Иса Мәсиһин јолу илә ҝедин
«Ким дејирсә ки, Онда [Аллаһда] јашајыр, О [Иса] неҹә һәрәкәт етдисә, өзү дә ејни ҹүр һәрәкәт етмәлидир» (1 ЈӘҺЈА 2:6).
1, 2. Ҝөзүмүзү Исадан ајырмамаг нә демәкдир?
ҺӘВАРИ ПАВЕЛ јазмышдыр: «Гаршымыза гојулан јарышда мәтанәтлә гачаг. Ҝөзүмүзү иманымызын Башчысы вә Камилләшдириҹиси олан Исадан ајырмајаг» (Ибраниләрә 12:1, 2, ЈД). Сәдагәт јолундан дөнмәмәк үчүн ҝөзүмүзү Иса Мәсиһдән ајырмамалыјыг.
2 Јунанҹа Мүгәддәс Јазыларда «ҝөзүнү ајырмамаг» кими тәрҹүмә олунан сөз орижинал дилдә «бүтүн диггәти бир истигамәтә јөнәлтмәк», «нәзәрини бир шејдән чәкиб, башга бир шејә јөнәлтмәк», «ҝөзүнү чәкмәдән, диггәтлә бахмаг» мә’насыны дашыјыр. Бир арајыш китабчасында гејд едилир: «Јунанлы гачыҹы тамашачылара бахмаг үчүн, гачыш јолундан вә өз мәгсәдиндән јајындығы анда сүр’әтини итирирди. Ејни шеј мәсиһчиләрлә дә баш верир». Диггәтимизин јајынмасы руһани инкишафымыза манечилик төрәдә биләр. Ҝөзүмүзү Иса Мәсиһдән ајырмамалыјыг. Башчымызын һансы хүсусијјәтләринә диггәт јетирмәлијик? «Башчы» кими тәрҹүмә олунан јунан сөзү «һәр һансы бир ишдә тәшәббүсү өз үзәринә ҝөтүрән вә бунунла да нүмунә верән рәһбәр» мә’насыны дашыјыр. Беләликлә, ҝөзүмүзү Исадан ајырмамаг — онун нүмунәсини тәглид етмәк демәкдир.
3, 4. а) Иса кими давранмаг үчүн биздән нә тәләб олунур? б) Һансы суаллар диггәтимизә лајигдир?
3 Мүгәддәс Китабда нөвбәти сөзләр јазылыб: «Ким дејирсә ки, Онда [Аллаһда] јашајыр, О [Иса] неҹә һәрәкәт етдисә, өзү дә ејни ҹүр һәрәкәт етмәлидир» (1 Јәһја 2:6). Иса Атасынын әмрләрини јеринә јетирдији кими, биз дә Исанын әмрләрини јеринә јетирәрәк, Аллаһла вәһдәтдә олмалыјыг (Јәһја 15:10).
4 Анҹаг Исанын һәрәкәт етдији кими һәрәкәт етмәк, ону бир Башчы кими диггәтлә изләмәк вә ејнилә онун изләри илә ҝетмәк демәкдир. Бунунла әлагәдар ваҹиб суаллар мејдана чыхыр: бәс Мәсиһ бу ҝүн бизә неҹә башчылыг едир? Ону тәглид етмәјимиз бизә неҹә тә’сир етмәлидир? Мәсиһин нүмунәсини изләмәјимиз бизә һансы фајданы ҝәтирир?
Мәсиһ өз давамчыларына неҹә башчылыг едир?
5. Ҝөјә галхмаздан әввәл Иса өз давамчыларына нә вә’д етди?
5 Ҝөјә галхмаздан әввәл, Иса өз шаҝирдләринә ҝөрүндү вә онлара ваҹиб бир иш тапшырды. О деди: «Ҝедин, бүтүн халглары шаҝирдим един». Мәсиһ бу ишдә бир Башчы кими онларла олаҹағыны вә’д етди: «Мән, дөврүн сонуна гәдәр һәр ҝүн сизинләјәм» (Матта 28:19, 20). Исанын бу системин сонунда өз давамчылары илә олдуғу нәдән ҝөрүнүр?
6, 7. Иса мүгәддәс руһ васитәсилә бизә неҹә башчылыг едир?
6 Иса демишди: «Мәним исмимлә Атанын ҝөндәрәҹәји Јардымчы, Мүгәддәс Руһ — О, сизә һәр шеји өјрәдәҹәк вә сизә сөјләдијим һәр шеји хатырладаҹаг» (Јәһја 14:26, И–93). Исанын исмилә ҝөндәрилән мүгәддәс руһ бу ҝүн бизә рәһбәрлик едир вә мөһкәмләндирир. О, бизи руһани ҹәһәтдән маарифләндирир вә һәтта «Аллаһын дәрин дүшүнҹәләрини» баша дүшмәјә көмәк едир (1 Коринфлиләрә 2:10). Бундан әлавә, Аллаһын руһунун сәмәрәсинә «мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик, өзүнә һаким олмаг» кими кејфијјәтләр дахилдир (Галатијалылара 5:22, 23). Мүгәддәс руһун көмәјилә биз өзүмүздә бу хүсусијјәтләри инкишаф етдирә биләрик.
7 Мүгәддәс Китабы өјрәнән вә өјрәндикләримизи тәтбиг етмәјә чалышан заман, Јеһованын руһу бизә һикмәт, дәрракә, әдаләт, идрак вә мүдриклик инкишаф етдирмәјә көмәк едир (Сүлејманын мәсәлләри 2:1-11). Мүгәддәс руһ бизә сынагларын вә ширникдириҹи тә’сирләрин өһдәсиндән ҝәлмәкдә дә көмәк едир (1 Коринфлиләрә 10:13; 2 Коринфлиләрә 4:7; Филипилиләрә 4:13). Мәсиһчиләр өзләрини ‘һәр бир бәдән вә руһ мурдарлығындан тәмизләмәјә вә Аллаһ горхусу илә камил гүдсијјәти әлдә етмәјә’ тәшвиг олунурлар (2 Коринфлиләрә 7:1). Мәҝәр биз Аллаһын руһунун көмәји олмадан Онун тәләб етдији гүдсијјәти, јә’ни мә’нәви тәмизлији әлдә едә биләрикми? Мүгәддәс руһ — бизә башчылыг етмәк үчүн Јеһова Аллаһын Исаја е’тибар етдији васитәләрдән биридир (Матта 28:18).
8, 9. Мәсиһ өз јығынҹағына «садиг вә ағыллы гул»ун васитәсилә неҹә башчылыг едир?
8 Мәсиһин бу ҝүн јығынҹаға даһа неҹә башчылыг етдијини нәзәрдән кечирәк. Өз иштиракы вә дөврүн сону һагда Иса демишдир: «Белә исә, вахтлы-вахтында онлара јемәк вермәк үчүн, ағасынын өз нөкәрләры үзәринә гојдуғу садиг вә ағыллы гул кимдир? О гул нә бәхтијардыр ки, ағасы ҝәлдији заман, ону бу ҹүр иш ҝөрмәкдә тапаҹагдыр. Сизә доғрусуну дејирәм ки, ағасы бүтүн маликанәсинин идарәсини она тапшыраҹагдыр» (Матта 24:3, 45-47).
9 «Аға» — Иса Мәсиһдир. «Гул» исә, јер үзүндә јашајан мәсһ олунмуш мәсиһчиләр групудур. Бу «гула», Исанын јер үзүндәки маликанәсинин гејдинә галмаг вә вахтлы-вахтында руһани гиданы вермәк һәвалә олунуб. «Садиг вә ағыллы гул» синфинин үзвләриндән ибарәт тәҹрүбәли ағсаггалларын кичик бир групу «гулун» тәмсилчиси кими хидмәт едән Рәһбәрлик шурасыны тәшкил едир. Онлар Падшаһлығын үмумдүнја тәблиғ ишинә рәһбәрлик едир вә руһани гиданы вахтлы-вахтында верирләр. Беләликлә, Мәсиһ өз јығынҹағына руһла мәсһ едилмиш «садиг вә ағыллы гул»ун вә бу «гулун» тәмсилчиси олан Рәһбәрлик шурасынын васитәсилә башчылыг едир.
10. Биз ағсаггаллара неҹә јанашмалыјыг вә нәјә ҝөрә?
10 Һәмчинин, Мәсиһ бизә «инсанлар тимсалында һәдијјәләр» (ЈД), јә’ни мәсиһчи ағсаггаллар вә ја нәзарәтчиләр васитәсилә башчылыг едир. Онлар «мүгәддәсләр хидмәт ишини иҹра етмәк вә Мәсиһин бәдәнини инкишаф етдирмәк үчүн тә’мин едилсинләр» дејә верилмишләр (Ефеслиләрә 4:8, 11, 12). Ибраниләрә 13:7 ајәсиндә онлар һаггында дејилир: «Аллаһын кәламыны сизә нағыл едән рәисләринизи јада салын. Онларын јашајышынын нәтиҹәсинә бахараг, иманларыны тәглид един». Ағсаггаллар јығынҹагда рәһбәрлији өз үзәрләринә ҝөтүрүрләр. Мәсиһи тәглид етдикләри үчүн, онларын иманы да тәглид едилмәјә лајигдир (1 Коринфлиләрә 11:1). Ағсаггаллара итаәткарлыг ҝөстәрмәклә, «инсанлар тимсалында һәдијјәләр»ә ҝөрә миннәтдар олдуғумузу ҝөстәрәҹәјик (Ибраниләрә 13:17).
11. Мәсиһ бу ҝүн өз давамчыларына неҹә башчылыг едир вә онун изләри илә ҝетмәк нә демәкдир?
11 Беләликлә, Иса Мәсиһ өз давамчыларына бу ҝүн мүгәддәс руһ, «садиг вә ағыллы гул» вә јығынҹағын ағсаггаллары васитәсилә башчылыг едир. Мәсиһин изләри илә ҝетмәк үчүн, онун өз давамчыларына неҹә башчылыг етдијини баша дүшмәк вә онун рәһбәрлијинә табе олмаг лазымдыр. Бу, һәмчинин онун һәјат тәрзини тәглид етмәк демәкдир. Һәвари Петер јазырды: «Сиз бунун үчүн чағырылдыныз. Чүнки Мәсиһ дә бизә бир нүмунә гојараг, бизим үчүн изтираб чәкди ки, биз Онун изләри илә ҝедәк» (1 Петер 2:21). Ҝәлин ҝөрәк, Мәсиһин камил нүмунәси онун давамчыларына неҹә тә’сир етмәлидир.
Һакимијјәтдән мүлајимликлә истифадә етмәк
12. Ағсаггаллар Мәсиһин нүмунәсини хүсусилә һансы саһәләрдә тәглид етмәлидирләр?
12 Атасы Исаја мүгајисә олунмаз һакимијјәт вермишди, лакин о, бу һакимијјәтдән мүлајимликлә истифадә едирди. Јығынҹағын һәр бир үзвү, хүсусилә дә ағсаггаллар чалышмалыдырлар ки, онларын мүлајимлији «бүтүн инсанлара мә’лум олсун» (Филипилиләрә 4:5; 1 Тимотејә 3:2, 3). Ағсаггаллар јығынҹагда мүәјјән һакимијјәтә малик олдуглары үчүн, онларын Мәсиһин изләри илә ҝетмәләри вә бу һакимијјәтдән мүлајимликлә истифадә етмәләри чох ваҹибдир.
13, 14. Ағсаггаллар башгаларыны Аллаһа хидмәт етмәјә тәшвиг едәндә Исанын нүмунәсини неҹә тәглид едә биләрләр?
13 Иса шаҝирдләрин мәһдуд имканларыны нәзәрә алырды. О, башгаларындан ҝүҹләри чатмајан ишләри тәләб етмирди (Јәһја 16:12). Иса өз давамчыларына һеч бир тәзјиг ҝөстәрмәдән Аллаһын ирадәсини јеринә јетирмәк үчүн вар гүввәләрини сәрф етмәјә тәшвиг едирди (Лука 13:24). О, шаҝирдләрини өз нүмунәси илә өјрәдир вә онларын үрәкләринә хитаб едирди. Буна бәнзәр тәрздә, бу ҝүн мәсиһчи ағсаггаллар да ҝүнаһландырмаг вә ја утандырмаг јолу илә башгаларына һәдә-горху ҝәлмир вә онлары Аллаһа хидмәт етмәјә мәҹбур етмирләр. Бунун әвәзинә, онлар Јеһоваја, Онун Оғлуна вә өз гоншуларына мәһәббәтдән ирәли ҝәләрәк хидмәт етмәјә тәшвиг едирләр (Матта 22:37-39).
14 Иса инсанларын һәјатыны идарә етмәјә чалышараг, она һәвалә олунан һакимијјәтдән суи-истифадә етмирди. О, мүмкүн олмајан шејләр тәләб етмир вә сајсыз-һесабсыз гајда-ганунлар гојмурду. О чалышырды ки, Муса васитәсилә верилән ганунларын әсасыны тәшкил едән принсипләр онларын үрәјинә јол ачсын (Матта 5:27, 28). Исанын нүмунәсини тәглид едәрәк, ағсаггаллар нә шәхси гајда-ганунларыны тә’сис етмәз, нә дә ки, өз нөгтеји-нәзәрләринин үстүндә инад етмәзләр. Онлар ҝејимә, косметикаја, истираһәтә вә әјләнҹәјә даир Микеја 6:8, 1 Коринфлиләрә 10:31-33 вә 1 Тимотејә 2:9, 10 ајәләриндәки принсипләри рәһбәр тутараг, һәмиманлыларын үрәкләринә јол тапмаға чалышырлар.
Шәфгәтли вә бағышлајан олун
15. Иса шаҝирдләринин сәһвләринә неҹә реаксија ҝөстәрирди?
15 Шаҝирдләринин сәһвләрә јол вермәләринә бахмајараг, Мәсиһин онларла давраныш тәрзи бизим үчүн ҝөзәл нүмунәдир. Онун јер үзүндәки һәјатынын сон ҝеҹәсиндә баш верән ики һадисәни нәзәрдән кечирәк. Ҝетсамани бағына ҝәләндә Иса «Петери, Јагубу вә Јәһјаны Өзү илә ҝөтүрдү» вә онлара деди: «Ојаг дурун». Сонра «бир аз ирәли ҝедиб јерә дөшәнди вә дуа етди». Ҝери гајыданда онлары јатмыш ҝөрдү. Бу заман Иса неҹә давранды? О деди: «Руһ гејрәтли, бәдән исә зәифдир» (Марк 14:32-38). Петери, Јагубу вә Јәһјаны кобудҹасына данламаг әвәзинә, онлара һәмдәрд олду! Елә һәмин ҝеҹә Петер Исаны үч дәфә инкар етди (Марк 14:66-72). Бәс инди Иса Петерлә неҹә давранаҹаг? «Рәбб... дирилмиш вә Шимона [Петерә] ҝөрүнмүшдүр» (Лука 24:34). О, «әввәлҹә Кефаја [Петерә], сонра да Оникиләрә ҝөрүндү» (1 Коринфлиләрә 15:5). Иса аҹыгланмаг әвәзинә, пешманчылыг чәкән һәварисини бағышлады вә мөһкәмләндирди. Сонра Петерин үзәринә даһа артыг мәс’улијјәтләр гојду (Һәвариләрин ишләри 2:14; 8:14-17; 10:44, 45).
16. Һәмиманлыларымыз бизи мә’јус едиб, пис вәзијјәтдә гојдуглары һалда белә, биз Исаны неҹә тәглид едә биләрик?
16 Ким исә јығынҹагда бизи мә’јус едиб, пис вәзијјәтдә гојурса, биз дә она, Иса кими, анлајышла јанашмалы вә бағышламалы дејиликми? Петер мәсиһчиләрә мәсләһәт едирди: «Һамыныз һәмфикир, башгаларынын дәрдләринә шәрик, гардаш севән, шәфгәтли, меһрибан, тәвазөкар олун. Пислијә писликлә, сөјүшә дә сөјүшлә ҹаваб вермәјин, әксинә хејир-дуа един, чүнки билирсиниз ки, хејир-бәрәкәтә варис олмаг үчүн дә’вәт олундунуз» (1 Петер 3:8, 9). Башгалары Исаны тәглид едәрәк, шәфгәт ҝөстәрмәк вә бизи бағышламаг истәмәдикләри һалларда белә, биз Мәсиһ кими давранмаға борҹлујуг (1 Јәһја 3:16).
Падшаһлығын марагларыны биринҹи јерә гојун
17. Нәдән ҝөрүнүр ки, Иса Аллаһын ирадәсини јеринә јетирмәји һәјатында биринҹи јерә гојурду?
17 Биз даһа бир ишдә дә Иса Мәсиһи тәглид етмәлијик. Аллаһын Падшаһлығы һаггында хош хәбәри бәјан етмәк онун һәјатында башлыҹа јери тутурду. Самаријадакы Сухар шәһәри јахынлығында самаријалы гадына һәгигәт һаггында шаһидлик етдикдән сонра, Иса шаҝирдләринә деди: «Мәним јемәјим Мәни Ҝөндәрәнин ирадәсини јеритмәк вә Онун ишини тамамламагдыр» (Јәһја 4:34). Атасынын ирадәсини јеринә јетирмәк Исаны мөһкәмләндирирди; ону санки гида кими бәсләјир, гүввә вә ҝүмраһлыг верирди. Иса кими, биз дә диггәтимизи Аллаһын ирадәсини јеринә јетирмәјә ҹәмләшдирсәк, мәҝәр бу, һәјатымыза мә’на вә мәмнунлуг ҝәтирмәзми?
18. Ушаглары таммүддәтли хидмәтә тәшвиг етмәк һансы хејир-дуалары ҝәтирир?
18 Валидејнләр ушагларыны таммүддәтли хидмәтә тәшвиг едәндә һәм өзләри, һәм дә ушаглары чохлу хејир-дуалар алырлар. Бир ата әкиз оғулларыны ушаглыгдан тәшвиг едирди ки, пионер кими хидмәт етмәји гаршыларына мәгсәд гојсунлар. Ушаглар тәһсилләрини битирдикдән сонра, пионер хидмәтинә башладылар. Һәмин ата нәтиҹәдә алдығы хејир-дуалар үзәриндә дүшүнәрәк, јазыр: «Оғулларымыз бизи мә’јус етмәдиләр. Биз миннәтдарлыгла дејә биләрик: “Өвладлар Рәббин вердији пајдыр”» (Мәзмур 127:3). Бәс таммүддәтли хидмәтә ҹан атмагла, ушаглар һансы хејир-дуалары алырлар? Беш ушаг анасы олан бир гадын дејир: «Пионер хидмәти өвладларымын һамысына Јеһова илә мүнасибәтләрини мөһкәмләндирмәјә, шәхси өјрәнмә илә мәшғул олмаг вәрдиши инкишаф етдирмәјә, вахтларындан мүдрикликлә истифадә етмәји өјрәнмәјә вә илк нөвбәдә руһани ишләри гијмәтләндирмәјә көмәк етди. Һәјатларында чохлу дәјишикликләр етмәли олсалар да, онлардан һеч бири бу јолу тутдуғу үчүн пешман дејил».
19. Ҝәләҹәк планлары илә әлагәдар ҝәнҹләрин нә һагда дүшүнмәләри мүдриклик оларды?
19 Еј ҝәнҹләр, ҝәләҹәкдә нә илә мәшғул олмағы планлашдырырсыныз? Пешәкар саһәдә ирәлиләмәјәми ҹан атырсыныз? Јохса таммүддәтли хидмәтин һәјатынызда ән башлыҹа јери тутмасы үчүн вар гүввәнизлә чалышырсыныз? Павел: «Нә ҹүр һәрәкәт етдијинизә чох диггәт верин, һикмәтсиз кими јох, һикмәтли кими јашајын. Һәр фүрсәтдән истифадә един, чүнки јашадығымыз ҝүнләр шәрдир», — дејә мәсләһәт верир. Сонра исә сөзләринә белә давам едир: «Буна ҝөрә ағылсыз олмајын, лакин Рәббин ирадәси нәдирсә, ону гаврајын» (Ефеслиләрә 5:15-17).
Сәдагәтли олун
20, 21. Иса нәдә садиглик ҝөстәрди вә биз ону неҹә тәглид едә биләрик?
20 Исанын изләри илә ҝетмәк онун сәдагәтлијини тәглид етмәк демәкдир. Мүгәддәс Китаб Исанын сәдагәтлији һагда дејир: «[Иса] Аллаһ сурәтиндә олдуғу һалда О, Аллаһла бәрабәрлији, имтинасы мүмкүн олмајан бир һагг сајмады. Лакин Өзүнү һеч едәрәк Өзүнү гул сурәтинә салыб, инсанлара охшар олду. Ҝөркәм е’тибарилә дә инсан кими, О Өз тәвазөкарлығыны ҝөстәрди вә өлүмәдәк, һәтта чармыха чәкилмәклә өлүмәдәк итаәткарлыг етди». Иса Аллаһын онунла бағлы ирадәсинә табе олараг, Јеһованын һакимијјәтини сәдагәтлә дәстәкләди. О, ишҝәнҹә дирәјиндә әзијјәт чәкәрәк, өләнә гәдәр итаәткарлығыны горуду. Биз дә ејни дүшүнҹә тәрзинә малик олмалы вә сәдагәтлә Аллаһын ирадәсини јеринә јетирмәлијик (Филипилиләрә 2:5-8).
21 Иса өз һәвариләри илә дә сәдагәтлә давранырды. Бахмајараг ки, онлар зәифликләрә малик вә гејри-камил идиләр, Иса «онлары сона гәдәр севди» (Јәһја 13:1). Буна бәнзәр тәрздә биз дә јол вермәмәлијик ки, башгаларынын гејри-камиллији үзүндән биздә тәнгиди дүшүнҹә тәрзи јарансын.
Исанын нүмунәсини тәглид един
22, 23. Мәсиһин јолу илә ҝедәркән, һансы хејир-дуалары алырыг?
22 Биз гејри-камил олдуғумуз үчүн, әлбәттә, Мәсиһи там мә’нада тәглид едә билмирик. Анҹаг вар гүввәмизлә чалышмалыјыг ки, Исанын гојдуғу нүмунәјә риајәт едәк. Бунун үчүн онун неҹә башчылыг етдијини баша дүшмәк, она табе олмаг вә онун јолу илә ҝетмәлијик.
23 Мәсиһи тәглид едәндә, бол хејир-дуалар газанырыг. Һәјатымыз даһа да мә’налы вә хошбәхт олур, чүнки бизи даһа чох өз марагларымыз јох, Аллаһын ирадәсини јеринә јетирмәк марагландырыр (Јәһја 5:30; 6:38). Биз тәмиз виҹдана саһиб олур вә башгаларына јахшы нүмунә веририк. Иса бүтүн јорғунлары вә јүкләри ағыр оланлары онун јанына ҝәлиб, ҹанларына тәравәт тапмаға дә’вәт едирди (Матта 11:28-30). Әҝәр Исаны тәглид едириксә, бизимлә үнсијјәтдә олмаг да башгаларына тәравәт ҝәтирәҹәк. Буна ҝөрә дә ҝәлин Исанын јолу илә ҝетмәјә давам едәк.
Хатырлајырсынызмы?
• Мәсиһ бу ҝүн өз давамчыларына неҹә башчылыг едир?
• Ағсаггаллар Аллаһын онлара вердији һакимијјәтдән истифадә едәркән, Мәсиһин нүмунәсини неҹә тәглид едирләр?
• Башгаларынын гејри-камиллији илә гаршылашанда, биз Исанын нүмунәсини неҹә тәглид едә биләрик?
• Ҝәнҹләр Падшаһлығын марагларыны биринҹи јерә гојмаг үчүн нә едә биләрләр?
[19-ҹу сәһифәдәки шәкил]
Мәсиһчи ағсаггаллар Мәсиһин башчылығына табе олмағымыза көмәк едирләр.
[20 вә 21-ҹи сәһифәләрдәки шәкилләр]
Ҝәнҹ мәсиһчиләр, руһән мәмнунлуг ҝәтирән бир һәјатынызын олмасы үчүн һансы планлары гурурсунуз?