«Һәр ҹүр тәсәлли» верән Јеһоваја ҝүвән!
«Ағамыз Иса Мәсиһин Атасы Аллаһа шүкүрләр олсун. О, мәрһәмәтли Ата вә һәр ҹүр тәсәлли [Аллаһыдыр]» (2 КОР. 1:3).
1. Јашларындан асылы олмајараг, бүтүн инсанларын нәјә еһтијаҹы вар?
ДҮНЈАЈА ҝөз ачдығымыз илк ҝүндән бәри тәсәллијә еһтијаҹымыз вар. Көрпә тәсәллијә еһтијаҹ дујанда буну ағламағы илә билдирир. Ола билсин, о, киминсә ону гуҹағына алмасыны вә ја једиздирмәсини истәјир. Һәтта јеткин јашларымызда белә, хүсусилә дә дара дүшәндә тәсәллијә тез-тез еһтијаҹ дујуруг.
2. Јеһова Она ҝүвәнәнләри нәјә әмин едир?
2 Чох вахт бизә аилә үзвләримиз вә достларымыз тәсәлли верир. Анҹаг һәрдән һеч бир инсан нараһатчылығымыза сәбәб олан амилләри арадан галдырмаг гүввәсиндә олмур. Белә һалларда, вәзијјәтимизин нә дәрәҹәдә пис олмасындан асылы олмајараг, јалныз Аллаһ бизә тәсәлли вермәјә гадирдир. Онун Кәламы бизи әмин едир: «Рәбб Ону... чағыран бүтүн инсанлара јахындыр... Фәрјадларына гулаг асыб онлары гуртарар» (Мәз. 145:18, 19). Бәли, «Рәббин ҝөзү салеһләрин үзәриндәдир, гулаглары онларын фәрјадларына ачыгдыр» (Мәз. 34:15). Лакин әҝәр Аллаһын бизә дајаг олмасыны вә тәсәлли вермәсини истәјириксә, Она ҝүвәнмәлијик. Мәзмурчу Давуд өз мәзмурунда буну ајдын шәкилдә ҝөстәрди: «Рәбб мәзлумларын пәнаһҝаһыдыр, сыхынты анларында мүдафиә галасыдыр. Исмини таныјанлар Сәнә ҝүвәнир, чүнки, ја Рәбб, Сәни ахтаранлары тәрк етмәзсән!» (Мәз. 9:9, 10).
3. Јеһованын Өз халгыны севдијини Иса һансы нүмунә әсасында ҝөстәрди?
3 Хидмәтчиләри Јеһова үчүн чох әзиздир. Буну Исанын нөвбәти сөзләри тәсдигләјир: «Мәҝәр беш сәрчәни икиҹә гара гәпијә сатмырлар? Амма онлардан һеч бири Аллаһын јадындан чыхмыр. Сизин исә башынызын сачы белә, бир-бир сајылыб. Одур ки, горхмајын, сиз сәрчәләрдән гат-гат гијмәтлисиниз» (Лука 12:6, 7). Јеһова Јеремја пејғәмбәр васитәсилә гәдим халгына демишди: «Сәни әбәди бир мәһәббәтлә севдим, буна ҝөрә дә севҝи илә сәни өзүмә тәрәф чәкдим» (Јер. 31:3).
4. Нәјә ҝөрә Јеһованын вәдләринә етибар едә биләрик?
4 Јеһоваја ҝүвәнмәјимиз вә Онун вәдләринин јеринә јетәҹәјинә иман етмәјимиз мәшәггәтли анларымызда бизә тәсәлли верә биләр. Бизим Аллаһа олан етибарымыз Јешуанынкы кими мөһкәм олмалыдыр. О демишди: «Аллаһыныз Рәббин һаггынызда дедији бүтүн јахшы шејләрдән һеч бири боша чыхмады. Һамысы сизин үчүн јеринә јетди. Онун сөзләриндән һеч бири боша чыхмады» (Јешуа 23:14). Бундан башга, әҝәр һал-һазырда вәзијјәтимиз чох ағырдырса, биз әмин ола биләрик ки, «Аллаһ вәфалы Аллаһдыр» вә һеч вахт садиг хидмәтчиләрини тәрк етмир. (1 Коринфлиләрә 10:13 ајәсини оху.)
5. Биз башгаларына неҹә тәсәлли верә биләрик?
5 Һәвари Павел Јеһованы «һәр ҹүр тәсәлли Аллаһы» адландырыр. «Тәсәлли вермәк» нараһатчылыг кечирән вә ја дәрди-гәми олан инсаны овундурмаг, сакитләшдирмәк мәнасыны дашыјыр. Буну әзаб чәкән инсанын изтирабыны вә ја дәрдини јүнҝүлләшдирмәклә, јахуд да она тәскинлик вермәклә етмәк олар. Әлбәттә, Јеһова белә дә едир. (2 Коринфлиләрә 1:3, 4 ајәләрини оху.) Сәмави Атамызын ҝүҹүнү һеч ким вә һеч нә мәһдудлашдырмыр, буна ҝөрә дә Ону севән инсанлара тәсәлли вермәк үчүн Јеһованын әлиндә һәр ҹүр васитә вар. Јеһовадан тәсәлли алдығымыз кими, биз дә, өз нөвбәмиздә, «мүхтәлиф ҹүр дәрди» олан һәмиманлыларымыза тәсәлли верә биләрик. Бу, үмидсизлијә гапылмыш инсанлара тәсәлли вермәк ҝүҹүнә малик олан Јеһованын мисилсиз гүввәсинин бариз нүмунәсидир!
Нараһатчылыгларымызын өһдәсиндән неҹә ҝәлә биләрик?
6. Нараһатчылыға сәбәб олан амилләрин бәзиләри һансылардыр?
6 Һәјатымызын бир чох саһәләриндә тәсәллијә еһтијаҹ дујуруг. Бизә ән чох әзаб верән шејләрдән бири әзиз адамымызын, хүсусилә дә севимли һәјат јолдашымызын вә ја өвладымызын өлүмүдүр. Ајры-сечкилијин вә ја гәрәзли мүнасибәтин гурбаны оланларын, еләҹә дә хәстәлик, гоҹалыг, јохсуллуг, аилә проблемләри вә ја дүнјадакы пис шәраит уҹбатындан әзијјәт чәкәнләрин дә тәсәллијә еһтијаҹы вар.
7. а) Изтираблы анларымызда нәјә еһтијаҹ дујуруг? б) Јеһова «сынан вә пешман олан» үрәјимизә неҹә шәфа верә биләр?
7 Үзләшдијимиз чәтинликләр мүхтәлиф олур. Бәзән үрәјимизи, зеһнимизи вә емосијаларымызы сакитләшдирмәјә еһтијаҹ јараныр, бәзән исә физики вә ја руһани сағламлығымыза зәрәр дәјдији үчүн тәсәллијә еһтијаҹымыз вар. Ҝөтүрәк елә үрәјимизи. Аллаһын Кәламында ачыг шәкилдә дејилир ки, бәзән үрәјимиз сыныр вә ја пешман олур (Мәз. 51:17). Шүбһә јохдур ки, Јеһова белә вәзијјәтләрдә дадымыза чатмаға гадирдир, чүнки О, «сыныг гәлбләрә шәфа верәр, јараларыны сарыјар» (Мәз. 147:3). Әҝәр биз там иманла Аллаһа дуа едир вә Онун әмрләрини јеринә јетиририксә, һәтта ән чәтин анларымызда белә О, ағрыјан үрәјимизи сакитләшдирәҹәк. (1 Јәһја 3:19—22; 5:14, 15 ајәләрини оху.)
8. Дахилимиздә нараһатчылыг доғуран фикирләр баш галдыранда Јеһова бизә нечә көмәк едир?
8 Зеһнимизин тез-тез тәсәллијә еһтијаҹы вар, чүнки үзләшдијимиз сынаглар заманы дахилимиздә нараһатчылыг доғуран фикирләр баш галдырыр. Өз ҝүҹүмүзлә бу ҹүр сынагларын өһдәсиндән ҝәлмәк гејри-мүмкүндүр. Мәзмурчу охујурду: «Фикирләр мәни чулғајанда мәнә тәсәлли вериб овутдун» (Мәз. 94:19, ЈД). Үстәлик, Павел јазмышды: «Һеч нәјә ҝөрә нараһат олмајын. Һәр диләјинизи дуа, јалварыш вә шүкранла Аллаһа билдирин. Аллаһын вердији гәлб раһатлығы бүтүн инсан фикирләрини үстәләјир; о, үрәјинизи вә зеһнинизи Мәсиһ Иса васитәсилә горујаҹаг» (Филип. 4:6, 7). Әҝәр Мүгәддәс Јазылары охујуб үзәриндә дүшүнсәк, бу, бизә нараһатчылыг доғуран фикирләрдән азад олмаға көмәк едәҹәк (2 Тим. 3:15—17).
9. Мәнфи емосијаларын өһдәсиндән неҹә ҝәлмәк олар?
9 Бәзән биз о дәрәҹәдә руһдан дүшүрүк ки, мәнфи емосијалара гапылмаг тәһлүкәси јараныр. Ола билсин, Мүгәддәс Китабын үзәримизә гојдуғу мәсулијјәтләри вә ја јығынҹагдакы тапшырығы јеринә јетирмәк үчүн өзүмүзү јарарсыз һисс едирик. Белә вәзијјәтләрдә дә Јеһова бизә дајаг олур вә тәсәлли верир. Нүмунә үчүн, Јешуаја исраиллиләри ҝүҹлү дүшмән халгларына гаршы дөјүшә апармаг тапшырығы вериләндә Муса халга деди: «Мөһкәм вә ҹәсарәтли олун! Онлардан горхуб чәкинмәјин! Чүнки Аллаһыныз Рәбб сизинлә ҝедир. О сизи атмаз, тәрк етмәз!» (Ганун. т. 31:6). Јеһованын көмәјилә Јешуа Аллаһын халгыны Вәд едилмиш дијара кечиртди вә бүтүн дүшмәнләри үзәриндә гәләбә чалды. Бу һадисәдән хејли өнҹә Муса да Јеһовадан ејни көмәји алмышды (Чых. 14:13, 14, 29—31).
10. Әҝәр нараһатчылыгларымыз сәһһәтимизә мәнфи тәсир ҝөстәрирсә, бизә нә көмәк едәҹәк?
10 Нараһатчылыг доғуран вәзијјәтләр сәһһәтимизә дә мәнфи тәсир ҝөстәрә биләр. Дүзҝүн гидаланмаг, лазыми гәдәр истираһәт етмәк, идманла мәшғул олмаг, ҝиҝијена гајдаларына әмәл етмәк бизим үчүн чох хејирлидир. Сағлам руһани әһвал-руһијјәнин вә ҝәләҹәјә никбин бахышын сәһһәтимизә ҝөстәрдији фајда да данылмаздыр. Буна ҝөрә дә ҝәлин сыхынтылы анларымызда Павелин нүмунәсини вә руһландырыҹы сөзләрини јадымыза салаг: «Бизи һәр тәрәфдән сыхышдырырлар, амма дивара дирәмәјибләр; чашгынлыг ичиндәјик, амма вәзијјәтимиз чыхылмаз дејил; бизи тәгиб едирләр, амма дарда галмамышыг; бизи јыхырлар, амма мәһв едилмәмишик» (2 Кор. 4:8, 9).
11. Руһани хәстәлијимиздән шәфа тапмаг үчүн нә етмәлијик?
11 Бәзи сынаглар исә бизим руһани сағламлығымыза хәләл ҝәтирә биләр. Белә вәзијјәтләрдә дә Јеһова дадымыза чатыр. Онун Кәламы бизи әмин едир: «Рәбб јыхыланларын һамысына дајагдыр, гәдди әјиләнләрин һамысыны галдырыр» (Мәз. 145:14). Руһани хәстәлијимиздән шәфа тапмаг үчүн јығынҹаг ағсаггалларына мүраҹиәт етмәлијик (Јаг. 5:14, 15). Мүгәддәс Китабын әбәди һәјата даир вердији үмиди даима јадда сахласаг, иманымызы сынаға чәкән һәр бир вәзијјәтә мәтанәтлә синә ҝәрәҹәјик (Јәһ. 17:3).
Аллаһдан тәсәлли алан инсанлар
12. Јеһова Ибраһимә неҹә тәсәлли верди?
12 Мәзмурчу Аллаһдан илһам алараг демишди: «Сән гулуна вердијин сөзү хатырла, бу сөзүнлә мәнә үмид вермисән. Әзаб чәкәндә бундан тәсәлли тапырам ки, кәламын мәни һәјата гајтараҹаг» (Мәз. 119:49, 50). Бу ҝүн бизим әлимиздә олан Мүгәддәс Китабда Аллаһдан тәсәлли алан бир чох инсанларын нүмунәси вар. Мисал үчүн, Аллаһын садиг бәндәси Ибраһим өјрәнәндә ки, Јеһова Содом вә Һоморраны мәһв етмәјә һазырлашыр, онун үрәји нараһат олмаға башлады. О, Јеһовадан сорушду: «Доғруданмы, Сән салеһи дә ҝүнаһкарла бирҝә мәһв едәҹәксән?» Јеһова она тәсәлли верәрәк әмин етди ки, әҝәр Содомда 50 салеһ адам тапылса, ораны мәһв етмәјәҹәк. Лакин Јеһоваја дүз беш дәфә мүраҹиәт едән Ибраһим бу сајы әввәлҹә 45-ә, сонра 40-а, ондан сонра 30-а, даһа сонра 20-ә, сонда исә 10-а гәдәр азалтды. Јеһова һәр дәфә сәбирлә вә мүлајимҹәсинә Ибраһими әмин едирди ки, Содомда онун дедији гәдәр салеһ адам тапылса, онун сакинләринә рәһм едәҹәк. Һәмин әразидә он нәфәр дә олсун салеһ адам тапылмады, лакин Јеһова Луту вә онун ики гызыны хилас етди (Јар. 18:22—32; 19:15, 16, 26).
13. Ханна Јеһоваја ҝүвәндијини неҹә ҝөстәрди?
13 Елгананын һәјат јолдашы Ханнанын ән бөјүк арзусу ушаг саһиби олмаг иди. Лакин сонсуз олдуғу үчүн бу, онун үрәјиндә губар бағламышды. Ханна бу барәдә Јеһоваја дуа едәндә баш каһин Ели она деди: «Гој Исраилин Аллаһы сәни мурадына чатдырсын!» Онун сөзләри Ханна үчүн тәсәлли олду вә «артыг чөһрәси кәдәрли дејилди» (1 Шам. 1:8, 17, 18). Ханна Јеһоваја там ҝүвәнирди вә бүтүн гајғысыны Онун үзәринә бурахмышды. О, бунун нә илә нәтиҹәләнәҹәјини билмәсә дә, дахилиндә раһатлыг һисс етди. Бир мүддәт сонра Јеһова онун дуасына ҹаваб верди вә онун Шамуел адында оғлу дүнјаја ҝәлди (1 Шам. 1:20).
14. Нәјә ҝөрә Давудун тәсәллијә еһтијаҹы варды вә о, кимә үз тутмушду?
14 Аллаһдан тәсәлли алан диҝәр инсан исә гәдим Исраилин падшаһларындан бири олан Давуд иди. Јеһова инсанын үрәјинә бахыр, буна ҝөрә дә Давуду Исраил үчүн падшаһ сечәндә гәлбинин тәмиз вә һәгиги ибадәтә үрәкдән бағлы олдуғуну билирди (1 Шам. 16:7; 2 Шам. 5:10). Лакин сонрадан Давуд Бат-Шева илә әхлагсызлыг етди вә онун әрини өлдүртдүрәрәк ҝүнаһыны өрт-басдыр етмәјә чалышды. Давуд бу әмәлләринин нә гәдәр бөјүк ҝүнаһ олдуғуну дәрк едәндә Јеһоваја дуа етди: «Бол мәрһәмәтинә ҝөрә ганунсузлугларымы сил. Тәгсирими тамамилә ју, ҝүнаһымдан мәни тәмизлә. Чүнки ганунсузлугларымы билирәм, ҝүнаһым даим ҝөзүмүн гаршысындадыр» (Мәз. 51:1—3). Давуд сәмими-гәлбдән төвбә етди вә Јеһова онун ҝүнаһындан кечди. Бунунла белә, о, ҝүнаһынын нәтиҹәләриндән гача билмәди (2 Шам. 12:9—12). Лакин Јеһованын мәрһәмәти тәвазөкар хидмәтчиси олан Давуд үчүн әсил тәсәлли иди.
15. Өлүмгабағы Јеһова Исаја неҹә дајаг олмушду?
15 Иса јер үзүндә оларкән бир чох сынагларла үзләшмишди. Аллаһ онун иманынын сынанмасына јол вермишди вә Иса камил бир инсан кими нөгсансызлығыны горујараг һәр вәзијјәтдә Јеһоваја ҝүвәндијини вә Онун али һакимијјәтини дәстәкләдијини ҝөстәрди. Әлә верилмәсиндән вә ишҝәнҹә дирәјиндә едам едилмәсиндән өнҹә Иса Јеһоваја дуа етмишди: «Гој мәним јох, Сәнин истәјинҹә олсун». Бу заман Аллаһын мәләји Исанын гаршысында пејда олуб ону мөһкәмләндирди (Лука 22:42, 43). Јеһова Исанын һәмин ан еһтијаҹ дујдуғу тәсәллини верди, ону мөһкәмләндирди вә она дајаг олду.
16. Нөгсансызлығымызы горујаркән һәјатымыз үчүн тәһлүкәли вәзијјәт јаранарса, Јеһова бизә неҹә көмәк едә биләр?
16 Әҝәр биз бир мәсиһчи кими Аллаһа садиг галмаг үчүн өлүмлә үз-үзә ҝәлсәк белә, О, бизә нөгсансыз галмағымыза көмәк етмәјә гадирдир. Вә биз әмин ола биләрик ки, Јеһова буну едәҹәк. Дирилмәјә олан үмидимиз дә бизим үчүн әсил тәсәлли мәнбәјидир. Биз бөјүк сәбирсизликлә сонунҹу дүшмәнимиз олан өлүмүн мәһв едиләҹәји вахты ҝөзләјирик! (1 Кор. 15:26). Һәјатларыны итирмиш Аллаһын садиг хидмәтчиләри, еләҹә дә диҝәр инсанлар ән етибарлы јердә — Аллаһын јаддашындадырлар вә онлар дириләҹәкләр (Јәһ. 5:28, 29; Һәв. иш. 24:15). Јеһованын бу вәдинә етибар етмәјимиз бизә тәсәлли верир вә тәгибләр заманы үрәкләримизи үмидлә долдурур.
17. Јеһова әзизләрини итирәнләрә һансы тәсәллини верир?
17 Бәшәријјәтин үмуми мәзарында олан әзизләримиз индики һәјата хас олан әзаб-әзијјәтләрдән азад олаҹаг ҝөзәл јени дүнјада һәјата гајтарылаҹаглар. Буну билмәк бизим үчүн әсил тәсәллидир! Бу пис дүнјанын мәһви заманы сағ галаҹаг Јеһованын хидмәтчиләриндән ибарәт олан бөјүк издиһам онлары гаршыламаг вә онлара тәлим вермәк шәрәфинә лајиг ҝөрүләҹәк! (Вәһј 7:9, 10).
«Сәни даим голларында ҝәздирәр»
18, 19. Аллаһ тәгиб олунан хидмәтчиләринә неҹә тәсәлли верир?
18 Инсан үрәјинин дәринликләринә тәсир едән бир маһныда Муса Исраил халгыны әмин етмишди: «Пәнаһҝаһын әзәли әбәди Аллаһдыр, сәни даим голларында ҝәздирәр» (Ганун. т. 33:27). Шамуел пејғәмбәр исә бир дәфә исраиллиләрә демишди: «Рәббин јолундан дөнмәјин, бүтүн гәлбинизлә јалныз Рәббә гуллуг един... Рәбб халгыны Өз бөјүк исми наминә атмајаҹаг» (1 Шам. 12:20—22). Нә гәдәр ки биз һәгиги Аллаһа сәдагәтлә ибадәт едирик, О, һеч вахт бизи тәрк етмәјәҹәк. О, һәр заман бизә лазым олан көмәји ҝөстәрәҹәк.
19 Бу мәшәггәтли сон ҝүнләрдә Јеһова халгындан Өз көмәјини вә тәсәллисини әсирҝәмир. Јүз илдән чохдур ки, бүтүн дүнјада минләрлә һәмиманлыларымыз садәҹә Јеһоваја хидмәт етдикләри үчүн тәгиб вә ја һәбс олунурлар. Онларын нүмунәси ҝөстәрир ки, сынаглар заманы Јеһова, һәгигәтән дә, хидмәтчиләринә тәсәлли верир. Мәсәлән, кечмиш Совет Иттифагында бир гардаша иманына ҝөрә 23 ил иш кәсилмишди. Лакин орада да бу гардаш ону мөһкәмләндирән вә онун үчүн тәсәлли олан руһани гиданы әлдә етмәјин үсулларыны тапмышды. О демишди: «Бүтүн бу илләр әрзиндә мән Јеһоваја вә Онун гүввәсинә ҝүвәнмәји өјрәндим». (1 Петер 5:6, 7 ајәләрини оху.)
20. Нәјә ҝөрә әмин ола биләрик ки, Јеһова бизи тәрк етмәјәҹәк?
20 Ҝәләҹәкдә нә илә үзләшәҹәјимиздән асылы олмајараг, ҝәлин мәзмурчунун тәсәлливериҹи сөзләрини һеч вахт унутмајаг: «Рәбб халгыны Өзүндән ајырмаз» (Мәз. 94:14). Һәр биримизин тәсәллијә еһтијаҹы олса да, биз башгаларына да тәсәлли верә биләрик. Нөвбәти мәгаләдән ҝөрәҹәјик ки, бу нараһат дүнјада әзаб-әзијјәт чәкәнләрә неҹә тәсәлли вермәк олар.
Неҹә ҹаваб верәрдиниз?
• Бизим әзаб чәкмәјимизә нәләр сәбәб ола биләр?
• Јеһова Өз хидмәтчиләринә неҹә тәсәлли верир?
• Өлүмлә үз-үзә ҝәләндә бизә нә тәсәлли верә биләр?
[25–ҹи сәһифәдәки чәрчивә/шәкил]
...тәсир едән шејләрин өһдәсиндән неҹә ҝәлмәк олар?
▪ ҮРӘЈИМИЗӘ (Мәз. 147:3; 1 Јәһ. 3:19—22; 5:14, 15)
▪ ЗЕҺНИМИЗӘ (Мәз. 94:19; Филип. 4:6, 7)
▪ ЕМОСИЈАЛАРЫМЫЗА (Чых. 14:13, 14; Ганун. т. 31:6)
▪ ФИЗИКИ САҒЛАМЛЫҒЫМЫЗА (2 Кор. 4:8, 9)
▪ РУҺАНИ САҒЛАМЛЫҒЫМЫЗА (Мәз. 145:14; Јаг. 5:14, 15)