Фәсил 19
Аллаһын мәһәббәтиндә галын
Аллаһы севмәк нә демәкдир?
Аллаһын мәһәббәтиндә галмаг неҹә мүмкүндүр?
Јеһова Онун мәһәббәтиндә галанлары неҹә мүкафатландыраҹаг?
Бу нараһат дөврдә Јеһованы өз сығынаҹағыныз едәҹәксинизми?
1, 2. Бу ҝүн е’тибарлы сығынаҹағы һарада тапа биләрик?
ТУФАНЛЫ бир ҝүндә јол ҝетдијинизи тәсәввүр един. Ҝет-ҝедә ҝөјүн үзү гаралыр, шимшәк чахыр вә ҝөј ҝурулдајыр. Лејсан башлајыр. Сиз тәләсик ора-бура ҝөз ҝәздирир, јағышдан ҝизләнмәк үчүн јер ахтарырсыныз. Јахынлыгда сығынаҹаг бир јер ҝөрүб, ора тәләсирсиниз. Ора исти вә раһатдыр. Бу ҹүр тәһлүкәсиз јер тапманыз неҹә дә ҝөзәлдир!
2 Бу ҝүн биз дә нараһат бир дөврдә јашајырыг. Дүнјада вәзијјәт ҝүндән-ҝүнә писләшир. Лакин бизи даими зәрәрдән горуја биләҹәк е’тибарлы сығынаҹаг мөвҹуддур. Бу һансы сығынаҹагдыр? Мүгәддәс Китабда дејилир: «О мәним сиғынаҹағымдыр, галамдыр, Аллаһымдыр, Она ҝүвәнирәм» (Мәзмур 91:2).
3. Јеһованын сығынаҹаг јеримиз олмасы үчүн нә етмәлијик?
3 Бир анлыға дүшүнүн: Каинатын Јараданы вә Али Һөкмдары Јеһова бизим үчүн е’тибарлы сығынаҹаг ола биләр! О бизи мүдафиә етмәјә гадирдир, чүнки Онун гүдрәти илә һеч нә мүгајисә олуна билмәз вә һеч ким Она гаршы дура билмәз. Бизимлә бәдбәхтлик үз версә белә, Јеһова зәрәри бүтүнлүклә арадан галдырмаға гадирдир. Бәс Јеһованын сығынаҹаг јеримиз олмасы үчүн нә етмәлијик? Биз Она ҝүвәнмәлијик. Бундан әлавә, Аллаһын Кәламы бизи тәшвиг едир: «Өзүнүзү Аллаһын мәһәббәтиндә сахлајын» (Јәһуда 21). Бәли, сәмави Атамызла достлуг мүнасибәтләримизи мөһкәмләндирәрәк, Аллаһын мәһәббәтиндә галмалыјыг. О заман Аллаһ бизим үчүн әсл сығынаҹаг олаҹаг. Бәс Онунла бу ҹүр мөһкәм достлуғу неҹә инкишаф етдирмәк олар?
АЛЛАҺЫН МӘҺӘББӘТИНИ ГИЈМӘТЛӘНДИРИН
4, 5. Јеһова бизә мәһәббәтини неҹә ҝөстәрир?
4 Аллаһын мәһәббәтиндә галмаг үчүн, Јеһованын бу хүсусијјәти бизә неҹә тәзаһүр етдирдијини ҝөрмәлијик. Бу китабын көмәјилә Мүгәддәс Китабдан өјрәндијиниз тә’лимләрин үзәриндә дүшүнүн. Јараданымыз Јеһова бизә ҝөзәл ев — Јер күрәсини һәдијјә едиб. О, Јер үзүндә гида вә су боллуғунун, тәбии еһтијатларын олмасынын гајғысына галыб. Һәмчинин һејранедиҹи һејванат аләми вә ҝөзәл мәнзәрәләр јарадыб. Аллаһ Өз Кәламы олан Мүгәддәс Китаб васитәсилә бизә адыны вә хүсусијјәтләрини ачыглајыб. Ејни заманда Мүгәддәс Китабда Аллаһын севимли Оғлу Иса Мәсиһи јер үзүнә ҝөндәрдији вә онун бизим уғрумузда изтираб чәкиб өлмәсинә изин вердији барәдә дә данышылыр (Јәһја 3:16). Бәс бу ән’ам бизим үчүн һансы мә’наны дашыјыр? О бизә хошбәхт ҝәләҹәјә үмид верир.
5 Ҝөзәл ҝәләҹәјә үмид етмәјимизин диҝәр сәбәби, Јеһованын ҝөјләр һөкумәти — Хиласкар Падшаһлыг гурмасыдыр. Тезликлә бу Падшаһлыг бүтүн әзаблара сон гојаҹаг вә јер үзүндә Ҹәннәти бәрпа едәҹәк. Тәсәввүр един: биз әбәдијјән сүлһ вә хошбәхтлик ичиндә јашаја биләҹәјик! (Мәзмур 37:29). Һәјатымызы јахшылыға доғру дәјишмәјә көмәк едән рәһбәрлији Аллаһ бизә артыг индидән верир. О, бизә өз дүшүнҹә вә һиссләримизи Онунла ачыгҹа бөлүшә билмәјимиз үчүн дуа етмәк ән’амыны да вермишдир. Бунлар, Јеһованын бүтүн инсанлара, о ҹүмләдән һәр биримизә мәһәббәти неҹә тәзаһүр етдирдијини ҝөстәрән нүмунәләрдән јалныз бир нечәсидир.
6. Сиз Јеһованын мәһәббәтинә неҹә ҹаваб верә биләрсиниз?
6 Инди исә ҹидди бир суалы мүзакирә едәк: Јеһованын мәһәббәтинә неҹә ҹаваб вермәк олар? Чохлары дејә биләр: «Биз дә Јеһованы севмәлијик». Сиз дә беләми дүшүнүрсүнүз? Иса: «Аллаһын олан Рәбби бүтүн үрәјинлә, бүтүн ҹанынла вә бүтүн дүшүнҹәнлә сев» әмринин ән бөјүк әмр олдуғуну демишдир (Матта 22:37). Әлбәттә, Јеһованы бүтүн үрәјинизлә, бүтүн ҹанынызла вә бүтүн дүшүнҹәнизлә севмәк үчүн чохлу сәбәбләриниз вар. Бәс Аллаһа гаршы садәҹә мәһәббәт һиссинин олмасы кифајәтдирми?
7. Аллаһа мәһәббәт садәҹә бир һиссдирми? Изаһ един.
7 Мүгәддәс Китабдан ҝөрүндүјү кими, Аллаһа мәһәббәт садәҹә бир һисс дејил. Бахмајараг ки, мәһәббәт һиссинин олмасы чох ваҹибдир, анҹаг бу, Јеһоваја олан әсл мәһәббәтин башланғыҹыдыр. Алма тумундан бар ҝәтирән алма ағаҹы битир. Әҝәр сиз алма јемәк истәсәниз, садәҹә тумун олмасы сизи гане едәрми? Тәбии ки, јох! Буна бәнзәр тәрздә, Јеһова Аллаһа олан мәһәббәт һисси садәҹә башланғыҹдыр. Мүгәддәс Китаб өјрәдир ки, «Аллаһы севмәк, Аллаһын әмрләринә риајәт етмәк демәкдир. Онун әмрләри исә ағыр дејилдир» (1 Јәһја 5:3). Аллаһа олан әсл мәһәббәт јахшы бәһрә ҝәтирмәлидир. Мәһәббәт әмәлләрлә ҝөстәрилмәлидир (Матта 7:16-20).
8, 9. Аллаһа мәһәббәтимизи вә миннәтдарлығымызы неҹә билдирә биләрик?
8 Биз Аллаһа мәһәббәти, Онун әмрләринә риајәт етмәклә вә Онун принсипләрини һәјата кечирмәклә ҝөстәририк. Буну етмәк чәтин дејил. Чүнки Јеһованын ганунлары ағыр дејил, онлар бизим хејримизә хидмәт едир вә хошбәхтлијә наил олмағымыза көмәк едир (Јешаја 48:17, 18). Аллаһын нәсиһәтләрини гәбул етмәклә, Онун бизим үчүн етдикләрини гијмәтләндирдијимизи ҝөстәририк. Тәәссүфләр олсун ки, бу ҝүн Аллаһа миннәтдарлыг билдирәнләр чох аздыр. Биз Исанын дөврүндә јашајан нанкор инсанлар кими олмаг истәмирик. Иса он нәфәр ҹүзамлыны сағалтдыгдан сонра, тәшәккүр етмәк үчүн онлардан јалныз бири ҝери гајытды (Лука 17:12-17). Бәли, Аллаһа миннәтдар олмаг чох ваҹибдир!
9 Биз Јеһованын һансы әмрләринә риајәт етмәлијик? Бу китабда онлардан бир чохуну мүзакирә етдик, анҹаг ҝәлин онлардан бә’зиләрини тәкрарлајаг. Аллаһын әмрләринә риајәт етмәк Аллаһын мәһәббәтиндә галмағымыза көмәк едәҹәк.
ЈЕҺОВАЈА ЈАХЫНЛАШЫН
10. Јеһова Аллаһ һаггында билик алмаға давам етмәјин нә үчүн ваҹиб олдуғуну изаһ един.
10 Јеһоваја јахынлашмаг үчүн Онун һаггында өјрәнмәк чох ваҹибдир. Бу, фасиләсиз просесдир. Сојуг бир ҝеҹәдә оҹаг гырағында исинсәјдиниз, онун зәифләјиб сөнмәсинә јол верәрдинизми? Әлбәттә, јох! Оҹаға одун атардыныз ки, алышыб јансын вә сизи иситсин. Чүнки сизин һәјатыныз бундан асылы ола биләрди! Одун оҹағы аловландырдығы кими, Аллаһ һаггында билик алмағымыз да Јеһоваја олан мәһәббәтимизи мөһкәмләндирир (Сүлејманын мәсәлләри 2:1-5).
Аллаһа мәһәббәт алышыб јанмасы үчүн даим одун атмаг лазым ҝәлән оҹаға бәнзәјир
11. Исанын сөзләри онун шаҝирдләринә неҹә тә’сир етди?
11 Иса давамчыларынын Јеһоваја вә Онун гијмәтли Кәламына олан мәһәббәти горујуб сахламаларыны, бу мәһәббәтин алышыб јанмасыны вә даһа да ҝүҹлү олмасыны истәјирди. Дириләндән сонра, Иса ики шаҝирдинә Ибраниҹә Мүгәддәс Јазыларда олан вә өз үзәриндә јеринә јетән бә’зи пејғәмбәрликләри изаһ етди. Бу, онун шаҝирдләринә неҹә тә’сир етди? Бир гәдәр сонра онлар дедиләр: «О, јолда бизимлә данышаркән вә Мүгәддәс Јазылары бизә изаһ едәркән, бизим үрәкләримиз алышыб јанмырдымы?» (Лука 24:32).
12, 13. а) Бу ҝүн инсанларын чоху Аллаһа вә Онун Кәламына неҹә јанашырлар? б) Јеһоваја мәһәббәтимизин сојумамасы үчүн нә едә биләрик?
12 Мүгәддәс Китабын әслиндә нә өјрәтдијини илк дәфә өјрәндијиниз заман, сизин үрәјиниз дә севинҹ вә Аллаһа мәһәббәт һисси илә алышыб јанмырдымы? Шүбһәсиз ки, бу белә иди. Чохлары да буна бәнзәр һиссләр кечирмишләр. Анҹаг ән чәтини, Аллаһа мәһәббәти горујуб сахламаг вә ону инкишаф етдирмәкдир. Биз буҝүнкү дүнјаја ујмаг истәмирик. Иса ‘бир чохларынын севҝисинин сојујаҹағыны’ габагҹадан хәбәр вермишди (Матта 24:12). Бәс сиз Јеһоваја вә Мүгәддәс Китаб һәгигәтләринә олан мәһәббәтинизин сојумамасы үчүн нә едә биләрсиниз?
13 Јеһова Аллаһ вә Иса Мәсиһ һаггында билик әлдә етмәјә давам един (Јәһја 17:3). Аллаһын Кәламындан өјрәндикләринизин үзәриндә дүшүнүн. Мүгәддәс Китабы охујанда өзүнүздән сорушун: «Охудуғум бу парча Јеһова һаггында мәнә нә өјрәдир? Мүгәддәс Китабын бу ајәләри Аллаһы бүтүн үрәјимлә, дүшүнҹәмлә вә ҹанымла даһа чох севмәјә мәни неҹә тәшвиг едир?» (1 Тимотејә 4:15). Бу ҹүр дәриндән дүшүнмәк Јеһоваја мәһәббәтинизи даһа да мөһкәмләндирәҹәк.
14. Дуа Јеһоваја мәһәббәти горујуб сахламаға неҹә көмәк едир?
14 Јеһоваја мәһәббәтимизин алышыб јанмасы үчүн мүнтәзәм олараг дуа етмәк дә лазымдыр (1 Салоникилиләрә 5:17). Бу китабын 17-ҹи фәслиндән өјрәндик ки, дуа Аллаһын гијмәтли һәдијјәсидир. Ачыг үнсијјәт инсанлары јахынлашдырдығы кими, мүнтәзәм олараг дуа етмәк дә Јеһова илә достлуғу мөһкәмләндирир. Чох ваҹибдир ки, дуаларымыз механики — үрәкдән ҝәлмәјән вә һеч бир мә’на дашымајан сөзләрин тәкрары олмасын. Бизим Јеһоваја дуамыз, ушағын севимли атасы илә етдији сөһбәт кими олмалыдыр. Әлбәттә, биз Аллаһа һөрмәтлә, ејни заманда сәмими вә үрәкдән мүраҹиәт етмәлијик (Мәзмур 62:8). Бәли, Мүгәддәс Китабын шәхси өјрәнилмәси вә үрәкдән ҝәлән дуалар мүгәддәс хидмәтимизин ајрылмаз бир һиссәсидир. Бүтүн бунлар Аллаһын мәһәббәтиндә галмағымыза көмәк едир.
АЛЛАҺА ХИДМӘТДӘН СЕВИНҸ ДУЈУН
15, 16. Тәблиғ хидмәтини нәјә ҝөрә шәрәф вә сәрвәт һесаб етмәлијик?
15 Мүгәддәс Китабы өјрәнмәк вә дуа етмәк — Аллаһла шәхси мүнасибәтләримизә аидијјаты олан мүгәддәс хидмәтин бир һиссәсидир. Инди исә ҝәлин, ибадәтимизин һамы гаршысында иҹра етдијимиз саһәси һаггында данышаг. Бу, өз иманымызы башгалары илә бөлүшмәкдир. Сиз Мүгәддәс Китаб һәгигәтләрини башгалары илә бөлүшүрсүнүзмү? Бу, бөјүк шәрәфдир (Лука 1:74, 75). Јеһова һаггында өјрәндикләримизи бөлүшмәклә, Аллаһын Падшаһлығы һагда хош хәбәри тәблиғ етмәјә даир бүтүн һәгиги мәсиһчиләрә верилмиш ваҹиб тапшырығы јеринә јетиририк (Матта 24:14; 28:19, 20).
16 Һәвари Павел Аллаһа хидмәти јүксәк гијмәтләндирирди вә ону сәрвәт адландырырды (2 Коринфлиләрә 4:7). Јеһова вә Онун нијјәтләри һагда башгаларына данышмаг, едә биләҹәјиниз ән јахшы ишдир. Ахы биз ән јахшы Ағаја хидмәт едирик, бу да өз нөвбәсиндә бөјүк хејир-дуалар ҝәтирир. Биз хидмәтдә иштирак етмәклә, сәмими инсанларын сәмави Атамыза јахынлашмаларына вә әбәди һәјат јолуну тутмаларына көмәк едирик. Мәҝәр бундан ваҹиб иш ола биләрми? Јеһова вә Онун Кәламы һаггында данышмагла, иманыныз мөһкәмләнир вә Аллаһа олан мәһәббәтиниз артыр. Јеһова сизин сә’јинизи чох гијмәтләндирир (Ибраниләрә 6:10). Хидмәт етмәк Аллаһын мәһәббәтиндә галмагда сизә көмәк едәҹәк (1 Коринфлиләрә 15:58).
17. Нәјә ҝөрә мәсиһчи хидмәти тә’хирәсалынмаз ишдир?
17 Јадда сахламаг лазымдыр ки, Падшаһлығын тәблиғи тә’хирәсалынмаз ишдир. Мүгәддәс Китаб дејир: «Аллаһын кәламыны тәблиғ ет, вахтлы ја вахтсыз һазыр ол» (2 Тимотејә 4:2). Буну етмәк нәјә ҝөрә бу ҝүн хүсусилә ваҹибдир? Аллаһын Кәламы ҹаваб верир: «Рәббин мөһтәшәм ҝүнү јахынлашыр, јахынлашыр, тез ҝәләҹәк» (Сефанја 1:14). Бәли, Јеһованын бу пис системи мәһв едәҹәји вахт сүр’әтлә јахынлашыр. Бу һагда инсанлары хәбәрдар етмәк лазымдыр! Онлар билмәлидирләр ки, инди Јеһованы Али Һөкмдар кими гәбул етмәјин вахтыдыр. Сон «ҝеҹикмәјәҹәк» (Һабаггуг 2:3).
18. Нәјә ҝөрә Јеһованы һәгиги мәсиһчиләрлә бирликдә ачыг-ашкар иззәтләндирмәлијик?
18 Јеһова истәјир ки, биз һәгиги мәсиһчиләрә гошулаг вә онларла бирликдә Она ачыг-ашкар иззәт верәк. Буна ҝөрә дә Онун Кәламында дејилир: «Бир-биримизи мәһәббәтә вә хејирли ишләрә неҹә тәшвиг едәҹәјимизин гајғысына галаг. Бә’зиләринин адәт етдикләри кими өз јығынҹагларымызы тәрк етмәјәк. Амма хүсусән, о Ҝүнүн јахынлашдығыны ҝөрдүјүмүз нисбәтдә бир-биримизи даһа чох үрәкләндирәк» (Ибраниләрә 10:24, 25). Мәсиһчи ҝөрүшләри бизә севимли Аллаһымызы иззәтләндирмәјә вә Она ибадәт етмәјә ҝөзәл имкан верир. Биз, һәмчинин ҝөрүшләрдә һәмиманлыларымызы руһландырыр вә үрәкләндиририк.
19. Мәсиһчи јығынҹағында мәһәббәт телләрини неҹә мөһкәмләндирә биләрик?
19 Јеһованын диҝәр хидмәтчиләри илә үнсијјәтдә олмагла, јығынҹагда мәһәббәт вә достлуг телләрини мөһкәмләндиририк. Јеһованын бизим јахшы ҹәһәтләримизә диггәт јетирдији кими, бизим дә һәмиманлыларымызын јахшы ҹәһәтләрини ҝөрмәјимиз олдугҹа ваҹибдир. Башгаларындан камиллик ҝөзләмәјин. Унутмајын ки, мәсиһчиләр руһани инкишафын мүхтәлиф мәрһәләсиндәдирләр вә һамымыз ҝүнаһ ишләдирик (Колослулара 3:13). Јеһованы үрәкдән севәнләрлә јахын достлуг сизи руһән инкишаф етмәјә тәшвиг едәҹәк. Бәли, руһани баҹы-гардашларла бирликдә Јеһоваја хидмәт етмәк Аллаһын мәһәббәтиндә галмағыныза көмәк едәҹәк. Јеһова, Она сәдагәтлә хидмәт едәнләри вә Онун мәһәббәтиндә галанлары неҹә мүкафатландыраҹаг?
«ҺӘГИГИ ҺӘЈАТА» ҸАН АТЫН
20, 21. ‘Һәгиги һәјат’ нәдир вә бу, нәјә ҝөрә ҝөзәл үмиддир?
20 Јеһова Өз садиг хидмәтчиләрини һәјатла мүкафатландыраҹаг. Мәҝәр биз инди јашамырыг? Чохларымызын ҹавабы мүсбәт оларды, чүнки биз јејир-ичир вә нәфәс алырыг. Ајдындыр ки, јашајырыг. Һәтта һәјатымызын ән хошбәхт анларында белә дејирик: «Бах, бу әсл һәјатдыр!» Лакин Мүгәддәс Китаб бунун һәгиги һәјат олмадығыны ҝөстәрир.
Јеһова «һәгиги һәјата» наил олманызы истәјир. Сиз буна ҹан атырсынызмы?
21 Мүгәддәс Китаб бизи ‘һәгиги һәјата наил олмаға’ тәшвиг едир (1 Тимотејә 6:19, İ–93). Бу сөзләрдән ҝөрүндүјү кими, «һәгиги һәјата» јалныз ҝәләҹәкдә наил ола биләрик. Бәли, биз камил олдугдан сонра, Аллаһын башланғыҹда нијјәт етдији кими, сөзүн әсл мә’насында јашајаҹағыг. Ҹәннәтдә ҝөзәл сағламлығымыз, әсл сүлһ вә хошбәхтлијимиз олан заман, нәһајәт һәгиги, әбәди һәјата наил олаҹағыг (1 Тимотејә 6:12). Мәҝәр бу ҝөзәл үмид дејилми?
22. ‘Һәгиги һәјата наил олмаг’ неҹә мүмкүндүр?
22 ‘Һәгиги һәјата наил олмаг’ неҹә мүмкүндүр? Бу сөзләри демәздән әввәл, Павел мәсиһчиләри ‘хејирхаһлыг етмәјә’ вә ‘јахшы ишләрлә варлы олмаға’ чағырырды (1 Тимотејә 6:18). Демәли, Мүгәддәс Китабдан алдығымыз биликләри неҹә тәтбиг етмәјимиздән чох шеј асылыдыр. Бәс Павелин сөзләри, хејирхаһ ишләримизлә ‘һәгиги һәјата’ лајиг ола биләҹәјимизими ҝөстәрир? Хејр, чүнки белә ҝөзәл үмидә јалныз Аллаһын «лүтфү» сајәсиндә саһиб ола биләрик (Ромалылара 5:15). Јеһова исә Она сәдагәтлә хидмәт едәнләри мүкафатландырмагдан севинҹ дујур. О, сизин «һәгиги һәјата» наил олманызы истәјир. Аллаһын мәһәббәтиндә галанларын һамысыны хошбәхтлик вә сүлһ ичиндә әбәди һәјат ҝөзләјир.
23. Аллаһын мәһәббәтиндә галмаг нә үчүн ваҹибдир?
23 Һәр биримиз өзүмүздән сорушмалыјыг: «Мән Аллаһы разы салмаға вә Она Мүгәддәс Китабын өјрәтдији кими хидмәт етмәјә чалышыраммы?» Әҝәр һәр ҝүн бу суала мүсбәт ҹаваб верә билириксә, демәли, доғру јолдајыг. Әмин ола биләрик ки, Јеһова бизим сығынаҹағымыздыр. О Өз садиг хидмәтчиләрини индики нараһат дөврүн сон ҝүнләриндә горујаҹаг. Јеһова, чох јахын олан јени дүнјаја дахил олмағымыза көмәк едәҹәк. Салеһлик өмүр сүрән јени дүнјада бизи неҹә дә ҝөзәл һәјат ҝөзләјир! Вахтында дүзҝүн сечим етдијимиз үчүн әсл мәмнунлуг дујаҹағыг! Әҝәр бу ҝүн сиз садиглијинизи горусаныз вә Аллаһын мәһәббәтиндә галсаныз, «һәгиги һәјата» наил олаҹаг вә Јеһова Аллаһын нијјәт етдији кими, әбәди јашаја биләҹәксиниз!