Валидејнләр, аиләнизин тәләбатларынын гејдинә галын
«Ким өз јахынларынын... гејдинә галмырса, о, иманы инкар етмишдир» (1 ТИМОТЕЈӘ 5:8).
1, 2. а) Мәсиһчи ҝөрүшләриндә аиләләри ҝөрмәк бизи нә үчүн руһландырыр? б) Јығынҹаг ҝөрүшләринә вахтында ҝәлмәк үчүн аиләләр һансы чәтинликләрлә үзләширләр?
МӘСИҺЧИ јығынҹағында ҝөрүш башламаздан әввәл әтрафымыза нәзәр салсаг, валидејнләринин јанында отуран сәлигәли вә јахшы ҝејинмиш ушаглары ҝөрә биләрик. Мәҝәр бу ҹүр аиләләрин Јеһованы вә бир-бирләрини севдијини ҝөрмәк хош дејилми? Амма унутмајаг ки, ушагларла бәрабәр јығынҹаг ҝөрүшләринә вахтында ҝәлмәк үчүн валидејнләрдән чохлу сә’ј тәләб олунур.
2 Валидејнләрин әксәријјәтинин башы бүтүн ҝүнү гарышыг олур, јығынҹаг ҝөрүшләри олан ахшамлар исә евин иши лап ашыб дашыр. Јемәк биширмәк, ев ишләрини ҝөрмәк, ев тапшырыгларыны һазырламаг лазымдыр. Әсас јүк дә валидејнләрин үзәринә дүшүр. Онлар диггәт јетирмәлидирләр ки, һамы тәмиз, тох вә евдән вахтында чыхмаға һазыр олсун. Әлбәттә, ушаглар мәһз ҝөзләмәдијимиз бир анда бизә сүрприз едә биләрләр. Бөјүк ушаг ојнајаркән шалварыны ҹырыр, балаҹа јемәк јејәндә үстүнү батырыр. Һәлә ушагларын далашмағыны демирик (Сүлејманын мәсәлләри 22:15). Бунларын нәтиҹәси нә олур? Валидејнләр һәр шеји јахшы планлашдырсалар да, вәзијјәт чох заман тамамилә башга ҹүр ола биләр. Буна бахмајараг, аилә Падшаһлыг Залына, демәк олар ки, һәмишә ҝөрүш башламаздан хејли габаг ҝәлиб чатыр. Белә аиләләри илләр бојунҹа һәр һәфтә јығынҹагда ҝөрмәк вә ушагларын бөјүјәрәк Јеһова Аллаһа хидмәт етдикләринин шаһиди олмаг бизи неҹә дә руһландырыр!
3. Јеһованын аиләләри јүксәк гијмәтләндирдијини һарадан билирик?
3 Бәли, валидејн олмаг асан дејил. Амма бу нә гәдәр үзүҹү олса да, сиз валидејнләр әмин ола биләрсиниз ки, Јеһова ҝөстәрдијиниз сә’ји јүксәк гијмәтләндирир. Аилә гурулушунун тәмәлини Јеһова Аллаһ Өзү гојуб. Онун Кәламы олан Мүгәддәс Китабда дејилир ки, һәр аилә өз адына, јә’ни мөвҹудлуғуна ҝөрә Јеһоваја борҹлудур (Ефеслиләрә 3:14, 15). Демәли, валидејнләр өз вәзифәләрини дүзҝүн тәрздә јеринә јетирмәјә чалышанда каинатын Һөкмдарыны иззәтләндирирләр (1 Коринфлиләрә 10:31). Мәҝәр бу бөјүк шәрәф дејилми?! Буна ҝөрә дә Јеһованын валидејнләрә вердији бу тапшырыға диггәт јетирмәк јахшы оларды. Бу мәгаләдә биз аиләнин тәләбатларыны тә’мин етмәјин јоллары һаггында данышаҹағыг. Ҝәлин ҝөрәк һансы үч саһәдә Аллаһ валидејнләрдән аиләләринин гејдинә галмаларыны ҝөзләјир.
Мадди тәләбатларын тә’мин едилмәси
4. Аиләдә ушагларын тәләбатларыны тә’мин етмәк үчүн Јеһова һансы тәдбири ҝөрүб?
4 Һәвари Павел јазырды: «Ким өз јахынларынын, хүсусән аилә үзвләринин гејдинә галмырса, о, иманы инкар етмиш вә имансыздан да бетәрдир» (1 Тимотејә 5:8). Павел бурада кими нәзәрдә тутурду? Адәтән аиләнин башчысы олан аталары. Аллаһ гадына да ваҹиб бир вәзифә вериб: о, әрин көмәкчисидир (Јарадылыш 2:18). Мүгәддәс Китаб јазылан дөврләрдә гадынлар аиләләринин гејдинә галмагда әрләринә көмәк едирдиләр (Сүлејманын мәсәлләри 31:13, 14, 16). Әлбәттә, аиләдә һәр ики валидејнин олмасыны вә аиләјә атанын башчылыг етмәсини һамы арзу едир. Амма тәәссүфләр олсун ки, бу ҝүн натамам аиләләрә әввәлкиндән даһа тез-тез раст ҝәлмәк олурa. Лакин гејд етмәк лазымдыр ки, ушагларыны тәк бөјүдән мәсиһчи валидејнләр дә аиләләринин гејдинә чох ҝөзәл галырлар.
5, 6. а) Аиләсинин мадди тәләбатларынын гејдинә галан валидејн һансы чәтинликләрлә үзләшир? б) Мәсиһчиләр дүнјәви ишә дүзҝүн мүнасибәт бәсләмәклә чәтинликләрин өһдәсиндән неҹә ҝәлә биләрләр?
5 Павел 1 Тимотејә 5:8 ајәсиндә аиләни һансы ҹәһәтдән тә’мин етмәк һаггында данышырды? Контекстдән ајдын олур ки, о, аиләнин мадди еһтијаҹларыны тә’мин етмәји нәзәрдә тутурду. Бу ҝүн аилә башчылары аиләләрини мадди ҹәһәтдән тә’мин етмәк үчүн бир чох чәтинликләрлә гаршылашырлар. Ишсизлијин артмасы, иш јериндә ихтисара дүшмәк вә баһачылыг кими игтисади чәтинликләр дүнјанын бүтүн өлкәләриндә ҝениш јајылыб. Бу ҹүр чәтинликләрин өһдәсиндән ҝәлмәкдә валидејнләрә нә көмәк едә биләр?
6 Аиләни тә’мин едән валидејн Јеһованын она ваҹиб бир иш тапшырдығыны јахшы јадында сахламалыдыр. Павелин илһамланмыш сөзләриндән ҝөрүнүр ки, бу әмрә риајәт етмәји баҹаран, амма буну етмәкдән бојун гачыран киши ‘иманы инкар етмиш’ адамла бирдир. Мәсиһчи белә бир инсан олмамаг үчүн әлиндән ҝәләни едәҹәк. Тәәссүфләр олсун ки, бу ҝүн бир чох инсанлар өз јахынларына гаршы ‘шәфгәтсиздирләр’ (2 Тимотејә 3:1, 3). Сајсыз-һесабсыз аилә башчылары өз аталыг борҹларыны јеринә јетирмәкдән бојун гачырараг ән чәтин анда аиләләрини тәрк едирләр. Амма мәсиһчи әрләр аиләләринин гејдинә галмаға бу ҹүр дашүрәклә вә башдансовма јанашмырлар. Онлар зәһмәтә бу дүнјанын нөгтеји-нәзәри илә бахмырлар. Ишләринин сајәсиндә һәм аиләләринин гејдинә галыр, һәм дә Јеһова Аллаһын үрәјини севиндирирләр. Бу сәбәбдән, ҝөрдүкләри аз престижли ишә ләјагәтләрини тапдалајан бир шеј кими бахмырлар.
7. Валидејнләр нә үчүн Исанын нүмунәсинин үзәриндә дүшүнмәлидирләр?
7 Аилә башчылары Исанын мүкәммәл нүмунәси үзәриндә дүшүнсәләр фајда әлдә едәрләр. Хатырлајаг ки, Мүгәддәс Китаб пејғәмбәрлијиндә Иса «Әбәди Ата» адландырылыр (Јешаја 9:6, 7). «Сонунҹу Адәм» олан Иса, әслиндә «илк инсан олан Адәми» әвәз едир вә она инананларын атасы олур (1 Коринфлиләрә 15:45). Иса Адәм кими егоист, өз мәнфәәтини ҝүдән ата олмадығы үчүн ону нүмунәви ата адландырмаг олар. Мүгәддәс Китаб онун һаггында белә дејир: «Биз мәһәббәти бунда дәрк етдик ки, Мәсиһ Өз ҹаныны бизим үчүн фәда верди» (1 Јәһја 3:16). Бәли, Иса өз һәјатыны көнүллү олараг бүтүн инсанлар үчүн гурбан верди. Һәмчинин о, һәр ҝүн, һәтта кичик шејләрдә белә башгаларынын еһтијаҹларыны өз еһтијаҹларындан үстүн тутурду. Валидејнләр, сизин дә бу ҹүр фәдакарлыгла аиләләринизин гејдинә галмағынызы мүшаһидә етмәк чох хошдур.
8, 9. а) ушларын фәдакарлыгла өз балаларынын гејдинә галмасындан валидејнләр нә өјрәнә биләрләр? б) Бир чох мәсиһчи валидејнләр фәдакарлыг руһуну неҹә ҝөстәрирләр?
8 Валидејнләр Исанын инадкар исраиллиләрә дедији сөзләрдәки гәрәзсиз мәһәббәтиндән чох шеј өјрәнә биләрләр: «Тојуг өз ҹүҹәләрини ганадлары алтына топладығы кими, Мән дә сәнин өвладларыны нечә дәфә топламаг истәдим» (Матта 23:37). Иса бурада тојуғун балаларыны ганадлары алтына неҹә алдығыны ҝөзәл тәсвир едир. Доғрудан да, валидејнләр тојуғун аналыг инстинктиндән чох шеј өјрәнә биләрләр. Тојуг ҹүҹәләрини бәладан горумаг үчүн һәтта өзүнү тәһлүкәјә атмаға белә һазырдыр. Һәр ҝүн гушларын нә илә мәшғул олдугларыны мүшаһидә етмәк дә чох мараглыдыр. Онлар јорулмадан ора-бура учараг јем ахтарырлар. Бәрк јорулсалар да, димдикләриндә ҝәтирдикләри јеми јумуртадан тәзәҹә чыхмыш аҹ балаларынын ағзына төкүрләр. Онлар да јеми удуб балаҹа димдикләрини јенидән ачырлар. Јеһованын јаратдығы мәхлуглардан чохунун өз балаларынын гејдинә галмалары ҝөстәрир ки, онлар «инстинктив һикмәтә» маликдирләр (Сүлејманын мәсәлләри 30:24, ЈД).
9 Ејнилә мәсиһчи валидејнләр дә, һарада јашамаларына бахмајараг, фәдакарлыгла аилә үзвләринин гејдинә галырлар. Валидејнләр, сиз ушагларыныза бир шеј олмасын дејә, һәр әзијјәтә гатлашмаға разысыныз. Бундан башга, аиләни тә’мин етмәк хатиринә һәр ҝүн мүәјјән гурбанлар вермәјә һазырсыныз. Сизләрдән бир чохлары ағыр, јоруҹу зәһмәтлә чөрәк пулу газанмаг үчүн сәһәр тездән дурур. Аиләнизи кејфијјәтли гида илә, ушагларынызы тәмиз ҝејим, мүнасиб евлә тә’мин етмәк вә онлара јахшы тәһсил вермәк үчүн әлиниздән ҝәләни едирсиниз. Буну сиз јорулмадан ҝүнбәҝүн, илбәил едирсиниз. Әмин ола биләрсиниз ки, Јеһова ҝөстәрдијиниз фәдакарлығы вә дөзүмлүјү јүксәк гијмәтләндирир (Ибраниләрә 13:16). Ејни заманда унутмајын ки, аиләнизин бундан даһа ваҹиб тәләбатлары да вар вә онлары сиз тә’мин етмәлисиниз.
Руһани тәләбатларын тә’мин едилмәси
10, 11. Инсан тәләбатларындан ән ваҹиби һансыдыр вә мәсиһчи валидејнләр бу тәләбаты тә’мин етмәк үчүн илк нөвбәдә нә етмәлидирләр?
10 Руһани тәләбатлары тә’мин етмәк мадди тәләбатлары тә’мин етмәкдән даһа ваҹибдир. Иса демишди: «Инсан јалныз чөрәклә јашамаз, лакин Аллаһын ағзындан чыхан һәр бир сөзлә јашар» (Матта 4:4; 5:3). Валидејнләр, аиләнизин руһани тәләбатларыны тә’мин етмәк үчүн нә едирсиниз?
11 Бу һагда сөз дүшәндә, јәгин Ганунун тәкрары 6:5-7 ајәләри гәдәр тез-тез ситат ҝәтирилән ајә јохдур. Зәһмәт олмаса, Мүгәддәс Китабынызы ачыб бу ајәләри охујун. Фикир вердинизсә, илк нөвбәдә валидејн өзү Јеһова илә мүнасибәтләрини инкишаф етдирмәли, Она мәһәббәт бәсләмәли вә Онун сөзләрини бүтүн үрәји илә гәбул етмәлидир. Бәли, сиз Мүгәддәс Китабы дәриндән арашдырмалы, ону мүнтәзәм сурәтдә охумалы вә үзәриндә дүшүнмәлисиниз. Јалныз белә олдугда Јеһованын јолларыны, принсипләрини вә ганунларыны баша дүшәҹәк вә онлары севәҹәксиниз. Нәтиҹәдә үрәјиниз фүсүнкар Мүгәддәс Китаб һәгигәтләри илә долаҹаг, севинҹиниз вә Јеһоваја олан мәһәббәтиниз даһа да артаҹаг. Беләликлә, ушагларыныза јалныз хејирли олан шејләр өјрәдәҹәксиниз (Лука 6:45).
12. Валидејнләр Мүгәддәс Китаб һәгигәтләрини ушагларынын шүуруна јахшы-јахшы јеритмәкдә Исадан неҹә нүмунә ҝөтүрә биләрләр?
12 Руһани ҹәһәтдән мөһкәм олан валидејнләр Ганунун тәкрары 6:7 ајәсиндәки мәсләһәтә риајәт едәрәк Јеһованын сөзләрини имкан дүшән кими өвладларынын ‘шүуруна јахшы-јахшы јеридәҹәкләр’. «Шүура јахшы-јахшы јеритмәк» бир шеји тәкрарлајараг өјрәтмәк демәкдир. Јеһова јахшы билир ки, һамымызын, хүсусән дә ушагларын өјрәнмәси үчүн тәкрар чох ваҹибдир. Бу сәбәбдән, Иса тәблиғ едәркән тез-тез тәкрардан истифадә едирди. Мәсәлән, о, шаҝирдләринә тәвазөкар олмағы, гүрур вә рәгабәтин исә мәсиһчијә јарашмадығыны өјрәдәркән, ејни принсипи мүхтәлиф јолларла тәкрар едирди. О, шаҝирдләри илә фикир јүрүдүр, мисаллар чәкир вә онлары шәхси нүмунәси илә дә өјрәдирди (Матта 18:1-4; 20:25-27; Јәһја 13:12-15). Мараглыдыр ки, Иса шаҝирдләри илә һәмишә тәмкинлә давранырды. Ејни шәкилдә, валидејнләр дә ушагларына әсас һәгигәтләри өјрәтмәјин үсулларыны тапмалы вә ушаг Јеһованын принсипләрини мәнимсәјиб, һәјата кечирәнәдәк бу принсипләри јорулмадан тәкрарламалыдырлар.
13, 14. Валидејнләр һансы имкан вә вәсаитләрдән истифадә едиб ушагларына Мүгәддәс Китаб һәгигәтләрини ашылаја биләрләр?
13 Аиләви өјрәнмә бу ҹүр тә’лим вермәјә ҝөзәл имкан јарадыр. Мүнтәзәм, руһландырыҹы вә мараглы Мүгәддәс Китаб өјрәнмәси аиләнин руһани сағламлығына зәманәтдир. Бүтүн дүнјада мәсиһчи аиләләр бу ҹүр өјрәнмәләри јүксәк гијмәтләндирир. Онлар Јеһованын тәшкилатынын вердији әдәбијјатлардан истифадә едир вә орада верилән мәсләһәтләри ушагларынын тәләбатларына ујғунлашдырырлар. «Бөјүк Мүәллимдән өјрән» вә «Ҝәнҹләрин суаллары. Практики мәсләһәтләр»b кими гијмәтли китаблар ушагларынын руһани тәләбатларыны тә’мин етмәкдә бир чох валидејнләрин әлиндән тутмушдур. Бунунла белә, аиләви өјрәнмә ушаглара тә’лим вермәк үчүн јеҝанә имкан дејил.
14 Ганунун тәкрары 6:7 ајәсиндән ҝөрдүјүмүз кими, ушагларла руһани сөһбәтләр апармаг үчүн чохлу имканлар вар. Мәсәлән, бирликдә һараса ҝедәркән, ев ишләрилә мәшғул оларкән вә ја бирҝә динҹәләркән ушагларынызын руһани тәләбатларыны тә’мин етмәјә ҝөзәл имкан јараныр. Әлбәттә, ушагларыныза дурмадан Мүгәддәс Китаб һәгигәтләри һаггында «мә’рузә охумаға» ҝәрәк јохдур. Әксинә, руһани шејләр барәсиндә сөһбәт едәрәк онлары руһландырмаға чалышын. Мәсәлән, «Ојанын!» журналында мүхтәлиф мөвзуларда мәгаләләр дәрҹ олунур. Бу ҹүр мәгаләләрин көмәјилә сиз Јеһованын јаратдығы һејванлар, ҝөзәл тәбиәт, мүхтәлиф халгларын адәт вә ән’әнәләри һаггында сөһбәтләр апара биләрсиниз. Белә сөһбәтләрин сајәсиндә ушагларыныз «садиг вә ағыллы гул»ун вердији әдәбијјатлары даһа да марагла охујаҹаг (Матта 24:45-47).
15. Валидејнләр тәблиғ хидмәтинин мараглы вә дәјәрли бир иш олдуғуну анламагда ушагларына неҹә көмәк едә биләрләр?
15 Ушагларынызла инкишафетдириҹи сөһбәтләр едәндә, онларын даһа бир руһани тәләбаты тә’мин олунур. Мәсиһчи ушаглар иманлары һаггында башгаларына мәһарәтлә данышмағы өјрәнмәлидирләр. Онларла «Ҝөзәтчи Гүлләси» вә ја «Ојанын!» журналларындан һәр һансы мараглы бир фикри мүзакирә едиб, бу мә’луматы тәблиғдә неҹә тәтбиг едә биләҹәкләри һаггында даныша биләрсиниз. Мәсәлән, ушаглара белә суал вермәк олар: «Јеһова һаггында бу ҝөзәл фикирләри даһа чох инсан билсәјди ә’ла оларды, елә дејилми? Неҹә дүшүнүрсән, бу фикри инсанлара неҹә чатдыра биләрик ки, онлар да мараглансын?» Белә сөһбәтләрин сајәсиндә, ушаглар өјрәндикләри шејләри башгалары илә даһа һәвәслә бөлүшәҹәкләр. Бундан башга, ушаглар бу ҹүр сөһбәтләри тәблиғ заманы неҹә тәтбиг етдијинизи ҝөрәндә, тәблиғин мараглы, бөјүк севинҹ вә мәмнунлуг ҝәтирән бир иш олдуғуна өз тәҹрүбәләриндә әмин олаҹаглар (Һәвариләрин ишләри 20:35).
16. Ушаглар валидејнләринин дуаларыны динләмәклә нә өјрәнә биләрләр?
16 Валидејнләр ушагларынын руһани тәләбатларыны бирликдә дуа етмәклә дә тә’мин едирләр. Иса шаҝирдләринә дуа етмәји өјрәтмиш вә онларла бирликдә дәфәләрлә дуа етмишдир (Лука 11:1-13). Бир тәсәввүр един, Јеһованын Оғлу илә дуа етмәк нә демәкдир! Бу дуалардан онлар нә гәдәр шеј өјрәнирдиләр! Ејнилә ушагларыныз да сизин дуаларыныздан чох шеј өјрәнә биләр. Мәсәлән, онлар өјрәнә биләр ки, Јеһова үрәјимиздән ҝәлән дуалары ешидир вә һансы чәтинлијимиз олурса-олсун Она дуа васитәсилә мүраҹиәт етмәјимизи истәјир. Бәли, ушагларыныз сизин дуаларыныздан һәјати ваҹиб һәгигәти өјрәнәҹәкләр: онлар да сәмави Аталары илә гаршылыглы мүнасибәт гура биләрләр (1 Петер 5:7).
Емосионал тәләбатларын тә’мин едилмәси
17, 18. а) Мүгәддәс Китаб ушаглара мәһәббәт бәсләмәјин ваҹиблијини неҹә ҝөстәрир? б) Мәһәббәтләрини ифадә етмәкдә аталар Јеһовадан нә өјрәнә биләрләр?
17 Ушагларын даһа бир тәләбаты да вар: бу, емосионал тәләбатдыр вә она бармагарасы бахмаг олмаз. Аллаһын Кәламы ҝөстәрир ки, бу тәләбат чох ваҹибдир вә валидејнләр ону да тә’мин етмәлидирләр. Мәсәлән, гадынлар ҝәрәк «ушагларыны севсинләр». Мүгәддәс Китаб ҝәнҹ аналарын «тә’лимә» еһтијаҹлары олдуғуну ҝөстәрир, јә’ни һәр ана бу вәзифәјә шүурлу сурәтдә вә дәрракә илә јанашмалыдыр (Титуса 2:4). Доғрудан да, ушаға мәһәббәт ҝөстәрмәк чох ваҹибдир. Бу, онун бүтүн һәјатына ҝөзәл тә’сир ҝөстәрәҹәк вә ушаг севмәји өјрәнәҹәк. Амма валидејн ушағына мәһәббәт ҝөстәрмәјәндә, бу, бир чох үрәк ағрыларына сәбәб олур. Валидејнин белә давраныш тәрзи ҝөстәрир ки, о, гејри-камиллијимизә бахмајараг, бизи бөјүк мәһәббәтлә севән Јеһова Аллаһдан нүмунә ҝөтүрмүр (Мәзмур 103:8-14).
18 Јеһова инсанлары севмәкдә дә тәшәббүсү Өз үзәринә ҝөтүрүр. 1 Јәһја 4:19 ајәсиндә дејилир: «О бизи биринҹи севмишдир». Сиз аталар, Јеһовадан хүсусилә нүмунә ҝөтүрмәли вә ушагларынызла аранызда олан мәһәббәт бағларыны даһа да мөһкәмләндирмәк үчүн аддымлар атмалысыныз. Мүгәддәс Китаб аталара төвсијә едир ки, ушаглары «мә’јус олмасынлар» дејә, онлары һирсләндирмәсинләр (Колослулара 3:21). Валидејнләрин онлары севмәдијини вә гијмәтләндирмәдијини билмәк гәдәр һеч бир шеј ушаглара белә пис тә’сир етмир. Мәһәббәтләрини ҝөстәрмәкдән чәкинән аталар јахшы оларды ки, Јеһованын шәхсән вердији нүмунәни унутмасынлар. Јеһова Өз оғлуну севдијинә вә ондан разы галдығына әмин етмәк үчүн, һәтта ҝөјләрдән белә данышырды (Матта 3:17; 17:5). Исанын бундан сонра нә гәдәр руһландығыны тәсәввүр едә биләрсиниз! Ејнилә, валидејнләр дә ушагларыны мәһәббәтләринә вә онлардан разы олдугларына сәмимијјәтлә әмин етсәләр, бу, ушаглары мә’нәви ҹәһәтдән ҝүҹләндирәҹәк вә онларын өзләринә инамлары даһа да артаҹаг.
19. Ушаглара тәрбијә вермәк нә үчүн ваҹибдир вә мәсиһчи валидејнләр бу мәсәләјә таразлы шәкилдә неҹә јанаша биләрләр?
19 Әлбәттә, валидејн өз мәһәббәтини садәҹә сөзләрлә әкс етдирмәмәлидир. Мәһәббәт илк нөвбәдә әмәлләрлә ифадә олунур. Бәли, валидејнләр мадди вә руһани ҹәһәтдән аиләләрини тә’мин етмәклә, ушагларыны севдикләрини ҝөстәрирләр. Амма чалышмаг лазымдыр ки, ушаглар бунун илк нөвбәдә мәһәббәтдән ирәли ҝәлдијини баша дүшсүнләр. Ата-ана мәһәббәти ушаглара тәрбијә вермәкдә дә өзүнү ҝөстәрмәлидир. Ибраниләрә 12:6 ајәсиндә ҝөзәл вурғуланыр: «Рәбб севдијини тәрбијә едәр». Амма тәрбијә вермәјә лагејдлик едән валидејн, ушағына ‘нифрәт етдијини’ ҝөстәрир (Сүлејманын мәсәлләри 13:24). Јеһова бу мәсәләјә таразлы шәкилдә јанашыр вә севдикләрини һәмишә ‘әдаләтлә тәрбијәләндирир’ (Јеремја 46:28). Гејри-камил валидејнләрә исә тәрбијә мәсәләсинә таразлы шәкилдә јанашмаг һәмишә асан олмур. Буна бахмајараг, валидејнләр, әлиниздән ҝәләни әсирҝәмәјин. Ушағыныз јалныз севҝи долу, амма ејни заманда дөнә-дөнә верилән нәсиһәтләрин сајәсиндә хошбәхт вә сәмәрәли һәјата наил ола биләр (Сүлејманын мәсәлләри 22:6). Мәҝәр һәр бир мәсиһчи валидејн ушағыны мәһз бу ҹүр ҝөрмәк истәмәздими?
20. Валидејнләр ушагларына ‘һәјаты сечмәк’ үчүн ән јахшы имканы неҹә верә биләрләр?
20 Сиз, валидејнләр, аиләнизин мадди, руһани вә емосионал тәләбатларыны тә’мин едәндә, Јеһова да тапшырығынызын өһдәсиндән јахшы ҝәлдијинизә ҝөрә сизә бол-бол хејир-дуалар верәҹәк. Белә етмәклә, өвладларыныза ‘һәјаты сечиб јашаја билмәләри’ үчүн ән ҝөзәл имканы верирсиниз (Ганунун тәкрары 30:19). Јеһоваја хидмәт етмәји өзләринә һәјат јолу сечән вә бөјүјәндән сонра да бу јолдан дөнмәјән ушаглар валидејнләринә бөјүк севинҹ ҝәтирирләр (Мәзмур 127:3-5). Бу севинҹин өмрү әбәди олаҹаг! Бәс сиз, ҝәнҹ оғлан вә гызлар, артыг индидән Јеһованы неҹә иззәтләндирә биләрсиниз? Бу мөвзуну нөвбәти мәгаләдә мүзакирә едәҹәјик.
[Һашијәләр]
a Мәгаләдә «аиләни тә’мин едән» дедикдә аталар нәзәрдә тутулса да, бу принсипләри ушагларыны тәк бөјүдән мәсиһчи аналар да тәтбиг едә биләр.
b Јеһованын Шаһидләри тәрәфиндән бир чох дилләрдә дәрҹ олунур.
Неҹә ҹаваб верәрдиниз?
Валидејнләр ушагларынын
• мадди
• руһани
• емосионал тәләбатларыны тә’мин етмәк үчүн нә едә биләрләр?
[8-ҹи сәһифәдәки шәкил]
Бир чох гушлар балаларыны тә’мин етмәк үчүн јорулмадан чалышырлар.
[10-ҹу сәһифәдәки шәкил]
Валидејнләр илк нөвбәдә Јеһова илә өз мүнасибәтләрини мөһкәмләндирмәлидирләр.
[10 вә 11-ҹи сәһифәләрдәки шәкил]
Валидејнләр ушагларына Јарадан һаггында данышмаг үчүн чохлу имканлар тапа биләрләр.
[12-ҹи сәһифәдәки шәкил]
Ушаглар валидејнләрин онлардан разы галдығыны биләндә мөһкәмләнир вә өзләринә инамлары артыр.