиә едирди?
5 Јеһова мүгәддәс руһун васитәсилә Өвладын нәсил шәҹәрәсинә дахил олан инсанлары мүдафиә едирди. Јеһова Абрама (Ибраһимә) деди: «Сәнин галханын Мәнәм» (Јар. 15:1). Бу, бош сөзләр дејилди. Нүмунә үчүн ҝәлин Ибраһимлә Саранын б. е. ә. тәхминән 1919-ҹу илдә мүвәггәти олараг Ҝерарда мәскунлашдыглары вахт баш верән һадисәләрә нәзәр салаг. Саранын Ибраһимин арвады олдуғундан хәбәрсиз олан Ҝерар падшаһы Авимелек евләнмәк мәгсәди илә ону евинә ҝәтирди. Саранын Ибраһим үчүн дүнјаја өвлад ҝәтирмәсинин гаршысыны алмаға чалышан Шејтанын бу ишдә әли вар идими? Мүгәддәс Китабда бу һагда һеч нә дејилмир. Орадан садәҹә Јеһованын бу ишә мүдахилә етдијини охујуруг. Јухуда О, Авимелекә тапшырды ки, Сараја тохунмасын (Јар. 20:1—18).
6 Бу, јеҝанә һал дејилди. Јеһова Ибраһими вә онун аилә үзвләрини чох хилас етмишди (Јар. 12:14—20; 14:13—20; 26:26—29). Буна ҝөрә дә Ибраһим вә онун нәсли һаггында мәзмурчу демишди: «Рәбб һеч кими онлара әзаб вермәјә гојмады, онлара ҝөрә падшаһлары тәнбеһ етди. Деди: “Мәсһ етдикләримә дәјмәјин, пејғәмбәрләримә пислик етмәјин”» (Мәз. 105:14, 15).
7. Јеһова Исраил халгыны неҹә горујурду?
7 Мүгәддәс руһунун васитәсилә Јеһова вәд олунмуш Өвладын доғулаҹағы гәдим Исраил халгыны һифз едирди. Јеһова руһу васитәсилә исраиллиләрә һәгиги ибадәти горујан вә јәһудиләрә руһани, әхлаги вә физики ҹәһәтдән тәмиз галмаға көмәк едән Ганун вермишди (Чых. 31:18; 2 Кор. 3:3). Һакимләрин ҝүнләриндә исраиллиләри дүшмән әлиндән азад етмәк үчүн мүәјјән адамлара Јеһованын руһу верилмишди (Һак. 3:9, 10). Ибраһимин Өвладынын әсас һиссәси олан Исанын дүнјаја ҝәлмәсиндән өнҹә, мүгәддәс руһ јүзилликләр әрзиндә Иса һаггындакы пејғәмбәрликләрин јеринә јетмәсиндә бөјүк рол ојнајан Јерусәлими, Бет-Лехеми вә мәбәди горујурду.
8. Мүгәддәс руһун Аллаһын Оғлунун һәјатында вә хидмәтиндә мүһүм рол ојнадығы нәдән бәллидир?
8 Мүгәддәс руһ Исанын һәјатында вә хидмәтиндә мүһүм рол ојнајырды. Мүгәддәс руһ бакирә Мәрјәмин бәтниндә фәалијјәт ҝөстәрәрәк һеч вахт ҝөрүлмәмиш бир иши етди — гејри-камил гадынын һамилә галыб ҝүнаһы вә өлүмү мирас алмајан камил Оғул дүнјаја ҝәтирмәсинин гајғысына галды (Лука 1:26—31, 34, 35). Бир гәдәр сонра исә көрпә Исаны вахтсыз өлүмдән гуртарды (Мат. 2:7, 8, 12, 13). Исанын тәхминән 30 јашы оланда Аллаһ ону мүгәддәс руһла мәсһ едәрәк Давудун тахтынын вариси тәјин етди вә она тәблиғ етмәји тапшырды (Лука 1:32, 33; 4:16—21). Мүгәддәс руһ Исаја мүхтәлиф мөҹүзәләр етмәк — хәстәләри сағалтмаг, чохсајлы инсанлары једиздирмәк вә өлүләри дирилтмәк гүввәси вермишди. Бу мөһтәшәм ишләр Падшаһ Исанын рәһбәрлији алтында алаҹағымыз хејир-дуалардан хәбәр верир.
9, 10. а) Мүгәддәс руһун Исанын еркән шаҝирдләринин үзәриндә олдуғу нәдән ҝөрүнүрдү? б) Ерамызын биринҹи әсриндә Јеһованын нијјәтинин һәјата кечирилмәсинин һансы јөнләри ачыгланды?
9 Ерамызын 33-ҹү илинин Пентикост ҝүнүндән етибарән Јеһова мүгәддәс руһундан истифадә едәрәк Ибраһимин өвладынын икинҹи дәрәҹәли үзвләрини мәсһ етди вә онларын чоху Ибраһимин нәслиндән дејилди (Ром. 8:15—17; Галат. 3:29). Мүгәддәс руһун Исанын еркән шаҝирдләринин үзәриндә олдуғу онлара сәјлә тәблиғ етмәјә көмәк етмәсиндән вә бөјүк ишләр ҝөрмәјә ҝүҹ вермәсиндән ајдын ҝөрүнүрдү (Һәв. иш. 1:8; 2:1—4; 1 Кор. 12:7—11). Онларын руһун мөҹүзәли әнамларыны алмасы сајәсиндә Јеһованын Өз нијјәтини неҹә һәјата кечирмәсинин јени јөнләри ачыгланды. Јеһова артыг истәмирди ки, халгы әсрләр өнҹә Онун тәсис етдији кими ибадәт етсин вә Јерусәлимдәки мәбәд бу ибадәтин мәркәзи олсун. Инди О, лүтфүнү јениҹә јаранмыш мәсиһчи јығынҹағына ҝөстәрирди. О вахтдан бәри Јеһова Өз нијјәтинин һәјата кечирилмәсиндә мәсһ олунмушларын јығынҹағындан истифадә едир.
10 Мүдафиә етмәк, ҝүҹ вермәк вә мәсһ етмәк Јеһованын гәдим дөврләрдә мүгәддәс руһундан истифадә едәрәк нијјәтини һәјата кечирмәк үсулларындан јалныз бәзиләридир. Бәс бизим ҝүнләр һаггында нә демәк олар? Јеһова Өз нијјәтини һәјата кечирмәк үчүн мүгәддәс руһундан бу ҝүн неҹә истифадә едир? Руһа ҝөрә һәрәкәт етмәк истәдијимиз үчүн буну билмәјимиз ваҹибдир. Буна ҝөрә дә ҝәлин Јеһованын бу ҝүн Өз руһундан неҹә истифадә етмәсинин дөрд үсулуну нәзәрдән кечирәк.
Мүасир зәманәдә мүгәддәс руһун ролу
11. Мүгәддәс руһун Аллаһын халгы арасында тәмизлији горујан бир гүввә олдуғу нәдән ҝөрүнүр вә сән бу руһла әмәкдашлыг етдијини неҹә ҝөстәрә биләрсән?
11 Биринҹиси, мүгәддәс руһ Аллаһын халгынын тәмиз галмасына көмәк едир. Јеһоваја Онун ирадәсинә ујғун хидмәт едәнләр вә Онун нијјәтиндән фајдалананлар әхлаги ҹәһәтдән тәмиз олмалыдырлар. (1 Коринфлиләрә 6:9—11 ајәләрини оху.) Һәгиги мәсиһчи олмаздан өнҹә, бәзиләри әхлагсызлыг, зинакарлыг вә һомосексуализм кими натәмиз ишләрлә мәшғул олмушлар. Ҝүнаһа апаран арзулар инсанын үрәјиндә дәрин көк сала биләр (Јаг. 1:14, 15). Анҹаг бу инсанлар ‘тәмизләнмиш’, јәни Аллаһа мәгбул олмаг үчүн һәјатларында лазыми дәјишикликләр етмишләр. Бәс Аллаһы севән инсанлара јанлыш арзуларына тәслим олмамаға нә көмәк едир? «Аллаһымызын Руһу»,— дејә 1 Коринфлиләрә 6:11 ајәсиндә ҹаваб верилир. Әхлаги тәмизлијини горумагла сән һәмин руһун һәјатына ҝүҹлү тәсир етмәсинә јол вердијини ҝөстәрирсән.
12. а) Језекелин ҝөрүнтүсүнә әсасән, Јеһова тәшкилатыны неҹә истигамәтләндирир? б) Руһа ҝөрә һәрәкәт етдијимизи неҹә ҝөстәрә биләрик?
12 Икинҹиси, Јеһова Өз тәшкилатыны мүгәддәс руһу илә идарә едәрәк истәдији сәмтә јөнәлдир. Језекелин ҝөрүнтүсүндә Јеһованын тәшкилатынын сәмави һиссәси Онун нијјәтинә доғру дајанмадан ирәлиләјән сәмави араба кими тәсвир олунур. Арабаны истигамәтләндирән нәдир? Мүгәддәс руһ (Јез. 1:20, 21). Ҝәлин унутмајаг ки, Јеһованын тәшкилаты ики һиссәдән ибарәтдир: онун бири ҝөјдә, диҝәри исә јердәдир. Әҝәр бу тәшкилатын сәмави һиссәсинә истигамәт верән мүгәддәс руһдурса, демәли, ејни шеји онун јердәки һиссәсинә дә шамил етмәк олар. Јеһованын тәшкилатынын јердәки һиссәсинин вердији ҝөстәришләрә итаәткарлыгла табе олмагла биз Јеһованын сәмави арабасы илә ајаглашдығымызы вә Онун мүгәддәс руһуна ҝөрә һәрәкәт етдијимизи ҝөстәририк (Ибр. 13:17).
13, 14. а) Исанын һаггында данышдығы ‘бу нәсли’ кимләр тәшкил едир? б) Мүгәддәс Китаб һәгигәтләринә ишыг салмагда мүгәддәс руһун фәалијјәтини ҝөстәрән нүмунә чәкин. («Ҝет-ҝедә артан нур илә ајаглашырсанмы?» адлы чәрчивәјә бахын.)
13 Үчүнҹүсү, мүгәддәс руһ Мүгәддәс Китаб һәгигәтләринә ајдынлыг ҝәтирир (Сүл. мәс. 4:18). Артыг узун мүддәтдир ки, «садиг вә ағыллы гул» тәдриҹән ачыгланан Мүгәддәс Китаб һәгигәтләрини чатдырмаг үчүн әсас васитә кими «Ҝөзәтчи Гүлләси» журналындан истифадә едир (Мат. 24:45). Мәсәлән, Исанын һаггында данышдығы ‘бу нәсли’ кимләрин тәшкил етдијинә даир малик олдуғумуз анлајышы нәзәрдән кечирәк. (Матта 24:32—34 ајәләрини оху.) Иса һансы нәсли нәзәрдә тутурду? «Мәсиһин иштиракы сизин үчүн нә демәкдир?» мәгаләсиндә изаһ олунурду ки, Иса пис нәсли јох, тезликлә мүгәддәс руһла мәсһ олунаҹаг шаҝирдләрини нәзәрдә тутурдуa. Исанын һәм биринҹи әсрдәки, һәм дә инди јашајан мәсһ олунмуш давамчылары әламәти ҝөрмәклә јанашы, онун мәғзини, јәни Исанын ‘гапыларда’ олдуғуну анлајаҹаглар.
14 Бу изаһат бизим үчүн һансы әһәмијјәти кәсб едир? ‘Бу нәслин’ нә гәдәр давам етдијини дәгиг мүәјјән едә билмәсәк дә, «нәсил» сөзү илә әлагәдар бәзи шејләри јадда сахламалыјыг: адәтән, «нәсил» дедикдә, һәјатлары мүәјјән вахт әрзиндә үст-үстә дүшән мүхтәлиф јашда инсанлар нәзәрдә тутулур; бу чох узун сүрмүр вә онун сону вар (Чых. 1:6). Бәс онда Исанын «бу нәсил» ифадәсини неҹә баша дүшмәк олар? Ҝөрүнүр, о демәк истәјирди ки, 1914-ҹү илдә әламәт ајдын олан заман ону ҝөрән мәсһ олунмушларын һәјаты илә бөјүк мәшәггәтин башланғыҹыны ҝөрәҹәк мәсһ олунмушларын һәјаты гисмән кәсишәҹәк. Бу нәслин нә вахтса башланғыҹы олуб вә бир ҝүн мүтләг сону ҝәләҹәк. Әламәтин мүхтәлиф тәркиб һиссәләринин јеринә јетмәси ајдын ҝөстәрир ки, мәшәггәт јахындыр. Вахтын ҝөзләмәдијини јадда сахламагла вә сајыглығыны горумагла, сән ҝет-ҝедә артан нурда јеријир вә мүгәддәс руһун рәһбәрлијинә риајәт едирсән (Марк 13:37).
15. Нәјә ҝөрә демәк олар ки, хош хәбәри бәјан етмәк ҝүҹүнү бизә мүгәддәс руһ вериб?
15 Дөрдүнҹүсү, мүгәддәс руһ бизә хош хәбәри бәјан етмәк үчүн ҝүҹ верир (Һәв. иш. 1:8). Әкс тәгдирдә хош хәбәрин бүтүн дүнјада тәблиғ олунмасы неҹә мүмкүн оларды? Бу һагда бир дүшүн. Ола билсин, бир чохлары кими, әввәлләр сән дә һәддән артыг утанҹаг вә чәкинҝән олдуғундан: «Мән һеч вахт евдән-евә тәблиғ едә билмәрәм!» — дејә дүшүнүрдүн. Инди исә бу ишдә сәјлә иштирак едирсәнb. Мүгавимәт вә тәгибләрә бахмајараг, Јеһованын бир чох садиг Шаһидләри тәблиғ етмәјә давам едирләр. Јалныз Аллаһын мүгәддәс руһу бизә бөјүк манеәләри ашмаг вә өз ҝүҹүмүзә мүмкүн олмајан шејләри етмәк үчүн ҝүҹ верә биләр (Мик. 3:8; Мат. 17:20). Тәблиғ ишиндә там иштирак етмәклә сән руһла әмәкдашлыг етдијини ҝөстәрирсән.
Мүгәддәс руһун ҝәләҹәкдәки ролу
16. Нәјә ҝөрә әмин ола биләрик ки, Јеһова бөјүк мәшәггәт заманы Өз халгыны горујаҹаг?
16 Ҝәләҹәкдә Јеһова Өз нијјәтини там һәјата кечирмәк үчүн мүгәддәс руһундан гејри-ади тәрздә истифадә едәҹәк. Илк нөвбәдә, ҝәлин Онун мүгәддәс руһундан мүдафиә етмәк мәгсәдилә неҹә истифадә едәҹәјини нәзәрдән кечирәк. Артыг билдијимиз кими, Јеһова кечмишдә руһундан ајры-ајры инсанлары, еләҹә дә Исраил халгыны горумаг үчүн истифадә едирди. Буна ҝөрә дә әмин ола биләрик ки, јахынлашмагда олан бөјүк мәшәггәт заманы О, бу гүдрәтли руһу илә Өз халгыны горујаҹаг. Јеһованын бизи о заман неҹә хилас едәҹәјинә даир фәрзијјәләр ирәли сүрмәк лазым дејил. Әксинә, Јеһованы севәнләрин һеч вахт Онун диггәтиндән јајынмајаҹағыны вә һарада олмаларындан асылы олмајараг, мүгәддәс руһун онлара көмәк едәҹәјини јадда сахлајараг ҝәләҹәјә там әминликлә баха биләрик (2 Салн. 16:9; Мәз. 139:7—12).
17. Јеһова јени дүнјада мүгәддәс руһундан неҹә истифадә едәҹәк?
17 Бәс Јеһова мүгәддәс руһундан ҝәләҹәк јени дүнјада неҹә истифадә едәҹәк? Һәмин вахт мүгәддәс руһун рәһбәрлији алтында јени тумарлар ачылаҹаг (Вәһј 20:12). Ҝөрүнүр, бу тумарлара мин ил әрзиндә тәтбиг етмәјимиз үчүн Јеһованын верәҹәји тәфәррүатлы тәләбләри дахил олаҹаг. Сән бу тумарларда јазыланлары арашдыраҹағын вахты сәбирсизликлә ҝөзләјирсәнми? Бәли, биз интизарла јени дүнјаны ҝөзләјирик. Биз тәсәввүр белә едә билмәрик ки, Јеһова мүгәддәс руһундан истифадә едәрәк јер вә бәшәријјәт үчүн нијјәтини һәјата кечирән заман һәјат неҹә олаҹаг!
18. Сән нә етмәјә гәти гәрарлысан?
18 Ҝәлин һеч вахт унутмајаг ки, Јеһованын нијјәти мүтләг һәјата кечәҹәк, чүнки О, мүгәддәс руһа — каинатда ән гүдрәтли гүввәјә маликдир. Онун нијјәтиндә сәнин дә јерин вар. Буна ҝөрә дә там гәтијјәтлә Јеһовадан мүгәддәс руһ дилә вә онун рәһбәрлијинә ујғун давран (Лука 11:13). Онда сән, Јеһованын бәшәријјәт үчүн нијјәтинә ујғун олараг, әбәдијјән јерүзү Ҹәннәтдә јашамаға үмид едә биләрсән.
[Һашијәләр]
a «Ҝөзәтчи Гүлләси»нин 2008-ҹи ил 15 феврал сајынын 21—25-ҹи сәһифәләринә бахын.
b Һәддән артыг утанҹаглығын өһдәсиндән ҝәлиб сәјлә хидмәт едән бир һәмиманлымызын нүмунәсинә «Ҝөзәтчи Гүлләси»нин 1993-ҹү ил 15 сентјабр сајынын 19-ҹу сәһифәсинә (рус.) баха биләрсиниз.
Јадыныздадырмы?
• Јеһова нијјәтини һәјата кечирмәк үчүн кечмишдә мүгәддәс руһундан неҹә истифадә едирди?
• Јеһова мүгәддәс руһундан һал-һазырда неҹә истифадә едир?
• Јеһова Өз нијјәтини там һәјата кечирмәк үчүн ҝәләҹәкдә мүгәддәс руһундан неҹә истифадә едәҹәк?
[10-ҹу сәһифәдәки чәрчивә]
Ҝет-ҝедә артан нур илә ајаглашырсанмы?
Јеһова халгынын үзәринә нур әләмәјә давам едир. «Ҝөзәтчи Гүлләси»ндә дәрҹ олунан тәлим дәјишикликләриндән бәзиләри һансылардыр?
▪ Исанын хәмир мајасы мәсәлиндә руһани артымын һансы амили вурғуланыр? (Мат. 13:33) (2008-ҹи ил 15 ијул, сәһифәләр 19, 20).
▪ Мәсиһчиләрин сәмави һәјата чағырышы нә заман сона јетир? (2007-ҹи ил 1 мај, сәһифәләр 30, 31, рус.).
▪ Јеһоваја «руһән» ибадәт етмәк нә демәкдир? (Јәһ. 4:24) (2008-ҹи ил 15 нојабр, сәһифә 7).
▪ Бөјүк издиһам Јеһованын руһани мәбәдинин һансы һәјәтиндә хидмәт едир? (Вәһј 7:15) (2002-ҹи ил 1 мај, сәһифәләр 30, 31, рус.).
▪ Гојунларын кечиләрдән ајрылмасы нә заман баш верир? (Мат. 25:31—33) (1995-ҹи ил 15 октјабр, сәһифәләр 18—28, рус.).