Аллаһын рәғбәтини газан вә әбәди јаша!

«Ја Рәбб, салеһә хејир-дуа верирсән, лүтфүнлә сипәр кими онлары һифз едирсән» (МӘЗ. 5:12).

1, 2. Илјас пејғәмбәр Сарепатдакы дул гадындан нә истәди вә ону нәјә әмин етди?

ГАДЫН, онун оғлу вә Аллаһын пејғәмбәри аҹ идиләр. Сарепатда јашајан бу дул гадын оҹаг галајыб јемәк биширмәјә һазырлашырды ки, Илјас ондан су вә чөрәк истәди. Гадын мәмнунијјәтлә Илјаса су верди, јемәјә ҝәлинҹә исә, деди ки, она верә биләҹәк кифајәт гәдәр јемәји јохдур — јалныз «күпдә бир овуҹ ун вә габда бир аз јағ» вар (1 Пад. 17:8—12).

² Лакин Илјас тәкидлә деди: «Әввәлҹә мәним үчүн ондан кичик бир көкә дүзәлт вә мәнә ҝәтир, өзүнлә оғлун үчүн сонра һазырлајарсан. Чүнки Исраилин Аллаһы Рәбб белә дејир: “...Нә күпдә ун түкәнәҹәк, нә дә габда јағ гуртараҹаг”» (1 Пад. 17:13, 14).

3. Һамымызын гаршысында һансы ваҹиб суал дурур?

³ Гадынын гаршысында ахырынҹы јемәјини пејғәмбәрлә бөлүшүб-бөлүшмәмәкдән даһа ваҹиб мәсәлә дурурду. Гадын Јеһованын онун вә оғлунун гајғысына галмаға гадир олдуғуна инанаҹаг, јохса мадди тәләбатларыны Аллаһын рәғбәт вә достлуғундан үстүн тутаҹаг? Буна бәнзәр суал һамымызын гаршысында дурур: бизим үчүн ән ваҹиб олан нәдир — Јеһованын рәғбәти, јохса мадди фираванлыг? Јеһоваја ҝүвәнмәк вә Она хидмәт етмәк үчүн бизим әсаслы сәбәбләримиз вар. Онун рәғбәтини ахтармаг вә газанмаг истәјириксә, биздән мүәјјән аддымлар атмаг тәләб олунур.

Ибадәтә «Сән... лајигсән»

4. Нәјә ҝөрә Јеһова бизим Она ибадәт етмәјимизә лајигдир?

⁴ Јеһованын инсанлардан Она мәгбул шәкилдә хидмәт етмәләрини тәләб етмәјә һаггы вар. Онун сәмави хидмәтчиләриндән ибарәт бир груп мәләк: «Аллаһымыз Јеһова, Сән шөһрәтә, һөрмәтә вә гүдрәтә лајигсән! Чүнки һәр шејин јараданы Сәнсән вә һәр шеј Сәнин ирадәнлә мөвҹуддур вә јарадылыб», — дејәрәк бу факты тәсдигләјирләр (Вәһј 4:11). Јеһова Јарадан олдуғу үчүн бизим Она ибадәт етмәјимизә лајигдир.

5. Нәјә ҝөрә Аллаһын мәһәббәти бизи Она хидмәт етмәјә тәшвиг етмәлидир?

⁵ Јеһоваја ибадәт етмәјимизин икинҹи сәбәби исә Онун тајы-бәрабәри олмајан, мисилсиз мәһәббәтидир. Мүгәддәс Китабда дејилир: «Аллаһ инсаны Өз сурәтиндә јаратды, Аллаһын сурәтиндә јаратды, онлары киши вә гадын олараг јаратды» (Јар. 1:27). Ирадә азадлығы илә јанашы, Аллаһ инсанлара дүшүнмәк вә гәрар гәбул етмәк баҹарығыны да вериб. Бизә һәјат бәхш етмәклә Јеһова бәшәријјәтин Атасы олду (Лука 3:38). Јахшы бир ата кими, Јеһова Өз оғул вә гызларыны һәјатдан һәзз алмалары үчүн һәр шејлә тәмин едиб. Онун «әмр»и илә ҝүнәш чыхыр вә јағыш јағыр, буна ҝөрә дә Јер күрәси кифајәт гәдәр мәһсул верир вә һејрәтамиз ҝөзәл мәнзәрәләри илә бизим көнлүмүзә охшајыр (Мат. 5:45).

6, 7. а) Адәм бүтүн бәшәријјәтә һансы зәрәри вуруб? б) Мәсиһин фидјә гурбанлығы Аллаһын рәғбәтини ахтаранлара һансы фајданы ҝәтирәҹәк?

⁶ Јеһова бизи һәмчинин ҝүнаһын аҹынаҹаглы нәтиҹәләриндән хилас едиб. Ҝүнаһ ишләдән илк инсан Адәми гумар ојнамаг үчүн аиләсиндән оғурлуг едән гумарбаза бәнзәтмәк олар. Адәм Јеһоваја гаршы үсјан галдырмагла, санки, өз өвладларындан әбәдијјән хошбәхт олмаг үмидини оғурлады. Онун бу ҹүр худбин һәрәкәти уҹбатындан бәшәријјәт гәддар аға олан гејри-камиллијин көләси олду. Буна ҝөрә дә бүтүн инсанлар хәстәләнир, һәјатларында гәм-гүссә илә үзләшир, сонда исә өлүрләр. Гулу көләликдән азад етмәк үчүн мүәјјән мәбләғ өдәмәк тәләб олунур. Јеһова бизи бу дәһшәтли агибәтдән азад едә биләҹәк мәбләғи өдәјиб. (Ромалылара 5:21 ајәсини оху.) Атасынын ирадәсинә ујғун олараг, Иса Мәсиһ ‘бир чохлары уғрунда ҹаныны фидјә кими верди’ (Мат. 20:28). Аллаһын рәғбәтини газанан инсанлар јахын ҝәләҹәкдә бу фидјә гурбанлығындан там фајда әлдә едәҹәкләр.

⁷ Хошбәхт вә мәналы һәјат сүрмәјимиз үчүн башгаларындан чох Јараданымыз Јеһованын әмәји вар. Аллаһымыз бәшәријјәтә дәјмиш зәрәри арадан галдырмаг үчүн һәрәкәтә кечәндә Онун рәғбәтини газанан инсанлар буну өз ҝөзләри илә ҝөрәҹәкләр. Јеһова бундан сонра да һәр биримизә ајры-ајрылыгда ‘Ону ҹидд-ҹәһдлә ахтаранлара [неҹә] мүкафат вердијини’ ҝөстәрәҹәк (Ибр. 11:6).

«Халгын көнүллү олараг сәнә гошулаҹаг»

8. Јешајанын нүмунәсиндән Аллаһа хидмәт етмәк барәдә нә өјрәнирик?

⁸ Аллаһын рәғбәтини газанмаг үчүн ирадә азадлығындан дүзҝүн истифадә етмәлијик. Ахы Јеһова һеч биримизи Она хидмәт етмәјә мәҹбур етмир. Јешаја пејғәмбәрин вахтында Јеһова суал верди: «Кими ҝөндәрим? Бизим үчүн ким ҝедәҹәк?» Јеһова пејғәмбәрин сечим етмәк һүгугуна һөрмәт едирди. Јешајанын мәмнунијјәтлә: «Мән бурадајам. Мәни ҝөндәр», — демәсини бир анлыға тәсәввүр ет (Јешаја 6:8).

9, 10. а) Биз Аллаһа һансы нијјәтдән ирәли ҝәләрәк хидмәт етмәлијик? б) Јеһоваја бүтүн варлығымызла хидмәт етмәк нәјә ҝөрә мүнасибдир?

⁹ Инсанлар Аллаһа хидмәт едиб-етмәмәк гәрарыны вермәкдә азаддырлар. Јеһова бизим Она көнүллү сурәтдә хидмәт етмәјимизи истәјир. (Јешуа 24:15 ајәсини оху.) Јеһоваја ҹандәрди, јахуд да садәҹә башгаларыны разы салмаг хатиринә хидмәт едәнләрин ибадәти Она мәгбул дејил (Колос. 3:22). Әҝәр биз дүнјәви марагларын ибадәтимизә мане олмасына јол версәк вә хидмәтдә «гәтијјәтсиз» олсаг, Аллаһын рәғбәтини газана билмәјәҹәјик (Јаг. 1:8). Јеһова билир ки, Она бүтүн варлығымызла хидмәт етмәк бизим хејримизәдир. Муса: «Аллаһыныз Рәбби севин, сөзү гулағынызда галсын вә Она бағланын», — дејәрәк исраиллиләри һәјаты сечмәјә тәшвиг етмишди (Ганун. т. 30:19, 20).

¹⁰ Гәдим Исраилин падшаһы Давуд Јеһоваја нәғмә охујурду: «Дөјүшәҹәјин ҝүн халгын көнүллү олараг сәнә гошулаҹаг, ҝәнҹләрин сәһәр шеһи кими мүгәддәс либасыны ҝејиб јанына ҝәләҹәк» (Мәз. 110:3). Бир чох инсанлар пул вә әјләнҹә үчүн јашајырлар. Јеһованы севәнләрин һәјатында исә биринҹи јердә мүгәддәс хидмәт дурур. Онларын хош хәбәри сәјлә тәблиғ етмәләри буна сүбутдур. Бу инсанлар зәррә гәдәр дә шүбһә етмирләр ки, Јеһова онларын ҝүндәлик еһтијаҹларынын гајғысына галмаг гүввәсиндәдир (Мат. 6:33, 34).

Аллаһа мәгбул гурбанлар

11. Исраиллиләр Јеһоваја һансы мәгсәдлә гурбан ҝәтирирдиләр?

¹¹ Мусанын Гануну алтында олан Исраил халгы Аллаһын рәғбәтини газанмаг үчүн Она мәгбул гурбанлар ҝәтирирди. Левилиләр 19:5 ајәсиндә дејилир ки, исраиллиләр ‘Рәббә үнсијјәт гурбанлары ҝәтирәндә елә ҝәтирмәли идиләр ки, гурбанлары гәбул едилсин’, башга сөзлә, Аллаһын рәғбәтини газансынлар. Елә һәмин китабда биз охујуруг: «Рәббә тәшәккүр гурбаны ҝәтирәндә елә ҝәтирин ки, о сиздән Рәббә мәгбул олсун» (Лев. 22:29). Исраиллиләр Јеһоваја мәгбул һејван гурбанлары ҝәтирәндә онун ҝөјә галхан түстүсү һәгиги Аллаһын ‘хошуна ҝәлирди’ (Лев. 1:9, 13). Исраил халгы өз мәһәббәтини бу ҹүр ифадә едәндә Јеһова разы галыр вә севинирди (Јар. 8:21). Бу ганунлардакы бир принсип бу ҝүн дә гүввәдәдир. Јеһоваја мәгбул гурбанлар тәгдим едәнләр Онун рәғбәтини газанырлар. О, нә ҹүр гурбанлар гәбул едир? Ҝәлин һәјатымызын ики саһәсинә — давраныш вә данышығымыза нәзәр салаг.

12. Һансы әмәлләрә ҝөрә Јеһова бизим Она ‘гурбан кими тәгдим етдијимиз’ бәдәнимизи гәбул етмәјә биләр?

¹² Ромалылара үнванладығы мәктубунда Павел јазыр: «Бәдәнинизи дири, мүгәддәс вә мәгбул гурбан кими Аллаһа тәгдим един; зеһнинизи мүгәддәс хидмәтин иҹрасына сәрф един» (Ром. 12:1). Аллаһын рәғбәтини газанмаг истәјәнләрин бәдәнләри тәмиз, јәни Она мәгбул олмалыдыр. Әҝәр инсан гејри-гануни олараг наркотик маддәләр гәбул едир, сигарет чәкир, бетел гозу (Асијада ҝениш јајылмыш вә наркотик кими истифадә олунан битки нөвү) чејнәјир вә ја спиртли ичкиләрдән суи-истифадә едирсә, онун бәдәни чиркләнир вә артыг Аллаһа мәгбул дејил (2 Кор. 7:1). Бундан әлавә, ‘ҹинси әхлагсызлыгла мәшғул олан өз бәдәнинә гаршы ҝүнаһ ишләтдији’ үчүн һәр ҹүр әхлагсызлыг едәнләрин гурбаныны Аллаһ тәһгир кими гәбул едир (1 Кор. 6:18). Аллаһы разы салмаг истәјән шәхс ‘һәр бир ишиндә мүгәддәс олмалыдыр’ (1 Пет. 1:14—16).

13. Нәјә ҝөрә Јеһоваја һәмд етмәк бизә «јарашыр»?

¹³ Јеһованын хошуна ҝәлән диҝәр гурбан исә дилимизин бәһрәсидир. Јеһованы севәнләр Онун һаггында һәм евдә, һәм дә башгаларынын гаршысында һәмишә јахшы данышырлар. (Мәзмур 34:1—3 ајәләрини оху.) 148—150-ҹи мәзмурлары оху вә бу үч мәзмурун бизи Јеһоваја һәмд етмәјә неҹә тәшвиг етдијинә фикир вер. Һәгигәтән дә, «үрәјидүз оланлара һәмд сөјләмәк јарашыр» (Мәз. 33:1). Бизим нүмунәмиз олан Иса Мәсиһ хош хәбәри тәблиғ етмәклә Јеһоваја һәмдләр сөјләмәјин ваҹиблијини ҝөстәрмишди (Лука 4:18, 43, 44).

14, 15. Һушә исраиллиләри һансы гурбанлар ҝәтирмәјә тәшвиг едирди вә бу, Јеһовада һансы һиссләри доғурурду?

¹⁴ Ҹанла-башла тәблиғ етмәјимиз Јеһованы севдијимизи вә Онун рәғбәтини газанмаг истәдијимизи ҝөстәрир. Ҝәлин Һушә пејғәмбәрин јалан ибадәтлә мәшғул олан вә буна ҝөрә дә Јеһованын ҝөзүндән дүшән исраиллиләри нәјә тәшвиг етдијинә нәзәр салаг (Һушә 13:1—3). «Һәр гәбаһәтимизи бағышла, бизи мәрһәмәтлә гәбул ет. Буғалар јеринә ағзымыздан чыхан шүкүрләри тәгдим едирик», — сөзләри илә Һушә исраиллиләри Аллаһа јалвармаға чағырырды (Һушә 14:1, 2).

¹⁵ Исраиллиләрин Јеһоваја гурбан ҝәтирә биләҹәкләри ән баһалы һејван буға иди. ‘Буғалар јеринә ағзымыздан чыхан шүкүрләр’ кими тәрҹүмә олунан ифадә орижинал мәтндә «ағзымызын ҝәнҹ буғалары» кими сәсләнир. Бу ифадә алтында һәгиги Аллаһа һәмд етмәк үчүн дејилән сәмими, јахшы дүшүнүлмүш сөзләр нәзәрдә тутулурду. Јеһова бу ҹүр гурбанлар ҝәтирәнләрә неҹә јанашырды? О демишди: «Онлары үрәкдән севәҹәјәм» (Һушә 14:4). Бу ҹүр һәмд гурбанлары ҝәтирәнләрдән Јеһова Өз әфвини, лүтфүнү вә достлуғуну әсирҝәмирди.

16, 17. Инсан хош хәбәри Јеһоваја имандан ирәли ҝәләрәк тәблиғ едәндә О, бу һәмдләри неҹә гәбул едир?

¹⁶ Инсанлар гаршысында Јеһоваја һәмд етмәк һәмишә һәгиги ибадәтин ајрылмаз һиссәси олуб. Һәгиги Аллаһы иззәтләндирмәк мәзмурчу үчүн о гәдәр өнәмли иди ки, о: «Ја Рәбб, сидг үрәкдән етдијим һәмди гәбул ет», — дејә Јеһоваја јалварырды (Мәз. 119:108). Бәс бизим ҝүнләр барәдә нә демәк олар? Јешаја пејғәмбәр бизим ҝүнләрдәки чохсајлы садиг инсанлар барәдә демишди: «[Онлар] Рәббә һәмдләр сөјләјәҹәк... Гурбанҝаһыма Мәнә мәгбул олан гурбанлар ҝәтириләҹәк» (Јешаја 60:6, 7). Бу сөзләр неҹә јеринә јетир? Милјонларла инсанлар «Аллаһа Онун адыны уҹалдан мәдһ гурбаны», јәни дилләринин бәһрәсини тәгдим едирләр (Ибр. 13:15).

¹⁷ Бәс шәхсән сәнин барәндә нә демәк олар? Сән Аллаһа мәгбул олан гурбанлар ҝәтирирсәнми? Әҝәр ҝәтирмирсәнсә, онда лазыми дәјишикликләр едиб Јеһованы инсанлар гаршысында мәдһ едәҹәксәнми? Иманын сәни хош хәбәри тәблиғ етмәјә башламаға тәшвиг едәндә сәнин гурбанларын «мал-гара гурбанындан» Јеһованын даһа чох «хошуна ҝәләҹәк». (Мәзмур 69:30, 31 ајәләрини оху.) Әмин ола биләрсән ки, ҝәтирдијин һәмд гурбанынын ‘әтри’ Јеһоваја чатаҹаг вә О, сәнә лүтф ҝөстәрәҹәк (Јез. 20:41). О заман дујдуғун севинҹдән јерә-ҝөјә сығмајаҹагсан.

«Ја Рәбб, салеһә хејир-дуа верирсән»

18, 19. а) Бу ҝүн бир чох инсанлар Аллаһа хидмәт етмәк барәдә нә дүшүнүрләр? б) Аллаһын рәғбәтини итирмәк нә илә нәтиҹәләнир?

¹⁸ Бу ҝүн бир чох инсанлар Малакинин ҝүнләриндәки бәзи инсанларын ҝәлдији нәтиҹәјә ҝәлирләр: «Аллаһа хидмәт етмәк фајдасыздыр. Ордулар Рәббинин бујруғуну јеринә јетирсәк дә,.. бунлардан бизә нә хејир олду?» (Мал. 3:14). Белә инсанларын дүшүнҹәләринә мадди һәрислик һаким кәсилиб; онлар Аллаһын нијјәтинин һәјатакечмәз, ганунларынын исә артыг тәтбигедилмәз олдуғуну һесаб едирләр. Онларын фикринҹә, хош хәбәри тәблиғ етмәк вахты бош јерә сәрф етмәкдән башга бир шеј дејил вә бу иш онлары гыҹыгландырыр.

¹⁹ Бу ҹүр фикирләрин көкү Еден бағына ҝедиб чыхыр. Јеһованын вердији һејрәтамиз һәјатын әсил дәјәринә вә Онун лүтфүнә етинасызлыг ҝөстәрмәјә Һәвваны тәшвиг едән Шејтан иди. Инсанлары Аллаһын ирадәсини јеринә јетирмәклә һеч нә әлдә етмәјәҹәкләринә инандырмаг үчүн Шејтан бу ҝүн дә дәридән-габыгдан чыхыр. Лакин Һәвва вә онун әри Адәм ашкар етдиләр ки, Аллаһын рәғбәтини итирмәк һәјатларыны итирмәк демәкдир. Бу ҝүн онларын изләри илә ҝедән бир чох инсанлар да бир дә ҝөрәҹәкләр ки, Аллаһын лүтфүнү итирмәклә чох бөјүк сәһвә јол верибләр (Јар. 3:1—7, 17—19).

20, 21. а) Сарепатлы дул гадын нә етди вә онун әһвалаты нә илә нәтиҹәләнди? б) Биз нәјә ҝөрә сарепатлы дул гадынын нүмунәсини изләмәлијик вә буну неҹә етмәк олар?

²⁰ Инди исә ҝәлин илк абзасларда данышдығымыз Илјас вә сарепатлы дул гадынын һадисәсинин нәтиҹәсини Адәм вә Һәвванын агибәти илә мүгајисә едәк. Илјасын руһландырыҹы сөзләриндән сонра дул гадын дуруб чөрәк биширди вә јемәји аз олса да, илк нөвбәдә, пејғәмбәрә верди. Бундан сонра Јеһова Илјас васитәсилә вердији вәдини һәјата кечирди. Мүгәддәс Китабда охујуруг: «Гадын вә онун аиләси Илјасла бирҝә узун мүддәт әрзиндә јемәк једиләр. Илјас васитәсилә Рәббин сөјләдији сөзә ҝөрә нә күпдә ун түкәнди, нә дә габда јағ гуртарды» (1 Пад. 17:15, 16).

²¹ Сарепатлы дул гадын бу ҝүн дүнјада јашајан милјардларла инсанларын арасындан јалныз аз сајда адамын атмаға һазыр олдуғу аддымы атды. О, бүтүн үмидини хилас Аллаһына бағлајырды. Јеһова да онун үмидләрини боша чыхармады. Һәм бу, һәм дә Мүгәддәс Китабда јер алан диҝәр һадисәләр сүбут едир ки, Јеһоваја етибар етмәјә дәјәр. (Јешуа 21:43—45; 23:14 ајәләрини оху.) Јеһованын мүасир хидмәтчиләринин һәјаты да ајдын ҝөстәрир ки, Онун лүтфүнү газанан инсанлары О, һеч вахт тәрк етмир (Мәз. 34:6, 7, 17—19)a.

22. Аллаһын рәғбәтини вахт итирмәдән ахтармаг нәјә ҝөрә сон дәрәҹәдә ваҹибдир?

²² Тезликлә «јер үзүндә јашајан һәр кәс үчүн [Аллаһын һөкм ҝүнү] ҝәләҹәк» (Лука 21:34, 35). О ҝүндән һеч ким гача билмәз. Нә вар-дөвләт, нә дә мадди фираванлыг Аллаһын тәјин етдији Һакимин: «Еј Атамын хејир-дуасыны алмыш бәндәләр! Ҝәлин, әзәлдән бәри сизин үчүн һазырланмыш падшаһлығы мирас алын», — сөзләри илә мүгајисәјә ҝәлә билмәз (Мат. 25:34). Бәли, Јеһованын Өзү ‘салеһләрә хејир-дуа верәҹәк, лүтфү илә сипәр кими онлары һифз едәҹәк’ (Мәз. 5:12). Мәҝәр бу, Аллаһын рәғбәтини ахтармаг үчүн тутарлы сәбәб дејил?!

[Һашијә]

Јадыныздадырмы?

• Нәјә ҝөрә Јеһова Она сәмими-гәлбдән ибадәт етмәјимизә лајигдир?

• Бу ҝүн Јеһова һансы гурбанлары гәбул едир?

• «Ағзымызын ҝәнҹ буғалары» ифадәси һансы мәнаны дашыјыр вә биз нәјә ҝөрә бу гурбанлары Јеһоваја тәгдим етмәлијик?

• Нәјә ҝөрә биз Јеһованын рәғбәтини газанмаға ҹан атмалыјыг?

[13-ҹү сәһифәдәки шәкил]

Аллаһын пејғәмбәринин касыб вә аҹ олан дул гадындан етдији хаһиш ону һансы сечим гаршысында гојду?

[15-ҹи сәһифәдәки шәкил]

Аллаһа һәмд гурбанлары тәгдим етмәклә һансы хејир-дуалары алырыг?

[17-ҹи сәһифәдәки шәкил]

Јеһоваја үрәкдән етибар етсән, һеч вахт пешман олмајаҹагсан!