“Хидмәтини там шәкилдә иҹра ет”

“Хидмәтини там шәкилдә иҹра ет” (2 ТИМОТЕЈӘ 4:5).

1, 2. Бүтүн мәсиһчиләр мүждәчи олсалар да, Мүгәддәс Китаба әсасән ағсаггаллардан нә ҝөзләнилир?

ӘҜӘР сән Падшаһлығын тәблиғчисисәнсә, бу ҝөзәл үстүнлүјә ҝөрә Јеһова Аллаһа миннәтдарлыг ет. Јығынҹагда ағсаггалсанса, сәнә даһа бөјүк мәс’улијјәт һәвалә едилиб. Лакин биз һеч заман унутмалы дејилик ки, бизи хидмәтә вә ја јығынҹагдакы нәзарәт ишинә јарарлы едән дүнјәви тәһсил вә ја ҝөзәл данышыг габилијјәти дејил. Бизи мүгәддәс хидмәтә јарарлы едән Јеһовадыр вә кишиләрдән ким исә јалныз Мүгәддәс Китаб тәләбләринә мүвафиг олдуглары үчүн јығынҹагда нәзарәтчи кими хидмәт едирләр (2 Коринфлиләрә 3:5, 6; 1 Тимотејә 3:1-7).

² Аллаһа һәср олунмуш бүтүн мәсиһчиләр мүждәчи иши илә мәшғул олурлар, лакин хидмәтдә хүсусилә нәзарәтчиләр, јә’ни ағсаггаллар јахшы нүмунә олмалыдырлар. “Тәблиғ вә тә’лим ишиндә зәһмәт чәкән” ағсаггаллара Јеһова, Мәсиһ, еләҹә дә һәмиманлылары диггәт јетирирләр (1 Тимотејә 5:17; Ефеслиләрә 5:23; Ибраниләрә 6:10-12). Ағсаггал һәр бир шәраитдә руһән сағлам тә’лим вермәлидир. Буну һәвари Павелин ағсаггал Тимотејә сөјләдији сөзләриндән ҝөрмәк олар: “Вахт олаҹагдыр ки, сағлам тә’лимә тәһәммүл етмәјәҹәкләр; лакин сәсләри гулагларына хош ҝәлән вә арзуларына ујғун олан мүәллимләри әтрафларына топлајаҹаглар. Вә өз гулагларыны һәгигәтдән узаглашдырыб, әфсанәләрә мејл ҝөстәрәҹәкләр. Фәгәт сән, һәр шејдә ајыг дур, әзијјәтә гатлаш, мүждәчи ишини јеринә јетир, өз хидмәтини там шәкилдә иҹра ет” (2 Тимотејә 4:3-5).

3. Јалан тә’лимләрин јығынҹаға руһән зәрәр ҝәтирмәмәси үчүн нә етмәк зәруридир?

³ Јалан тә’лимләр јығынҹаға руһани зәрәр ҝәтирмәсин дејә, ағсаггал һәвари Павелин нәсиһәтинә риајәт етмәлидирләр: “Сән һәр вәзијјәтдә ајыг дур... өз хидмәтини там шәкилдә иҹра ет” (2 Тимотејә 4:5). Беләликлә, ағсаггалдан өз хидмәтини “там шәкилдә иҹра етмәк” ҝөзләнилир. О, хидмәтини әсаслы сурәтдә, дәгигликлә, бүсбүтүн иҹра етмәлидир. Өз хидмәтини там шәкилдә иҹра едән ағсаггал, һеч бир иши өз ахарына бурахмадан, бүтүн вәзифәләринә лазыми диггәт ајырараг һәр шеји баша чатдырыр. Бу ҹүр инсан һәтта ән балаҹа ишдә белә садигдир (Лука 12:48; 16:10).

4. Хидмәтимизи там шәкилдә иҹра етмәкдә бизә нә көмәк едәҹәк?

⁴ Хидмәти там шәкилдә иҹра етмәк үчүн һәмишә чох вахт тәләб олунмур: башлыҹасы вахтдан сәмәрәли сурәтдә истифадә етмәкдир. Сабит олмағын сајәсиндә, һәр бир мәсиһчинин хидмәти сәмәрәли ола биләр. Тәблиғ хидмәтинә чох вахт ајырмаг үчүн, ағсаггала өз ҝүнүнү таразлашмыш сурәтдә планлашдырмаг, һәмчинин һансы мәс’улијјәтләри башгалары илә бөлүшмәк вә буну неҹә етмәјин јолуну билмәк лазымдыр (Ибраниләрә 13:17). Тәбиидир ки, јығынҹагда һөрмәт газанмыш ағсаггал, Јерусәлимин диварларынын јенидән уҹалдылмасында шәхсән иштирак едән Неһемјаја бәнзәр тәрздә, јығынҹагда өз пајына дүшән иши јеринә јетирәҹәкдир (Неһемја 5:16). Јеһованын бүтүн хидмәтчиләринә дә Падшаһлыг һаггындакы тәблиғ ишиндә мүнтәзәм олараг иштирак етмәк лазымдыр (1 Коринфлиләрә 9:16-18).

5. Биз хидмәтимизә неҹә јанашмалыјыг?

⁵ Бизә һәвалә едилмиш тапшырығы — тә’сис едилмиш сәмави Падшаһлыг һаггында е’лан етмәк тапшырығыны јеринә јетирмәк неҹә дә севиндириҹидир! Сөзсүз ки, сон ҝәләнә гәдәр хош хәбәрин бүтүн дүнјада тәблиғиндә иштирак етмәк үстүнлүјүнү гијмәтләндиририк (Матта 24:14). Гејри-камил олмағымыза бахмајараг, Павелин сөзләриндән тәсәлли әлдә едә биләрик: “Бу сәрвәти сахсы габларда сахлајырыг ки, ән үстүн гүдрәт бизә јох, Аллаһа аид олсун” (2 Коринфлиләрә 4:7). Ҝөрдүјүмүз кими, Аллаһа мәгбул олан хидмәти јалныз Онун вердији гүввә вә мүдриклијин көмәји илә иҹра етмәк мүмкүндүр (1 Коринфлиләрә 1:26-31).

Аллаһын иззәтини әкс етдирмәк

6. Ҹисмани Исраил илә руһани Исраил арасындакы фәрг нәдәдир?

⁶ Мәсһ едилмиш мәсиһчиләрә даир Павел дејир ки, Аллаһ онлары “Әһди-Ҹәдидин хидмәткарлары олмаға габил етди”. Һәвари, Иса Мәсиһин васитәсилә руһани Исраил халгы илә бағланан јени әһди, Мусанын васитәсилә ҹисмани Исраил халгы илә бағланан көһнә әһдлә — Ганун әһди илә мүгајисә едир. Павел әлавә едир ки, Муса, үзәриндә Он ганун һәкк олунмуш лөвһәләрлә Сина дағындан енәндә, үзү нур сачдығы үчүн исраиллиләр онун үзүнә баха билмәдиләр. Лакин сонрадан ҹидди һадисә баш верди; онларын ‘зеһинләри кор олду’ вә үрәкләри “өртүк” алтында галды. Сәмими гәлбдән еһтирам һисси илә Јеһоваја тәрәф дөнәндә исә, өртүк ҝөтүрүлүр. Көһнә әһддә оланлара е’тибар едилмиш хидмәти нәзәрдә тутараг Павел дејир: ‘Биз һамымыз исә, өртүксүз үзлә Рәббин иззәтини ајнада имиш кими ҝөрүрүк [“әкс етдиририк”, ЈД]’ (2 Коринфлиләрә 3:6-8, 14-18, И–93; Чыхыш 34:29-35). Бизим ҝүнләрдә Исанын “башга гојунлары” да Јеһованын иззәтини әкс етдирмәјә лајиг ҝөрүлүбләр (Јәһја 10:16).

7. Инсанлар Аллаһын иззәтини неҹә әкс етдирә биләрләр?

⁷ Аллаһын үзүнү ҝөрүб сағ гала билмәјән ҝүнаһлы инсанлар Онун иззәтини не­ҹә әкс етдирә биләрләр? (Чыхыш 33:20). Мәсәлә ондадыр ки, Јеһованын Өз иззәтиндән башга, Онун иззәтли нијјәти — Падшаһлыг васитәсилә Өз һөкмранлығына бәраәт газандырмаг нијјәти дә вар. Падшаһлыгла бағлы олан һәгигәтләр, ерамызын 33⁠-ҹү илиндә үзәрләринә мүгәддәс руһ төкүлән кәсләрин е’лан етмәјә башладыглары “Аллаһын мөһтәшәм ишләри”нин бир һиссәсидир (Һәвариләрин ишләри 2:11). Руһун рәһбәрлији алтында, онлара һәвалә едилмиш хидмәти там шәкилдә иҹра едә билирдиләр (Һәвариләрин ишләри 1:8).

8. Хидмәтә мүнасибәтиндә Павел һансы гәтијјәтли әһвал-руһијјәни әкс етдирирди?

⁸ Павел, хидмәтини там шәкилдә иҹра етмәк үчүн она һеч бир шејин мане олмасына јол вермирди. О јазырды: “Бизә ҝөстәрилән мәрһәмәт сајәсиндә бу ҹүр хидмәтә малик олдуғумуз үчүн руһдан дүшмүрүк. Лакин биз ҝизли, ејибли үсуллары рәдд етдик. Һијләҝәрлик илә һәрәкәт етмирик, Аллаһын кәламыны тәһриф етмирик, амма һәгигәти ачыг е’лан едәрәк өзүмүзү Аллаһ гаршысында һәр инсанын виҹданына тәгдим едирик” (2 Коринфлиләрә 4:1, 2). Павелин “бу ҹүр хидмәт” адландырдығы шејин васитәсилә һәгигәт бәлли олур вә һәр тәрәфә руһани ишыг сачыр.

9, 10. Јеһованын иззәтини әкс етдирмәк неҹә мүмкүндүр?

⁹ Һәгиги вә руһани ишығын Мәнбәјинә даир Павел јазырды: “Гаранлыгдан ишыг парлајаҹагдыр”, — дејән Аллаһ үрәкләримизи ишыгландырды ки, Иса Мәсиһин симасында Аллаһ иззәтини дәрк етмәк нуруна малик олаг” (2 Коринфлиләрә 4:6; Тәквин 1:2-5). Аллаһын хидмәтчиләри олмаг кими гијмәтли имкана малик олдуғумуз үчүн, ҝәлин өзүмүзү тәмиз сахлајаг ки, ајналар кими Јеһованын иззәтини әкс етдирәк.

¹⁰ Руһани зүлмәтдә олан инсанлар нә Јеһованын иззәтини, нә дә Онун иззәтинин Бөјүк Муса сајылан Иса Мәсиһдәки әксини ҝөрүрләр. Амма Јеһованын хидмәтчиләри кими биз, Мүгәддәс Јазылардакы иззәтли нуру гәбул едир вә ону башгаларына әкс етдиририк. Руһани зүлмәтдә јашајан инсанларын һәлакдан хилас олмалары үчүн, онлара Аллаһдан ҝәлән ишыг лазымдыр. Буна ҝөрә дә Јеһованын иззәти үчүн бөјүк севинҹлә вә сә’јлә биз Онун “гаранлыгдан ишыг парлајаҹагдыр” ҝөстәришинә риајәт едирик.

Гој сәнин нурун Мүгәддәс Китаб өјрәнмәләриндә парласын

11. Иса ишыға даир һансы нәсиһәти верди вә биз хидмәтимиздә бу нәсиһәтә неҹә риајәт едә биләрик?

¹¹ Иса өз давамчыларына демишдир: “Сиз дүнјанын нурусунуз. Дағын зирвәсиндә гурулан шәһәр ҝизли гала билмәз. Вә чыраг јандыраркән, ону габын алтына гојмазлар, амма чырагдана гојарлар ки, евдә оланларын һамысыны ишыгландырсын. Гој сизин нурунуз инсанларын гаршысында елә парласын ки, хејирхаһ ишләринизи ҝөрсүнләр вә Ҝөјләрдәки Атаныза һәмд етсинләр” (Матта 5:14-16). Бизим нүмунәви давранышымыз башгаларыны Аллаһа иззәт вермәјә тәшвиг едә биләр (1 Петер 2:12). Бизим мүждәчи ишимизин мүхтәлиф саһәләри сајәсиндә дә руһани ишығымызын парламасы үчүн чох имканларымыз вар. Башлыҹа мәгсәдләримиздән бири — Аллаһын Кәламындакы руһани ишығы, баҹарыгла Мүгәддәс Китаб өјрәнмәси кечирәркән әкс етдирмәкдир. Хидмәтимизи там шәкилдә иҹра етмәк истәјириксә, бу чох ваҹиб үсулдур. Һәгигәти ахтаран кәсләрин үрәјинә јол тапаҹаг дәрәҹәдә Мүгәддәс Китаб өјрәнмәси кечирмәкдә бизә нә көмәк едә биләр?

12. Дуа Мүгәддәс Китаб өјрәнмәси кечирмәклә неҹә бағлыдыр?

¹² Әҝәр Мүгәддәс Китаб өјрәнмәси кечирмәји үрәкдән арзу едириксә, бу барәдә Јеһоваја дуа едәҹәјик. Бу ҹүр дуалар һәм дә башгаларына Аллаһ һаггында билик әлдә етмәкдә көмәк етмәјин нә гәдәр ваҹиб олдуғуну баша дүшдүјүмүзү ҝөстәрир (Һезекиел 33:7-9). Јеһова дуаларымыза мүтләг ҹаваб верәҹәк вә хидмәтдәки виҹданлы сә’јләримизи хејир-дуаландыраҹаг (1 Јәһја 5:14, 15). Лакин биз јалныз Мүгәддәс Китаб өјрәнмәси кечирә биләҹәјимиз адамы тапа билмәјимиз барәсиндә дуа етмирик. Киминләсә Мүгәддәс Китаб өјрәнмәси кечирмәјә башлајаркән дуа едәҹәк вә мәһз һәмин адамын нәјә еһтијаҹы олдуғу барәдә дәриндән дүшүнәҹәјик — бу, һәр бир дәрси еффектли шәкилдә кечирмәјә көмәк едәҹәк (Ромалылара 12:12).

13. Мүгәддәс Китаб өјрәнмәләрини кејфијјәтли шәкилдә кечирмәкдә бизә нә көмәк едә биләр?

¹³ Мүгәддәс Китаб өјрәнмәсини еффектли шәкилдә кечирмәк үчүн, биз һәр өјрәнмәјә јахшы һазырлашмалыјыг. Әҝәр өзүмүзү там әмин һисс етмириксә, мәс’ул гардашларын һәр һәфтә јығынҹағын китабөјрәнмәсини неҹә кечирдикләринә диггәт јетирмәк фајдалы оларды. Еһтимал ки, вахташыры олараг, Мүгәддәс Китаб өјрәнмәсини јахшы кечирмәји баҹаран Падшаһлыг тәблиғчиләри илә хидмәтә чыха биләҹәјик. Шүбһәсиз ки, Иса Мәсиһин кејфијјәтләри вә мүәллимлик үсуллары хүсусилә диггәтәлајигдир.

14. Мүгәддәс Китабы өјрәнән инсанын үрәјинә јол тапмагда бизә нә көмәк едәр?

¹⁴ Иса сәмави Атасынын ирадәсини јеринә јетирмәји вә инсанларла Аллаһ һаггында данышмағы үрәкдән арзу едирди (Мәзмур 40:8). О, һәлим иди вә динләјиҹиләринин үрәјинә јол тапырды (Матта 11:28-30). Буна ҝөрә дә ҝәлин, Мүгәддәс Китабы өјрәнмәјә көмәк етдијимиз адамларын үрәјинә јол тапмаға чалышаг. Бунун үчүн һәр бир өјрәнмәјә, конкрет инсанын шәраитләри барәдә дүшүнәрәк разырлашмалыјыг. Мәсәлән, әҝәр онун мәдәнијјәтиндә Мүгәддәс Китаб нүфузлу китаб сајылмырса, биз, јәгин ки, ону һәгигәтин Мүгәддәс Китабда олдуғуна инандырмалыјыг. Һәм дә, еһтимал ки, биз Мүгәддәс Китабын даһа чох ајәләрини охумалы вә изаһ етмәли олаҹағыг.

Мүгәддәс Китабы өјрәнәнләрә мәсәлләри баша дүшмәкдә көмәк ет

15, 16. а) Мүгәддәс Китабы өјрәнән вә онда истифадә олунан нүмунәләрдән һансыныса баша дүшмәјән адама неҹә көмәк едә биләрик? б) Әдәбијјатларымыздан һансындаса Мүгәддәс Китабы өјрәнән адамын баша дүшмәдији нүмунә истифадә олунурса, нә етмәли?

¹⁵ Мүгәддәс Китабы өјрәнән адама Мүгәддәс Јазылардакы һансыса мәсәл таныш олмаја биләр. Мәсәлән, о, чырагдан үзәринә гојулан чыраг һаггында Исанын дедикләринин мә’насыны баша дүшмәјә биләр (Марк 4:21, 22). Иса, гәдимдә ишләнән, фитили олан вә јағла јанан чырагдан данышырды. Бу ҹүр чырағы хүсуси чырагдан үзәринә гојурдулар вә бунун да сајәсиндә евин бир һиссәси ишыгланырды. Исанын мәсәлини изаһ етмәк үчүн, еһтимал ки, әдәбијјатларымыздан әлавә мә’лумат ахтарыб тапмалы олаҹағыг. Лакин Мүгәддәс Китабы өјрәнән адамын јанына онун баша дүшәҹәји вә гијмәтләндирәҹәји изаһатла ҝәлмәк неҹә дә хошдур!

¹⁶ Мүгәддәс Китабы өјрәнмәк үчүн олан вәсаитләрдә истифадә олунан мәсәлләри баша дүшмәк бә’зән өјрәнән адам үчүн чәтин олур. Бу ҹүр мәсәли изаһ ет вә ја һәмин фикри ајдынлашдыран башга мәсәлдән истифадә ет. Фәрз едәк ки, әдәбијјатда мүвәффәгијјәтли никаһ үчүн јахшы һәјат јолдашынын олмасы вә јекдил сә’јләр ҝөстәрмәјин ваҹиблији вурғуланыр. Буну ајдынлашдырмаг үчүн, ҝимнастларла әлагәли нүмунә ҝәтирилир. Бу нүмунәдә һәрәкәт едән трапесијадан атылан ҝимнасты башга бир ҝимнаст тутур. Бу нүмунәнин әвәзинә, еһтимал ки, јешикләри бири-биринә өтүрәрәк ҝәмини бошалдан ишчиләрин нүмунәсини истифадә етмәк олар. Бу һалда да јахшы ортағын вә һәрәкәтләрин јекдил олмасы ваҹибдир.

17. Исанын мәсәлләрдән истифадә етмәк үсулундан биз нә өјрәнә биләрик?

¹⁷ Әлавә мәсәл сөјләмәк үчүн, еһтимал ки, габагҹадан һазырлашмаг лазымдыр. Лакин буну етмәклә Мүгәддәс Китабы өјрәнән адама шәхси марағымызы ҝөстәрмиш олуруг. Чәтин мәсәләләри баша салмаг үчүн, Иса садә мәсәлләрдән истифадә едирди. Буну онун Дағүстү тәблиғи сүбут едир вә Мүгәддәс Китаба әсасән, онун өјрәтмә габилијјәти динләјиҹиләри тәәҹҹүбләндирирди (Матта 5:1–7:29). Иса инсанларла дәриндән марагландығы үчүн һәр шеји сәбирлә изаһ едирди (Матта 16:5-12).

18. Әдәбијјатларымызда истифадә олунан Мүгәддәс Китаб ајәләринә даир һансы мәсләһәт верилир?

¹⁸ Инсанлара олан марағымыз, бизи Мүгәддәс Јазылар әсасында ‘онларла мүзакирә етмәјә’ тәшвиг едәҹәкдир (Һәвариләрин ишләри 17:2, 3, И–93). Бунун үчүн бизим өзүмүз “садиг... нөкәрбашы”нын тәгдим етдији нәшрләри дуа васитәсилә өјрәнмәли вә онлардан мүдрикликлә истифадә етмәлијик (Лука 12:42-44). Мәсәлән, “Әбәди һәјата апаран билик” китабында чохлу Мүгәддәс Китаб ајәләри варa. Јерә гәнаәт етмәк мәгсәдилә онлардан бә’зиләринә садәҹә истинад едилир. Мүгәддәс Китаб өјрәнмәси заманы бу ајәләрдән һеч олмаса һансыныса охумаг вә изаһ етмәк ҝәрәкдир, ахы бизим вердијимиз тә’лим чох тә’сирли олан Аллаһын Кәламына әсасланыр (Ибраниләрә 4:12). Һәр бир өјрәнмә заманы абзасларда олан ајәләри сәрбәст сурәтдә истифадә едәрәк Мүгәддәс Китаба мүраҹиәт ет. Мүәјјән суал вә ја мүәјјән һәрәкәт тәрзи барәдә Мүгәддәс Китабда нә дејилдијини ҝөрмәкдә өјрәнән адама көмәк ет. Аллаһа гулаг асмағын нә гәдәр фајдалы олдуғуну она ҝөстәрмәјә чалыш (Ишаја 48:17, 18).

Дүшүнмәјә тәшвиг едән суаллар вер

19, 20. а) Мүгәддәс Китаб өјрәнмәси заманы нөгтеји-нәзәрә әсасланан суаллардан истифадә етмәк нәјә ҝөрә лазымдыр? б) Әҝәр һансыса суал даһа дәриндән нәзәрдән кечирилмәји тәләб едирсә, нә етмәли?

¹⁹ Иса мәһарәтлә истифадә етдији суалларын көмәји илә инсанлара мүлаһизә јүрүтмәкдә көмәк едирди (Матта 17:24-27). Әҝәр биз Мүгәддәс Китабы өјрәнән адамы чыхылмаз вәзијјәтдә гојмајан нөгтеји-нәзәрә әсасланан суаллар веририксә, ҹаваблардан һәмин адамын бу вә ја диҝәр мәсәләјә даир нә дүшүндүјүнү өјрәнә биләрик. Еһтимал ки, онун һәлә дә Мүгәддәс Китаба әсасланмајан бахышлара малик олдуғуну, мәсәлән, Үч үгнума инандығыны ҝөрә биләрик. “Билик” китабынын 3-ҹү фәслиндә дејилир ки, “Үч үгнум” сөзү Мүгәддәс Китабда истифадә олунмур. Һәмин китабда Јеһованын Исадан фәргләндијини вә мүгәддәс руһун шәхсијјәт дејил, Јеһованын фәал гүввәси олдуғуну ҝөстәрән Мүгәддәс Јазыларын ајәләри ҝөстәрилир. Ола биләр ки, Мүгәддәс Китабын бу ајәләрини јалныз охумаг вә мүзакирә етмәк кифајәт едәҹәкдир. Бәс даһа чох шеј тәләб олунса неҹә? Белә һалда нөвбәти дәфә өјрәнмәдән сонра, бу мөвзуну Јеһованын Шаһидләринин башга бир нәшринин мәсәлән, “Үч үгнума инанмаға дәјәрми?” (рус.) адлы брошүрасынын көмәји илә фајдалы сурәтдә мүзакирә етмәк үчүн мүәјјән вахт ајырмаг олар. Бундан сонра “Билик” китабынын көмәји илә өјрәнмәни давам етдирмәк олар.

²⁰ Өјрәнән адамын мүәјјән нөгтеји-нәзәрә даир суала вердији ҹавабын бизи тәәҹҹүбләндирәҹәјини вә ја һәтта наүмид едәҹәјини ҝүман етмәк олар. Әҝәр сөһбәт сигарет чәкмәкдән вә ја һәр һансы инҹә мәтләбдән ҝедирсә, биз дәрси давам етдирмәји, бу мөвзунун мүзакирәсини исә бир гәдәр сонраја сахламағы тәклиф едә биләрик. Өјрәнән адамын һәлә дә сигарет чәкдијини биләрәк, әдәбијјатларымызда она руһани наилијјәтләр етмәјә көмәк едә биләҹәк мә’луматлар ахтара биләрик. Өјрәнән адамын үрәјинә јол тапмаға сә’ј ҝөстәрәрәк дуа едәҹәјик ки, Јеһова һәмин адамын руһән инкишаф етмәсинә көмәк етсин.

21. Мүәллимлик габилијјәтләримизи Мүгәддәс Китабы өјрәнән адамын хүсусијјәтләринә ујғунлашдырырыгса, һансы нәтиҹәләр әлдә олуна биләр?

²¹ Әҝәр биз јахшы һазырлашыр вә Јеһованын көмәјиндән истифадә едириксә, шүбһәсиз ки, мүәллимлик габилијјәтләримизи Мүгәддәс Китабы өјрәнән адамын хүсусијјәтләринә ујғунлашдыра биләҹәјик. Вахт өтдүкҹә биз, еһтимал ки, һәмин адама Аллаһа дәрин мәһәббәт һиссини инкишаф етдирмәкдә көмәк едә биләҹәјик. Һәм дә һәмин адама, Јеһованын тәшкилатына һөрмәтлә јанашмағы вә ону гијмәтләндирмәји өјрәтмәк истәјирик. Мүгәддәс Китабы өјрәнән адамын “Аллаһ һәгигәтән араныздадыр” дејә е’тираф етмәси неҹә дә хошдур! (1 Коринфлиләрә 14:24, 25). Буна ҝөрә дә ҝәлин Мүгәддәс Китаб өјрәнмәләрини баҹарыгла кечирәк вә инсанлара Исанын шаҝирдләри олмагда көмәк етмәк үчүн әлимиздән ҝәләни едәк.

Гијмәтләндирилмәли сәрвәт

22, 23. Хидмәтимизи там шәкилдә иҹра етмәк үчүн бизә нә лазымдыр?

²² Хидмәтимизи там шәкилдә иҹра етмәк үчүн, биз Аллаһын ҝүҹүнә бел бағламалыјыг. Һәвари Павел һәмиманлыларына, мәсһ едилмиш мәсиһчиләрә, хидмәтә даир бунлары јазырды: “Бу сәрвәти сахсы габларда сахлајырыг ки, ән үстүн гүдрәт бизә јох, Аллаһа аид олсун” (2 Коринфлиләрә 4:7).

²³ Бизим һамымыз — һәм мәсһ едилмишләр, һәм дә “башга гојунлар” — тезсынан сахсы габа бәнзәјирик (Јәһја 10:16). Амма Јеһова бизә һеч бир чәтинлијә бахмајараг, хидмәтдәки тапшырыгларымызы јеринә јетирмәк үчүн лазым олан гүввәни верә биләр (Јәһја 16:13; Филипилиләрә 4:13). Буна ҝөрә дә ҝәлин бүтүнлүклә Јеһоваја бел бағлајаг, мүждәчи сәрвәтини гијмәтләндирәк вә хидмәтимизи там шәкилдә иҹра едәк.

[Һашијәләр]

Јеһованын Шаһидләри тәрәфиндән дәрҹ олунмушдур.

Неҹә ҹаваб верәрдиниз?

• Ағсаггаллар өз хидмәтләрини там шәкилдә неҹә иҹра едә биләрләр?

• Мүгәддәс Китаб өјрәнмәләри кечирмәјин кејфијјәтини неҹә јахшылашдыра биләрик?

• Мүгәддәс Китабы өјрәнән адам бир мәсәли баша дүшмүрсә вә ја она һансыса суала даир әлавә мә’лумат лазымдырса, неҹә давранмаг ҝәрәкдир?

[14-ҹү сәһифәдәки шәкил]

Мәсиһчи ағсаггаллары јығынҹагда тә’лим верир вә һәмиманлыларына тәблиғ ишини өјрәдирләр.

[16-ҹы сәһифәдәки шәкил]

Нурумузун парламасына јол вермәјин үсулларындан бири — Мүгәддәс Китаб өјрәнмәсини баҹарыгла кечирмәкдир.