Јеһоваја үмид бағла вә ҹәсарәтли ол

«Рәббә үмид бағла! Ҹәсарәтли вә мөһкәм ол! Рәббә үмид бағла!» (МӘЗМУР 27:14).

1. Үмид нә дәрәҹәдә ваҹибдир вә бу сөз Мүгәддәс Китабда неҹә истифадә едилир?

ҺӘГИГИ үмид парлаг ишыг кимидир. О бизә сынаглара таб ҝәтирмәјә, ҝәләҹәјә севинҹлә вә ҹәсарәтлә бахмаға көмәк едир. Јалныз Јеһова бизә мөһкәм үмид верә биләр вә О, буну Өз Кәламы васитәсилә едир (2 Тимотејә 3:16). Мүгәддәс Китабда «үмид» сөзүнә мүхтәлиф формаларда тәхминән 160 дәфә раст ҝәлинир вә јахшы бир шеји сәбирсизликлә вә инамла ҝөзләмәјә, һәм дә ҝөзләнилән шејә аид едилирa. Белә үмид әсассыз вә ја јеринә јетәҹәјинә һеч бир зәманәт олмајан ади арзудан гат-гат үстүндүр.

2. Үмид Исанын һәјатында һансы ролу ојнајырды?

² Сынаг вә чәтинликләрлә үзләшәндә Иса ҝәләҹәјә бахыр вә үмидини Јеһоваја бағлајырды. «О, гаршысына гојулан севинҹ уғрунда, рүсвајчылыға е’тинасызлыг ҝөстәриб, чармыха тәһәммүл етди вә Аллаһын тахтынын сағында отурду» (Ибраниләрә 12:2). Иса фикрини Јеһованын Али һөкмранлыг һүгугуна бәраәт газандыраҹағына вә Онун адыны иззәтләндирәҹәјинә ҹәмләшдирмишди. Буна ҝөрә дә о, нәјин баһасына олурса-олсун, һеч вахт Аллаһын итаәтиндән чыхмырды.

3. Үмид Аллаһын хидмәтчиләринин һәјатында һансы ролу ојнајыр?

³ Падшаһ Давуд үмидлә ҹәсарәтин арасындакы бағлылыға ишарә едәрәк јазмышды: «Рәббә үмид бағла! Ҹәсарәтли вә мөһкәм ол! Рәббә үмид бағла!» (Мәзмур 27:14). Әҝәр ҹәсарәтли олмаг истәјириксә, һеч вахт јол вермәмәлијик ки, үмидимиз мүҹәррәд олсун, ону һәмишә һафизәмиздә ајдын сахламалы вә дәриндән гијмәтләндирмәлијик. Белә етдикдә биз, Исанын шаҝирдләринә тапшырдығы иши онун кими сә’ј вә ҹәсарәтлә јеринә јетирәҹәјик (Матта 24:14; 28:19, 20). Бәли, Аллаһын хидмәтчиләринә хас олан иман вә мәһәббәт кими ваҹиб кејфијјәтләрлә јанашы, үмид дә онларын һәјатында олдугҹа бөјүк рол ојнајыр (1 Коринфлиләрә 13:13).

‘Үмидлә долуб дашырсанмы’?

4. Мәсһ едилмиш мәсиһчиләр вә онларын јолдашлары ‘башга гојунлар’ нәји сәбирсизликлә ҝөзләјирләр?

⁴ Јеһованын халгыны парлаг ҝәләҹәк ҝөзләјир. Мәсһ едилмиш мәсиһчиләр Иса илә бирҝә ҝөјдә хидмәт едәҹәкләри вахты сәбирсизликлә ҝөзләјирләр, ‘башга гојунлар’ исә ‘чүрүклүјә олан көләликдән азад олунуб Аллаһын [јерүзү] өвладларынын иззәтли азадлығына говушаҹагларына’ үмид бәсләјирләр (Јәһја 10:16; Ромалылара 8:19-21; Филипилиләрә 3:20). ‘Иззәтли азадлыға говушмаг’ ҝүнаһдан вә онун мүдһиш нәтиҹәләриндән азад олунмаг демәкдир. Бәли, ‘һәр бир јахшы бәхшиши вә һәр камил һәдијјәни’ верән Јеһова садиг хидмәтчиләриндән һеч нәји әсирҝәмәјәҹәк (Јагуб 1:17; Јешаја 25:8).

5. ‘Үмидлә долуб дашмаг’ үчүн нә етмәлијик?

⁵ Мәсиһчи үмиди һәјатымызда нә дәрәҹәдә бөјүк рол ојнамалыдыр? Ромалылара 15:13 ајәсиндә биз охујуруг: «Гој үмид верән Аллаһ иман һәјатынызда сизи һәр ҹүр севинҹ вә сүлһлә долдурсун ки, сиз Мүгәддәс Руһун гүдрәти васитәсилә үмидлә долуб дашасыныз». Бәли, үмиди гаранлыгда јанан шам ишығы илә јох, доған ҝүнәшин парлаг шүалары илә мүгајисә етмәк олар. Белә үмид һәјатымызы сүлһ вә хошбәхтликлә долдурур, она мә’на верир вә бизи ҹәсарәтләндирир. Диггәт јетирин, биз Аллаһын Кәламында јазыланлара инананда вә Онун мүгәддәс руһуну аланда, ‘үмидлә долуб дашырыг’. Ромалылара 15:4 ајәсиндә дејилир: «Бундан әввәл јазыланларын һамысы бизә тә’лим олараг јазылды ки, тәһәммүл вә Мүгәддәс Јазыларын тәсәллиси илә үмидимиз олсун». Буна ҝөрә өзүндән соруш: «Мүгәддәс Китабы чалышганлыгла тәдгиг етмәклә вә ону һәр ҝүн охумагла үмидими парлаг сахлајыраммы? Аллаһын мүгәддәс руһуну алмаг үчүн тез-тез дуа едирәмми?» (Лука 11:13).

6. Үмидимизин парлаг олмасы үчүн, өзүмүзү нәдән горумалыјыг?

⁶ Бизим үчүн нүмунә олан Иса Аллаһын Кәламындан гүввәт алырды. Онун һәјаты үзәриндә дәриндән дүшүнсәк, ‘ҹанымыз јорулмајаҹаг [вә] тагәтдән дүшмәјәҹәјик’ (Ибраниләрә 12:3). Әҝәр үмидимиз зеһнимиздә вә үрәјимиздә зәифләјәрсә вә ја башымыз башга шејләрә, мәсәлән, вар-дөвләт јығмаға, јахуд дүнјәви мәгсәдләрә гарышарса, биз тезликлә руһән тагәтдән дүшә биләрик. О заман биздә Аллаһын әхлаг нормаларына ујғун јашамаға ҝүҹ вә ҹәсарәт галмајаҹаг. Белә әһвал-руһијјә илә ‘иманымыз гәзаја уғрајан ҝәми кими бата’ да биләр (1 Тимотејә 1:19). Һәгиги үмид исә иманымызы мөһкәмләндирир.

Үмид имандан ајрылмаздыр

7. Нә үчүн үмид имандан ајрылмаздыр?

⁷ «Иман... үмид едилән шејләрә е’тимад, ҝөрүнмәјән һәгигәтләрә инамдыр» (Ибраниләрә 11:1). Буна ҝөрә дә, үмид иманын ајрылмаз һиссәсидир. Ибраһимин нүмунәсинә бахаг. Јеһова Ибраһим вә Саранын вариси олаҹағыны вә’д едәндә инсан нөгтеји-нәзәринҹә дүнјаја ушаг ҝәтирмәк үчүн онлар чох гоҹа идиләр (Јарадылыш 17:15-17). Ибраһим Аллаһын вә’динә неҹә јанашды? «Бу һәр нә гәдәр үмидсиз идисә дә, Ибраһим бир чох халгларын атасы олаҹағына үмидлә иман етди» (Ромалылара 4:18). Бәли, Аллаһын Ибраһимә вердији үмид онун нәсли олаҹағына иманыны мөһкәмләндирди. Иман исә, өз нөвбәсиндә, онун үмидини ҹанландырды вә мөһкәм етди. Ибраһим вә Сара ҹәсарәтлә һәтта ев-ешикләрини вә гоһум-әграбаларыны гојуб өмүрләринин галан һиссәсини јад торпагда чадырларда јашадылар!

8. Дөзүмлүлүк үмиди неҹә мөһкәмләндирир?

⁸ Ибраһим, һәтта чәтин вахтларда да Јеһоваја шәртсиз итаәт етмәклә үмидини мөһкәм сахлајырды (Јарадылыш 22:2, 12). Әҝәр Јеһоваја мәтанәтлә вә итаәткарлыгла хидмәт едириксә, Онун бизи мүкафатландыраҹағына әмин ола биләрик. Һәвари Павел јазмышды: «Дөзүмлүлүкдән тәҹрүбә вә тәҹрүбәдән үмид һасил олдуғуну биләрәк, сыхынтыларла да өјүнүрүк. Вә үмид утандырмаз» (Ромалылара 5:4, 5). Павел, һәмчинин бу сөзләри дә јазмышдыр: «Арзу едирик ки, һәр бириниз, үмидин вердији там е’тимада наил олмаг үчүн сона гәдәр ејни сә’ји ҝөстәрсин» (Ибраниләрә 6:11). Јеһова илә јахын мүнасибәтләрә әсасланмыш белә никбин әһвал-руһијјә һәр бир чәтинлијин өһдәсиндән ҹәсарәтлә, һәтта севинҹлә ҝәлмәјә көмәк едәр.

‘Үмидлә севинин’

9. Бундан сонра да ‘үмидлә севинмәк’ үчүн мүнтәзәм олараг нә етмәлијик?

⁹ Аллаһын вердији үмид дүнјанын тәклиф едә биләҹәји һәр бир шејдән гат-гат дәјәрлидир. Мәзмур 37:34 ајәсиндә дејилир: «Рәбби ҝөзлә, Онун јолуну тут, О сәнә өлкәни мүлк олараг верәҹәк, сәни јүксәлдәҹәк. Писләрин кәсилиб атылаҹағы заманы ҝөрәҹәксән». Бәли, ‘үмидлә севинмәјимизә’ бир чох сәбәб вар (Ромалылара 12:12). Бунун үчүн үмидимиз һаггында даима дүшүнмәлијик. Бәс сән буну едирсәнми? Өзүнү там сағлам, гајғысыз, севдијин адамларын әһатәсиндә, мә’налы вә мәмнунедиҹи ишлә мәшғул олаҹағын Ҹәннәтдә тәсәввүр едирсәнми? Нәшрләримиздә Ҹәннәти тәсвир едән шәкилләрин үзәриндә дүшүнүрсәнми? Белә мүнтәзәм дүшүнҹәләри ҝөзәл мәнзәрәјә ачылан пәнҹәрәни силмәклә мүгајисә етмәк олар. Әҝәр шүшәләр вахташыры јујулмаса, чирк үзүндән мәнзәрә о гәдәр дә ајдын вә ҹазибәли ҝөрүнмәјәҹәк. Онда диггәтимиз диҝәр шејләрә јајына биләр. Буна һеч вахт јол вермә!

10. Нә үчүн мүкафата ҹан атмағымыз Јеһова илә мүнасибәтимизә јахшы тә’сир ҝөстәрир?

¹⁰ Әлбәттә, Јеһоваја хидмәт етмәјимизә әсас сәбәб Она бәсләдијимиз мәһәббәтдир (Марк 12:30). Бунунла јанашы, диггәтимизи алаҹағымыз мүкафатда мөһкәм сахламалыјыг, чүнки буну биздән Јеһова ҝөзләјир! Ибраниләрә 11:6 ајәсиндә дејилир: «Иман етмәдән Аллаһа мәгбул олмаг исә гејри-мүмкүндүр. Чүнки Аллаһа јахынлашан иман етмәлидир ки, О вар вә Ону ахтаранлара мүкафат верир». Нә үчүн Јеһова Ондан мүкафат ҝөзләмәјимизи истәјир? Она ҝөрә ки, бу, Јеһованы сәхавәтли вә севҝи долу сәмави Ата кими јахшы таныдығымызы бәлли едир. ‘Үмидли ҝәләҹәјимиз’ олмасајды, биз неҹә дә бәдбәхт олар вә асанлыгла руһ дүшкүнлүјә гапылардыг! (Јеремја 29:11).

11. Аллаһын вердији үмид Мусаја мүдрик гәрар гәбул етмәкдә неҹә көмәк етди?

¹¹ Муса, Аллаһын вердији үмиди ҝөз гаршысында сахламагда ҝөзәл нүмунә гојмушдур. Муса «Фир’онун гызынын оғлу» кими Мисирдә һакимијјәт, нүфуз вә вар-дөвләт саһиби иди. Бәс онун үрәји бу шејләрә бағлы иди, јохса Јеһоваја? О, Аллаһа хидмәт етмәји даһа үстүн тутду. Бу сечими етмәк үчүн она ҹәсарәт лазым иди. Муса нә үчүн бу јолу сечди? «Чүнки әвәзиндә алаҹағы мүкафаты ҝөзләјирди» (Ибраниләрә 11:24-26). Бәли, Муса Јеһованын вердији үмидә гәтијјән биҝанә јанашмырды.

12. Нә үчүн мәсиһчи үмиди дәбилгәјә охшадылыр?

¹² Һәвари Павел үмиди гәдимдә әсҝәрин башына тахдығы дәбилгә илә мүгајисә етди. Бизим руһани дәбилгәмиз ағлымызы горујараг мүдрик гәрарлар гәбул етмәјә, даһа ваҹиб шејләрә үстүнлүк вермәјә вә нөгсансызлығымызы горумаға көмәк едир (1 Салониклиләрә 5:8). Сәнин дәбилгән һәмишә башындадырмы? Белә тәгдирдә сән, Муса вә Павел кими, ‘ҝүвәнилә билмәјән вар-дөвләтә бел бағламајаҹаг, лакин зөвг алмамыз үчүн бизә һәр шеји боллугла верән јашајан Аллаһа үмид бәсләјәҹәксән’. Дүздүр, худбин мәгсәдләрдән имтина едәрәк ахына гаршы ҝетмәк ҹәсарәт тәләб едир, амма буну етмәјә дәјәр! Мәҝәр Јеһоваја үмид едән вә Ону севәнләри ҝөзләјән ‘һәгиги һәјатдан’ нә исә ҝөзәл бир шеј ола биләрми? (1 Тимотејә 6:17, 19, һашијә).

«Сәни һеч бурахмајаҹағам»

13. Јеһова садиг хидмәтчиләрини нәјә әмин едир?

¹³ Бу дүнјанын ‘ағрылары’ ҝет-ҝедә чохалдыгҹа үмидләрини индики дүнјаја бағлајанлар ҝәләҹәкләри һаггында ҹидди дүшүнмәлидирләр (Матта 24:8). Јеһоваја үмид едәнләр исә горхмурлар. Онлар бундан сонра да «әмин-аманлыгда јашајаҹаг, раһатлыг тапаҹаг, писликдән горхмајаҹаг»лар (Сүлејманын мәсәлләри 1:33). Онлар үмидләрини бу дүнјаја бағламадығындан Павелин мәсләһәтинә мәмнунијјәтлә риајәт едирләр: «Һәјатыныз пулпәрәстликдән азад олсун, өзүнүздә олан шејләрлә кифајәтләнин; чүнки О Өзү демишдир: “Сәни һеч бурахмајаҹағам вә әсла тәрк етмәјәҹәјәм”» (Ибраниләрә 13:5).

14. Нәјә ҝөрә мәсиһчиләр ҝүндәлик тәләбатларына ҝөрә һәддиндән артыг нараһат олмамалыдырлар?

¹⁴ Ајәдә ишләнән «һеч» вә «әсла» сөзләри Јеһованын бизим гајғымыза галаҹағына шүбһә гојмур. Иса, Аллаһын мәһәббәтлә гајғымыза галдығына бизи әмин едәрәк деди: «Әввәлҹә Аллаһын Сәлтәнәтини [Падшаһлығыны] вә Онун салеһлијини ахтарын; вә бунларын һамысы [еһтијаҹ дујдуғумуз мадди шејләр] сизә әлавә олараг вериләҹәкдир. Буна ҝөрә, сабаһ үчүн гајғы чәкмәјин; она ҝөрә ки, сабаһкы ҝүн өзү үчүн гајғы чәкәҹәкдир» (Матта 6:33, 34). Јеһова билир ки, Онун Падшаһлығыны сә’јлә тәблиғ етмәк вә ејни заманда физики тәләбатларымызы өдәмәјин ағыр мәс’улијјәтини дашымаг асан дејил. Ҝәлин Јеһованын бизим тәләбатларымызын гајғысына галмаға гадир олдуғуна вә буну арзуладығына һеч вахт шүбһә етмәјәк (Матта 6:25-32; 11:28-30).

15. Мәсиһчиләр ‘ҝөзләрини’ неҹә сағлам сахлајырлар?

¹⁵ ‘Ҝөзүмүзү сағлам’ сахламагла Јеһоваја бел бағладығымызы ҝөстәририк (Матта 6:22, 23). ‘Ҝөзүнү сағлам’ сахлајан инсанын нијјәтләри тәмиз вә сәмимидир, о, тамаһкар вә худбин истәкләрдән азаддыр. Ҝөзү сағлам сахламаг касыблыг ичиндә јашамаг вә ја мәсиһчи мәс’улијјәтләримизә лагејд јанашмаг демәк дејил. Бу, Јеһоваја хидмәтимизи һәр шејдән үстүн тутараг ‘сағлам дүшүнҹәли’ олмаг демәкдир (2 Тимотејә 1:7, ЈД).

16. Ҝөзү сағлам сахламаг үчүн нәјә ҝөрә ҹәсарәт вә иман тәләб олунур?

¹⁶ Ҝөзү сағлам сахламаг үчүн ҹәсарәт вә иман тәләб олунур. Мәсәлән, мүдир сәндән ҝөрүшләр кечирилән саатларда мүнтәзәм сурәтдә ишләмәји тәләб етсә, руһани ишләрә ҹәсарәтлә үстүнлүк верәҹәксәнми? Кимсә Јеһованын Өз хидмәтчиләринин гајғысына галаҹағы вә’динә шүбһә едирсә, белә адама Шејтанын өз тәзјигини бир аз ҝүҹләндирмәси бәсдир ки, ҝөрүшләри тамамилә атсын. Бәли, иманымыз зәифдирсә һәјатда нәјә үстүнлүк вермәјимизи Јеһова дејил, Шејтан мүәјјән едәҹәк. Бу неҹә дә аҹынаҹаглы оларды! (2 Коринфлиләрә 13:5).

Јеһованы үмидлә ҝөзлә

17. Јеһоваја ҝүвәнәнләрин һал-һазырда һансы хејир-дуалары вар?

¹⁷ Мүгәддәс Јазыларда, Јеһоваја үмид едән вә ҝүвәнәнләрин уғурлу олдуғу дөнә-дөнә вурғуланыр (Сүлејманын мәсәлләри 3:5, 6; Јеремја 17:7). Дүздүр, һәрдән онлар аз шејләрлә кифајәтләнмәли олсалар да, буну ҝәләҹәкдә алаҹаглары хејир-дуаларла мүгајисәдә кичик гурбан һесаб едирләр. Бунунла онлар Јеһованы үмидлә ҝөзләдикләрини вә Онун садиг хидмәтчиләринин үрәкләриндәки бүтүн салеһ арзуларыны һәјата кечирәҹәјинә әмин олдугларыны ҝөстәрирләр (Мәзмур 37:4, 34). Онлар һәтта бу ҝүн дә сөзүн әсл мә’насында хошбәхтдирләр. «Салеһләри севинҹ ҝөзләр, шәр инсанларын үмиди боша чыхар» (Сүлејманын мәсәлләри 10:28).

18, 19. а) Јеһова бизи мәһәббәтлә нәјә әмин едир? б) Јеһованын ‘сағымызда’ дајанмасына неҹә јол веририк?

¹⁸ Балаҹа оғлан атасы илә әл-әлә ҝәзәндә өзүнү тәһлүкәсиз һисс едир. Биз дә сәмави Атамызла јеријәндә өзүмүзү бу ҹүр һисс едирик. Јеһова Исраилә демишди: «Горхма, чүнки Мән сәнинләјәм... Сәнә көмәк едәҹәјәм... Чүнки сәнин сағ әлиндән тутуб “Горхма, сәнә көмәк едәҹәјәм” дејән Аллаһын Рәбб Мәнәм» (Јешаја 41:10, 13).

¹⁹ Бу неҹә дә риггәт доғуран мәнзәрәдир — Јеһова Өз хидмәтчисинин әлиндән тутур! Давуд јазмышды: «Рәббә әбәдилик үз тутмушам, сағымда олдуғу үчүн сарсылмарам» (Мәзмур 16:8). Биз Јеһованын ‘сағымызда’ дајанмасына неҹә јол веририк? Бунун үчүн ән азы ики үсул вар. Биринҹиси, Онун Кәламына һәјатымызын һәр саһәсиндә рәһбәрлик ҝөстәрмәјә имкан веририк. Икинҹиси, Јеһованын вә’д етдији ҝөзәл ән’амы ҝөзүмүзүн гаршысында сахлајырыг. Мәзмурчу Асәф охујурду: «Даим Сәнинлә олмушам, мәним сағ әлимдән тутмусан. Нәсиһәтинлә мәнә јол ҝөстәрирсән, сонра мәни шәрәфә чатдыраҹагсан» (Мәзмур 73:23, 24). Буна әмин олдуғумуз үчүн ҝәләҹәјә инамла бахырыг.

«Гуртулушунуз јахынлашыр»

20, 21. Јеһоваја үмид бағлајанлары һансы ҝәләҹәк ҝөзләјир?

²⁰ Јеһованын ‘сағымызда’ дајанмасы ҝүндән-ҝүнә зәруриләшир. Тезликлә Шејтан дүнјасы бу вахтадәк мисли ҝөрүнмәмиш мәшәггәтлә үзләшәҹәк вә бу, јалан динин мәһви илә башлајаҹаг (Матта 24:21). Имансыз бәшәријјәти горху бүрүјәҹәк. О гарышыг вахтда Јеһованын ҹәсарәтли хидмәтчиләри үмидләринә севинәҹәкләр! Иса демишдир: «Бу ишләр јеринә јетмәјә башладыгда јухары бахын вә башынызы галдырын, чүнки гуртулушунуз јахынлашыр» (Лука 21:28).

²¹ Ҝәлин Аллаһын бизә вердији үмидә севинәк вә Шејтанын кәләкләринә вә һијләҝәрликлә гурдуғу тәләләринә ујмајаг. Һәм дә, ҝәлин иман, мәһәббәт вә Аллаһ горхумузу мөһкәмләндирәк. Белә етсәк, мүхтәлиф шәраитләрдә Јеһоваја итаәт етмәк вә Иблисә гаршы дурмаг үчүн ҹәсарәтимиз олаҹагдыр (Јагуб 4:7, 8). «Еј Рәббә үмид бағлајан бүтүн инсанлар, ҹәсарәтли, мөһкәм олун!» (Мәзмур 31:24).

[Һашијә]

Ҹаваб верә биләрсинизми?

• Исанын үмиди ону неҹә ҹәсарәтләндирирди?

• Иман вә үмид бир-бири илә неҹә бағлыдыр?

• Иман вә үмид мәсиһчиләрә һәјатда ваҹиб шејләри үстүн тутмаға неҹә ҹәсарәт верир?

• Јеһоваја үмид бағлајанлар нә үчүн ҝәләҹәјә әминликлә бахырлар?

[30-ҹу сәһифәдәки шәкил]

Јашлылар вә ҝәнҹләр, өзүнүзү Ҹәннәтдә ҝөрүрсүнүзмү?