Аллаһын мәһәббәтиндән бизи ким мәһрум едә биләр?
“Биз Ону севирик, чүнки О бизи биринҹи севмишдир” (1 ЈӘҺЈА 4:19).
1, 2. а) Севилдијимизи билмәк бизим үчүн нәјә ҝөрә ваҹибдир? б) Кимин мәһәббәтинә даһа чох еһтијаҹымыз вар?
СЕВИЛДИЈИНИЗИ билмәк сизин үчүн нә дәрәҹәдә ваҹибдир? Инсан һәмишә - көрпәликдән гоҹалана гәдәр - мәһәббәтә еһтијаҹ дујур. Ананын гуҹағында нәвазишлә тутдуғу көрпәни һеч сејр етмисинизми? Әтрафда нә баш верирсә версин, анасынын меһрибан ҝөзләрини ҝөрдүјү мүддәтдә көрпә өзүнү, севән ананын гуҹағында раһат вә тәһлүкәсиз һисс едир. Бәс ҹошғун јенијетмәлик илләриндә бә’зән һансы вәзијјәтдә олдуғунузу хатырлајырсынызмы? (1 Салониклиләрә 2:7). Бу јашда, нә истәдијимизи һәрдән өзүмүз дә билмәмишик, һәтта һиссләримизи белә анламамышыг. Лакин ата вә анамызын бизи севдикләрини билмәк неҹә дә ваҹибдир! Мәҝәр бүтүн проблем вә суалларынызла валидејнләринизә мүраҹиәт едә биләҹәјинизи фикирләшәндә, раһатлыг дујмурдунузму? Бәли, һәјатымыз боју башгалары тәрәфиндән севилмәјә даһа чох еһтијаҹ дујуруг. Башгаларынын мәһәббәти, бизи, онлар үчүн дәјәрли олдуғумуза әмин едир.
2 Валидејнләрин сөнмәз мәһәббәти, инсанын дүзҝүн инкишаф етмәси вә тәмкинли олмасы үчүн ваҹибдир. Лакин руһани вә емосионал рифаһымыз үчүн, сәмави Атамыз Јеһованын бизи севдијини билмәк даһа зәруридир. Олсун ки, әлиниздәки журналын бә’зи охуҹуларыны валидејнләри һеч вахт әсл мә’нада севмәјибләр. Әҝәр бу сөзләр сәнә дә аиддирсә, онда руһдан дүшмә. Әҝәр сән валидејн мәһәббәтини дадмамысан вә ја бу мәһәббәт сәнә һәддиндән артыг аз ифадә олунубса да, ону Аллаһын түкәнмәз мәһәбәти әвәз едә биләр.
3. Јеһова халгыны өз мәһәббәтинә неҹә әмин етди?
3 Јеһова, Ишаја пејғәмбәрин васитәсилә билдирди ки, ана өзүнүн сүдәмәр ушағыны “унуда биләр”, амма Аллаһ өз халгыны һеч заман унутмајаҹаг (Ишаја 49:15). Давуд да әминликлә дејирди: “Анам вә атам мәни бурахдыглары заман, Рәбб мәнә һимајәчилик едәр” (Мәзмур 27:10). Доғрудан да руһландырыҹы сөзләрдир! Һансы вәзијјәтдә олсан да, әҝәр Јеһова Аллаһын һәср олунмуш хидмәтчисисәнсә вә Онунла шәхси мүнасибәт инкишаф етдирмисәнсә, һәмишә јадда сахламалысан ки, Јеһованын сәнә бәсләдији мәһәббәт, һәр бир инсанын мәһәббәтиндән үстүндүр!
Өзүнүзү Аллаһын мәһәббәтиндә сахлајын
4. Биринҹи әсрдә јашамыш мәсиһчиләр Аллаһын мәһәббәтинә неҹә әмин олдулар?
4 Сән, Јеһованын мәһәббәти һаггында илк дәфә нә вахт өјрәнмисән? Јәгин ки, сәнин башына ҝәлән әһвалат, биринҹи әсрдәки мәсиһчиләрин әһвалатына бәнзәјир. Павелин ромалылара јаздығы мәктубун 5-ҹи фәслиндә, бир заманлар Аллаһдан үз дөндәрмиш ҝүнаһкарларын Јеһованын мәһәббәти һагда неҹә өјрәндикләри сәлис дилдә тәсвир едилир. Һәмин фәслин 5-ҹи ајәсиндә охујуруг: “Мүгәддәс Руһ васитәсилә Аллаһын мәһәббәти үрәкләримиздә долуб дашыр”. Павел 8-ҹи ајәдә әлавә едир: “Аллаһ бизә олан Өз мәһәббәтини бунунла сүбут едир ки, биз һәлә ҝүнаһкар икән Мәсиһ бизим уғрумузда өлдү”.
5. Аллаһын мәһәббәтинин дәринлијини гијмәтләндирмәкдә сәнә нә көмәк етди?
5 Бунун кими, Аллаһын Кәламындан һәгигәти өјрәндикдә вә иман тәзаһүр етдирдикдә, Јеһованын мүгәддәс руһу сәнин гәлбиндә фәалијјәт ҝөстәрмәјә башлады. Елә бунун сајәсиндә, Јеһованын өз севимли Оғлуну сәнин уғрунда өлмәјә ҝөндәрәрәк етдији ишин бүтүн әһәмијјәтини дәрк етмәјә вә гијмәтләндирмәјә башладын. Бунунла да Јеһова сәнә көмәк етди ки, Онун инсанлары нә дәрәҹәдә чох севдијини өјрәнәсән. Сән, Јеһованы танымајан ҝүнаһкар бир шәхс кими доғулдуғуна бахмајараг, Онун инсанлара салеһ е’лан едилмәк вә әбәди һәјата наил олмаг имканы вердијини анладыгда, мәҝәр бу сәнин үрәјинә тә’сир ҝөстәрмәдими? Јеһоваја гаршы мәһәббәт һисси дујмадынмы? (Ромалылара 5:10).
6. Нәјә ҝөрә бә’зән өзүмүзү Јеһовадан узаг һисс едә биләрик?
6 Сәмави Атамыз мәһәббәти илә сәни өзүнә ҹәлб етдикдән вә сән һәјатыны Она мәгбул олаҹаг тәрздә дәјишдикдән сонра, өзүнү Аллаһа һәср етдин. Инди Аллаһла сүлһ мүнасибәтиндәсән. Бә’зән өзүнү Јеһовадан узаг һисс едирсәнми? Белә һиссләр һәр биримиздә јарана биләр. Лакин ҝәлин, Аллаһын дәјишмәз олдуғуну һәмишә јадда сахлајаг. Онун мәһәббәти, Јер күрәсинә даим исти ишыг шүаларыны ҝөндәрән Ҝүнәш кими, әбәди вә дәјишмәздир (Малаки 3:6; Јагуб 1:17). Бунун әксинә олараг, биз, мүвәггәти дә олса дәјишә биләрик. Јер фырландыгҹа планетин јарысы гаранлыға гәрг олур. Буна бәнзәр вәзијјәт бизимлә дә баш верәр: әҝәр бир аз да олса Аллаһдан узаглашарыгса, Онунла олан мүнасибәтимизин сојудуғуну һисс едә биләрик. Белә вәзијјәти дүзәлтмәк үчүн нә едә биләрик?
7. Өзүмүзү јохламаг, Аллаһын мәһәббәтиндә галмагда бизә неҹә көмәк едә биләр?
7 Әҝәр нәјинсә бизи Аллаһын мәһәббәтиндән ајырдығыны һисс едириксә, өзүмүздән сорушмалыјыг: “Аллаһын мәһәббәтинә ади бир шеј кимими јанашырам? Иманда зәифләјәрәк, јашајан вә севән Аллаһдан тәдриҹән үз дөндәрирәмми? Өз фикирләрими “руһани” дејил, “ҹисмани” шејләрәми јөнәлдирәм?” (Ромалылара 8:5-8; Ибраниләрә 3:12). Әҝәр биз Јеһовадан узаглашмышыгса, јаранан вәзијјәти дүзәлдәрәк, Онунла мүнасибәтимизи јенидән јахын вә сәмими етмәк үчүн тәдбирләр ҝөрмәлијик. Јагуб бизи тәшвиг едир: “Аллаһа јахынлашын, О да сизә јахынлашар” (Јагуб 4:8). Ҝәлин, Јәһуданын сөзләрини дә динләјәк: “Севимлиләр, өзүнүзү сон дәрәҹә мүгәддәс олан иманынызын тәмәли үзәриндә инкишаф етдирин вә Мүгәддәс Руһла дуа един... өзүнүзү Аллаһын мәһәббәтиндә сахлајын” (Јәһуда 20, 21).
Дәјишән шәраитләр Аллаһын мәһәббәтинә тә’сир ҝөстәрмир
8. Һәјатымызда гәфилдән һансы дәјишикликләр баш верә биләр?
8 Индики әшјалар системиндәки һәјат чохсајлы дәјишикликләрлә бағлыдыр. Сүлејман падшаһын мүшаһидәсинә әсасән, инсанларын “һамысы үчүн вахт вә тәсадүф” мөвҹуддур (Ваиз 9:11). Һәјатымыз бир ан ичиндә кәскин сурәтдә дәјишә биләр. Бу ҝүн сағламыг, сабаһ исә ҹидди хәстәлијә тутула биләрик. Бу ҝүн ишимиз сабит ҝөрүндүјү һалда, сабаһ ишсиз гала биләрик. Өлүм, сорушмадан бизә әзиз оланлары һәјатдан апара биләр. Бә’зи өлкәләрдә мәсиһчиләр бир мүддәт раһат шәраитләрдә јашајыр, сонра исә гәфилдән бир јығын тә’гибләрә мә’руз галырлар. Олсун ки, бизи нәдә исә јаландан иттиһам едирләр вә биз башгалары тәрәфиндән әдаләтсиз мүнасибәтләрә дүчар олуруг. Бәли, һәјатымыз һеч дә сабит вә там тәһлүкәсиз дејил (Јагуб 4:13-15).
9. Ромалылара олан мәктубун 8-ҹи фәслинин бә’зи һиссәләрини нәзәрдән кечирәмәк бизим үчүн нәјә ҝөрә фајдалы олаҹаг?
9 Ҝөзләнилмәдән бизә бир фәлакәт үз верәндә, өзүмүзү тәрк олунмуш һисс едиб, һәтта Аллаһын бизи әввәлки кими севмәдијини дә дүшүнә биләрик. Бу һамынын башына ҝәлә биләр. Буна ҝөрә дә, һәвари Павелин ромалылара јаздығы мәктубун 8-ҹи фәслиндәки тәсәлливериҹи сөзләр үзәриндә дәриндән дүшүнмәјимиз фајдалы олаҹаг. Павел һәмин сөзләри мүгәддәс руһла мәсһ едилмиш мәсиһчиләрә јазмышды. Лакин бу сөзләр, әсас е’тибарилә, салеһ е’лан олунан вә мәсиһчиликдән әввәлки дөврләрдә јашајыб, Ибраһим кими, Аллаһын достлары адланан башга гојунлара да тәтбиг едилир (Ромалылара 4:20-22; Јагуб 2:21-23).
10, 11. а) Дүшмәнләр Аллаһын халгыны бә’зән нәдә иттиһам едирләр? б) Бу иттиһамлар нәјә ҝөрә мәсиһчиләр үчүн һеч бир әһәмијјәт дашымыр?
10 Ромалылара 8:31-34 ајәләрини охујун. Павел сорушур: “Әҝәр Аллаһ бизимләдирсә, ким бизә гаршы ола биләр?” Әлбәттә, Шејтан вә онун пис дүнјасы бизә гаршы чыхыр. Һәтта мәһкәмәләрдә белә, дүшмәнләримиз бизи јаландан иттиһам едә биләрләр. Һәрдән мәсиһчи валидејнләр, өвладларынын Аллаһын ганунуна зидд олан тибби үсулларла мүалиҹә олунмаларына вә ја онлара бүтпәрәст бајрамларда иштирак етмәјә иҹазә вермәдикләри үчүн, өз өвладларынын дүшмәни һесаб олунурлар (Һәвариләрин ишләри 15:28, 29; 2 Коринфлиләрә 6:14-16). Садиг мәсиһчиләрдән бә’зиләрини мүһарибә илләриндә инсанлары өлдүрмәдикләринә вә ја сијасәтдә иштирак етмәдикләринә ҝөрә, онлардан кими исә һакимијјәтә зидд ҝедән тәшвигатда иттиһам едә биләрләр (Јәһја 17:16). Бә’зи рәгибләримиз исә, күтләви информасија васитәсилә бөһтанлар јајыб, јаландан Јеһованын Шаһидләринин тәһлүкәли тәригәт олдуғуну иддиа едирләр.
11 Амма ҝәлин һәвариләрин ҝүнләриндә дејиләнләри унутмајаг: “Бизә мә’лумдур ки, бу тәригәтә гаршы һәр јердә сөз сөјләнир” (Һәвариләрин ишләри 28:22). Мәҝәр јалан иттиһамларын бир әһәмијјәти вармы? Ахы, мәсиһчиләри салеһ е’лан едән Аллаһдыр вә бу заман О өз хидмәтчиләринин Мәсиһин фидијә гурбанлығына олан иманларына әсасланыр. Хидмәтчиләринә ән дәјәрли һәдијјәни - өз севимли Оғлуну вердикдән сонра Јеһованын онлара олан мәһәббәти неҹә сојуја биләр? (1 Јәһја 4:10). Мәсиһ инди, өлүләрдән дирилдилдији вә Аллаһын сағында отурдуғу бир вахтда, мәсиһчиләр үчүн васитәчидир. Мәсиһин өз давамчыларына тәгдим етдији мүһафизәнин тутарсыз олдуғуну ким сүбут едә биләр? Јахуд, Аллаһын өз садигләринин хејринә гәбул етдији гәрары ким јалана чыхара биләр? Һеч ким! (Ишаја 50:8, 9; Ибраниләрә 4:15, 16).
12, 13. а) Һансы шәраит вә ја вәзијјәтләр бизи Аллаһын мәһәббәтиндән ајыра билмәз? б) Бизә чәтинликләр төрәтмәклә Иблис нәјә наил олмаг истәјир? в) Мәсиһчиләр нә үчүн һәмишә галиб ҝәлирләр?
12 Ромалылара 8:35-37 ајәләрини охујун. Өзүмүздән башга, бизи Јеһованын вә Онун Оғлу Иса Мәсиһин мәһәббәтиндән ким вә ја нә ајыра биләр? Шејтан јер үзүндәки гуллугчулары васитәсилә мәсиһчиләри бир сыра әзијјәтләрә дүчар едә биләр. Кечән јүзилликдә бир чох мәсиһчи гардаш-баҹыларымыз чох өлкәләрдә шиддәтли тә’гибләрә мә’руз галмышлар. Бу ҝүн гардашларымыз бә’зи әразиләрдә ҝүндәлик игтисади чәтинликләрлә гаршылашырлар. Бә’зиләри аҹлыг чәкир вә ја ҝејмәјә палтар тапмырлар. Бүтүн бу чәтинликләри јаратмагла Иблис нәјә наил олмаг истәјир? Онун мәгсәдләриндән бири, Јеһоваја едилән һәгиги ибадәтә манечилик төрәтмәкдир. Шејтан бизи инандырмаға чалышыр ки, Аллаһын бизә гаршы мәһәббәти сојујубдур. Бәс бу доғрудурму?
13 Мәзмур 44:22 ајәсини ситат ҝәтирән Павел кими, биз дә Аллаһын Кәламыны тәдгиг едирик. Анлајырыг ки, бүтүн бунлар бизимлә - Аллаһын “гојунлары илә” - Онун исминә ҝөрә баш верир. Аллаһын исминин тәгдис едилмәси вә Онун һөкмранлығына һагг газандырылмасы һаггындакы суаллар һәлл олунур. Аллаһ бизи артыг севмәдији үчүн дејил, мәһз бу ваҹиб суаллары һәлл етмәк мәгсәдилә әзаблара јол верир. Вәзијјәт нә дәрәҹәдә чәтин олурса-олсун, биз әминик ки, Аллаһын өз халгына, о ҹүмләдән бизләрдән һәр биримизә олан мәһәббәти зәррә гәдәр дә азалмајыб. Әҝәр нөгсансызлығымызы горујуругса, мәғлубијјәт кими ҝөрүнән һәр бир чәтинлик гәләбәјә чевриләҹәкдир. Аллаһын сарсылмаз мәһәббәтинә даир верилән әминликдән гүввәт вә руһ јүксәклији алырыг.
14. Мәсиһчиләрин гаршылашаҹаглары чәтинликләрә бахмајараг, Павел Аллаһын мәһәббәтинә нәјә ҝөрә әмин иди?
14 Ромалылара 8:38, 39 ајәләрини охујун. Нәјә ҝөрә Павел әмин иди ки, мәсиһчиләри Аллаһын мәһәббәтиндән һеч нә ајыра билмәз? Шүбһәсиз ки, хидмәт етдији мүддәтдә Павелин башына ҝәлән һадисәләр, Аллаһын бизә олан мәһәббәтинә һеч бир чәтинлијин тә’сир ҝөстәрә билмәјәҹәјинә даир әминлијини мөһкәмләндирирди (2 Коринфлиләрә 11:23-27; Филипилиләрә 4:13). Павел, һәмчинин Јеһованын әбәди нијјәти вә кечмишдә Онун өз халгы илә неҹә даврандығы һагда да билирди. Бәс өлүм, Аллаһын өз садиг хидмәтчиләринә олан мәһәббәтиндән ҝүҹлү ола биләрми? Әсла јох! Өлән һәмин садиг инсанлар Аллаһын камил јаддашында јашајаҹаглар. Вахты ҝәлдикдә исә, Аллаһ онлары дирилдәҹәкдир (Лука 20:37, 38; 1 Коринфлиләрә 15:22-26).
15, 16. Аллаһын өз садиг хидмәтчиләринә дујдуғу севҝини сојутмаға гадир олмајан бә’зи сәбәбләри садалајын.
15 Бу ҝүн дүчар олдуғумуз фәлакәтләрдән - бәдбәхтлик, өлүмҹүл хәстәлик вә игтисади чәтинликләрдән асылы олмајараг, Аллаһын өз халгына бәсләдији мәһәббәти һеч нә пуч едә билмәз. Шејтан адыны газанан итаәтсиз мәләк кими гүввәтли мәләкләр, Јеһоваја тә’сир ҝөстәрә билмәзләр ки, Онун өз садиг хидмәтчиләринә олан мәһәббәти сојусун (Ејуб 2:3). Һакимијјәтләр Аллаһын хидмәтчиләринин фәалијјәтини гадаған едәр, онлары һәбсханалара салдырар, онларла пис рәфтар едәр вә ја онлары гејри-гануни е’лан едә биләрләр (1 Коринфлиләрә 4:13). Халглар тәрәфиндән ҝөстәрилән бу гәдәр һагсыз нифрәт инсанлары бизә гаршы галхмаға мәҹбур едә биләр. Амма бу мүнасибәт Каинатын Һөкмдарына тә’сир ҝөстәрә билмәз ки, О, бизи тәрк етсин.
16 Биз, бир мәсиһчи кими, Павелин “индики” адландырдығы, јә’ни бу әшјалар системиндә тәшәккүл тапан һадисәләр, шәраитләр, вәзијјәтләрин вә ја “ҝәләҹәк шејләр”ин Аллаһын өз халгына олан сәдагәтини поза биләҹәјиндән горхмалы дејилик. Һәм јер үзүндәки, һәм дә руһани гүввәләрин бизә гаршы чыхдыгларына бахмајараг, Аллаһын сәдагәтли мәһәббәти бизә һәмишә дајаг олаҹаг. Павелин гејд етдији кими, бизи Аллаһын мәһәббәтиндән “нә һүндүрлүк, нә дәринлик” мәһрум едә биләр. Бәли, мә’јуслуғумуза сәбәб олан һеч нә, һәтта ҝүҹлү дә олса, һеч бир тә’сир бизи Аллаһын мәһәббәтиндән мәһрум едә билмәз. Јараданын өз садиг хидмәтчиләри илә олан мүнасибәтини һеч бир башга варлыг поза билмәз. Аллаһын мәһәббәти һеч заман түкәнмир - бу мәһәббәт әбәдидир (1 Коринфлиләрә 13:8).
Аллаһын мәрһәмәтини даима јүксәк гијмәтләндирин
17. а) Аллаһын мәһәббәти нәјә ҝөрә “һәјатдан јахшыдыр”? б) Аллаһын мәһәббәтини јүксәк гијмәтләндирдијимизи неҹә ҝөстәрә биләрик?
17 Аллаһын мәһәббәти сизин үчүн нә дәрәҹәдә ваҹибдир? Давудун һиссләрини јашајырсынызмы? О јазырды: “Додагларым сәни мәдһ едәр; чүнки инајәтин һәјатдан јахшыдыр. Һәјатым боју сәни белә тәгдис едәрәм; сәнин исминлә әлләрими галдырарам” (Мәзмур 63:3, 4). Доғрудан да, бу дүнјада сүрүлән һәјатда Аллаһын мәһәббәтиндән вә Онунла достлуг мүнасибәтиндән башга јахшы бир шеј вармы? Мәсәлән, даһа јахшы нә ола биләр: ҝәлирли вәзифә, јохса Аллаһла јахын гаршылыглы мүнасибәтин ҝәтирдији дахили әмин-аманлыг вә хошбәхтлик? (Лука 12:15). Бә’зи мәсиһчиләр, Јеһовадан үз дөндәрмәк вә ја өлүмү сечмәк мәҹбуријјәтиндә галмышлар. Бу ҹүр сечими, Јеһованын Шаһидләри Икинҹи дүнја мүһарибәси илләриндә тез-тез етмәли олмушлар. Мәсиһчи гардашларымыз, бә’зи һаллары чыхмаг шәртилә, һәтта өлмәк лазым ҝәлсә дә Аллаһын мәһәббәтиндә галмағы үстүн тутмушлар. Сәдагәтлә Аллаһын мәһәббәтиндә галан кәсләр әмин ола биләрләр ки, Аллаһ онлара, бу дүнјанын верә билмәдији әбәди ҝәләҹәји бәхш едәҹәкдир (Марк 8:34-36). Амма сөһбәт јалныз әбәди һәјатдан ҝетмир.
18. Әбәди һәјат нә үчүн бу гәдәр ҹәлбедиҹидир?
18 Әбәди һәјат Јеһовасыз геји-мүмкүн олса да, сонсуз һәјаты Јарадансыз тәсәввүр етмәјә чалышын. Белә һәјат бош вә мә’насыз оларды. Бу сон ҝүнләрдә Јеһова өз халгына, јеринә јетирилмәси мәмнунлуг ҝәтирән иш тапшырыб. Буна ҝөрә дә биз әмин ола биләрик ки, өз нијјәтләрини һәјата кечирән Даһи Јеһованын бизә верәҹәји әбәди һәјатда, өјрәнилмәси вә јеринә јетирилмәси мәмнунлуг ҝәтирән чохлу ишләр олаҹаг (Ваиз 3:11). Ҝәләҹәк минилликдә биз нә гәдәр билик алсаг да, “Аллаһын зәнҝинлик вә һикмәт вә елминин дәринлији”ни ахырадәк гавраја билмәјәҹәјик (Ромалылара 11:33).
Ата сизи севир
19. Иса Мәсиһ, ајрыларкән шаҝирдләрини нәдә әмин етди?
19 Ерамызын 33-ҹү илинин 14 нисанында, он бир садиг һәвариси илә кечирдији сонунҹу ахшамда Иса онлара чох шеј сөјләди. Онун дедикләри, гаршыда баш верәҹәк һадисәләр үчүн һәвариләри мөһкәмләндирмәли иди. Исанын кечирдији сынагларда һәвариләри онунла бирликдә галмыш вә онун мәһәббәтини өз үзәрләриндә һисс етмишләр (Лука 22:28, 30; Јәһја 1:16; 13:1). Буна ҝөрә дә Иса: “Ата Өзү сизи севир” - дејә, онлары әмин етди (Јәһја 16:27). Бу сөзләр, сәмави Атанын шаҝирдләрә бәсләдији нәҹиб һиссләри анламагда онлара неҹә дә көмәк етди!
20. Сиз нәји етмәјә гәти гәрарлысыныз вә нәјә әмин ола биләрсиниз?
20 Бу ҝүн јашајан инсанлардан бир чоху артыг онилләрдир ки, Јеһоваја сәдагәтлә хидмәт едирләр. Бу пис әшјалар системинин сонуна гәдәр, шүбһәсиз, һәлә чох сынагларымыз олаҹаг. Һеч заман јол вермәјин ки, бу сынаглар вә фәлакәтләр, Аллаһын сизи үрәкдән севдијинә даир сиздә шүбһәләр ојатсын. Јеһова сизи севир вә буна чохлу сүбутлар вар (Јагуб 5:11). Ҝәлин буна ҹаваб олараг, Аллаһын әмрләринә сәдагәтлә риајәт едәк (Јәһја 15:8-10). Ҝәлин һәр фүрсәтдән истифадә едиб, Онун исмини иззәтләндирәк. Биз, гәтијјәтли олмаг үчүн мөһкәмләнмәли, Јеһоваја дуа едәрәк вә Онун Кәламыны өјрәнәрәк бундан сонра да Она јахынлашмалыјыг. Сабаһкы ҝүндә нә илә гаршылашсаг да, әҝәр Јеһованы мәмнун етмәјә вар гүввәмизлә чалышырыгса, гәлбимиздә әмин-аманлығы вә Аллаһын түкәнмәз мәһәббәтинә там әминлији горујуб сахлајаҹағыг (2 Петер 3:14).
Сиз неҹә ҹаваб верәрдиниз?
• Руһани вә емосионал таразлығы горумаг үчүн, биз даһа чох кимин мәһәббәтинә еһтијаҹ дујуруг?
• Јеһованын өз хидмәтчиләринә бәсләдији мәһәббәтин сојумасына нәләр тә’сир едә билмәз?
• Нәјә ҝөрә Јеһованын мәһәббәти “һәјатдан јахшыдыр”?
[16-ҹы сәһифәдәки шәкилләр]
Әҝәр бир шејин бизи Аллаһын мәһәббәтиндән ајырдығыны һисс едириксә, буна дүзәлиш верә биләрик.
[17-ҹи сәһифәдәки шәкил]
Павел тә’гиб олундуғунун сәбәбини анлајырды.