Јеһованын Кәламы ҹанлыдыр
Јәһјанын вә Јәһуданын мәктубларындан диггәтәлајиг фикирләр
ЕРАМЫЗЫН 98-ҹи илиндә Ефес шәһәриндә јазылдығы еһтимал едилән һәвари Јәһјанын үч мәктубу илһамланмыш Мүгәддәс Јазыларын сон китабларына дахилдир. Илк ики мәктуб мәсиһчиләри даима нурда јеримәјә вә дөнүклүјә ујмамаға сәсләјир. Үчүнҹү мәктубда исә Јәһја һәгигәтә ҝөрә һәрәкәт етмәкдән данышмагла јанашы, мәсиһчиләри бир-бири илә әмәкдашлыг етмәјә тәшвиг едир.
Ерамызын тәхминән 65-ҹи илиндә Исанын анабир гардашы Јәһуда Фәләстиндән јаздығы мәктубунда мәсиһчиләри јығынҹаға дахил олан пис инсанлара гаршы хәбәрдар едир вә зәрәрли тәсирләрә неҹә мүгавимәт ҝөстәрмәјә даир мәсләһәтләр верир. Јәһјанын вә Јәһуданын мәктубларындакы мәсләһәтләрә әмәл етсәк, бу бизә, чәтинликләрә бахмајараг, иманда мөһкәм галмаға көмәк едәҹәк (Ибр. 4:12).
ДАИМА НУРДА, МӘҺӘББӘТДӘ ВӘ ИМАНДА ЈЕРИ
Јәһја Мәсиһлә бир оланларын һамысына үнванладығы илк мәктубунда мәсиһчиләрә дөнүклүјә ујмамаға, һәгигәтдә сабит дурмаға, салеһлијә бағлы галмаға көмәк етмәк үчүн фајдалы мәсләһәтләр верир. О, даима нурда, мәһәббәтдә вә иманда јеримәјин ваҹиблијини вурғулајыр.
Јәһја јазыр: «Әҝәр О [Аллаһ], нурда олдуғу кими, биз дә нурда ҝәзириксә, онда бир-биримизлә үнсијјәтимиз вардыр». Аллаһ мәһәббәт Мәнбәји олдуғу үчүн һәвари дејир: «Бир-биримизи севәк». Јеһова Аллаһа мәһәббәт бизи Онун ‘әмрләринә риајәт етмәјә’ тәшвиг етдији һалда, Она, Кәламына вә Оғлуна «иманымыз» сајәсиндә исә дүнјаја галиб ҝәлирик (1 Јәһ. 1:7; 4:7; 5:3, 4).
Мүгәддәс Китаб суалларына ҹаваблар:
2:7, 8 — Јәһјанын «јени» вә «гәдим» адландырдығы әмр һансы әмрдир? Јәһја фәдакар гардаш мәһәббәтинә даир верилән әмри нәзәрдә тутурду (Јәһ. 13:34). О бу әмри она ҝөрә «гәдим» адландырыр ки, Иса ону, Јәһја илк мәктубуну гәләмә алмаздан 60 ил өнҹә вермишди. Беләликлә, иманлылар бу әмрә өз мәсиһчи һәјатларынын ‘башланғыҹындан’ маликдирләр. Бунунла белә, бу әмр «јени»дир, чүнки «гоншуну өзүн кими сев» әмриндән үстүндүр вә фәдакар мәһәббәт тәзаһүр етдирмәјә тәшвиг едир (Лев. 19:18; Јәһ. 15:12, 13).
3:2 (И-93) — Мәсһ олунмуш мәсиһчиләрә ‘һәлә изһар олунмајан’ нәдир вә «Ону олдуғу кими ҝөрәҹәјик» дедикдә Јәһја кими нәзәрдә тутурду? Онлара изһар олунмајан, јәни мәлум олмајан одур ки, онлар руһани бәдәндә ҝөјләр һәјатына дириләндә неҹә олаҹагларыны билмирләр (Филип. 3:20, 21). Анҹаг онлар ‘билирләр ки, [Аллаһ] зүһур едәндә, Она бәнзәјәҹәкләр, чүнки Ону олдуғу кими’, јәни ‘Руһ’ шәклиндә ҝөрәҹәкләр (2 Кор. 3:17, 18).
5:5-8 — Су, ган вә руһ «Исанын Аллаһын Оғлу олдуғуна» неҹә шаһидлик етди? Су о мәнада шаһидлик етди ки, Иса суда вәфтиз олунанда Јеһова Оғлундан мәмнун олдуғуну билдирди (Мат. 3:17). ‘Һамы үчүн фидијә верилән’ Исанын ганы, јәни һәјаты Исанын Аллаһын Оғлу олдуғуну ҝөстәрди (1 Тим. 2:5, 6). Иса вәфтиз олунан заман үзәринә енән мүгәддәс руһ исә она өлкәни долашараг ‘јахшылыг етмәјә, иблисин истибдады [зүлмү] алтында оланларын һамысына шәфа вермәјә’ гүввәт вермәклә онун Аллаһын Оғлу олдуғуна шаһидлик етди (Јәһ. 1:29-34; Һәв. иш. 10:38).
Бизим үчүн ибрәт дәрсләри:
2:9-11; 3:15. Әҝәр мәсиһчи нәјәсә вә ја кимәсә гардашлара олан мәһәббәтини пуч етмәјә јол верирсә, руһани зүлмәтдә јеријир вә һара ҝетдијини билмир.
‘ҺӘГИГӘТӘ ҜӨРӘ ҺӘРӘКӘТ ЕТМӘЈӘ’ ДАВАМ ЕТ
Јәһја икинҹи мәктубуна белә башлајыр: «Сечилмиш ханыма вә онун өвладларына». О, һәмин ханымын ‘ушаглары арасында һәгигәтә ҝөрә һәрәкәт едәнләрин’ олдуғуна севиндијини јазыр (2 Јәһ. 1, 4).
Мәһәббәт инкишаф етдирмәјә тәшвиг етдикдән сонра Јәһја дејир: «Мәһәббәт... бундан ибарәтдир ки, биз Онун әмрләринә ҝөрә һәрәкәт едәк». Јәһја һәмчинин ‘сахтакар [адама] вә Мәсиһин әлејһдарына’ даир хәбәрдарлыг верир (2 Јәһ. 5-7).
Мүгәддәс Китаб суалларына ҹаваблар:
1, 13 — ‘Сечилмиш ханым’ кимдир? Ола билсин, Јәһја Кирија (јунанҹа «ханым») дејә мүраҹиәт едәркән конкрет инсаны нәзәрдә тутурду. Вә ја еһтимал ки, Јәһја тәгибчиләри аздырмаг мәгсәдилә мәҹази дилдән истифадә едәрәк мүәјјән бир мәсиһчи јығынҹағына мүраҹиәт едирди. Белә олдугда, онда гадынын ушаглары һәмин јығынҹағын үзвләри, сонунҹу ајәдә хатырланан онун ‘баҹысынын ушаглары’ исә башга јығынҹағын үзвләри ола биләрди.
7 — Јәһја Исанын һансы ‘ҝәлишиндән’ данышыр вә һијләҝәрләр онун ҝәлишини һансы мәнада ‘играр етмирләр’? Бурада Исанын ҝәләҹәкдә ҝөзлә ҝөрүнмәјән тәрздә ҝәлмәсиндән јох, онун «бәдәндә» ҝәлмәсиндән вә Мәсиһ кими мәсһ олунмасындан бәһс едилир (1 Јәһ. 4:2). Һијләҝәрләр онун бәдәндә ҝәлдијини гәбул етмирләр. Ола билсин, онлар Исанын нә вахтса јер үзүндә јашадығыны вә ја онун мүгәддәс руһла мәсһ олундуғуну инкар едирләр.
Бизим үчүн ибрәт дәрсләри:
2, 4. «Һәгигәт»и, јәни Мүгәддәс Китабын бүтүн тәлимләрини өјрәнмәк вә онлара ујғун јашамаг хилас олунмағымыз үчүн ваҹибдир (3 Јәһ. 3, 4).
8-11. Әҝәр биз ‘Ата Аллаһдан вә Иса Мәсиһдән ҝәлән лүтфү, мәрһәмәти вә сүлһү’, һәмчинин һәмиманлыларымызла үнсијјәти итирмәк истәмириксә, Мәсиһин тәлимләринә бағлы галыб-галмадығымыза ‘диггәт вермәли’ вә ‘Мәсиһин тәлиминә бағлы галмајанлары’ рәдд етмәлијик (2 Јәһ. 3).
«ҺӘГИГӘТ УҒРУНДА ҺӘМКАР ОЛАГ»
Јәһја үчүнҹү мәктубуну јахын досту Гаја үнванлајыб. О јазыр: «Өвладларымын һәгигәтә ҝөрә һәрәкәт етдијини ешитмәкдән даһа бөјүк севинҹим јохдур» (3 Јәһ. 4).
Јәһја онлара баш чәкән гардашлара көмәк едәрәк ‘садиг иш ҝөрдүјүнә’ ҝөрә Гајы тәрифләјир. Һәвари дејир: «Биз онлар кимиләрә көмәк етмәлијик ки, һәгигәт уғрунда һәмкар олаг» (3 Јәһ. 5-8).
Мүгәддәс Китаб суалларына ҹаваблар:
11 — Нәјә ҝөрә бәзиләри пислик етмәјә башлајырлар? Һәгигәтә бағлы галмајан бәзиләринин мәҹази ҝөзләри Аллаһы ҝөрмүр. Бу инсанлар Аллаһы физики ҝөзлә ҝөрә билмәдикләри үчүн өзләрини елә апарырлар ки, санки Аллаһ да онлары ҝөрмүр (Јез. 9:9).
15 — ‘Достлар’ кимләрдир? Бурада тәкҹә инсанлар арасында јахын достлуг нәзәрдә тутулмур. Јәһја үмумиликдә бүтүн һәмиманлылардан данышыр.
Бизим үчүн ибрәт дәрсләри:
4. Руһани ҹәһәтдән јеткин мәсиһчиләр јығынҹагдакы ҝәнҹләрин «һәгигәтә ҝөрә һәрәкәт етдијини» ҝөрәндә севинирләр. Валидејнләр ушагларына руһани инсан олмаға көмәк едәндә неҹә дә бөјүк севинҹ дујурлар!
5-8. Јеһоваја вә гардашларына мәһәббәтдән ирәли ҝәләрәк һәмиманлылары үчүн чалышанларын арасында сәјјар нәзарәтчиләр, миссионерләр, Бет-Ел хидмәтчиләри вә пионерләр вар. Бу һәмиманлыларымыз бизим онлара мәһәббәтлә дәстәк олмағымыза вә иманларыны тәглид етмәјимизә лајигдирләр.
9-12. Биз, гардашлары һаггында пис сөзләр јајан бөһтанчы Диотрефин нүмунәсини јох, садиг Димитринин нүмунәсини тәглид етмәлијик.
«ӨЗҮНҮЗҮ АЛЛАҺЫН МӘҺӘББӘТИНДӘ САХЛАЈЫН»
Јәһуда јығынҹаға ҝизлиҹә дахил олан аллаһсызлары ‘дејинән вә өз талеләриндән шикајәт едәнләр’, һәмчинин ‘өз еһтирасларына ҝөрә һәрәкәт едәнләр’ кими тәсвир едир. Онларын «ағзындан ловға сөзләр чыхыр вә онлар... инсанлара јалтагланырлар» (Јәһуда 4, 16).
Мәсиһчиләр пис тәсирләрә гаршы неҹә дура биләрләр? «Севимлиләрим, — дејә Јәһуда мүраҹиәт едир, — габагҹа Рәббимиз Иса Мәсиһин һәвариләринин дедикләри... сөзләри јада салын». О әлавә едир: «Өзүнүзү Аллаһын мәһәббәтиндә сахлајын» (Јәһуда 17-21).
Мүгәддәс Китаб суалларына ҹаваблар:
3, 4 — Нәјә ҝөрә Јәһуда мәсиһчиләри ‘иман үчүн ҹәһд етмәјә’, јәни инадла мүбаризә апармаға тәшвиг едирди? Чүнки јығынҹаға ‘аллаһсызлар ҝизлинҹә дахил олмушдулар’. Бу инсанлар ‘Аллаһын лүтфүнү сәфаһәт бәһанәсинә чевирмишдиләр’.
20, 21 — ‘Өзүмүзү Аллаһын мәһәббәтиндә сахламаг’ неҹә мүмкүндүр? 1) Аллаһын Кәламыны чалышганлыгла арашдырмағын вә хош хәбәри сәјлә тәблиғ етмәјин сајәсиндә ‘өзүмүзү сон дәрәҹә мүгәддәс олан иманымызын тәмәли үзәриндә инкишаф етдирмәклә’; 2) «Мүгәддәс Руһла», јәни онун тәсири алтында ‘дуа етмәклә’; 3) әбәди һәјата јол ачан Иса Мәсиһин фидијә гурбанлығына иман ҝәтирмәклә (Јәһ. 3:16, 36).
Бизим үчүн ибрәт дәрсләри:
5-7. Писләр Јеһованын һөкмүндән гача биләрләрми? Јәһуданын ҝәтирдији хәбәрдаредиҹи үч нүмунәјә әсасән, бу мүмкүн дејил.
8-10. Биз баш мәләк Микајылын нүмунәсини изләмәли вә Јеһова тәрәфиндән сәлаһијјәт верилмиш шәхсләрә һөрмәтлә јанашмалыјыг.
12. Неҹә ки ‘суалты гајалар’ (ЈД) ҝәмиләрә вә үзҝүчүләрә тәһлүкә јарадыр, еләҹә дә өзләрини севән инсан кими гәләмә верән дөнүкләр бизим үчүн тәһлүкәлидир. Јаланчы мүәллимләр сәхавәтли ҝөрүнә биләрләр, лакин онлар јағмурсуз булудлар кимидир, јәни руһән бошдурлар. Белә инсанлар пајыз ағаҹлары тәк сәмәрәсиздир. Онлар да, көкүндән гопарылмыш ағаҹлар кими, мәһв олаҹаглар. Дөнүкләрдән гачмаг мүдрикликдир.
22, 23. Һәгиги мәсиһчиләр пислијә нифрәт едирләр. Јығынҹағын руһән јеткин үзвләри, хүсусилә дә тәјин олунмуш нәзарәтчиләр ‘тәрәддүд едәнләрин бәзиләрини’ әбәди һәлак одундан гуртармагла онлара руһән көмәклик ҝөстәрмиш олурлар.
[28-ҹи сәһифәдәки шәкил]
Су, руһ вә ган «Исанын Аллаһын Оғлу олдуғуна» шәһадәт етди