‘Дүнјанын руһуна’ мүгавимәт ҝөстәр

«Биз бу дүнјанын руһуну дејил, Аллаһдан ҝәлән Руһу гәбул етдик» (1 КОР. 2:12).

1, 2. а) Кечмишдә Британија шахталарында сарыбүлбүл гушлары һансы мәгсәдлә истифадә олунурду? б) Мәсиһчиләр һансы тәһлүкә илә үзләширләр?

БРИТАНИЈА һөкумәти 1911-ҹи илдә шахтачыларын тәһлүкәсизлијини тәмин етмәк үчүн бир ганун гәбул етди. Бу гануна әсасән, һәр шахтада ики сарыбүлбүл гушу сахланылмалы иди. Бу нә үчүн тәләб олунурду? Шахтада јанғын баш верәндә, хиласедиҹиләр бу гушлары өзләри илә јерин алтына апармалы идиләр. Бу балаҹа гушлар дәм газы кими зәһәрли газлара гаршы чох һәссасдыр. Әҝәр һава зәһәрләнмиш олсајды, бу гушлар гәфәсдә ора-бура вурнухар, һәтта тардан јыхыла биләрдиләр. Бу илк әламәт олдугҹа ваҹиб иди. Рәнҝсиз вә гохусуз олан дәм газы, инсанын бәдәниндәки гырмызы ган һүҹејрәләринин оксиҝен мүбадиләсинин гаршысыны алмагла инсаны өлдүрүр. Хиласедиҹиләр сајыг олмасајдылар, һушуну итирә вә һәтта зәһәрләндикләрини белә анламадан өлә биләрдиләр.

² Руһани мәнада мәсиһчиләр дә шахтачылар кими ејни вәзијјәтлә гаршылашырлар. Бу неҹә ола биләр? Иса шаҝирдләринә хош хәбәри бүтүн дүнјада тәблиғ етмәк тапшырығыны верәндә билирди ки, онлары Шејтанын вә бу дүнјанын руһунун тәсири алтында олан тәһлүкәли дүнјаја ҝөндәрир (Мат. 10:16; 1 Јәһ. 5:19). Иса шаҝирдләринә ҝөрә о гәдәр нараһат иди ки, өлүмүндән габагкы ҝеҹә Атасына дуа едирди: «Мән хаһиш етмирәм ки, Сән онлары дүнјадан ҝөтүрәсән. Хаһиш едирәм ки, онлары шәрдән [«шејтандан», һашијә] горујасан» (Јәһ. 17:15).

3, 4. Иса шаҝирдләринә һансы хәбәрдарлығы верди вә бу бизи нә үчүн марагландырмалыдыр?

³ Иса давамчыларына хәбәрдарлыг етмишди ки, руһани сајыглыгларыны горумалыдырлар, әкс тәгдирдә һәјатларыны итирә биләрдиләр. Онун сөзләри бу системин сонунда јашајан бизләр үчүн хүсуси мәна кәсб едир. О, шаҝирдләрини тәшвиг едирди: «Фәлакәтләрдән гачынмаға лајиг олмаг вә Инсан Оғлунун һүзуруна чыха билмәк үчүн, һәр ан дуа един вә ајыг олун» (Лука 21:34-36). Һәмчинин Иса сөз вермишдир ки, онларын өјрәндикләрини јадларына салмаға, ајыг-сајыг дурмаларына вә ҹәсарәтли олмаларына көмәк етмәк үчүн Атасы мүгәддәс руһ верәҹәк (Јәһ. 14:26).

⁴ Бәс бизим һаггымызда нә демәк олар? Һәмин мүгәддәс руһун көмәјинә биз дә үмид едә биләрикми? Биләриксә, ону алмаг үчүн нә етмәлијик? Дүнјанын руһу нәдир вә неҹә фәалијјәт ҝөстәрир? Дүнјанын руһуна неҹә мүгавимәт ҝөстәрә биләрик? (1 Коринфлиләрә 2:12 ајәсини оху.)

Мүгәддәс руһ, јохса дүнјанын руһу?

5, 6. Мүгәддәс руһ бизим үчүн нә едә биләр вә ону алмаг үчүн нә етмәлијик?

⁵ Мүгәддәс руһун фәалијјәти тәкҹә биринҹи әсрлә битмир. Бу руһ бизим ҝүнләрдә дә әлчатандыр вә бизә дүзҝүн оланы етмәјә, һәмчинин хидмәтимиздә фәал олмаға ҝүҹ верир (Ром. 12:11; Филип. 4:13). О һәм дә «руһун сәмәрәси»нә дахил олан мәһәббәт, лүтфкарлыг вә јахшылыг кими хош хүсусијјәтләри өзүмүздә јетишдирмәјә көмәк едир (Галат. 5:22, 23). Амма Јеһова Аллаһ Өз мүгәддәс руһуну ону диләмәјәнләрә вермир.

⁶ Буна ҝөрә јахшы оларды ки, өзүмүздән сорушаг: «Мүгәддәс руһу алмаг үчүн нә етмәлијәм?» Мүгәддәс Китаб бир нечә үсул ҝөстәрир. Ваҹиб вә садә үсуллардан бири ону Аллаһдан диләмәкдир. (Лука 11:13 ајәсини оху.) Башга фајдалы үсул Аллаһын илһамландырдығы Кәламындакы мәсләһәтләри өјрәнмәк вә онлара әмәл етмәкдир (2 Тим. 3:16). Әлбәттә, һәр кәс Аллаһын руһуну Мүгәддәс Китабы садәҹә охумагла алмыр. Лакин сәмими мәсиһчи Аллаһын Кәламыны арашдыранда илһамланмыш Кәламда әкс олунан һиссләри вә бахышлары мәнимсәјә биләр. Јеһованын Исаны Өз тәмсилчиси тәјин етдијини вә руһуну онун васитәсилә вердијини гәбул етмәјимиз дә ваҹибдир (Колос. 2:6). Демәли, биз Исанын нүмунәсини изләмәли вә тәлимләринә ујғун јашамалыјыг (1 Пет. 2:21). Мәсиһи нә гәдәр чох тәглид етмәјә чалышсаг, мүгәддәс руһу да бир о гәдәр чох алаҹағыг.

7. Дүнјанын руһу инсанлара неҹә тәсир едир?

⁷ Дүнјанын руһу исә инсанлара елә тәсир едир ки, онлар Шејтанын шәхсијјәтини әкс етдирирләр. (Ефеслиләрә 2:1-3 ајәләрини оху.) Дүнјанын руһу мүхтәлиф ҹүр фәалијјәт ҝөстәрир. Әтрафымызда баш верәнләр ҝөстәрир ки, бу руһ инсанлары Аллаһын нормаларына гаршы чыхмаға тәһрик едир. О, дүнјада ‘ҹисмани еһтираса, ҝөзләрин еһтирасына вә һәјатын тәкәббүрүнә’ сәбәб олур (1 Јәһ. 2:16). Онун бәһрәси ҹинси әхлагсызлыг, бүтпәрәстлик, сеһрбазлыг, һәсәд, гәзәб вә сәрхошлуг кими ҹисмани әмәлләрдир (Галат. 5:19-21). О, дөнүкләрин мурдар фикирләринин јајылмасына сәбәб олур (2 Тим. 2:14-18). Бир факт данылмаздыр: инсан нә гәдәр дүнјанын руһунун она тәсир етмәсинә јол верәрсә, бир о гәдәр дә Шејтана бәнзәјәҹәк.

8. Бизләрдән һәр биримиз нәјә гәрар вермәлијик?

⁸ Биз өзүмүзү кәнар тәсирләрдән тамамилә тәҹрид едә билмәрик. Һәр кәс һәјатына мүгәддәс руһун, јохса дүнјанын руһунун истигамәт верәҹәјинә гәрар вермәлидир. Дүнјанын руһунун тәсири алтында олан инсанлар ондан азад олуб, мүгәддәс руһун һәјатларына истигамәт вермәсинә јол верә биләрләр. Бу инсанларын мүгавимәтлә үзләшмәси дә мүмкүндүр. Бир вахтлар мүгәддәс руһа ҝөрә һәрәкәт едәнләр бу дүнјанын руһунун тәләсинә дүшә биләрләр (Филип. 3:18, 19). Ҝәлин ҝөрәк бу дүнјанын руһуна неҹә мүгавимәт ҝөстәрә биләрик.

Илк әламәтләри сезин

9-11. Дүнјанын руһуна ујдуғумузу ҝөстәрән бәзи әламәтләр һансылардыр?

⁹ Мәгаләнин әввәлиндә хатырланан Британија шахтачылары зәһәрли газын јајылыб-јајылмамасыны өјрәнмәк үчүн сарыбүлбүлләрдән истифадә едирдиләр. Шахтачы бу гушун өз тарындан јыхылдығыны ҝөрәндә, хилас олмаг үчүн тәҹили тәдбир ҝөрмәк лазым олдуғуну анлајырды. Бәс руһани мәнада бизим бу дүнјанын руһунун тәсиринә дүшдүјүмүзү ҝөстәрән илк әламәтләрдән бәзиләри һансылардыр?

¹⁰ Аллаһын Кәламындакы һәгигәти јени өјрәнәндә вә һәјатымызы Јеһоваја һәср едәндә, ола билсин, Мүгәддәс Китабы сәјлә охујурдуг. Еһтимал ки, сәмими-гәлбдән вә тез-тез дуа едирдик. Јығынҹаг ҝөрүшләринә мәмнунијјәтлә ҝәлирдик вә һәр ҝөрүш бизим үчүн, сәһрада сусајан адам үчүн јашыллыг вә сујун олдуғу кими, руһани тәравәт мәнбәји иди. Бу бизә дүнјанын руһундан азад олмаға вә бир даһа онун тәсири алтына дүшмәмәјә көмәк етмишди.

¹¹ Инди дә Мүгәддәс Китабы һәр ҝүн охумаға чалышырыгмы? (Мәз. 1:2). Дуаларымыз мүнтәзәм вә сәмимидирми? Јығынҹаг ҝөрүшләрини севирикми вә һәфтә әрзиндә кечирилән ҝөрүшләрдә иштирак едирикми? (Мәз. 84:10). Јохса бу јахшы вәрдишләрин бәзиләри артыг биздә јохдур? Әлбәттә, вахт вә ҝүҹүмүзү алан мәсулијјәтләримиз вар вә бәзән ибадәтимизлә бағлы һәр шеји етмәк чәтин ола биләр. Әҝәр мүәјјән вахтдан сонра һансыса јахшы руһани вәрдиши тәрҝитмишиксә, демәк олмазмы ки, биз бу дүнјанын руһунун тәсири алтына дүшмүшүк? Онлары бәрпа етмәк үчүн вар ҝүҹүмүзлә чалышаҹағыгмы?

«Үрәкләриниз... ағырлашмасын»

12. Исанын сөзләринә ҝөрә, онун шаҝирдләри нәјә диггәт етмәлидирләр вә нә үчүн?

¹² Дүнјанын руһуна даһа неҹә мүгавимәт ҝөстәрмәк олар? Иса шаҝирдләринә ајыг галмағы тапшыранда, өнҹә онлара өзләрини конкрет тәһлүкәдән ҝөзләмәләрини сөјләди. О деди: «Диггәтли олун ки, үрәкләриниз гарынгулулуг вә сәрхошлугла, бу һәјатын гајғылары илә ағырлашмасын вә о Ҝүн сизи гәфләтән јахаламасын» (Лука 21:34, 35).

13, 14. Јејиб-ичмәклә бағлы өзүмүзә һансы суаллары вермәк јахшы оларды?

¹³ Бу хәбәрдарлыг һагда дүшүн. Иса јемәкдән вә ичкидән һәзз алмағымы мүһакимә едирди? Јох! Сүлејманын сөзләри она јахшы таныш иди: «Мән билирәм ки, инсан үчүн шадлыг етмәкдән вә өмрү боју хејирхаһлыг етмәкдән јахшы шеј јохдур. Һәм дә һәр кәсин јејиб-ичмәји вә ҝөрдүјү ишдән зөвг алмағы Аллаһын бәхшишидир» (Ваиз 3:12, 13). Амма Иса билирди ки, бу дүнјанын руһу бу мәсәләләрдә нәфсә һаким олмамаға тәшвиг едир.

¹⁴ Неҹә әмин ола биләрик ки, гарынгулулуг вә сәрхошлуг кими тәһлүкәјә дүшәрәк әглимиз дүнјанын руһу илә зәһәрләнмәјиб? Өзүмүздән соруша биләрик: «Гарынгулулуг барәдә Мүгәддәс Китабда вә ја нәшрләримиздә верилән мәсләһәтләрә неҹә мүнасибәт ҝөстәрирәм? Онларын мәнә аид олмадығы вә ја һәддән артыг сәрт олдуғуну дүшүнәрәк онлары инкар едирәмми, јахуд өзүмә бәраәт газандырыраммы?a Спиртли ичкиләрә, истифадә едирәмсә, онларын таразлы истифадәсинә вә сәрхошлугдан гачынмаға даир верилән мәсләһәтләрә неҹә бахырам? Бу мәсләһәтләрин мүәјјән сәбәбләрә ҝөрә мәнә аид олмадығыны дүшүнәрәк онларын әһәмијјәтини азалдыраммы? Әҝәр башгалары спиртли ичкиләрә алудә олдуғума даир нараһатчылыгларыны билдирирләрсә, өзүмү мүдафиә едирәмми, јахуд һирсләнирәмми? Башгаларыны Мүгәддәс Китабын белә мәсләһәтләринә ҹидди јанашмамаға тәшвиг едирәмми?» Бәли, мәһз инсанын бу мәсәләләрә мүнасибәти онун дүнјанын руһуна ујуб-ујмамасыны мүәјјән едир. (Ромалылара 13:11-14 ајәләри илә мүгајисә ет.)

Нараһатчылығын сизи боғмасына јол вермәјин

15. Инсанлар нәјә мејллидирләр вә Иса һансы мәсләһәти верди?

¹⁵ Дүнјанын руһуна мүгавимәт ҝөстәрмәкдә диҝәр ваҹиб үсул нараһатчылыглары дәф етмәкдир. Иса билирди ки, гејри-камил инсанлар олан бизләр ҝүндәлик тәләбатлара ҝөрә нараһат олмаға мејллијик. О, шаҝирдләринә мәсләһәт верди: «Гајғы чәкмәјин» (Мат. 6:25, И–93). Ајдындыр ки, биз Аллаһы разы салмаг, мәсиһчи мәсулијјәтләрини јеринә јетирмәк вә аилә тәләбатларыны өдәмәк кими зәрури шејләрә ҝөрә нараһат олуруг (1 Кор. 7:32-34). Белә исә Исанын хәбәрдарлығындан нә өјрәнә биләрик?

16. Дүнјанын руһу бир чох инсанлара неҹә тәсир ҝөстәрир?

¹⁶ Бир чох инсанлар вар-дөвләтлә өјүнмәкдә өзүнү бүрузә верән дүнјанын руһуна јолухдугларына ҝөрә һәддиндән артыг нараһатчылыға гапылырлар. Онлар истәјирләр ки, биз пулун тәһлүкәсизлији тәмин етдијинә вә инсанын дәјәринин руһани кејфијјәтләрлә јох, әмлакынын кәмијјәти вә кејфијјәти илә өлчүлдүјүнә инанаг. Бу тәблиғата ујанлар вар-дөвләт газанмағын гулуна чеврилирләр вә ән тәзә, ән бөјүк вә ән габагҹыл маллары алмаг истәји даима онлары нараһат едир (Сүл. мәс. 18:11). Мадди әшјалара даир тәһриф олунмуш белә нөгтеји-нәзәр инсанда нараһатчылыг доғурур ки, бу да онун руһани инкишафына мане олур. (Матта 13:18, 22 ајәләрини оху.)

17. Нә едә биләрик ки, нараһатчылыглар бизи боғмасын?

¹⁷ Исанын «әввәлҹә Аллаһын Сәлтәнәтини вә Онун салеһлијини ахтарын» ҝөстәришинә әмәл етсәк, нараһатчылыглардан азад ола биләрик. Иса әмин етди ки, онун дедији кими даврансаг, доғрудан да еһтијаҹ дујдуғумуз шејләр бизә әлавә олараг вериләҹәкдир (Мат. 6:33). Бу вәдә инандығымызы неҹә ҝөстәрә биләрик? Бунун бир јолу, малијјә мәсәләләриндә Аллаһын нормаларына риајәт едәрәк әввәлҹә Аллаһын салеһлијини ахтармагдыр. Мәсәлән, верҝи бәјаннамәсини сахталашдырмајаҹағыг вә ја ишләримиздә һәтта «кичик» јалан сөјләмәјәҹәјик. Әлимиздән ҝәләни едәҹәјик ки, малијјә өһдәликләримизи јеринә јетирәк, јәни борҹларымызы гајтармаг мәсәләсинә ҝәлдикдә, ‘бәлимиз, бәли олаҹаг’ (Мат. 5:37; Мәз. 37:21). Белә дүз давраныш инсаны варлы етмир, лакин белә инсан Аллаһ тәрәфиндән бәјәнилир, виҹданы тәмиз олур вә нараһатчылыглары хејли азалыр.

18. Иса бизим үчүн һансы ҝөзәл нүмунәни гојуб вә ону тәглид етмәк бизә һансы фајданы ҝәтирир?

¹⁸ Әввәлҹә Падшаһлығы ахтармаг һәјатымызда ән ваҹиб шејин нә олдуғуну дәрк етмәк демәкдир. Исанын нүмунәсинә бахаг. Онун палтары арасында јүксәккејфијјәтлиси дә варды (Јәһ. 19:23). Јахшы достларын әһатәсиндә јемәкдән вә шәрабдан һәзз алырды (Мат. 11:18, 19). Лакин әшјалар вә әјләнҹә онун һәјатында хөрәјин өзү јох, она гатылан әдвијјат кими иди. Исанын јемәји Јеһованын ирадәсини јеринә јетирмәкдән ибарәт иди (Јәһ. 4:34-36). Исанын нүмунәсини тәглид едәндә һәјатымыз неҹә дә мәмнунедиҹи олур! Мәјуслуға гапылан инсанлара Мүгәддәс Јазылардан тәсәлли вермәкдән севинҹ дујуруг. Һәмиманлыларымыз бизи севир вә дәстәкләјир. Вә Јеһованын үрәјини севиндиририк. Һәјатымызда нәјин даһа ваҹиб олдуғуну дәрк едәндә әмлак вә әјләнҹә артыг бизә ағалыг етмир. Әксинә, онлар Јеһоваја ибадәтдә бизә көмәк едән гул вә ја аләт олур. Аллаһын Падшаһлығыны дәстәкләмәк үчүн нә гәдәр чох фәалијјәт ҝөстәрсәк, дүнјанын руһунун тәсири алтына дүшмәк еһтималы да бир о гәдәр аз олаҹаг.

‘Руһани шејләри дүшүнмәјә’ давам един

19-21. Руһани шејләри неҹә дүшүнә биләрик вә нәјә ҝөрә буну етмәлијик?

¹⁹ Фикирләр һәрәкәтләрдән өнҹә ҝәлир. Чохларынын дүшүнүлмәмиш һәрәкәтләр адландырдығы шејләр чох вахт ҹисмани дүшүнҹә тәрзиндән ирәли ҝәлир. Буна ҝөрә, һәвари Павел дүшүнҹәмизи горумағын ваҹиб олдуғуну бизә хатырладыр: «Ҹисмани тәбиәтә ҝөрә јашајанлар, ҹисмани шејләри дүшүнүрләр, Руһа ҝөрә јашајанлар, руһани шејләри дүшүнүрләр» (Ром. 8:5, И–93).

²⁰ Дүшүнҹәмизә, еләҹә дә һәрәкәтләримизә дүнјанын руһунун тәсир етмәсинә јол вермәмәк үчүн нә етмәлијик? Бејнимизи мүмкүн гәдәр дүнјанын тәблиғатындан горујараг нә һагда дүшүндүјүмүзә нәзарәт етмәлијик. Мәсәлән, өзүмүзә әјләнҹә сечәндә еһтијатлы олмалыјыг ки, әхлагсызлыға вә зоракылыға тәшвиг едән верилишләр бејнимизи ләкәләмәсин. Баша дүшүрүк ки, Аллаһ Өзүнүн мүгәддәс, пак руһуну бејнини натәмиз фикирләрлә долдуран инсанлара вермәјәҹәк (Мәз. 11:5; 2 Кор. 6:15-18). Бундан әлавә, мүнтәзәм олараг Мүгәддәс Китабы охумагла, дуа етмәклә, дүшүнмәклә вә јығынҹаг ҝөрүшләринә ҝетмәклә ҝөстәририк ки, Аллаһын руһуну алмаг истәјирик. Тәблиғ хидмәтиндә мүнтәзәм иштирак етмәклә руһла әмәкдашлыг едирик.

²¹ Әлбәттә, дүнјанын руһуна вә онун бәһрәси олан ҹисмани арзулара мүгавимәт ҝөстәрмәлијик. Буну етмәк үчүн сәј ҝөстәрмәјимизә дәјәр, чүнки һәвари Павел демишдир ки, «ҹисмани тәбиәтә ујан дүшүнҹә — өлүм, Руһа ујан дүшүнҹә исә — һәјат вә сүлһдүр» (Ром. 8:6).

Јадыныздадырмы?

• Мүгәддәс руһу алмаг үчүн нә етмәлијик?

• Дүнјанын руһу бизә һансы јолларла тәсир ҝөстәрә биләр?

• Биз дүнјанын руһуна неҹә мүгавимәт ҝөстәрә биләрик?

[21-ҹи сәһифәдәки шәкил]

Ишә вә ја мәктәбә ҝетмәздән өнҹә мүгәддәс руһ үчүн дуа ет

[23-ҹү сәһифәдәки шәкилләр]

Дүшүнҹәләримизи тәмиз сахламалы, ишләримиздә дүрүст вә вәрдишләримиздә таразлы олмалыјыг