Онда ‘ҝизләдилмиш’ хәзинәләри ахтарын
«Һикмәтин вә ирфанын [билијин] бүтүн хәзинәләри Мәсиһдә ҝизләдилмишдир» (КОЛОС. 2:3).
1, 2. а) 1922-ҹи илдә һансы әшјалар ашкар олунуб вә һал-һазырда онлар һарададыр? б) Аллаһын Кәламы һәр бир инсаны нәјә дәвәт едир?
ТАПЫЛАН ҝизли хәзинәләр һаггында мәлуматлар чох вахт әсас хәбәр башлыглары олур. Мәсәлән, 1922-ҹи илдә британијалы мисиршүнас Һовард Картер онилликләр әрзиндә чәтин шәраитдә апарылмыш газынты ишләриндән сонра бүтүн дүнјаны һејрәтә ҝәтирән бир шеј ашкар етмишдир. О, Тутанһамонун тәхминән 5 000 әшјадан ибарәт вә демәк олар ки, тохунулмамыш сәрдабәсини тапмышдыр.
2 Сенсасија доғуран фирон сәрдабәсиндәки әшјаларын әксәријјәти музејләрә вә шәхси коллексијалара дүшмүшдүр. Бу әшјалар тарихи вә инҹәсәнәт бахымындан мүәјјән дәјәрә малик олса да, ҝүндәлик һәјатымыза онларын һеч бир тәсири јохдур. Аллаһын Кәламы исә һәр кәси әсил дәјәрә малик олан хәзинәләри ахтармаға дәвәт едир вә мүкафат истәнилән мадди хәзинәдән гат-гат бөјүкдүр. (Сүлејманын мәсәлләри 2:1-6 ајәләрини оху.)
3. Јеһованын Өз хидмәтчиләрини ахтармаға тәшвиг етдији хәзинәләр нә гәдәр дәјәрлидир?
3 Ҝәлин Јеһованын Өз хидмәтчиләрини ахтармаға тәшвиг етдији хәзинәләрин нә гәдәр дәјәрли олдуғуну нәзәрдән кечирәк. Онларын арасында јашадығымыз чох тәһлүкәли зәманәдә бизи һифз едән вә горујан «Рәбб горхусу» вар (Мәз. 19:9). Әҝәр ‘Аллаһы танысаг’, Һагг-Таала илә сых мүнасибәтимиз олаҹаг ки, бу да инсанларын саһиб ола биләҹәји ән бөјүк шәрәфдир. Аллаһын вердији һикмәт, билик вә дәрракә сајәсиндә биз һәјатымыздакы проблемләрин вә чәтинликләрин өһдәсиндән мүвәффәгијјәтлә ҝәлә биләҹәјик (Сүл. мәс. 9:10, 11). Белә гијмәтли хәзинәләри неҹә тапа биләрик?
Руһани хәзинәләри нәјә ҝөрә ахтармалыјыг?
4. Руһани хәзинәләри неҹә тапа биләрик?
4 Гијмәтли бир шеј тапмаг үчүн, адәтән, һәр јердә ахтарыш апармалы олан археолог вә диҝәр тәдгигатчылардан фәргли олараг, биз руһани хәзинәләрин һарада «басдырылдығындан» аҝаһыг. Мүгәддәс Китаб, дәгиг бир хәритә кими, бизә Аллаһын вәд етдији хәзинәләрин һарада ҝизләдилдијини ҝөстәрир. Мәсиһ һаггында данышараг һәвари Павел јазырды: «Һикмәтин вә ирфанын бүтүн хәзинәләри Мәсиһдә ҝизләдилмишдир» (Колос. 2:3). Ҝәлин бу сөзләрин үзәриндә дүшүнәрәк өзүмүздән сорушаг: «Бу хәзинәләри нәјә ҝөрә ахтармалыјыг? Онлар һансы мәнада Мәсиһдә “ҝизләдилмишдир”? Вә онлары неҹә тапмаг олар?» Бу суалларын ҹавабыны тапмаг үчүн ҝәлин һәвари Павелин сөзләринә јахындан нәзәр салаг.
5. Павел нәјә ҝөрә руһани хәзинәләр һаггында јазмаг гәрарына ҝәлди?
5 Павел бу сөзләри Колос шәһәриндәки һәмиманлыларына үнванламышды. О, ‘онларын гәлбинин тәсәлли тапмасы, гаршылыглы мәһәббәтдә бирләшмәси’ уғрунда бөјүк мүбаризә апардығыны демишди. (Колослулара 2:1, 2 ајәләрини охуa.) Павел нәјә ҝөрә белә нараһат иди? Ҝөрүнүр, о билирди ки, бу шәһәрдә јашајан гардашлар араларында јунан фәлсәфәсини јајан вә ја Мусанын Ганунуна риајәт едилмәсинин тәрәфдары олан бәзиләринин тәсири алтына дүшә биләрдиләр. Буна ҝөрә дә һәмиманлыларына ҹидди хәбәрдарлыг етди: «Гардашлар, диггәтли олун ки, Мәсиһә дејил, инсан әнәнәсинә, дүнјанын ибтидаи гүввәтләринә әсасланараг, фәлсәфә вә бош һијлә илә кимсә сизи әсир алмасын» (Колос. 2:8).
6. Нәјә ҝөрә Павелин мәсләһәти бизи марагландырмалыдыр?
6 Ејнилә, бу ҝүн дә Шејтан вә онун пис системи бизә һәмин тәсири ҝөстәрмәјә чалышыр. Аллаһы инкар едән секулјар һуманизм вә тәкамүл нәзәријјәси дә дахил олмагла, бу дүнјанын фәлсәфәси инсанларын дүшүнҹә вә һәјат тәрзини, мәнәвијјатыны вә мәгсәдләрини формалашдырыр. Бир чох мәшһур бајрамларын гејд олунмасында јалан дин башлыҹа рол ојнајыр. Әјләнҹә сәнајеси инсанларын пис ҹисмани арзуларынын тәмин олунмасына шәраит јарадыр. Һәмчинин Интернетдә јерләшдирилән бир чох материаллар да һәм ҝәнҹләр, һәм дә јашлылар үчүн әсил тәһлүкә мәнбәјидир. Бу вә диҝәр тәһлүкәләрә давамлы олараг мәруз галмағымыз Јеһованын рәһбәрлијинә олан мүнасибәтимизә асанлыгла тәсир едә биләр. Бунун да нәтиҹәсиндә биз һәгиги — әбәди һәјатдан әввәлки кими мөһкәм јапышмајаҹағыг. (1 Тимотејә 6:17-19 ајәләрини оху.) Беләликлә, Шејтанын усталыгла гурдуғу тәләләрин гурбаны олмамаг үчүн биз Павелин колослулара јаздығы мәсләһәтин мәғзини дәрк етмәли вә она ҹидди јанашмалыјыг.
7. Павелин сөзләринә ҝөрә, колослулара һансы ики амил көмәк едәҹәкди?
7 Ҝәлин јухарыда сөзүҝедән мәктуба гајыдаг. Павел өз нараһатчылығыны ифадә етдикдән сонра Колос мәсиһчиләринә мәһәббәтдә бирләшмәләринә вә тәсәлли тапмаларына көмәк едәҹәк ики амили вурғулајыр. Илк нөвбәдә, о, ‘һәгигәтин там, ајдын анлајышыны’ хатырладыр. Онлар Мүгәддәс Јазылары дүзҝүн анладыгларына там әмин олмалы идиләр ки, иманлары мөһкәм тәмәл үзәриндә гурулсун (Ибр. 11:1). Сонра Павел ‘Аллаһын мүгәддәс сирри һаггында дәгиг билијә’ тохунду. Онлар һәгигәтин әсас тәлимләри илә кифајәтләнмәјиб Аллаһын дәрин дүшүнҹәләри һагда ајдын анлајыша јијәләнмәли идиләр (Ибр. 5:13, 14). Колослулара вахтында верилән бу мәсләһәт бу ҝүн бизләр үчүн дә фајдалыдыр! Белә исә, бу ҹүр әминлијә вә дәгиг билијә неҹә јијәләнә биләрик? Ҹавабы Павелин Иса Мәсиһ һаггында дедији дәрин мәналы сөзләриндә тапмаг олар: «Һикмәтин вә ирфанын бүтүн хәзинәләри Мәсиһдә ҝизләдилмишдир».
Мәсиһдә ‘ҝизләдилмиш’ хәзинәләр
8. Мәсиһдә «ҝизләдилмишдир» ифадәсинин мәнасыны изаһ един.
8 Һикмәтин вә билијин бүтүн хәзинәләринин Мәсиһдә ‘ҝизләдилдијини’ демәклә Павел онларын әлчатмаз олдуғуну нәзәрдә тутмурду. Әксинә, бу о демәкдир ки, һәмин хәзинәләри тапмаг үчүн биз ҹидд-ҹәһдлә чалышмалы вә диггәти Иса Мәсиһә јөнәлтмәлијик. Бу, Исанын өзү һаггында дедији сөзләрә ујғун ҝәлир: «Јол, һәгигәт вә һәјат Мәнәм; Мәним васитәчилијим олмаса, Атанын јанына һеч ким ҝәлә билмәз» (Јәһ. 14:6). Бәли, Аллаһ һаггында билији тапмаг үчүн биз Исанын көмәјинә вә рәһбәрлијинә еһтијаҹ дујуруг.
9. Исаја һансы роллар һәвалә олунуб?
9 Иса өзүнүн «јол» олдуғуну демәклә јанашы, «һәгигәт вә һәјат» олдуғуну да сөјләди. Бу ҝөстәрир ки, о, Атаја јахынлашмаг үчүн садәҹә олараг бир васитә дејил. Иса һәм дә Мүгәддәс Китаб һәгигәтләринин баша дүшүлмәсиндә, о ҹүмләдән инсанларын әбәди һәјата наил олмасында һәјати ваҹиб роллара маликдир. Һәгигәтән дә, Исада ҝизләдилмиш мисилсиз дәјәри олан руһани ләл-ҹәваһиратлар өз тәдгигатчыларыны ҝөзләјир. Ҝәлин ҝәләҹәјә олан үмидимиз вә Аллаһла мүнасибәтләримизлә бирбаша әлагәси олан һәмин һәгигәтләрдән бәзиләрини арашдыраг.
10. Колослулара 1:19 вә 2:9 ајәләриндән Иса һаггында нә өјрәнирик?
10 «Илаһи тәбиәтин бүтүн долғунлуғу бәдәнҹә Мәсиһдә јашајыр» (Колос. 1:19; 2:9). Атасы илә ҝөјләрдә милјардларла ил әрзиндә јашамыш Иса Аллаһа вә Онун ирадәсинә һамыдан јахшы бәләддир. Иса јер үзүндә хидмәт едәркән Атасынын өјрәтдикләрини башгаларына өјрәдир вә она ашыладығы хүсусијјәтләри өз әмәлләриндә әкс етдирирди. Буна ҝөрә дә Иса әминликлә дејә билмишди: «Мәни ҝөрән, Атаны ҝөрмүш олур» (Јәһ. 14:9). Јеһова һаггында бүтүн һикмәт вә билик Мәсиһдә ҝизләдилдији, јәни онда олдуғу үчүн Аллаһымыз барәдә өјрәнмәјин ән јахшы үсулу Иса һаггындакы мәлуматларын һамысыны диггәтлә арашдырмагдыр.
11. Иса илә Мүгәддәс Китаб пејғәмбәрликләри арасында һансы әлагә вар?
11 «Иса һаггындакы шәһадәт пејғәмбәрликләрин мәғзидир» (Вәһј 19:10, ЈД). Бу сөзләр Исанын бир чох Мүгәддәс Китаб пејғәмбәрликләринин јеринә јетмәсиндә әсас ролу ојнадығыны ҝөстәрир. Јарадылыш 3:15 ајәсиндә јазылмыш Јеһованын илк пејғәмбәрлијиндән тутмуш «Вәһј» китабындакы мөһтәшәм ҝөрүнтүләрәдәк Мүгәддәс Китабын бүтүн пејғәмбәрликләрини јалныз Исанын Падшаһлыгла бағлы ролуну нәзәрә алдыгда дүзҝүн баша дүшмәк олар. Бу, Ибраниҹә Мүгәддәс Јазыларда гәләмә алынан бир чох пејғәмбәрликләрин Исаны вәд едилмиш Мәсиһ кими гәбул етмәјән инсанлары нәјә ҝөрә карыхдырдығыны изаһ едир. Бу һәмчинин ҝөстәрир ки, нәјә ҝөјә Мәсиһ һаггында чохлу пејғәмбәрликләрин гәләмә алындығы Ибраниҹә Мүгәддәс Јазылары гијмәтләндирмәјән инсанлар ону садәҹә даһи бир инсан кими гәбул едирләр. Иса һаггында билик Аллаһын халгына ҝәләҹәкдә јеринә јетәҹәк Мүгәддәс Китаб пејғәмбәрликләринин мәғзини анламаға көмәк едир (2 Кор. 1:20).
12, 13. а) Иса һансы мәнада ‘дүнјанын Нурудур’? б) Мәсиһин руһани зүлмәтдән азад едилмиш давамчылары нә етмәјә борҹлудурлар?
12 «Мән дүнјанын Нурујам». (Јәһја 8:12; 9:5 ајәләрини оху.) Иса јер үзүнә ҝәлмәздән чох илләр өнҹә, Јешаја белә бир пејғәмбәрлик сөјләмишди: «Зүлмәтдә јашајан халг мөһтәшәм бир ишыг ҝөрдү. Өлүм көлҝәси дијарында мәскунлашанларын үзәринә нур доғду» (Јешаја 9:2). Һәвари Матта изаһ едир ки, Иса: «Төвбә един, чүнки Сәмави Сәлтәнәт јахындыр»,— дејә тәблиғ етмәјә башлајанда һәмин пејғәмбәрлији јеринә јетирди (Мат. 4:16, 17). Исанын хидмәти инсанларын руһани ҝөзләрини ачды вә јалан динин тәлимләринин көләлијиндән азад етди. О демишди: «Мән дүнјаја нур олараг ҝәлдим ки, Мәнә иман едән һеч кимсә зүлмәтдә галмасын» (Јәһ. 1:3-5; 12:46).
13 Чох илләр сонра һәвари Павел һәмиманлыларына јазмышды: «Бир заманлар гаранлыг идиниз, инди исә Рәбдә ишыгсыныз. Ишыг өвладлары кими һәрәкәт един» (Ефес. 5:8). Руһани зүлмәтин буховларындан азад едилмиш мәсиһчиләр ишыг өвладлары кими һәрәкәт етмәјә борҹлудурлар. Бу, Исанын Дағүстү тәблиғиндә өз давамчыларына дедији сөзләрә ујғун ҝәлир: «Гој сизин нурунуз инсанларын гаршысында елә парласын ки, хејирхаһ ишләринизи ҝөрсүнләр вә ҝөјләрдәки Атаныза һәмд етсинләр» (Мат. 5:16). Исада ашкар етдијин руһани хәзинәләри о дәрәҹәдә јүксәк гијмәтләндирирсәнми ки, бу хәзинәләр һагда данышмагла вә өзүнү нүмунәви мәсиһчи кими апармагла онлары башгаларына да төвсијә едирсән?
14, 15. а) Гәдим заманларда гојунлар вә диҝәр һејванлар һәгиги ибадәтдә неҹә истифадә едилирди? б) Нәјә ҝөрә Исанын «Аллаһ Гузусу» кими ојнадығы ролуну мүгајисәјәҝәлмәз хәзинә адландырмаг олар?
14 Иса «Аллаһын Гузусу»дур (Јәһ. 1:29, 36). Гәдим заманларда Аллаһдан ҝүнаһларын бағышланмасыны диләмәк вә Она јахынлашмаг үчүн гојун гурбаны ҝәтирилирди. Мәсәлән, Ибраһим оғлу Исһагы гурбан ҝәтирмәк үзрә оланда мәләк онун әлини сахлады вә гурбан ҝәтирмәси үчүн Исһагын әвәзинә бир гоч тәгдим етди (Јар. 22:12, 13). Исраиллиләр Мисирдән чыханда ‘Рәббин Пасхасындан’ өнҹә гојун гурбаны ҝәтирмәли вә ганындан ҝөтүрүб гапынын һәр ики јан тахтасына вә үст дирәјинә сүртмәли идиләр (Чых. 12:1-13). Бундан әлавә, Мусанын Ганунунда, гојун вә кечи гурбанлары да дахил олмагла, мүхтәлиф һејван гурбанлары нәзәрдә тутулмушду (Чых. 29:38-42; Лев. 5:6, 7).
15 Нә бу, нә дә ки инсанларын вердији истәнилән гурбанлар бәшәријјәти ҝүнаһ вә өлүмдән әбәдијјән азад едә билмәзди (Ибр. 10:1-4). Лакин Иса «дүнјанын ҝүнаһыны арадан галдыран Аллаһ Гузусу»дур. Тәкҹә бу факт Исаны дүнјанын бүтүн хәзинәләриндән даһа дәјәрли едир. Буна ҝөрә дә биз фидјә мөвзусуну диггәтлә арашдырмаға вахт ајырмалы вә Аллаһын бу һејрәтамиз әнамына иман ҝәтирмәлијик. Әҝәр белә едәриксә, бөјүк бир мүкафат вә хејир-дуа алаҹағымыза — «кичик сүрү»јә дахил олуб Мәсиһлә бирҝә ҝөјләрдә падшаһлыг етмәк шәрәфинә вә иззәтинә лајиг ҝөрүләҹәјимизә, јахуд да јерүзү Ҹәннәтдә әбәди јашамаға үмид едән ‘башга гојунларын’ сырасында олаҹағымыза үмид едә биләрик (Лука 12:32; Јәһ. 6:40, 47; 10:16).
16, 17. Исанын «иманымызын Баниси вә Камилләшдириҹиси» ролуну баша дүшмәк нәјә ҝөрә ваҹибдир?
16 Иса «иманымызын Баниси вә Камилләшдириҹиси»дир. (Ибраниләрә 12:1, 2 ајәләрини оху.) Павел «Ибраниләрә» мәктубунун 11-ҹи фәслиндә иманы чох ҝөзәл тәсвир едәрәк онун гыса тәрифини верир вә өз иманларына ујғун давранмыш Нуһ, Ибраһим, Сара вә Рахав кими нүмунәви киши вә гадынларын адларыны чәкир. Павел һәмиманлыларыны бүтүн бунлары јадда сахлајараг «иманымызын Баниси вә Камилләшдириҹиси олан Исаја» бахмаға тәшвиг едир. Нәјә ҝөрә?
17 «Ибраниләрә» мәктубун 11-ҹи фәслиндә садаланан садиг киши вә гадынлар Аллаһын вәдләринә бөјүк иман ҝәтирсәләр дә, Онун Өз вәдләрини Мәсиһ вә Падшаһлыг васитәсилә неҹә јеринә јетирәҹәјини там тәфсилаты илә билмирдиләр. Бу мәнада онларын иманы натамам иди. Һәтта Мәсиһ һаггында пејғәмбәрликләри јаздырмаг үчүн Аллаһын истифадә етдији инсанлар јаздыгларынын мәғзини сонадәк анламырдылар (1 Пет. 1:10-12). Јалныз Иса васитәсилә иманымыз мүкәммәл, јәни там ола биләр. Исанын «иманымызын Баниси вә Камилләшдириҹиси» ролуну баша дүшмәк вә гијмәтләндирмәк неҹә дә ваҹибдир!
Ахтарышлары давам етдирин
18, 19. а) Мәсиһдә ҝизләдилмиш диҝәр руһани инҹиләри садалајын. б) Руһани хәзинәләри тапмаг үчүн нәјә ҝөрә Исаја бахмаға давам етмәлијик?
18 Биз Аллаһын нијјәтинә дахил олан бәшәријјәтин хиласында Исанын ојнадығы ваҹиб роллардан јалныз бир нечәсини нәзәрдән кечирдик. Лакин Мәсиһдә ҝизләдилмиш хәзинәләр бунунла битмир. Онлары ахтармаг бизә севинҹ вә фајда ҝәтирәҹәк. Мәсәлән, һәвари Петер Исаны ‘Һәјат Рәиси’ вә доған «дан улдузу» адландырды (Һәв. иш. 3:15; 5:31; 2 Пет. 1:19). Мүгәддәс Китабда Исаја һәмчинин «Амин» титулу да шамил едилир (Вәһј 3:14). Бүтүн бу титулларын мәнасыны вә нә гәдәр ваҹиб олдуғуну билирсинизми? Исанын дедији кими, «ахтарын, тапаҹагсыныз» (Мат. 7:7).
19 Тарих боју һәјаты Иса гәдәр бөјүк әһәмијјәтә малик олан вә әбәди рифаһымыза хидмәт едән икинҹи бир шәхсијјәт олмајыб. Онда олан руһани хәзинәләри истәнилән адам бүтүн үрәклә ахтарарса, тапа биләр. Ҝәлин ‘Мәсиһдә ҝизләдилмиш’ хәзинәләри севинҹлә вә ҹанла-башла ахтармаға давам едәк!
[Һашијә]
a Колослулара 2:1, 2 (ЈД): «Сизин, Лаодикијадакыларын вә мәни шәхсән ҝөрмәјәнләрин һамысынын уғрунда бөјүк мүбаризә апардығымы билмәјинизи истәјирәм. Гој онларын гәлби тәсәлли тапсын, онлар гаршылыглы мәһәббәтдә бирләшсинләр, һәгигәтин там, ајдын анлајышынын зәнҝинлијинә вә Аллаһын мүгәддәс сирри олан Мәсиһ һаггында дәгиг билијә јијәләнсинләр».
Јадыныздадырмы?
• Мәсиһчиләр һансы хәзинәләри ахтармаға тәшвиг олунурлар?
• Нәјә ҝөрә Павелин мәсләһәти бизим үчүн дә актуалдыр?
• ‘Мәсиһдә ҝизләдилмиш’ бәзи руһани инҹиләри садалајын вә онлары изаһ един.
[5-ҹи сәһифәдәки шәкил]
Мүгәддәс Китаб ‘Мәсиһдә ҝизләдилмиш’ хәзинәләрә јол ҝөстәрән бир хәритәдир