“Һәр шејдән әввәл бир-биринизә ҹошғун мәһәббәтиниз олсун”
“Һәр шејин ахыры јахындыр. [...] Һәр шејдән әввәл бир-биринизә ҹошғун мәһәббәтиниз олсун” (1 ПЕТЕР 4:7, 8).
ИСА һәвариләри илә кечирдији сон саатларын нә гәдәр гијмәтли олдуғуну билирди. О, шаҝирдләрини гаршыда нәләр ҝөзләдијини баша дүшүрдү. Онлар чохлу иш ҝөрмәли идиләр; бундан әлавә, Иса кими, онун шаҝирдләринә дә нифрәт етмәли вә онлары тә’гиб етмәли идиләр (Јәһја 15:18-20). Сон ҝеҹә һәвариләри илә бирликдә оларкән, о бир нечә дәфә ‘бир-бирини севмәјин’ зәрури олдуғуну хатырлатды (Јәһја 13:34, 35; 15:12, 13, 17).
2 Һәмин ҝеҹә Иса илә бирликдә олан һәвари Петер бу сөзләрин ваҹиблијини анламышды. Илләр кечдикдән сонра, Јерусәлимин дағылмасындан бир гәдәр өнҹә, Петер мәһәббәтин ваҹиб олдуғуну вурғуламышды. О, мәсиһчиләри дә’вәт едирди: “Һәр шејин ахыры јахындыр. [...] Һәр шејдән әввәл бири–биринизә ҹошғун мәһәббәтиниз олсун” (1 Петер 4:7, 8). Буҝүнкү пис системин ‘ахыр ҝүнләриндә’ јашајан инсанлара Петерин сөзләрини јадда сахламаг чох ваҹибдир (2 Тимотејә 3:1). Бәс “ҹошғун мәһәббәт” нәдир? Бу мәһәббәти башгаларына гаршы тәзаһүр етдирмәк нәјә ҝөрә ваҹибдир? Вә биз буну неҹә едә биләрик?
“Ҹошғун мәһәббәт” нәдир?
3 Бир чохлары елә дүшүнүрләр ки, мәһәббәт өз-өзүнә јаранан бир һиссдир. Лакин Петер һәр һансы бир һәссас дујғу барәдә данышмырды; о, мәһәббәтин ән нәҹиб нөвүнү нәзәрдә тутурду. 1 Петер 4:8 ајәсиндәки “мәһәббәт” сөзү јунанҹа агáпе сөзүндән тәрҹүмә олунуб. Бу ифадә алтында принсипләрә әсасланан тәмәннасыз мәһәббәт нәзәрдә тутулур. Бир арајыш әсәриндә гејд олунур: “Агáпе мәһәббәтини идарә етмәк мүмкүндүр, чүнки о јалныз емосијалардан ибарәт дејил, мүәјјән һәрәкәтләрә апаран шүурлу гәрардыр”. Егоистлик мејлини мирас алдығымыз үчүн, биз бир-биримизә гаршы Мүгәддәс Китабын принсипләринә мүвафиг олан мәһәббәти тәзаһүр етдирмәјин ваҹиб олдуғуна даир хатырлатмалара еһтијаҹ дујуруг (Тәквин 8:21; Ромалылара 5:12).
4 Бу һеч дә о демәк дејил ки, бир-биримизи борҹ һиссиндән ирәли ҝәләрәк севмәлијик. Агáпе сәмими һиссләрдән мәһрум дејил. Петер демишдир ки, ‘бир–биримизә ҹошғун мәһәббәтимиз’ олмалыдырa. Лакин бу ҹүр мәһәббәти тәзаһүр етдирмәк үчүн сә’ј тәләб олунур. “Ҹошғун” кими тәрҹүмә олунан јунан сөзүнә даир бир алим демишдир: “О финишә јахын сон гүввәсини топлајан идманчынын сә’јини тәсвир едир”.
5 Демәли, биз өз мәһәббәтимизи јалныз һәр һансы чәтинликләрлә бағлы олмајанда, ја да мәһдуд сајда инсанлара гаршы тәзаһүр етдирмәли дејилик. Мәсиһчи мәһәббәти тәләб едир ки, бизим үрәјимиз ‘ҝенишләнсин’ вә һәтта буну етмәк асан олмајанда белә ону тәзаһүр етдирәк (2 Коринфлиләрә 6:11-13, И–93). Тамамилә ајдындыр ки, өз баҹарығыны артырмаг мәгсәдилә мәшг едән идманчы кими, биз дә мәһәббәтин бу нөвүнү тәзаһүр етдирмәк үчүн сә’ј ҝөстәрмәлијик. Арамызда бу ҹүр мәһәббәтин олмасы олдугҹа ваҹибдир. Нәјә ҝөрә? Ән азы үч сәбәбә ҝөрә.
Биз нәјә ҝөрә бир-биримизи севмәлијик?
6 Биринҹиси, “мәһәббәт Аллаһдандыр” (1 Јәһја 4:7). Бу ҝөзәл кејфијјәтин Мәнбәји олан Јеһова бизи биринҹи севмишдир. Һәвари Јәһја дејир: “Аллаһын мәһәббәти биздә белә зүһур етмишдир: Аллаһ Өз јеҝанә Оғлуну дүнјаја ҝөндәрди ки, биз Онун васитәсилә һәјат алаг” (1 Јәһја 4:9). Аллаһын Оғлу дүнјаја инсан кими ҝөндәрилмиш, хидмәтини иҹра етмиш вә ишҝәнҹә дирәјиндә өлдүрүлмүшдүр — бүтүн бунларын һамысы бизим ‘һәјат алмағымыз’ үчүн едилмишдир. Биз Аллаһын мәһәббәтинин ән бөјүк тәзаһүрүнә неҹә мүнасибәт ҝөстәрмәлијик? Јәһја јазыр: “Севимлиләрим, әҝәр Аллаһ бизи белә севдисә, биз дә бир-биримизи севмәлијик” (1 Јәһја 4:11). Диггәт јетирин ки, Јәһја “Әҝәр Аллаһ бизи белә севдисә” дејир, јә’ни тәк сәни јох, бизи. Бундан ајдын олур ки, әҝәр Аллаһ һәмиманлыларымызы севирсә, биз дә онлары севмәлијик.
7 Икинҹиси, “һәр шејин ахыры јахындыр” вә буна ҝөрә дә еһтијаҹ ичиндә олан гардашларымыза көмәк едәрәк бир-биримизә мәһәббәт ҝөстәрмәк инди хүсусилә ваҹибдир (1 Петер 4:7). Биз “чәтин анлар”да јашајырыг (2 Тимотејә 3:1). Дүнја һадисәләри, тәбии фәлакәтләр вә мүхтәлиф тәзјигләр бизә чәтинликләр јарадыр. Бу чәтин шәраитләрдә ҝәрәк бир-биримизә һәмишә олдуғундан даһа јахын олаг. Ҹошғун мәһәббәт бизи бирләшдирәр вә ‘бир-биримизин гајғысына галмаға’ тәшвиг едәр (1 Коринфлиләрә 12:25, 26).
8 Үчүнҹүсү исә, биз она ҝөрә бир-биримизи севмәлијик ки, ‘Иблисә јер вермәк’ истәмирик (Ефеслиләрә 4:27). Шејтан елә етмәјә чалышыр ки, һәмиманлыларымызын гејри-камиллији — зәиф ҹәһәтләри, чатышмазлыглары вә сәһвләри бизим бүдрәмәјимизә сәбәб олсун. Биз киминсә дүшүнмәдән фикир сөјләдијинә вә ја налајиг һәрәкәт етдијинә ҝөрә јығынҹаға ҝетмәјә сон гојаҹағыгмы? (Сүлејманын мәсәлләри 12:18). Әҝәр бир-биримизә гаршы ҹошғун мәһәббәтимиз варса, әлбәттә ки, јох! Бу ҹүр мәһәббәт бизә сүлһү горумаға вә Аллаһымыза “бир үрәклә”, јә’ни чијин-чијинә хидмәт етмәјә көмәк едәҹәк (Тсефанја 3:9).
Башгаларыны севдијимизи неҹә ҝөстәрә биләрик?
9 Мәһәббәтин тәзаһүрү евдән башланмалыдыр. Иса демишдир ки, онун һәгиги давамчыларыны бир-биринә олан мәһәббәтдән танымаг олаҹаг (Јәһја 13:34, 35). Мәһәббәт тәк јығынҹагда јох, һәмчинин аиләдә — һәјат јолдашлары вә валидејнләрлә ушаглар арасында да өзүнү бүрузә вермәлидир. Аилә үзвләримизә гаршы садәҹә олараг мәһәббәт һисси дујмаг кифајәт дејил; ону әмәлдә ҝөстәрмәк лазымдыр.
10 Әр-арвад бир-биринә гаршы мәһәббәтләрини неҹә тәзаһүр етдирә биләрләр? Һәјат јолдашыны һәгигәтән дә севән әр, һәм сөзләриндә, һәм әмәлләриндә — инсанлар арасында вә тәкликдә — ону чох гијмәтләндирдијинә инандырыр. О, арвадынын ләјагәтинә һөрмәт едир вә онун фикирләрини, нөгтеји-нәзәрини вә һиссләрини нәзәрә алыр (1 Петер 3:7 ). Әр, һәјат јолдашынын рифаһыны шәхси рифаһындан үстүн тутур вә онун мадди, руһани вә емосионал тәләбатларынын гајғысына галмаг үчүн әлиндән ҝәләни едир (Ефеслиләрә 5:25, 28). Әрини һәгигәтән дә севән гадын, әри бә’зән онун үмидләрини доғрултмајанда белә она ‘еһтирам едир’ (Ефеслиләрә 5:22, 33). О, әринә көмәк едир, она гулаг асыр, гаршысына һәдсиз тәләбләр гојмур, лакин онунла бирликдә диггәтини һәмишә руһани шејләрә мәркәзләшдирмәјә чалышыр (Тәквин 2:18; Матта 6:33).
11 Валидејнләр, ушагларыныза неҹә мәһәббәт ҝөстәрә биләрсиниз? Онларын мадди тәләбатларыны тә’мин етмәк үчүн ағыр иш ҝөрмәјә һазыр олмағыныз, шүбһәсиз ки, сизин мәһәббәтинизә сүбутдур (1 Тимотејә 5:8). Лакин ушаглар тәкҹә гида, палтар вә мәнзилә еһтијаҹ дујмурлар. Бөјүдүкдән сонра һәгиги Аллаһы севмәләри вә Она хидмәт етмәләри үчүн онлара руһани тәрбијә вермәк тәләб олунур (Сүлејманын мәсәлләри 22:6). Буна ҝөрә бүтүн аилә илә бирликдә Мүгәддәс Китабы өјрәнмәк, хидмәтдә иштирак етмәк вә мәсиһчи јығынҹагларына ҝетмәк үчүн вахт ајырмаг ваҹибдир (Тәснијә 6:4-7). Хүсусилә бу чәтин заманларда бу ишдә сабитлик ҝөстәрмәк үчүн, чох шеји гурбан вермәк тәләб олунур. Ушагларынызын руһани тәләбатларынын гајғысына галмагла, сиз онларын әбәди рифаһынын гајғысына галмыш олурсунуз. Бу онлара олан мәһәббәтинизин сүбуту дејилми? (Јәһја 17:3).
12 Чох ваҹибдир ки, валидејнләр ушагларынын емосионал тәләбатларынын да гајғысына галсынлар. Ушаглар емосионал ҹәһәтдән чох зәиф олдуглары үчүн, дөнә-дөнә онлары севдијинизә әмин един. Онлары севдијинизи сөјләјин вә нәвазишинизи онлардан әсирҝәмәјин. Бунун сајәсиндә онлар өзләринин севилдикләринә вә гијмәтләндирилдикләринә әмин олаҹаглар. Онларын сә’јини ҝөрдүјүнүзә вә гијмәтләндирдијинизә әмин етмәк үчүн, онлары үрәкдән тә’рифләмәји унутмајын. Онлары мәһәббәтлә тәрбијә един ки, неҹә инсан олаҹагларына е’тинасыз јанашмадығынызы баша дүшсүнләр (Ефеслиләрә 6:4). Мәһәббәтин бу ҹүр тәзаһүрү аилә үзвләринин хошбәхтлијинә вә бирлијинә хидмәт едәрәк, аиләнизә јахшы тә’сир ҝөстәрәҹәк. Бу исә өз нөвбәсиндә ахыр ҝүнләрдә гаршылашдығыныз чәтинликләрин өһдәсиндән мүвәффәгијјәтлә ҝәлмәкдә сизә көмәк едәҹәк.
13 Мәһәббәт бизи башгаларынын нөгсанларына ҝүзәштлә јанашмаға тәшвиг едир. Јадыныза салын ки, Петер мәсиһчиләри “бир-биринизә ҹошғун мәһәббәтиниз олсун” дејә, тәшвиг едәндә, бунун нәјә ҝөрә ваҹиб олдуғуну изаһ етмишдир: “Чүнки мәһәббәт бир чох ҝүнаһын үстүнү өртәр” (1 Петер 4:8). Бурада сөһбәт ҹидди ҝүнаһларын үстүнү өрт-басдыр етмәкдән ҝетмир. Бу ҹүр ҝүнаһлар һаггында јығынҹагдакы мәс’ул гардашлара хәбәр вермәк лазымдыр, чүнки белә проблемләри һәлл етмәк онлара һәвалә олунуб (Левилиләр 5:1; Сүлејманын мәсәлләри 29:24). Гаты ҝүнаһкарларын тәгсирсиз инсанлара зәрәр ҝәтирмәјә давам етмәләринә јол вермәк сон дәрәҹәдә рәһмсизлик вә Мүгәддәс Јазылара зидд оларды (1 Коринфлиләрә 5:9-13).
14 Әксәр һалларда исә һәмиманлыларымызын чатышмазлыглары вә сәһвләри бир о гәдәр дә ҹидди олмур. Бә’зән бизим һамымыз сөздә вә әмәлдә сәһвә јол верир, бир-биримизи мә’јус едир вә һәтта инҹидирик (Јагуб 3:2). Киминсә сәһвләри һаггында хәбәр тутдугда, дәрһал башгаларына данышмаға дәјәрми? Бу ҹүр давраныш јығынҹагда јалныз ихтилафлара сәбәб олур (Ефеслиләрә 4:1-3). Мәһәббәтдән ирәли ҝәләрәк һәмиманлыларымызын сәһвләрини һамыја билдирмәјәҹәјик (Мәзмур 50:20). Боја вә суваг диварын әјри олан јерләрини ҝизләтдији кими, мәһәббәт дә баҹы-гардашларымызын нөгсанларыны өртүр (Сүлејманын мәсәлләри 17:9).
15 Мәһәббәт бизи тәшвиг едир ки, еһтијаҹ ичиндә оланлара көмәк едәк. Бу ахыр ҝүнләрдә инсанларын һәјат шәраити ҝет-ҝедә писләшдији үчүн, һәмиманлыларымыза мадди вә ја практики көмәк ҝөстәрмәк лазым ҝәлә биләр (1 Јәһја 3:17, 18). Мисал үчүн, әҝәр јығынҹағымызда ким исә мадди ҹәһәтдән чәтинлик чәкир вә ја ишсиз галыбса, онда неҹә? Белә һалда, ҝүман ки, биз имканымыз јол верән гәдәр она мадди көмәк ҝөстәрә биләрик (Сүлејманын мәсәлләри 3:27, 28; Јагуб 2:14-17). Јашлы дул баҹымызын евинин тә’мирә еһтијаҹы вармы? Онда нәјә ҝөрә биз өзүмүз она һәр һансы көмәји тәклиф етмәјәк? (Јагуб 1:27).
16 Биз јалныз јахынлыгда јашајанлара мәһәббәт ҝөстәрмәклә кифајәтләнмирик. Бә’зән гасырға, зәлзәлә вә ја мүхтәлиф иғтишашлара ҝөрә башга өлкәләрдә Аллаһын хидмәтчиләринин ҝүҹлү зәрәр чәкдикләри һагда ешидирик. Ола билсин, онлар гидаја, палтара вә һәјат үчүн ваҹиб олан башга шејләрә чох еһтијаҹ дујурлар. Онларын һансы иргдән вә ја етник групдан олмаларынын фәрги јохдур. Биз бүтүн ‘гардашлығы севирик’ (1 Петер 2:17). Фәлакәтләрдән зәрәр чәкәнләр үчүн һуманитар јардым тәшкил олунанда, I әсрин јығынҹаглары кими биз дә ҝөстәрилән јардымда иштирак етмәјә чалышырыг (Һәвариләрин ишләри 11:27-30; Ромалылара 15:26). Бу тәрздә мәһәббәт тәзаһүр етдирмәклә, бу ахыр ҝүнләрдә бизи бирләшдирән бирлик бағларыны мөһкәмләндиририк (Колослулара 3:14).
17 Мәһәббәт бизи Аллаһын Падшаһлығы һаггындакы хош хәбәри башгалары илә бөлүшмәјә тәшвиг едир. Исанын нүмунәсини нәзәрдән кечирәк. Ону тәблиғ етмәјә вә өјрәтмәјә тәшвиг едән нә иди? Инсанларын руһани ҹәһәтдән аҹынаҹаглы вәзијјәтдә олдугларыны ҝөрәндә, онлара јазығы ҝәлирди (Марк 6:34). Јалан дин рәһбәрләри һәмин инсанлара руһани һәгигәтләри өјрәтмәк вә онлара үмид вермәк әвәзинә, онларын гајғысына һеч галмыр вә онлары алдадырдылар. Буна ҝөрә, Иса дәрин мәһәббәт вә мәрһәмәтлә тәшвиг олунараг, онлара ‘Аллаһын Падшаһлығынын мүждәси’ илә тәскинлик верирди (Лука 4:16-21, 43, И–93).
18 Бу ҝүн дә бир чох инсанлар руһани рәһбәрликдән мәһрумдурлар, алданырлар вә үмидсизлик ичиндәдирләр. Әҝәр Иса кими биз дә һәгиги Аллаһы танымајан инсанларын руһани тәләбатларына һәссаслыгла јанашырыгса, онда мәһәббәт вә мәрһәмәт бизи тәшвиг едәҹәк ки, Аллаһын Падшаһлығы һаггындакы хош хәбәри онларла бөлүшәк (Матта 6:9, 10; 24:14). Галан вахтын чох гыса олдуғу үчүн, хиласедиҹи хәбәри тәблиғ етмәк һәмишәкиндән даһа ваҹибдир (1 Тимотејә 4:16).
“Һәр шејин ахыры јахындыр”
19 Хатырлајын ки, Петер һәмиманлыларыны бир-бирини севмәјә тәшвиг етмәздән әввәл бу сөзләри демишдир: “Һәр шејин ахыры јахындыр” (1 Петер 4:7). Бу натәмиз дүнја тезликлә Аллаһын әдаләтли јени дүнјасы илә әвәз олунаҹаг (2 Петер 3:13). Бу о демәкдир ки, инди өзүнә архајын олмағын вахты дејил. Иса бизи хәбәрдар едиб: “Диггәтли олун ки, үрәкләриниз гарынгулулуг вә сәрхошлугла, бу һәјатын гајғылары илә ағырлашмасын вә о Ҝүн сизи гәфләтән јахаламасын” (Лука 21:34, 35).
20 Буна ҝөрә дә, һансы дөврдә јашадығымызы јадда сахлајараг, ҝәлин бүтүн гүввәмизлә бундан сонра да ојаг дураг (Матта 24:42). Ҝәлин, бизи сапдыра билән Шејтанын һәр бир имтаһанына гаршы сајыглыг ҝөстәрмәјә давам едәк. Ҝәлин, бу сојуг вә мәһәббәтдән мәһрум олан дүнјаја башгаларына мәһәббәт ҝөстәрмәјимизә мане олмасына јол вермәјәк. Вә һәр шејдән әввәл, ҝәлин һәгиги Аллаһ олан Јеһоваја даһа да јахынлашаг. Тез бир заманда Аллаһын Хиласкар Падшаһлығы Онун Јер күрәсинә даир иззәтли нијјәтини иҹра едәҹәк (Вәһј 21:4, 5).
[Һашијәләр]
a Мүгәддәс Китабын башга тәрҹүмәләриндә 1 Петер 4:8 ајәсиндә дејилир ки, биз бир-биримизи “мөһкәм”, “сәмимијјәтлә” вә ја “дәриндән” севмәлијик.
ӨЈРӘНМӘ ҮЧҮН СУАЛЛАР
• Сон ҝеҹә шаҝирдләри илә бирликдә оланда, Иса онлара һансы мәсләһәти верди вә нәдән ҝөрүнүр ки, Петер о сөзләрин ваҹиб олдуғуну дәрк етмишдир? (абз. 1, 2).
• “Ҹошғун мәһәббәт” нәдир? (абз. 3-5).
• Биз бир-биримизи нәјә ҝөрә севмәлијик? (абз. 6-8).
• Башгаларыны севдијимизи неҹә ҝөстәрә биләрик? (абз. 9-18).
• Нәјә ҝөрә инди өзүнә архајын олмағын вахты дејил вә биз нәјә гәти гәрарлы олмалыјыг? (абз. 19, 20).
[29-ҹу сәһифәдә олан шәкил]
Бирлик һөкм сүрән аиләләр ахыр ҝүнләрин чәтинликләринин өһдәсиндән даһа мүвәффәгијјәтлә ҝәлә билирләр.
[30-ҹу сәһифәдә олан шәкил]
Мәһәббәт бизи тәшвиг едир ки, еһтијаҹ ичиндә оланлара көмәк едәк.
[31-ҹи сәһифәдә олан шәкил]
Биз Аллаһын Падшаһлығы һаггындакы хош хәбәри башгалары илә бөлүшмәклә мәһәббәт тәзаһүр етдирмиш олуруг.