Евдән-евә тәблиғдә јаранан чәтинликләрин өһдәсиндән ҝәлирик
«Аллаһымыздан ҹәсарәт алдыг ки, бөјүк мүгавимәтә бахмајараг, сизә Аллаһын Мүждәсини елан едәк» (1 САЛОН. 2:2).
1. Јеремја һансы чәтинликләрлә үзләширди вә онларын өһдәсиндән неҹә ҝәлди?
ЈЕРЕМЈА бизим кими һиссләри олан адам иди. Јеһова онун «милләтләрә пејғәмбәр» олаҹағыны билдирәндә Јеремја деди: «Аһ, ја Худавәнд Рәбб! Ахы мәним данышыг габилијјәтим јохдур, чүнки һәлә ҹаванам». Буна бахмајараг, Јеремја Јеһоваја ҝүвәнәрәк тәјинаты гәбул етди (Јер. 1:4-10). 40 илдән чох Јеремја лагејдлик, истеһза вә һәтта зоракылыгла үзләширди. Халг онун тәблиғ етдији хәбәри гәбул етмирди, лакин о, бүтүн бунлара таб ҝәтирди (Јер. 20:1, 2). Јеремја һәрдән тапшырығындан имтина етмәк истәсә дә, әксәријјәт арасында јахшы гәбул олунмајан хәбәри дашүрәкли халга бәјан етмәкдә мәтанәтли иди. О, һеч заман өзү јеринә јетирә билмәјәҹәји иши Аллаһын ҝүҹүнүн сајәсиндә баша чатдырды. (Јеремја 20:7-9 ајәләрини оху.)
2, 3. Аллаһын мүасир хидмәтчиләри Јеремјанын үзләшдији һансы чәтинликләрлә үзләширләр?
2 Аллаһын мүасир хидмәтчиләринин чохуна Јеремјанын һиссләри танышдыр. Евдән-евә тәблиғ һаггында дүшүнәркән, чохларымыз: «Мән буну һеч заман баҹармарам», — дејә фикирләшмәмиш олмазды. Амма тәблиғ ишинин Јеһованын ирадәсинә дахил олдуғуну анлајанда, горхуларымыза үстүн ҝәлиб тәблиғ етмәјә башламышыг. Бунунла белә, бизләрдән чоху, гыса мүддәт дә олса, тәблиғ ишини давам етдирмәјимизи чәтинләшдирән проблемләрлә үзләшиб. Доғрудур ки, евдән-евә тәблиғ етмәјә башламаг вә сона гәдәр тәблиғ иши илә мәшғул олмаг асан дејил (Мат. 24:13).
3 Әҝәр мүәјјән мүддәт Мүгәддәс Китабы Јеһованын Шаһидләри илә өјрәнмәјинә вә јығынҹагларда мүнтәзәм иштирак етмәјинә бахмајараг, евдән-евә тәблиғ етмәјә башламаға тәрәддүд едирсәнсә, бәс онда неҹә? Јахуд вәфтиз олунмуш Шаһидсәнсә вә һәтта сағламлығын јол версә белә, евдән-евә тәблиғ етмәкдә чәтинлик чәкирсәнсә, неҹә? Әмин ол ки, мүхтәлиф мәншәли тәблиғчиләр бу чәтинликләрин өһдәсиндән ҝәлирләр. Јеһованын көмәји сајәсиндә буну сән дә едә биләрсән.
Ҹәсарәт алырыг
4. Һәвари Павел хош хәбәри нәјин сајәсиндә ҹәсарәтлә бәјан едирди?
4 Шүбһәсиз, сән баша дүшүрсән ки, үмумдүнја тәблиғ иши инсан ҝүҹү вә ја мүдриклији илә дејил, Аллаһын руһунун көмәји сајәсиндә һәјата кечирилир (Зәк. 4:6). Һәмчинин буну һәр бир мәсиһчинин хидмәти барәдә дә демәк олар (2 Кор. 4:7). Ҝәлин һәвари Павелин хидмәтинә нәзәр салаг. О, миссионер сәјаһәти заманы әмәкдашы илә бирҝә дүшмәнләринин пис рәфтарына мәруз галдығыны хатырлајараг јазмышды: «Габагҹа Филипидә әзаб чәкиб, тәһгир олундуғумуз һалда, биз Аллаһымыздан ҹәсарәт алдыг ки, бөјүк мүгавимәтә бахмајараг, сизә Аллаһын Мүждәсини елан едәк» (1 Салон. 2:2; Һәв. иш. 16:22-24). Тәсәввүр етмәк чәтиндир ки, һәвари Павел кими чалышган тәблиғчијә бәзән тәблиғ етмәк чәтин олармыш. Бизләрдән һәр биримиз кими, Павел дә хош хәбәри ҹәсарәтлә бәјан етмәк үчүн Јеһоваја бел бағламалы иди. (Ефеслиләрә 6:18-20 ајәләрини оху.) Павелин нүмунәсини неҹә тәглид едә биләрик?
5. Ҹәсарәтлә тәблиғ етмәк үчүн илк нөвбәдә нә лазымдыр?
5 Ҹәсарәтлә тәблиғ етмәк үчүн илк нөвбәдә дуа етмәлијик. Бир пионер демишди: «Мән дуа едирәм ки, әминликлә данышым, дуа едирәм ки, инсанларын үрәјинә јол тапым вә дуа едирәм ки, хидмәтдән севинҹ дујум. Ахы бу бизим јох, Јеһованын ишидир вә Онун көмәји олмадан әлимиздән һеч нә ҝәлмәз» (1 Салон. 5:17). Ҹәсарәтлә тәблиғ етмәк үчүн һәр биримиз дурмадан Аллаһын мүгәддәс руһунун көмәјини диләмәлијик (Лука 11:9-13).
6, 7. а) Језекелә һансы ҝөрүнтү верилди вә онун мәнасы нә иди? б) Језекелин ҝөрүнтүсүндә Аллаһын мүасир хидмәтчиләри үчүн һансы дәрс вар?
6 «Језекел» китабында јазылан бир мәлумат да ҹәсарәтлә тәблиғ етмәјимизә көмәк едәҹәк. Ҝөрүнтүдә Јеһова Језекелә өнүндә вә архасында «мәрсијә, матәм, бәла» сөзләри јазылмыш бир тумар верир вә ону јемәји әмр едәрәк дејир: «Еј бәшәр оғлу, мәдәни бунунла долдур, сәнә вердијим бу тумарла гарныны дојдур». Бу ҝөрүнтүнүн мәнасы нәдир? Језекел бәјан едәҹәји хәбәри тамамилә мәнимсәмәли иди. Бу онун бир һиссәси олмалы, башга сөзләрлә десәк, онун дәрин һиссләринә тәсир ҝөстәрмәли иди. Пејғәмбәр давам едир: «Мән једим, ағзым бал кими ширин олду». Језекелә Аллаһын хәбәрини ҹамаат гаршысында бәјан етмәк бал јемәк кими ләззәт едирди. Чохларынын ешитмәк истәмәдији хәбәри чатдырмаг лазым ҝәлсә дә, Језекел үчүн Јеһованын тәмсилчиси олмаг вә Онун тапшырығыны јеринә јетирмәк хүсуси шәрәф иди. (Језекел 2:8–3:4, 7-9 ајәләрини оху.)
7 Бу ҝөрүнтүдә Аллаһын мүасир хидмәтчиләри үчүн ваҹиб дәрс вар. Биз дә сәјләримизи һәр заман гијмәтләндирмәјән инсанлара онларын ешитмәк истәмәдији хәбәри бәјан едирик. Хидмәтимизә һәмишә Аллаһын вердији шәрәф кими јанашмаг үчүн руһани ҹәһәтдән јахшы гидаланмалыјыг. Сәтһи вә ја гејри-мүнтәзәм шәхси өјрәнмә Аллаһын Кәламыны тамамилә мәнимсәмәк үчүн кифајәт дејил. Мүгәддәс Китабы мүнтәзәм вә ја даһа јахшы охујуб арашдыра биләрсәнми? Охудугларын үзәриндә дүшүнмәк үчүн даһа чох вахт ајыра биләрсәнми? (Мәз. 1:2, 3).
Мүгәддәс Китаб һаггында сөһбәтә башламағын үсуллары
8. Һансы үсулун көмәјилә бәзи тәблиғчиләр евдән-евә тәблиғ едәркән Мүгәддәс Китаб һаггында сөһбәтә башламаға мүвәффәг олмушлар?
8 Бир чох тәблиғчиләр үчүн евдән-евә тәблиғдә ән чәтини ев јијәси илә сөһбәтә башламагдыр. Етираф етмәк лазымдыр ки, мүәјјән әразиләрдә сөһбәтә башламаг мүшкүл мәсәләдир. Бәзи тәблиғчиләр фикир вермишләр ки, чәрчивәдә ҝөстәрилдији кими, бир нечә јахшы сечилмиш сөзләрлә тәгдимә едиб инсана трактат вермәк гапынын ағзында сөһбәтә башламағы асанлашдырыр. Трактатын ады, јахуд үзәриндәки рәнҝли шәкил һәмсөһбәтимизин диггәтини ҹәлб едә биләр, бу исә бизә ҝәлишимизин мәгсәдини гысаҹа сөјләмәк вә она суал вермәк имканыны јарадаҹаг. Бу тәгдимәни бир аз дәјишмәк дә олар, мәсәлән, ев јијәсинә үч-дөрд трактат ҝөстәриб онун үчүн мараглы оланы сечмәји тәклиф етмәк олар. Әлбәттә, мәгсәдимиз садәҹә трактат пајламаг вә ја онлардан һәр гапыда истифадә етмәк јох, Мүгәддәс Китаб өјрәнмәсинин әсасыны гојмаг үчүн сөһбәтә башламагдыр.
9. Јахшы һазырлашмаг нәјә ҝөрә ваҹибдир?
9 Истифадә етдијин үсулдан асылы олмајараг, јахшы һазырлыг сәнә евдән-евә тәблиғдә әминликлә вә шөвглә данышмағына көмәк едәҹәкдир. Бир пионер мүшаһидәләринә әсасланараг дејир: «Хидмәтә јахшы һазырлашанда даһа чох севинҹ дујурам. Һәмин дәгигә ҝедиб тәгдимәми сөјләмәк истәјирәм». Башга пионер исә дејир: «Хидмәтдә тәклиф едәҹәјим әдәбијјатлары јахшы-јахшы охујанда онлары шөвглә тәгдим едирәм». Дејәҹәкләрини өз-өзүнә тәкрар етмәјин мүәјјән фајдасы олса да, чохлары ҝөрмүшләр ки, ону уҹадан мәшг етмәјин даһа чох көмәји дәјир. Белә етмәк онлара Јеһоваја ән јахшысыны вермәјә көмәк едир (Колос. 3:23; 2 Тим. 2:15).
10. Тәблиғ үчүн ҝөрүшләрин сәмәрәли вә фајдалы олмасы үчүн нә етмәк олар?
10 Тәблиғ үчүн ҝөрүшләрин бөјүк фајдасы вар. Орада биз евдән-евә мәһарәтлә тәблиғ етмәји вә хидмәтимиздән севинҹ дујмағы өјрәнирик. Әҝәр ҝүндәлик ајә тәблиғлә бағлыдырса, ҝөрүш заманы ону охујуб гысаҹа мүзакирә етмәк олар. Лакин тәблиғ үчүн ҝөрүшү апаран гардаш әразијә ујғун олан садә бир тәгдимәнин мүзакирәси вә онун сәһнәләшдирилмәси үчүн кифајәт гәдәр вахт ајырмалы вә ја тәблиғчиләрин һәмин ҝүн хидмәтдә истифадә едә биләҹәкләри диҝәр практики мәлуматы мүзакирә етмәлидир. Бу, иштирак едәнләрә хидмәтдә даһа да мәһарәтли олмаға көмәк едәҹәк. Габагҹадан јахшы һазырлашмағын сајәсиндә ағсаггаллар, јахуд башгалары бу ҝөрүшләри сәмәрәли кечирә вә ајрылан вахт чәрчивәсиндә онлары битирә биләрләр (Ром. 12:8).
Динләмәјә һазыр ол
11, 12. Шәфгәтлә динләмәк, тәблиғ етдијимиз инсанларын үрәјинә јол тапмағымыза неҹә көмәк едә биләр? Нүмунәләр чәкин.
11 Јахшы һазырлашмаг сөһбәтә башламағын вә инсанларын үрәјинә јол тапмағын јеҝанә јолу дејил, тәблиғ етдијимиз инсанлара сәмими мараг да ҝөстәрмәлијик. Буну етмәјин үсулларындан бири неҹә динләдијимизә диггәт јетирмәкдир. Бир сәјјар нәзарәтчи фикир вермишдир: «Сәбирлә вә диггәтлә динләмәк инсанларда хош хәбәрә гулаг асмаг һәвәси ојадыр вә бу, сәмими марағымызын ҝөзәл ифадәсидир». Ашағыдакы нүмунәнин ҝөстәрдији кими, шәфгәтлә гулаг асмаг һәмсөһбәтимизин үрәјинә јол тапмағымыза көмәк едә биләр.
12 Франсанын Сент-Етјенн шәһәриндә чыхан «Прогре» гәзетиндә, үч ајлыг гызыны итирән бир гадынын мәктубу чап едилмишди. Орада һәмин фаҹиәдән бир гәдәр сонра ики адамын онун гапысыны дөјдүјүндән бәһс едилирди. Гадын јазырды: «Онларын Јеһованын Шаһидләри олдугларыны о дәгигә билдим. Онлары мәдәни сурәтдә јола салмаг истәдим, амма тәклиф етдикләри брошүра диггәтими ҹәлб етди. О, Аллаһын әзаблара нә үчүн јол вердији һагда иди. Буна ҝөрә дә, ҝәтирдикләри дәлилләрин доғру олмадығыны сүбут етмәк үчүн онлары ичәри дәвәт етдим. [...] Шаһидләр биздә тәхминән бир саат олдулар. Онлар мәни шәфгәтлә динләдиләр вә онлар ҝедәндә өзүмү о гәдәр раһат һисс едирдим ки, тәкрар ҝәлмәләринә разылыг вердим» (Ром. 12:15). Бир мүддәтдән сонра һәмин гадын Мүгәддәс Китабы өјрәнмәјә башлады. Ҝөрдүјүмүз кими, о гадын, Шаһидләрин илк ҝөрүшдә дедикләрини јох, ону неҹә динләдикләрини хатырлајырды.
13. Хош хәбәри тәблиғ едәркән тәгдимәни инсанларын тәләбатларына неҹә ујғунлашдыра биләрик?
13 Шәфгәтлә динләјәндә, әслиндә, инсанлара Падшаһлыға нә үчүн еһтијаҹ дујдугларыны сөјләмәјә имкан веририк. Белә етмәк хош хәбәри онлара даһа јахшы чатдырмағымыза көмәк едәҹәк. Јәгин диггәт јетирмисән ки, тәҹрүбәли тәблиғчиләр адәтән јахшы динләмәји баҹарырлар (Сүл. мәс. 20:5). Онлар хидмәтдә гаршылашдыглары адамларла сәмими марагланырлар. Белә тәблиғчиләр онларын јалныз адларыны вә үнванларыны дејил, мараг вә еһтијаҹларыны да гејд едирләр. Кимисә конкрет бир проблем нараһат едәндә онлар ахтарышлар апарыр вә өјрәндикләри илә бөлүшмәк үчүн гыса вахтдан сонра јенидән һәмин инсана баш чәкирләр. Һәвари Павел кими, онлар Падшаһлыг һаггында хош хәбәри тәблиғ едәркән өз тәгдимәләрини инсанларын тәләбатларына ујғунлашдырырлар. (1 Коринфлиләрә 9:19-23 ајәләрини оху.) Бу ҹүр сәмими мараг инсанлары хош хәбәрә ҹәлб едир вә ‘Аллаһын мәрһәмәтини әкс етдирир’ (Лука 1:78).
Мүсбәт әһвал-руһијјәни гору
14. Тәблиғ едәркән Јеһованын кејфијјәтләрини неҹә әкс етдирә биләрик?
14 Јеһова бизә ирадә азадлығы бәхш етмәклә бизи шәхсијјәт кими гијмәтләндирдијини ҝөстәрди. Јеһова Күлл-Ихтијар Аллаһ олса да, һеч кими Она хидмәт етмәјә мәҹбур етмир, әксинә, истәјир ки, инсанлар Онун мәһәббәтинә һај версинләр. Јеһова Онун ҝөстәрдији гајғыја миннәтдар оланлара хејир-дуа верир (Ром. 2:4). Биз һәр дәфә шаһидлик едәркән хош хәбәри мәрһәмәтли Аллаһымыза лајигли тәрздә бәјан етмәјә һазыр олмалыјыг (2 Кор. 5:20, 21; 6:3-6). Бунун үчүн саһәмиздә јашајан инсанлара гаршы мүсбәт әһвал-руһијјәни горумалыјыг. Буну неҹә етмәк олар?
15. а) Исанын ҝөстәришинә әсасән, инсанлар хош хәбәри рәдд етдикләри тәгдирдә һәвариләр нә етмәли идиләр? б) Диггәтимизи ләјагәтли оланларын ахтарышына ҹәмләмәјә нә көмәк едәр?
15 Иса давамчыларына тапшырды ки, кимсә хош хәбәри рәдд едәндә буна ҝөрә һәддиндән артыг нараһат олмаг әвәзинә, диггәтләрини ләјагәтли оланларын ахтарышына ҹәмләсинләр. (Матта 10:11-15 ајәләрини оху.) Гаршымыза кичик, әлчатан мәгсәдләр гојмағымыз бу ишдә бизә көмәк едә биләр. Бир гардаш өзүнү гызылахтаранла мүгајисә едир. Онун шүары беләдир: «Мән бу ҝүн мүтләг гызыл тапмалыјам!» Башга гардашын мәгсәди исә «һеч олмаса бир нәфәр мараг ҝөстәрән адама раст ҝәлмәк вә марағыны инкишаф етдирмәк үчүн бир неҹә ҝүндән сонра она тәкрар баш чәкмәкдир». Бәзи тәблиғчиләр евдән-евә тәблиғдә растлашдыглары һәр бир инсана имкан дахилиндә ән азы бир ајә охумаға чалышырлар. Бәс сән гаршына һансы әлчатан мәгсәдләри гоја биләрсән?
16. Нәјә ҝөрә хош хәбәри дурмадан тәблиғ етмәлијик?
16 Евдән-евә тәблиғдә мүвәффәгијјәт саһәмиздә јашајан инсанларын хош хәбәрә јалныз неҹә һај вермәләриндән асылы дејил. Дүздүр, тәблиғ сәмими инсанларын хилас олмасы үчүн ваҹибдир, амма о, башга ваҹиб мәгсәдләрә дә хидмәт едир. Тәблиғ едәркән биз Јеһованы севдијимизи ҝөстәририк (1 Јәһ. 5:3). Инсанларын ганындан тәмиз галырыг (Һәв. иш. 20:26, 27). Аллаһсыз инсанлары хәбәрдар едирик ки, Јеһованын «һөкмүнүн вахты ҝәлди» (Вәһј 14:6, 7). Ән әсасы исә, хош хәбәрин тәблиғи сајәсиндә Јеһованын адына бүтүн дүнјада һәмд олунур (Мәз. 113:3). Беләликлә, инсанларын бизи динләјиб-динләмәмәләриндән асылы олмајараг, Падшаһлыг хәбәрини дурмадан бәјан етмәлијик. Әмин ол ки, хош хәбәри бәјан етмәкдә ҝөстәрдијимиз бүтүн сәјләримизи Јеһова јүксәк гијмәтләндирир (Ром. 10:13-15).
17. Инсанлар тезликлә нәји етираф етмәли олаҹаглар?
17 Чохлары бәјан етдијимиз хәбәрә лагејд јанашсалар да, тезликлә она башга ҝөзлә бахмалы олаҹаглар (Мат. 24:37-39). Јеһова Језекели әмин етди ки, онун бәјан етдији һөкмләр јеринә јетәндә үсјанкар Исраил еви ‘араларында бир пејғәмбәрин’ олдуғуну биләҹәк (Јез. 2:5). Ејнилә, Аллаһ мүасир системин үзәриндә һөкмүнү иҹра едәндә инсанлар Јеһованын Шаһидләринин ачыгҹа вә евдән-евә тәблиғ етдикләри хәбәрин әслиндә јеҝанә, һәгиги Аллаһ Јеһовадан олдуғуну вә Шаһидләрин Онун тәмсилчиләри олдуғуну етираф етмәли олаҹаглар. Бу мүһүм зәманәдә Онун адыны дашымаг вә хәбәрини бәјан етмәк неҹә дә бөјүк шәрәфдир! Ҝәлин гаршылашдығымыз чәтинликләрә бахмајараг вә Онун көмәјинә архаланараг евдән-евә тәблиғимизи давам етдирәк!
Неҹә ҹаваб верәрдиниз?
• Ҹәсарәтлә тәблиғ етмәк үчүн нә етмәлијик?
• Евдән-евә тәблиғ едәркән сөһбәтә неҹә башламаг олар?
• Инсанлара сәмими мараг неҹә ҝөстәрә биләрик?
• Саһәмиздә јашајан инсанлара гаршы мүсбәт әһвал-руһијјәмизи горумагда бизә нә көмәк едәр?
[9-ҹу сәһифәдәки чәрчивә/шәкил]
Мүгәддәс Китаб һаггында сөһбәтә башламағын бир үсулу
Әввәлдә:
◼ Ев јијәсини саламладыгдан сонра она бир трактат вериб демәк олар: «Мән бу ваҹиб мөвзуја даир мараглы бир фикирлә бөлүшмәк истәјирәм».
◼ Вә ја трактаты тәклиф едәрәк демәк олар: «Мән бу ҝүн инсанларла гысаҹа сөһбәт едирәм вә бу мөвзу һагда сизин фикринизи билмәк истәрдим».
Әҝәр трактаты гәбул едибләрсә:
◼ Адамын фикрини өјрәнмәк үчүн трактатын ады илә бағлы дәрһал бир суал вер.
◼ Диггәтлә динлә вә ев сакининин фикрини баша дүшмәјә чалыш. Фикрини сөјләдијинә ҝөрә она тәшәккүрүнү билдир.
Сөһбәти давам етдирмәк үчүн:
◼ Тәгдимәни һәмсөһбәтинин мараг вә еһтијаҹларына ујғунлашдырараг бир, јахуд бир нечә ајә охујуб мүзакирә ет.
◼ Инсан мараг ҝөстәрирсә, әдәбијјат тәклиф ет вә мүмкүнсә, Мүгәддәс Китаб өјрәнмәсинин неҹә кечирилдијини ҝөстәр. Тәкрар баш чәкәҹәјин вахты мүәјјәнләшдир.