‘Ардымҹа ҝәлин’

“Сиз бунун үчүн чағырылдыныз. Чүнки Мәсиһ дә сизә бир нүмунә гојараг, сизин үчүн әләм чәкди ки, сиз Онун изләри илә ҝедәсиниз” (1 ПЕТЕР 2:21, И–93).

1, 2. Исанын бир мүәллим кими гојдуғу камил нүмунә бизим үчүн нәјә ҝөрә тәтбигедилмәз дејил?

ИСА МӘСИҺ јер үзүндә јашамыш ән бөјүк Мүәллим иди. Бундан әлавә, о, камил олмуш вә јер үзүндә јашадығы мүддәтдә һеч заман ҝүнаһ ишләтмәмишдир (1 Петер 2:22). Бәс бу о демәкдирми ки, Исанын бир мүәллим кими гојдуғу нүмунә бизим кими гејри-камил инсанлар үчүн тәтбигедилмәздир? Әсла јох.

² Әввәлки мәгаләдән ҝөрдүјүмүз кими, Исанын мүәллимлик фәалијјәтинин әсасыны мәһәббәт тәшкил едирди. Мәһәббәти исә һәр биримиз инкишаф етдирә биләрик. Аллаһын Кәламы дәфәләрлә бизи башгаларыны даһа мөһкәм вә дәриндән севмәји өјрәнмәјә тәшвиг едир (Филипилиләрә 1:9; Колослулара 3:14). Јеһова һеч заман јаратдығы варлыглардан мүмкүн олмајан шеји ҝөзләмир. “Аллаһ мәһәббәт” олдуғуна вә бизи өз сурәтиндә јаратдығына ҝөрә дејә биләрик ки, О, бизә мәһәббәт тәзаһүр етдирмәк баҹарығы вериб (1 Јәһја 4:8; Тәквин 1:27). Буна ҝөрә дә, мәгаләнин әсас ајәсиндә һәвари Павелин сөзләрини охудугда, она мүвафиг даврана биләҹәјимизә шүбһә етмәјә биләрик. Биз, Мәсиһин изләри илә дәгиг ҝетмәји баҹара биләрик. Бундан әлавә, Исанын ‘ардымҹа ҝәлин’ әмринә табе олмаг игтидарындајыг (Лука 9:23). Ҝәлин Исанын әввәлҹә һәгигәтә мәһәббәтини, сонра исә өјрәтдији инсанлара олан мәһәббәтини неҹә тәглид едәҹәјимизә диггәт јетирәк.

Өјрәндијимиз һәгигәтләрә мәһәббәт инкишаф етдиририк

3. Нәјә ҝөрә бә’зиләринә өјрәнмәк чәтиндир, лакин Сүлејманын мәсәлләри 2:1-5 ајәләри нәјә тәшвиг едир?

³ Башгаларына өјрәтдијимиз һәгигәтләри севмәк үчүн, әввәлҹә өзүмүз һәмин һәгигәтләри өјрәнмәји севмәлијик. Буҝүнкү дүнјада буну етмәк о гәдәр дә асан дејил. Мәктәб тәһсилинин кифајәт гәдәр олмадығындан вә ҝәнҹликдә әмәлә ҝәлән пис вәрдишләр уҹбатындан чохларында тәһсилә гаршы сојуглуг јараныр. Анҹаг Јеһованын тә’лими бизим үчүн олдугҹа ваҹибдир. Сүлејманын мәсәлләри 2:1-5 ајәләриндә дејилир: “Оғлум, гулағыны һикмәтә чевирәрәк вә анлајыша үрәјини мејлләндирәрәк, сөзләрими гәбул едәр вә әмрләрими јанында сахларсанса; ҝерчәк, әҝәр идракы чағырар вә анлајыша сәсини јүксәлдәрсәнсә; әҝәр ҝүмүш ахтарар кими ону ахтарар вә хәзинәләр арашдырар кими ону арашдырарсанса; Рәбб горхусуну о заман анлајаҹагсан вә Аллаһ билијини тапаҹагсан”.

4. ‘Үрәји мејлләндирмәк’ нә демәкдир вә бу ишдә бизә “Аллаһ билијин”ә гаршы неҹә мүнасибәт көмәк едәр?

⁴ Диггәт јетирин ки, бирдән дөрдүнҹү ајәјә гәдәр биз садәҹә ‘гәбул едиб’ вә ‘сахламаға’ дејил, һәмчинин ‘ахтарыб’, ‘арашдырмаға’ да дөнә-дөнә тәшвиг олунуруг. Бизи буна нә тәшвиг етмәлидир? Ҝәлин “анлајыша үрәјини мејлләндирәрәк” ифадәсинә диггәт јетирәк. Бир арајыш китабчасында дејилир ки, бу, “садәҹә диггәтли олмаға чағырыш дејил; бу, мүвафиг әһвал-руһијјәјә малик олмаг, јә’ни тә’лимә гаршы хүсусилә һәссас олмаға даир тәләбдир”. Бәс Јеһованын тә’лиминә гаршы һәссас олмагда бизә нә көмәк едә биләр? Бу тә’лимләрә гаршы олан мүнасибәтимиз. Биз, “Аллаһ билијинә” “ҝүмүш” вә “хәзинәләр” кими бахмалыјыг.

5, 6. а) Вахт кечдикҹә нә баш верә биләр вә бунун гаршысыны неҹә алмаг олар? б) Мүгәддәс Китабдан әлдә етдијимиз билик хәзинәләрини нәјә ҝөрә артырмалыјыг?

⁵ Белә мүнасибәти инкишаф етдирмәк чәтин дејил. Мәсәлән, сәнин гәбул етдијин “Аллаһ билији”, Јеһованын нијјәтинә әсасән Она садиг инсанларын јер үзү Ҹәннәтдә әбәди јашајаҹаглары һаггында һәгигәти дә, еһтимал ки, өзүнә дахил едир (Мәзмур 37:28, 29). Бу һәгигәти јени өјрәнән заман, сөзсүз ки, ону әсл бир хәзинә, зеһнини вә үрәјини үмид вә севинҹлә долдуран бир билик кими гәбул етмишдин. Бәс инди неҹә? Вахт кечдикҹә бу хәзинәјә олан миннәтдарлыг һиссин зәифләмәјиб ки? Әҝәр еләдирсә, нөвбәти ики аддымы атмаға чалыш. Биринҹиси, өзүндә олан миннәтдарлыг һиссини ҹанландыр, һәтта илләр өнҹә өјрәнмиш олдуғун, Јеһованын өјрәтдији һәр бир һәгигәти нәјә ҝөрә гијмәтләндирдијини мүнтәзәм шәкилдә хатырла.

⁶ Икинҹиси, хәзинәни артырмаға давам ет. Мисал үчүн, әҝәр тәсадүфән јолдан гијмәтли бир даш тапсајдын, ону садәҹә ҹибинә гојуб мәмнун һалда јолуна давам едәрдин? Јохса јенә даш олуб олмадығыны јохламаг үчүн, јери газмаға башлајардын? Аллаһын Кәламы гијмәтли дашлара бәнзәјән дәјәрли һәгигәтләрлә долудур. Нә гәдәр дәјәрли һәгигәтләр әлдә етмиш олсан да, даһа чох тапмаг мүмкүндүр (Ромалылара 11:33). Һәгигәтин јени бир саһәсини өјрәндикдә өзүндән соруш: Буну дәјәрли едән нәдир? Бу, Јеһованын шәхсијјәтини вә ја нијјәтләрини даһа дәриндән анламагда мәнә көмәк едирми? Исанын изләри илә ҝетмәјә көмәк едәҹәк практики рәһбәрлик верирми? Бу ҹүр суалларын үзәриндә дүшүнмәк, Јеһованын бизә өјрәтдији һәгигәтләрә мәһәббәт инкишаф етдирмәјә көмәк едәҹәкдир.

Өјрәтдијимиз һәгигәтләрә мәһәббәт

7, 8. Мүгәддәс Китабдан өјрәндијимиз һәгигәтләри севдијимизи инсанлара неҹә ҝөстәрә биләрик? Нүмунә ҝәтирин.

⁷ Инсанлара һәгигәти өјрәдәркән, Аллаһын Кәламындан өјрәндијимиз һәгигәтләри севдијимизи неҹә ҝөстәрә биләрик? Исанын нүмунәсини изләјәрәк, тәблиғ едән вә өјрәдән заман тамамилә Мүгәддәс Китаба истинад едирик. Сон заманлар Аллаһын халгы бүтүн дүнјада тәблиғ фәалијјәтиндә Мүгәддәс Китабы даһа чох истифадә етмәјә тәшвиг олунур. Бу мәсләһәтә риајәт едәрәк тәблиғ етдијин инсанлара Аллаһын Кәламындан бөлүшдүјүн һәгигәтләри гијмәтләндирдијини ҝөстәрмәк үчүн үсуллар ахтар (Матта 13:52).

⁸ Мәсәлән, кечән ил Нју-Јоркда баш верән террор актларындан сонра, бир мәсиһчи баҹымыз хидмәтдә раст ҝәлдији инсанлара Мәзмур 46:1, 11 ајәләрини охујурду. Әввәлҹә инсанлардан јаранан фаҹиәнин сарсынтысына неҹә таб ҝәтирдикләрини хәбәр алырды. Онларын ҹавабларыны диггәтлә динләјир, баша дүшдүјүнү билдирир, сонра исә дејирди: “Иҹазәнизлә мән сизә, бу чәтин заманда мәнә тәсәлли верән Мүгәддәс Китабдан бир ајәни охумаг истәјәрдим”. Имтина едәнләр аз иди вә нәтиҹәдә чохлары илә мараглы сөһбәтләр башланды. Һәмин баҹымыз ҝәнҹләрлә сөһбәт едәркән чох вахт белә дејир: “Дүз 50 илдир ки, мән Мүгәддәс Китаб биликләрини инсанларла бөлүшүрәм вә индијә гәдәр елә бир проблем олмајыб ки, бу китаб онун һәллиндә көмәк едә билмәсин”. Ҝөстәрдијимиз сәмимилик вә руһ јүксәклији инсанлара көмәк едәҹәкдир ки, Аллаһын Кәламындан өјрәндијимиз һәгигәтләри гијмәтләндириб, онлары севдијимизи ҝөрсүнләр (Мәзмур 119:97, 105).

9, 10. Е’тигадымыз барәсиндә суаллара ҹаваб вердикдә нәјә ҝөрә Мүгәддәс Китабы истифадә етмәк ваҹибдир?

⁹ Инсанлар бизим е’тигадымыз барәдә сорушдугда, Аллаһын Кәламына олан мәһәббәтимизи ҝөстәрмәк үчүн ҝөзәл имкан јараныр. Исанын нүмунәсини тәглид едәрәк, ҹавабларымызда өз идејаларымыза әсасланмырыг (Сүлејманын мәсәлләри 3:5, 6). Әксинә, ҹаваб верәркән Мүгәддәс Китабы истифадә едирик. Киминсә сәнә ҹаваб верә билмәјәҹәјин бир суал вермәсиндән горхурсанмы? Белә һалда атаҹағын ики аддымы нәзәрдән кечирәк.

¹⁰ Һазырлыглы олмаг үчүн әлиндән ҝәләни ет. Һәвари Петер јазмышды: “Рәбб Аллаһы үрәкләриниздә тәгдис един. Малик олдуғунуз үмид барәсиндә сиздән һесабат истәјән һәр кәсә һәмишә мүлајимликлә вә еһтирамла ҹаваб вермәк үчүн һазыр олун” (1 Петер 3:15). Е’тигадыны мүдафиә етмәјә һазырсанмы? Мәсәлән, әҝәр кимсә сәндән Мүгәддәс Китаба әсасланмајан адәт вә ја мәшғулијјәтдә иштирак етмәдијинин сәбәбини өјрәнмәк истәјирсә, һәмин адама садәҹә: “Бу мәним динимә зиддир”, демәклә кифајәтләнмә. Бу ҹүр ҹаваб елә бир тәәссүрат јарада биләр ки, сән башгаларынын сәнин јеринә гәрар гәбул етмәсинә јол верирсән, демәли, һансыса тәригәтин үзвүсән. Јахшы оларды ки, “Буна, Аллаһын Кәламында, Мүгәддәс Китабда јол верилмир” вә ја “Бу, мәним Аллаһыма мәгбул дејил” дејиб, сонра исә мәнтигә ујғун фактлар ҝәтирәсән (Ромалылара 12:1).

11. Һансы вәсаит Аллаһын Кәламындан олан һәгигәтләрә даир суаллара ҹаваб вермәкдә һазырлыглы олмағымыза көмәк едә биләр?

¹¹ Әҝәр һазырлыгсыз олдуғуну дүшүнүрсәнсә, нәјә ҝөрә “Мүгәддәс Китаб әсасында сөһбәт етмәк үчүн мөвзулар” брошүрасыны (русҹа) өјрәнмәјә бир аз вахт ајырмајасан?a Хидмәтдә тохунула биләҹәк бә’зи мөвзулары сеч вә Мүгәддәс Китабда олан бир нечә фактлары јадда сахла. Мүгәддәс Китаб вә “Мүгәддәс Китаб әсасында сөһбәт етмәк үчүн мөвзулар” брошүрасы әлинин алтында олсун. Һәр икисини дә истифадә етмәкдән чәкинмә, Мүгәддәс Китабдан бу вә ја диҝәр суаллара ҹаваб тапмаг үчүн мәмнунијјәтлә бу брошүраја мүраҹиәт етдијини изаһ ет.

12. Әҝәр Мүгәддәс Китаба даир верилән суалын ҹавабыны билмириксә, нә дејә биләрик?

¹² Әбәс јерә нараһатчылыгдан гачын. Гејри-камил инсанлар арасында һәр суала ҹаваб билән јохдур. Буна ҝөрә дә, сәнә Мүгәддәс Китаба даир ҹавабыны билмәдијин суал вердикдә һәмишә тәхминән белә дејә биләрсән: “Чох мараглы суалдыр. Доғрусуну десәм, мән бу суалын ҹавабыны билмирәм, анҹаг әминәм ки, Мүгәддәс Китабда бу суала ҹаваб вар. Мән бөјүк мәмнунијјәтлә Мүгәддәс Китабы тәдгиг едирәм вә буна ҝөрә дә вердијиниз суалын ҹавабыны тапыб, тәкрар сизин јаныныза ҝәләҹәјәм”. Бу ҹүр сәмими вә мүлајим мүнасибәт даһа сонра сөһбәти давам етдирмәк үчүн јахшы шәраит јарада биләр (Сүлејманын мәсәлләри 11:2).

Һәгигәти өјрәтдијимиз инсанлара мәһәббәт

13. Нәјә ҝөрә тәблиғ етдијимиз инсанлара гаршы мүсбәт нөгтеји-нәзәримизи горујуб сахламалыјыг?

¹³ Иса һәгигәти өјрәтдији инсанлара мәһәббәт ҝөстәрирди. Бу саһәдә ону неҹә тәглид едә биләрик? Биз һеч вахт әтрафымыздакы инсанлара гаршы лагејд олмалы дејилик. Доғрудур, “Күлл-Ихтијар Аллаһын бөјүк ҝүнүндә баш верәҹәк мүһарибә” ҝетдикҹә јахынлашыр вә милјардларла инсанлар арасында чохлары мәһв едиләҹәкдир (Вәһј 16:14; Јеремја 25:33). Лакин биз кимин сағ галыб, кимин дә мәһв олаҹағындан бихәбәрик. Бу һөкм ҝәләҹәкдә вериләҹәк вә Јеһованын тә’јин етдији кәс — Иса Мәсиһ тәрәфиндән иҹра олунаҹагдыр. Дүшүнүрүк ки, бу һөкм ҝүнү башлајанадәк һәр бир кәс Јеһованын хидмәтчиси ола биләр (Матта 19:24-26; 25:31-33; Һәвариләрин ишләри 17:31).

14. а) Инсанлара гаршы шәфгәтли олуб-олмадығымызы неҹә јохлаја биләрик? б) Башгаларына гаршы шәфгәтли олмағы вә онларла марагландығымызы тәҹрүбәдә неҹә ҝөстәрә биләрик?

¹⁴ Буну нәзәрә алараг, Иса кими биз дә әтрафымыздакы инсанлара гаршы шәфгәтли олмаға чалышырыг. Өзүмүздән соруша биләрик: Бу дүнјанын дини, сијаси вә тиҹарәт аләми тәрәфиндән мәһарәтлә сөјләнилән јаланларын вә һијләләрин гурбаны олан кәсләрә аҹыјыраммы? Сөјләдијимиз хәбәрә е’тинасыз јанашырларса, бунун сәбәбини анламаға чалышыраммы? Һал-һазырда Јеһоваја хидмәт едәнләрин, һәмчинин шәхсән өзүмүн дә бир заманлар бу хәбәрә гаршы е’тинасыз олдуғум јадымдадырмы? Тәблиғ үсулуму онлара ујғунлашдырыраммы? Јохса елә дүшүнүрәм ки, бу ҹүр адамларла сөһбәт етмәк фајдасыздыр? (Вәһј 12:9). Инсанлар бизим сәмими гәлбдән шәфгәт ҝөстәрдијимизи һисс етдикдә, ҝәтирдијимиз хәбәрә һај верәҹәкләри еһтималы артыр (1 Петер 3:8). Шәфгәтлилик хидмәтдә раст ҝәлдијимиз инсанлара даһа чох мараг ҝөстәрмәјә дә тәшвиг едәҹәкдир. Биз онларын суалларына, онлары нараһат едән мәсәләләрә диггәт јетирә биләрик. Беләликлә, тәкрар башчәкмә заманы ҝөстәрәҹәјик ки, кечән дәфә онларын дедикләри үзәриндә дүшүнмүшүк. Вә әҝәр онларын нәјә исә тә’ҹили еһтијаҹлары варса, һансыса көмәк ҝөстәрә биләҹәјимиз истисна дејил.

15. Нәјә ҝөрә инсанлардакы јахшы ҹәһәтләри ҝөрмәјә чалышмалыјыг вә буну неҹә едә биләрик?

¹⁵ Иса кими, биз дә инсанларда олан јахшы ҹәһәтләри ҝөрмәјә чалышырыг. Тутаг ки, хидмәтдә ушагларынын тәрбијәсиндә тә’рифәлајиг сә’ј ҝөстәрән тәнһа анаја, аиләсини тә’мин етмәк үчүн әлиндән ҝәләни едән кишијә, руһани мәсәләләрә мараг ҝөстәрән јашлы адама раст ҝәлирик. Биз бу инсанлардакы јахшы ҹәһәтләри ҝөрүб, онлары тә’рифләјирикми? Бу ҹүр давранараг арамызда үмуми бир шејин олдуғуну вурғуламыш олуруг, бу исә бизә Падшаһлыг һаггында шаһидлик етмәјә имкан јарада биләр (Һәвариләрин ишләри 26:2, 3).

Мәһәббәт ҝөстәрмәк үчүн тәвазөкарлыг ваҹибдир

16. Нәјә ҝөрә тәблиғ етдијимиз инсанларла мүнасибәтдә һәмишә мүлајимлик вә еһтирам ҝөстәрмәк ваҹибдир?

¹⁶ Һәгигәти өјрәтдијимиз инсанлара олан мәһәббәт, бизи Мүгәддәс Китабын мүдрик хәбәрдарлығына диггәт јетирмәјә тәшвиг едәҹәкдир: “Билик инсаны ловғаландырыр, мәһәббәт исә руһән инкишаф етдирир” (1 Коринфлиләрә 8:1). Иса дәрин билијә саһиб иди, лакин о, һеч заман ловғаланмырды. Буна ҝөрә дә, инсанлара өз е’тигадын һаггында данышаркән мүбаһисә етмәк истәјини билдирән рәфтардан, јахуд өзүнү үстүн тутмаг һиссиндән гачын. Чүнки мәгсәдимиз инсанларын үрәјинә јол тапмаг, онлары севдијимиз һәгигәтләрә ҹәлб етмәкдир (Колослулара 4:6). Унутмајаг ки, Петер мәсиһчиләри мүдафиәјә һазыр олмаға тәшвиг едәркән хатырлатды ки, һәгигәти “мүлајимликлә вә еһтирамла” мүдафиә етмәк лазымдыр (1 Петер 3:15). Әҝәр биз мүлајимлик вә еһтирам ҝөстәририксә, еһтимал ки, инсанлары хидмәт етдијимиз Аллаһа ҹәлб едәҹәјик.

17, 18. а) Бир тәблиғчи кими габилијјәтли олмағымыза даир тәнгиди мүнасибәтләрә неҹә јанашмалыјыг? б) Мүгәддәс Китабын јазылдығы гәдим дилләри билмәк, бу китабы өјрәнәнләр үчүн нәјә ҝөрә әсас шәрт дејил?

¹⁷ Мәгсәдимиз, билијимиз вә тәһсилимизлә инсанлара тәәссүрат бағышламаг дејил. Әҝәр саһәдә ким исә университет тәһсили вә ја вәзифәси олмајанлары динләмирсә, руһдан дүшмәк лазым дејил. Иса мәшһур раввин мәктәбләри битирмәдији үчүн едилән е’тиразлара фикир вермирди; бундан башга Иса о заман ҝениш јајылмыш габагҹадан јаранан јанлыш фикирләрә риајәт етмир вә әтрафындакы инсанлара дәрин билији илә тәәссүрат бағышламаға чалышмырды (Јәһја 7:15).

¹⁸ Тәвазөкарлыг вә мәһәббәт мәсиһчиләр үчүн истәнилән дүнјәви тәһсилдән даһа ваҹибдир. Бизи хидмәтә габилијјәтли едән Даһи Педагог Јеһовадыр (2 Коринфлиләрә 3:5, 6). Христиан дүнјасынын диндарлары нә дејирләр десинләр, Аллаһын Кәламынын мүәллимләри олмаг үчүн Мүгәддәс Китабын јазылдығы гәдим дилләри өјрәнмәк лазым дејил. Јеһованын мүгәддәс руһунун рәһбәрлији алтында Мүгәддәс Китаб о гәдәр садә вә ајдын дилдә јазылыб ки, һәр кәс онун дәјәрли һәгигәтләрини анламаг игтидарындадыр. Бу һәгигәтләр јүзләрлә, минләрлә дилә тәрҹүмә едилсә дә, дәјишмәз олараг галмагдадыр. Буна ҝөрә дә, гәдим дилләри билмәк бә’зи һалларда јарарлы олса да, бу әсас шәрт дејил. Амма инсан дилбилмә габилијјәти илә гүррәләнирсә, мәсиһчиләрә хас олан өјрәнмәјә һазыр олмаг кими ваҹиб кејфијјәти итирә биләр (1 Тимотејә 6:4).

19. Мәсиһчи хидмәтимиз һансы мә’нада тәвазөкарлыг тәләб едән фәалијјәтдир?

¹⁹ Мәсиһчи хидмәтинин тәвазөкар дүшүнҹә тәрзи тәләб етдијинә шүбһә ола билмәз. Биз һәмишә мүгавимәт, е’тинасызлыг вә тә’гиблә үзләширик (Јәһја 15:20). Лакин хидмәтимизи сәдагәтлә јеринә јетирәрәк, һәјати ваҹиб иши ҝөрмүш олуруг. Бу иши јеринә јетирәрәк башгаларына тәвазөкарлыгла хидмәт етмәјә давам едириксә, Иса Мәсиһин инсанлара ҝөстәрдији мәһәббәтини тәглид етмиш олуруг. Буну дүшүн: бир нәфәр һәлим инсаны тапмаг үчүн, е’тинасызлыг вә мүгавимәт ҝөстәрән мин нәфәрә тәблиғ етмәк лазым ҝәлсәјди, мәҝәр ҝөстәрдијимиз сә’ј өзүнү доғрултмаздымы? Әлбәттә, доғрулдарды! Буна ҝөрә дә, руһдан дүшмәјиб, даһа да сә’ј ҝөстәрәрәк биз һәлә раст ҝәләҹәјимиз һәмин һәлим инсанлара хидмәт етмиш олуруг. Сөзсүз ки, Јеһова вә Иса бу системин сону ҝәлмәздән әввәл, дәјәрли инсанларын һәлә чохунун тапылмасынын вә онлара көмәк едилмәсинин гејдинә галаҹаглар (Һаггај 2:7).

20. Башгаларыны шәхси нүмунәмизлә неҹә өјрәдә биләрик?

²⁰ Башгаларына хидмәт етмәјә һазыр олдуғумузу ҝөстәрмәјин үсулларындан бири дә онлары шәхси нүмунәмизлә өјрәтмәкдир. Мәсәлән, биз инсанлара, “бәхтијар Аллаһ” олан Јеһоваја хидмәт етмәјин ән јахшы вә ән чох мәмнунлуг ҝәтирән бир јол олдуғуну өјрәтмәк истәјирик (1 Тимотејә 1:11, ЈД). Инсанлар, бизим гоншуларымызла, синиф вә иш јолдашларымызла мүнасибәтимиздән вә өзүмүзү неҹә апармағымыздан, мәмнун вә хошбәхт олдуғумузу ҝөрүрләрми? Бундан әлавә, биз Мүгәддәс Китабы өјрәнәнләрә, мәсиһчи јығынҹағынын бу сојуг вә амансыз дүнјада мәһәббәт долу бир сығынаҹаг јери олдуғуну өјрәдирик. Һәгигәти өјрәтдијимиз кәсләр јығынҹағын бүтүн үзвләрини севдијимизи вә бир-биримизлә әмин-аманлыгда олмаг үчүн виҹданла чалышдығымызы дәрһал ҝөрүрләрми? (1 Петер 4:8).

21, 22. а) Шәраитимизи вә дүшүнҹә тәрзимизи јохласаг, һансы имканлардан истифадә едә биләрик? б) Нөвбәти мәгаләләрдә нә мүзакирә олунаҹагдыр?

²¹ Хидмәтдә әлимиздән ҝәләни етмәјә һазыр олмаг, һәрдән бизи өз шәраит вә дүшүнҹә тәрзимизи јохламаға тәшвиг едә биләр. Дүзҝүн тәрздә апарылан бу ҹүр јохлама чохларына хидмәтләрини ҝенишләндирмәкдә көмәк едир: онлар таммүддәтли хидмәтә башлајыр, јахуд даһа чох тәләбат олан әразијә көчүрләр. Диҝәрләри, әразиләринә башга өлкәләрдән ҝәлән вә сајы артмагда олан инсанлара хидмәт етмәк үчүн хариҹи дил өјрәнмәји гәрара алырлар. Әҝәр сәнин үчүн дә бу ҹүр имканлар ачыгдырса, онларын үзәриндә диггәтлә вә дуа едәрәк дүшүн. Хидмәтә һәср едилмиш һәјат севинҹ, мәмнунијјәт вә дахили раһатлыг ҝәтирир (Ваиз 5:12).

²² Өјрәтдијимиз һәгигәтләрә вә һәгигәти өјрәтдијимиз инсанлара олан мәһәббәтимизи артырараг, бундан сонра да Иса Мәсиһи тәглид етмәјә давам едәҹәјик. Әҝәр бу ики саһәдә мәһәббәт инкишаф етдирир вә ҝөстәририксә, бу бизә Мәсиһә бәнзәр мүәллим олмаг үчүн мөһкәм тәмәл гојмаға көмәк едәҹәкдир. Бәс бу тәмәлин үзәриндә неҹә инша едә биләрик? Нөвбәти мәгаләләрдә Исанын мүәллимлик фәалијјәтинә даир бир сыра нүмунәләр мүзакирә олунаҹагдыр.

[Һашијә]

Сиз неҹә ҹаваб верәрдиниз?

• Нәјә ҝөрә әмин ола биләрик ки, Исанын гојдуғу мүәллимлик нүмунәси бизим үчүн тәтбигедилмәз дејил?

• Мүгәддәс Китабдан өјрәндијимиз һәгигәтләри севдијимизи неҹә ҝөстәрә биләрик?

• Билијимизи артырараг тәвазөкар галмағымыз нәјә ҝөрә ваҹибдир?

• Һәгигәти өјрәтмәјә чалышдығымыз инсанлара һансы үсулларла мәһәббәт ҝөстәрмәк олар?

[12-ҹи сәһифәдәки шәкилләр]

Һазырлыглы олмаг үчүн әлиндән ҝәләни ет.

[12 вә 13-ҹү сәһифәләрдәки шәкилләр]

“Аллаһ билијини” гијмәтләндирирсәнсә, Мүгәддәс Китабы фајдалы шәкилдә истифадә едә биләҹәксән.

[14-ҹү сәһифәдәки шәкил]

Хош хәбәри инсанларла бөлүшәрәк, онлара мәһәббәт ҝөстәририк.