Јеһованын мүгәддәс руһуну кәдәрләндирмәјин
«Аллаһын Мүгәддәс Руһуну кәдәрләндирмәјин. ...О Руһла мөһүрләндиниз» (ЕФЕС. 4:30).
1. Јеһова милјонларла инсан үчүн һансы тәдбири ҝөрүб вә онлар нә етмәјә борҹлудурлар?
ЈЕҺОВА бу нараһат дүнјада јашајан милјонларла инсан үчүн хүсуси бир тәдбир ҝөрүб. О, јеҝанә Оғлу Иса Мәсиһин васитәсилә инсанларын Өзүнә јахынлашмасыны мүмкүн едиб (Јәһ. 6:44). Әҝәр сән Аллаһа һәср олунуб вә она мүвафиг һәјат тәрзи сүрүрсәнсә, бу, сәнин үчүн дә мүмкүн олуб. Мүгәддәс руһун исми илә вәфтиз олундуғун үчүн она ујғун јашамаг сәнин борҹундур (Мат. 28:19, И—93).
2. Биз һансы суаллары нәзәрдән кечирәҹәјик?
2 «Руһ үчүн әкән» бизләр јени мәнлији ҝејинирик (Галат. 6:8; Ефес. 4:17—24). Лакин һәвари Павел бизә мәсләһәт вә хәбәрдарлыг едир ки, Аллаһын мүгәддәс руһуну кәдәрләндирмәјәк. (Ефеслиләрә 4:25—32 ајәләрини оху.) Ҝәлин һәваринин бу мәсләһәтини диггәтлә нәзәрдән кечирәк. «Аллаһын... Руһуну кәдәрләндирмәјин» дедикдә Павел нәји нәзәрдә тутурду? Јеһоваја һәср олунмуш инсан Онун руһуну неҹә кәдәрләндирә биләр? Вә биз бундан неҹә гачына биләрик?
Павел нәји нәзәрдә тутурду?
3. Ефеслиләрә 4:30 ајәсиндә јазылан сөзләрин мәнасыны неҹә изаһ едәрдиниз?
3 Илк нөвбәдә, Павелин Ефеслиләрә 4:30 ајәсиндә јаздығы сөзләрә диггәт јетирәк: «Аллаһын Мүгәддәс Руһуну кәдәрләндирмәјин. Хилас ҝүнү үчүн [«фидјә васитәсилә», ЈД] о Руһла мөһүрләндиниз». Павел әзиз һәмиманлыларынын руһаниликләрини тәһлүкә алтына атмаларыны истәмирди. Онлар хилас ҝүнү үчүн фидјә васитәсилә Јеһованын руһу илә мөһүрләнмишдиләр. Кечмишдә олдуғу кими, инди дә Аллаһын мүгәддәс руһу нөгсансызлыгларыны горујан мәсһ олунмушларын мөһүрү вә ја ‘ҝәләҹәкдә алаҹаглары мүкафатын зәманәтидир’ (2 Кор. 1:22, ЈД). Мөһүр онларын Аллаһын мүлкү олдуғуну вә ҝөјләр һәјатыны алаҹагларыны ҝөстәрир. Мөһүрләнәнләрин сајы 144 000 нәфәрдир (Вәһј 7:2—4).
4. Аллаһын руһуну кәдәрләндирмәкдән гачынмаг нә үчүн ваҹибдир?
4 Мәсиһчинин онун һәјатына тәсир едән Аллаһын руһуну кәдәрләндирмәси ондан тамамилә мәһрум олмасына ҝәтириб чыхаран илк аддымдыр. Бунун мүмкүн олдуғу Давудун Бат-Шева илә ҝүнаһ ишләтдикдән сонра дедији сөзләрдән ҝөрүнүр. Давуд төвбә едәрәк Јеһоваја јалварды: «Мәни Өз һүзурундан атма, Мүгәддәс Руһуну мәндән ҝөтүрмә» (Мәз. 51:11). Јалныз «өлүм баһасына да олса садиг гал»ан мәсһ олунмушлар ҝөјләрдә өлмәз һәјат «таҹыны» алаҹаглар (Вәһј 2:10; 1 Кор. 15:53). Јер үзүндә јашамаг үмиди олан мәсиһчиләр Аллаһ гаршысында нөгсансызлыгларыны горумаг вә Мәсиһин фидјә гурбанлығына иман сајәсиндә верилән һәјат әнамыны алмаг истәјирләрсә, онларын да мүгәддәс руһа еһтијаҹлары вар (Јәһ. 3:36; Ром. 5:8; 6:23). Буна ҝөрә дә, һәр биримиз Јеһованын мүгәддәс руһуну кәдәрләндирмәкдән гачынмалыјыг.
Неҹә ола биләр ки, мәсиһчи Аллаһын руһуну кәдәрләндирсин?
5, 6. Неҹә ола биләр ки, мәсиһчи Аллаһын руһуну кәдәрләндирсин?
5 Аллаһын һәср олунмуш хидмәтчиләри олан бизләр руһу кәдәрләндирмәкдән гачына биләрик. Бунун үчүн биз даима ‘Руһа ҝөрә јашамалы, Руһа ҝөрә дә рәфтар етмәлијик’, чүнки онда пис ҹисмани арзулар бизә үстүн ҝәлмәјәҹәк вә биз пис хүсусијјәтләр тәзаһүр етдирмәјәҹәјик (Галат. 5:16, 25, 26). Анҹаг Аллаһын руһунун тәсири алтында јазылмыш Мүгәддәс Китабда мүһакимә олунан давраныш тәрзини, ола билсин, өзүмүз дә билмәдән јаваш-јаваш мәнимсәјәк, белә олан һалда Онун руһуну кәдәрләндирә биләрик.
6 Әҝәр мүгәддәс руһун рәһбәрлијинә әкс ҝетмәјә давам едириксә, онда биз руһу вә онун Мәнбәји олан Јеһованы кәдәрләндиририк. Ефеслиләрә 4:25—32 ајәләрини арашдырмағын сајәсиндә давранышымызын неҹә олдуғуну ҝөрәҹәјик; вә бу, бизи Аллаһын руһуну кәдәрләндирмәкдән горујаҹаг.
Руһу кәдәрләндирмәкдән неҹә гачынмаг олар?
7, 8. Нәјә ҝөрә биз дүрүст вә етибарлы олмалыјыг? Изаһ един.
7 Һәмишә дүзүнү данышмалыјыг. Ефеслиләрә 4:25 ајәсиндә Павел јазыр: «Јаланы кәнара атын, һәр бириниз өз гоншусуна һәгигәти сөјләсин; чүнки һамымыз ејни бәдәнин үзвләријик [«вә бир-биримизә мәхсусуг», ЈД]». ‘Ејни бәдәнин үзвләри’ олдуғумуздан биз, әлбәттә ки, һәмиманлыларымызы һијләҝәрҹәсинә вә гәсдән алдатмаға чалышмајаҹағыг, чүнки бу, јалан сатмаға бәрабәрдир. Инадкарлыгла бу ҹүр давранмаға давам едән һәр кәс Аллаһла мүнасибәтләрини итирәҹәк. (Сүлејманын мәсәлләри 6:16, 17 ајәләрини оху.)
8 Сөз вә һәрәкәтләрлә башгаларыны алдатмаг јығынҹагдакы бирлији поза биләр. Буна ҝөрә дә биз Даниел пејғәмбәр кими дүрүст вә етибарлы олмалыјыг — онда һеч ким һеч бир тәгсир тапа билмәмишди (Дан. 6:4). Биз Павелин ҝөјләр үмидинә малик олан мәсиһчиләрә ‘Мәсиһин бәдәнинин’ һәр бир үзвүнүн диҝәринә мәнсуб олдуғуна вә Исанын етибарлы мәсһ олунмуш давамчылары илә бирлији горујуб сахламалы олдуғуна даир вердији нәсиһәти унутмамалыјыг (Ефес. 4:11, 12). Әҝәр биз јерүзү Ҹәннәтдә әбәди јашамаг үмидинә маликиксә, биз дә һәгигәти сөјләмәлијик, бунунла өз тәрәфимиздән үмумдүнја гардашлыг бирлијини горумуш оларыг.
9. Ефеслиләрә 4:26, 27 ајәләринә риајәт етмәк нәјә ҝөрә ваҹибдир?
9 Биз Иблисә мүгавимәт ҝөстәрмәли вә онун бизә руһани зәрәр вурмасына јол вермәмәлијик (Јаг. 4:7). Мүгәддәс руһ бизә Шејтана мүгавимәт ҝөстәрмәјә көмәк едир. Мәсәлән, биз өзүмүзү гаршысыалынмаз гәзәбдән ҝөзләмәлијик. Павел јазыр: «Гәзәбләнәндә ҝүнаһ ишләмәјин; гој сиз гәзәбләниркән ҝүнәш батмасын, вә иблисә јер вермәјин» (Ефес. 4:26, 27). Әҝәр һаглы олараг гәзәбләнмишиксә, дәрһал үрәјимиздә дуа етмәк Аллаһын руһуну кәдәрләндирәҹәк һәрәкәт етмәк әвәзинә, өзүмүзә һаким олараг ‘һәлимлик руһуну’ горујуб сахламаға көмәк едәҹәк (Сүл. мәс. 17:27). Буна ҝөрә ҝәлин гәзәбимизи ҹиловлајаг ки, Шејтан фүрсәтдән истифадә едиб бизи пислијә сүрүкләмәсин (Мәз. 37:8, 9). Шејтана мүгавимәт ҝөстәрмәјин үсулларындан бири мүбаһисәни тез вә Исанын мәсләһәтинә ујғун һәлл етмәкдир (Мат. 5:23, 24; 18:15—17).
10, 11. Нәјә ҝөрә биз оғурлуға вә ја надүрүстлүјә јол вермәмәлијик?
10 Биз оғурлуға вә ја надүрүстлүјә јол вермәмәлијик. Павел оғурлуг барәдә јазыр: «Оғурлуг едән артыг оғурламасын; әксинә, өз әлләринин әмәји илә јахшы иш ҝөрсүн ки, еһтијаҹы оланларла бөлүшдүрмәјә бир шеји олсун» (Ефес. 4:28). Әҝәр һәср олунмуш мәсиһчи оғурлуг едәрсә, Аллаһы рүсвај едәрәк Онун ‘адыны ләкәләјәр’ (Сүл. мәс. 30:7—9). Касыбчылыг белә оғурлуға һагг газандырмыр. Аллаһы вә инсанлары севәнләр дәрк едирләр ки, оғурлуға һеч вахт бәраәт јохдур (Марк 12:28—31).
11 Павел тәкҹә нәји етмәмәли олдуғумузу јох, һәм дә нәји етмәли олдуғумузу дејир. Әҝәр биз мүгәддәс руһа ҝөрә һәрәкәт едир вә јашајырыгса, аиләмизин тәләбатларыны өдәмәк үчүн, үстәлик, ‘еһтијаҹы оланларла бөлүшмәјә бир шејимиз олсун’ дејә сәјлә ишләјәҹәјик (1 Тим. 5:8). Иса вә онун һәвариләри касыблара көмәк етмәк үчүн һәмишә гыраға пул гојурдулар, лакин Исаны әлә верән Јәһуда Искарјот һәмин пуллардан оғурлајырды (Јәһ. 12:4—6). Ајдындыр ки, о, руһа ҝөрә һәрәкәт етмирди. Аллаһын руһуна ҝөрә һәрәкәт едән бизләр, Павел кими, «һәр ҹәһәтҹә өзүмүзү јахшы апармаға ҹан атырыг» (Ибр. 13:18). Белә етмәклә биз Јеһованын мүгәддәс руһуну кәдәрләндирмәјәҹәјик.
Руһу кәдәрләндирмәмәк үчүн даһа нә етмәк лазымдыр?
12, 13. а) Ефеслиләрә 4:29 ајәсинин ҝөстәрдији кими, биз һансы данышыға јол вермәмәлијик? б) Данышығымыз неҹә олмалыдыр?
12 Данышығымыза фикир вермәлијик. Павел дејир: «Ағзыныздан һеч бир чүрүк сөз чыхмасын, анҹаг еһтијаҹа ҝөрә, руһи инкишаф үчүн јахшы сөз сөјләјин ки, сизи динләјәнләрә немәт версин» (Ефес. 4:29). Јенә дә һәвари Павел бизә јалныз нәји етмәмәли олдуғумузу јох, һәмчинин нәји етмәли олдуғумузу да дејир. Аллаһын руһунун тәсири алтында биз ‘руһи инкишаф үчүн јахшы сөз сөјләјәҹәјик ки, бизи динләјәнләрә немәт версин’. Үстәлик, ағзымыздан һеч бир «чүрүк сөз» чыхмамалыдыр. «Чүрүк» кими тәрҹүмә олунан јунан сөзү чүрүк мејвәјә, ијләнмиш балыға вә ја әтә аид едилир. Бу ҹүр јемәкләрдән диксиндијимиз кими, ејнилә, Јеһованын налајиг һесаб етдији данышыға да нифрәт едирик.
13 Данышығымыз әдәбли, мүлајим вә «дуз гатылмыш» олмалыдыр (Колос. 3:8—10; 4:6). Бизи ешидәнләр башга инсанлардан фәргләндијимизи ҝөрмәлидирләр. Буна ҝөрә дә ҝәлин һәмишә ‘руһи инкишаф үчүн јахшы сөз сөјләјәк’ вә мәзмурчунун сөзләринә шәрик олаг. О охујурду: «Ағзымдан чыхан сөзләр, гәлбимдәки дүшүнҹәләр һүзурунда гәбул олунсун. Ја Рәбб, мәним Гајам вә Сатыналанымсан!» (Мәз. 19:14).
14. Ефеслиләрә 4:30, 31 ајәләринә әсасән, биз нәдән узаг олмалыјыг?
14 Кин, гәзәб, тәһгирамиз данышыг вә һәр нөв пислији өзүмүздән кәсиб атмалыјыг. Аллаһын руһуну кәдәрләндирмәмәјә даир хәбәрдарлыг сөјләдикдән сонра Павел јазыр: «Гој һәр ҹүр кин, һиддәт, гәзәб, чығырты, күфр, һәр нөв пис нијјәтлә бәрабәр сиздән узаг олсун» (Ефес. 4:30, 31). Гејри-камил олдуғумуздан һәр биримиз фикир вә һәрәкәтләримизә нәзарәт етмәк үчүн сәјлә чалышмалыјыг. Әҝәр биз кин, һиддәт вә гәзәбә јол версәк, Аллаһын руһуну кәдәрләндирмиш олардыг. Бизә гаршы едилән писликләрин һесабыны апаранда, һәмишә күсәндә вә хәтримизә дәјән инсанла барышмаг истәмәјәндә дә Аллаһын руһуну кәдәрләндиририк. Әҝәр Мүгәддәс Китаб мәсләһәтләрини гулагардына вурмаға башлајырыгса, биздә мүгәддәс руһа гаршы ҝүнаһ ишләтмәјә ҝәтириб чыхаран хүсусијјәтләрин јаранма еһтималы вар, бунун нәтиҹәси исә чох аҹынаҹаглы ола биләр.
15. Әҝәр кимсә хәтримизә дәјибсә, биз нә етмәлијик?
15 Лүтфкар вә шәфгәтли олмағы, еләҹә дә бағышламағы баҹармалыјыг. Павел јазыр: «Бир-биринизә гаршы лүтфкар, шәфгәтли олун вә Аллаһ Мәсиһдә сизи бағышладығы кими, сиз дә бир-биринизи бағышлајын» (Ефес. 4:32). Әҝәр кимсә бәрк хәтримизә дәјибсә, ҝәлин Аллаһы тәглид едәрәк ону бағышлајаг (Лука 11:4). Туталым, һәмиманлымыз һаггымызда хошаҝәлмәз шејләр данышыб. Мәсәләјә ајдынлыг ҝәтирмәк үчүн биз она јахынлашырыг. О, сәмими олараг сәһвини етираф едир вә үзр истәјир, биз дә ону бағышлајырыг. Лакин Левилиләр 19:18 ајәсинә әсасән, биздән даһа бир шеј тәләб олунур: «Өз халгындан һеч кәсдән гисас алма, һеч кимә гаршы кин сахлама. Анҹаг гоншуну өзүн кими сев. Рәбб Мәнәм».
Ајыг-сајыг олун
16. Јеһованын руһуну кәдәрләндирмәмәк үчүн бәзән өзүмүздә дәјишикликләр етмәли олдуғумуза даир нүмунә ҝәтирин.
16 Тәкликдә оланда белә ширникдириҹи вәзијјәт јарана биләр вә биз Аллаһа мәгбул олмајан иш ҝөрә биләрик. Туталым, гардаш мәсиһчијә мүнасиб олмајан мусигијә гулаг асыр. «Садиг вә ағыллы гул»ун нәшрләри васитәсилә верилән Мүгәддәс Китаб мәсләһәтләринә мәһәл гојмадығы үчүн виҹданы ону нараһат етмәјә башлајыр (Мат. 24:45). Ола билсин, о, бу проблем барәдә дуа едир вә Павелин Ефеслиләрә 4:30 ајәсиндәки сөзләр јадына дүшүр. Аллаһын руһуну кәдәрләндирәҹәк һеч бир шеј етмәмәк әзминдә олан гардаш даһа белә мусигијә гулаг асмамаг гәрарына ҝәлир. Әлбәттә, Јеһова онун гәрарына хејир-дуа верәҹәк. Буна ҝөрә дә ҝәлин Аллаһын руһуну кәдәрләндирмәкдән һәмишә өзүмүзү ҝөзләјәк.
17. Әҝәр сајыглығымызы итирсәк вә дуа етмәсәк, нә баш верә биләр?
17 Әҝәр сајыглығымызы итирсәк вә дуа етмәсәк, Аллаһын руһуну кәдәрләндирән натәмиз вә ја пис шејләрин тәсири алтына дүшә биләрик. Мүгәддәс руһ Јеһованын ирадәсини јеринә јетирдији үчүн ону кәдәрләндирмәк Јеһованы кәдәрләндирмәјә бәрабәрдир. Әлбәттә, биз буну етмәк истәмәздик (Ефес. 4:30). Биринҹи әсрин јәһуди дин хадимләри Исанын мөҹүзәләрини Шејтана аид етмәклә ҝүнаһа батырдылар. (Марк 3:22—30 ајәләрини оху.) Мәсиһә дүшмән кәсилән бу адамлар ‘Мүгәддәс Руһа күфр едирдиләр’ вә онларын бу һәрәкәти бағышланмаз ҝүнаһ иди. Гој бизим агибәтимиз һеч вахт онларын агибәти кими олмасын!
18. Бағышланмаз ҝүнаһ етмәдијимизи неҹә мүәјјән едә биләрик?
18 Әҝәр биз бағышланмаз ҝүнаһа доғру бир аддым белә атмаг истәмириксә, Павелин руһу кәдәрләндирмәмәк барәдә дедикләрини јадда сахламалыјыг. Амма әҝәр ҹидди ҝүнаһ ишләтмишиксә, онда неҹә? Төвбә едиб ағсаггаллардан көмәк алмышыгса, Аллаһын бизи бағышладығы вә мүгәддәс руһа гаршы һеч бир ҝүнаһ етмәдијимиз гәнаәтинә ҝәлә биләрик. Аллаһын көмәји илә биз Онун руһуну бир даһа кәдәрләндирмәкдән гачына биләрик.
19, 20. а) Гачынмалы олдуғумуз бәзи шејләр һансылардыр? б) Биз нәји етмәјә гәти гәрарлы олмалыјыг?
19 Аллаһ мүгәддәс руһунун көмәји илә Өз халгы арасында мәһәббәт, севинҹ вә бирлик һасил едир (Мәз. 133:1—3). Буна ҝөрә дә биз деди-годулара баш гошмамалы вә руһла тәјин олунмуш нәзарәтчиләри һөрмәтдән салан шејләр данышмамалыјыг ки, Аллаһын руһуну кәдәрләндирмәјәк (Һәв. иш. 20:28; Јәһуда 8). Әксинә, биз јығынҹагда һөкм сүрән бирлијә өз төһфәмизи вермәли вә бир-биримизә һөрмәтлә јанашмалыјыг. Јығынҹагда груплашмаларын јаранмасында иштирак етмәмәлијик. Павел јазыр: «Иса Мәсиһин ады илә, еј гардашларым, сизә јалварырам ки, һамыныз ејни дүшүнҹәдә олун вә аранызда ајрылыг олмасын вә сиз бир фикирдә вә ејни рәјдә бирләшәсиниз» (1 Кор. 1:10).
20 Јеһова Онун руһуну кәдәрләндирмәјимизи истәмир вә бунун үчүн бизә көмәк едир. Ҝәлин һәмишә Аллаһдан мүгәддәс руһ диләјәк вә ону кәдәрләндирмәмәјә гәти гәрарлы олаг. Ҝәлин инди вә әбәдијјән мүгәддәс руһун рәһбәрлијини сәјлә ахтарараг ‘руһ үчүн әкмәјә’ давам едәк!
Неҹә ҹаваб верәрдиниз?
• Аллаһын руһуну кәдәрләндирмәк нә демәкдир?
• Неҹә ола биләр ки, Јеһоваја һәср олунмуш инсан Онун руһуну кәдәрләндирсин?
• Мүгәддәс руһу кәдәрләндирмәкдән неҹә гачынмаг олар?
[30-ҹу сәһифәдәки шәкил]
Мүбаһисәләри тез һәлл един
[31-ҹи сәһифәдәки шәкил]
Сәнин данышығын даһа чох һансы мејвәјә бәнзәјир?