Үрәкләрә јазылмыш мәһәббәт гануну
«Ганунуму онларын дахилинә гојуб үрәкләринә јазаҹағам» (ЈЕРЕМЈА 31:33).
1, 2. а) Бу мәгаләдә нәји нәзәрдән кечирәҹәјик? б) Јеһова Сина дағында неҹә зүһур етди?
ӨТӘН ики мәгаләдән өјрәндик ки, Муса Сина дағындан енәндә Јеһованын иззәтини әкс етдирдијиндән үзү нур сачырды. Биз, һәмчинин, Мусанын үзүнү нигабла өртмәсинин сәбәбини дә мүзакирә етдик. Инди исә ҝәлин, мәсиһчиләр үчүн бу ҝүн хүсусилә мараглы олан бир мөвзуја тохунаг.
2 Муса дағда оланда Јеһовадан мүәјјән ҝөстәришләр алды. Сина дағынын әтәјиндә топлашмыш исраиллиләр Аллаһын һејрәтли зүһурунун шаһиди олдулар. «Ҝөј ҝурултусу, шимшәкләр, дағ үзәриндә гаты бир булуд вә чох уҹа шејпур сәси олду. Дүшәрҝәдә олан бүтүн халг титрәди... Бүтүн Сина дағы түстү ичиндә иди, чүнки Рәбб онун үзәринә алов ичәрисиндә енмишди. Бүтүн дағ күрәнин вердији түстү кими түстүләнирди, бәрк титрәјирди» (Чыхыш 19:16-18).
3. Јеһова Исраилә Он әмри һансы јолла верди вә халга нә ајдын олду?
3 Јеһова, мәләк васитәсилә данышараг, халгына Он әмр адланан ганунлары верди (Чыхыш 20:1-17). Буна ҝөрә дә ганунларын Күлл-Ихтијар Аллаһ тәрәфиндән верилдијинә шүбһә ола билмәзди. Јеһова бу ганунлары даш лөвһәләрә јазмышды. Исраиллиләрин гызыл данаја ситајиш етдикләрини ҝөрән Муса, бу лөвһәләри чилик-чилик етмишди. Јеһова һәмин әмрләри диҝәр даш лөвһәләрин үзәринә јазды. Бу дәфә лөвһәләрлә дағдан енәндә Мусанын үзү нур сачырды. Бунунла да ганунларын бөјүк әһәмијјәтә малик олдуғу артыг һамыја ајдын олду (Чыхыш 32:15-19; 34:1, 4, 29, 30).
4. Он әмр нә үчүн бөјүк әһәмијјәтә малик иди?
4 Үзәриндә Он әмр јазылан ики лөвһә әввәлҹә Һүзур чадырынын, сонра исә мә’бәдин Ән мүгәддәс јериндә олан Әһд сандығынын ичиндә сахланылырды. Һәмин әмрләр Мусаја верилән Ганунун башлыҹа принсипләринин вә Исраилин теократик идарә системинин әсасыны тәшкил едирди. Он әмр Јеһованын Өзү үчүн хүсуси бир халг сечдијинә шәһадәт едирди.
5. Аллаһын Исраилә вердији ганун Онун мәһәббәтини неҹә әкс етдирирди?
5 Бу ганунлар Јеһованын шәхсијјәти, хүсусилә дә халгына олан мәһәббәти һаггында чох шеј дејирди. Он әмр итаәткар инсанлар үчүн неҹә дә гијмәтли һәдијјә иди! Бир алим бу әмрләр һаггында јазырды: «Бәшәр өвладлары тәрәфиндән гурулмуш һәр һансы бир әхлаг системи Аллаһын әһдинин он сөзүнә нәинки үстүн ҝәлә биләр, һеч онунла мүгајисә олуна билмәз». Јеһова Мусанын гануну һаггында демишди: «Әҝәр сөзүмә диггәтлә гулаг асыб әһдимә риајәт етсәниз, сиз бүтүн халглар арасындан Мәнә мәхсус халг олаҹагсыныз. Бүтүн јер үзү Мәнимдир; сиз исә Мәнә хидмәт едән каһинләр сәлтәнәти, мүгәддәс милләт олаҹагсыныз» (Чыхыш 19:5, 6).
Үрәјә јазылмыш ганун
6. Һансы ганун даш лөвһәләр үзәриндә јазылмыш ганунлардан даһа дәјәрлидир?
6 Бәли, Аллаһын исраиллиләрә вердији ганунлар чох гијмәтли иди. Бәс, мәсһ едилмиш мәсиһчиләрин даш лөвһәләрә јазылмыш ганунлардан даһа дәјәрли бир шејә малик олдугларыны һеч билирдинми? Јеһова Исраил халгы илә бағладығы Ганун әһдини јени бир әһдлә әвәз едәҹәји һагда пејғәмбәрлик етмишдир: «Ганунуму онларын дахилинә гојуб үрәкләринә јазаҹағам» (Јеремја 31:31-34). Јени әһдин Васитәчиси олан Иса, өз давамчыларына јазылы ганунлар күллијјаты вермәди. О, Јеһованын ганунуну сөјләдији вә етдији шејләр васитәсилә шаҝирдләринин үрәјинә вә зеһнинә һәкк етди.
7. «Мәсиһин Гануну» илк нөвбәдә кимләрә верилмишдир вә сонрадан ону кимләр гәбул етди?
7 Бу ганун «Мәсиһин Гануну» адланыр. О, Јагубун өвладлары олан Исраил халгына дејил, илк нөвбәдә «Аллаһын Исраили» адланан руһани халга верилмишдир (Галатијалылара 6:2, 16; Ромалылара 2:28, 29). Аллаһын Исраили мүгәддәс руһла мәсһ едилмиш мәсиһчиләрдән ибарәтдир. Сонрадан онлара Јеһоваја ибадәт етмәк арзусунда олан вә бүтүн милләтләрдән чыхан «бөјүк бир издиһам» гошулду (Вәһј 7:9, 10; Зәкәријјә 8:23). Бу ики груп «тәк Чобан»ын рәһбәрлији алтында «тәк сүрү» олараг «Мәсиһин Ганунуну» гәбул едир вә бу гануна әсасән јашамаға чалышыр (Јәһја 10:16).
8. Мусанын гануну илә Мәсиһин гануну арасында һансы фәрг варды?
8 Доғулан андан Мусанын ганунуна табе олан исраиллиләрдән фәргли олараг, мәсиһчиләр Мәсиһин ганунуну көнүллү сурәтдә гәбул едирләр. Миллијјәт вә доғум јери кими амилләр артыг һеч бир мә’на кәсб етмир. Мәсиһчиләр Јеһова вә Онун јоллары һаггында өјрәнир вә бүтүн гәлбләри илә Аллаһын ирадәсини јеринә јетирмәјә ҹан атырлар. Аллаһын гануну үрәкләриндә јазылан мәсһ едилмиш мәсиһчиләр Аллаһын онлары ҹәзаландыраҹағындан горхдуглары үчүн вә ја борҹ һиссиндән ирәли ҝәләрәк Она табе олмурлар. Онларын итаәткарлығы даһа тутарлы вә ҝүҹлү бүнөврәјә әсасланыр. Ејнилә, башга гојунларын да үрәкләриндә Аллаһын гануну јазылдығындан онлар да итаәткарлыг ҝөстәрирләр.
Мәһәббәт үзәриндә гурулмуш ганунлар
9. Јеһованын ганунларынын мәһәббәт үзәриндә гурулдуғуну Иса неҹә ҝөстәрди?
9 Јеһованын бүтүн ганунлары вә ҝөстәришләринин маһијјәтини бир сөзлә ифадә етмәк олар: мәһәббәт. Мәһәббәт һәмишә тәмиз ибадәтин ајрылмаз һиссәси олуб вә олаҹаг да. Исадан Ганунда һансы әмрин ән бөјүк олдуғуну сорушанда, о демишди: «Аллаһын олан Рәбби бүтүн үрәјинлә, бүтүн ҹанынла вә бүтүн дүшүнҹәнлә сев». Икинҹиси беләдир: «Гоншуну өзүн кими сев». Бундан сонра о деди: «Бүтүн Ганун вә пејғәмбәрләр бу ики әмрә бағлыдыр» (Матта 22:35-40). Бунунла Иса демәк истәјирди ки, нәинки Он әмр вә Ганун, һәмчинин Ибраниҹә Мүгәддәс Јазылар да бүтөвлүклә мәһәббәт үзәриндә гурулмушдур.
10. Мәсиһин ганунунун мәһәббәтә әсасландығыны биз һарадан билирик?
10 Бәс, мәсиһчиләрин дә үрәкләриндә јазылмыш ганунун әсасыны Аллаһа вә гоншуја олан мәһәббәтин тәшкил етдијини демәк олармы? Әлбәттә олар! Мәсиһин ганунуна Аллаһа олан дәрин мәһәббәтдән әлавә јени бир әмр дә дахилдир: мәсиһчиләр ҝәрәк бир-бирләрини фәдакарлыгла севсинләр. Бу мәсәләдә Иса онлара өрнәк олмалыдыр. О, достларыны о гәдәр севирди ки, онлар үчүн һәјатыны белә гурбан верди. Иса шаҝирдләринә Аллаһы севмәји вә бир-бирләрини севмәјә даир ондан нүмунә ҝөтүрмәји өјрәдирди. Мәсиһчиләрин бир-биринә ҝөстәрдикләри фәдакар мәһәббәт онлары фәргләндирән әсас хүсусијјәтдир (Јәһја 13:34, 35; 15:12, 13). Иса онлара һәтта дүшмәнләрини дә севмәји өјрәдирди (Матта 5:44).
11. Аллаһа вә бәшәријјәтә олан мәһәббәтини Иса неҹә тәзаһүр етдирди?
11 Мәһәббәти тәзаһүр етдирмәкдә Иса мүкәммәл бир нүмунәдир. О, ҝөјдә ҝүҹлү руһани шәхсијјәт кими јашајаркән, Атасынын ирадәсини јер үзүндә јеринә јетирмәји һазырлыгла өз өһдәсинә ҝөтүрдү. Инсанларын әбәди јашаја билмәләри үчүн һәјатыны гурбан вермәклә јанашы, о, инсанлара неҹә јашамалы олдугларыны да ҝөстәрди. О, чох һәлим, хејирхаһ, башгаларына гаршы һәссас иди, мәзлумлара вә фағырлара көмәк едирди. О, јорулмадан «әбәди һәјатын сөзләри»ни инсанлара сөјләјир вә Јеһованы танымагда онлара көмәк едирди (Јәһја 6:68).
12. Нәјә ҝөрә демәк олар ки, Аллаһа вә јахынларымыза олан мәһәббәт бир-бири илә сых әлагәлидир?
12 Аллаһа вә јахынларымыза олан мәһәббәт бир-бири илә сых әлагәлидир. Һәвари Јәһја дејирди: «Мәһәббәт Аллаһдандыр... Ким десә ки, мән Аллаһы севирәм, амма өз гардашына нифрәт едирсә, о јаланчыдыр. Чүнки ҝөрдүјү гардашыны севмәјән, ҝөрмәдији Аллаһы неҹә севә билир?» (1 Јәһја 4:7, 20). Јеһова Аллаһ мәһәббәтин һәм мәнбәји, һәм дә тәҹәссүмүдүр. Бу сәбәбдән О, һәр бир шеји мәһәббәтлә едир. Инсанлары да Өз сурәтиндә јаратдығы үчүн биз дә севмәк габилијјәтинә маликик (Јарадылыш 1:27). Јахынларымызы севмәклә Аллаһа олан мәһәббәтимизи ифадә етмиш олуруг.
Севмәк итаәт етмәк демәкдир
13. Аллаһы севмәк истәјириксә, илк нөвбәдә нә етмәлијик?
13 Ҝөрмәдијимиз Аллаһы неҹә севә биләрик? Илк мүһүм аддым Онунла таныш олмагдыр. Әлбәттә, һеч биримиз танымадығымыз адамы нә севә, нә дә ки, она е’тибар едә биләрик. Бу сәбәбдән Аллаһын Кәламы бизи Онунла јахындан таныш олмаға тәшвиг едир. Буна, Мүгәддәс Китабы охумаг, дуа етмәк вә артыг Ону таныјан вә севән инсанларла сых үнсијјәт сахламагла наил олмаг олар (Мәзмур 1:1, 2; Филипилиләрә 4:6; Ибраниләрә 10:25). Бу ҹәһәтдән Инҹилдәки дөрд Мүждә биздә хүсусилә мараг доғурур, белә ки, онлар Иса Мәсиһин һәјаты вә хидмәтини тәсвир етмәклә јанашы, Јеһованын кејфијјәтләрини дә чох јахшы әкс етдирир. Аллаһла даһа јахындан таныш олуб, бизә бәсләдији мәһәббәт үчүн миннәтдарлығымызы билдирмәклә, Она табе олмаг вә һәјатымызда Онун кејфијјәтләрини тәзаһүр етдирмәк арзусу да ҝүнү-ҝүндән артаҹаг. Ҝөрдүјүмүз кими, Аллаһа олан мәһәббәт итаәтлә сых бағлыдыр.
14. Нә үчүн Аллаһын ганунларынын ағыр олмадығыны сөјләјә биләрик?
14 Адәтән бизә әзиз олан инсанларын нәји севиб-севмәдијини билирик вә буну нәзәрә алмаға чалышырыг. Әлбәттә, севдијимиз инсаны кәдәрләндирмәк истәмирик. Һәвари Јәһја јазырды: «Аллаһы севмәк, Аллаһын әмрләринә риајәт етмәк демәкдир. Онун әмрләри исә ағыр дејилдир» (1 Јәһја 5:3). Доғрудан да, Аллаһын әмрләри нә ағыр, нә дә ки чохсајлыдыр. Бундан әлавә, һәр бир аддымымызы јөнәлдәҹәк чохсајлы ганунлары да әзбәрләмәјә еһтијаҹ јохдур. Дүзҝүн јолу вә истигамәти бизә Аллаһа олан мәһәббәт ҝөстәрир. Әҝәр Аллаһы севириксә, Онун ирадәсини јеринә јетирмәкдән севинҹ дујаҹағыг. Буну етмәклә, Јеһова Аллаһын илтифатыны газанар вә Онун ганунларына риајәт етмәјин бәһрәсини ҝөрәрик (Јешаја 48:17).
15. Бизи Јеһоваја бәнзәмәјә нә тәшвиг едәҹәк? Изаһ един.
15 Аллаһа олан мәһәббәт бизи Онун кејфијјәтләрини тәглид етмәјә тәшвиг едәҹәк. Әҝәр кимисә севириксә, онун кејфијјәтләринә һејран олур вә она бәнзәмәјә чалышырыг. Мәсәлән, Јеһова илә Иса арасындакы мүнасибәтләр һаггында дүшүнәк. Онлар ҝөјдә милјардларла ил бирликдә јашамышдылар. Араларында дәрин, тәмиз мәһәббәт варды. Иса сәмави Атасынын шәхсијјәтини о гәдәр дәгигликлә әкс етдирирди ки, шаҝирдләринә белә демишди: «Мәни ҝөрән, Атаны ҝөрмүш олур» (Јәһја 14:9). Јеһова вә Онун Оғлу һаггында даһа чох билик әлдә етдикҹә үрәјимиз миннәтдарлыг һиссилә долаҹаг, бу исә өз нөвбәсиндә бизи һәр шејдә Онлара бәнзәмәјә тәшвиг едәҹәк. Јеһоваја олан севҝимизин вә мүгәддәс руһун көмәји илә ‘көһнә мәнлијимизи вә онун әмәлләрини сојунуб јени мәнлији ҝејә’ биләҹәјик (Колослулара 3:9, 10; Галатијалылара 5:22, 23).
Мәһәббәт әмәлләрлә ифадә олунур
16. Аллаһа вә јахынларымыза олан мәһәббәтимизи тәблиғ хидмәтиндә вә шаҝирдләр һазырламаг ишиндә неҹә ҝөстәрә биләрик?
16 Аллаһа вә јахынларымыза олан мәһәббәт, биз мәсиһчиләри Падшаһлыг хәбәрини јајмаг вә шаҝирдләр һазырламаг ишиндә иштирак етмәјә тәшвиг едир. Јеһова Аллаһ ҝөрдүјүмүз бу ишдән чох разыдыр, чүнки ‘О, бүтүн инсанларын хилас олуб, һәгигәти дәрк етмәләрини истәјир’ (1 Тимотејә 2:3, 4). Биз Мәсиһин ганунунун инсанларын үрәкләринә јазылмасына көмәк етмәкдән бөјүк севинҹ дујуруг. О ҹүмләдән, онларын дәјишдијини, Јеһова Аллаһын кејфијјәтләрини һәјатларында әкс етдирдикләрини мүшаһидә едәндә үрәјимиз неҹә дә севинир! (2 Коринфлиләрә 3:18). Доғрудан да, инсанларын Аллаһла таныш олмаларына көмәк етмәк онлара верә биләҹәјимиз ән гијмәтли һәдијјәдир. Јеһованын достлуғуну гәбул едәнләр әбәди олараг бу достлуг мүнасибәтләриндән һәзз алаҹаглар.
17. Мадди шејләрә мејл салмагданса Аллаһа вә јахынларымыза мәһәббәт бәсләмәк нә үчүн мүдрик һәрәкәтдир?
17 Биз мадди шејләрин јүксәк гијмәтләндирилдији вә чох севилдији бир дүнјада јашајырыг. Амма мадди шејләр дә әбәди дејил. Онлар оғурлана вә јахуд да хараб ола биләр (Матта 6:19). Мүгәддәс Китаб бизи хәбәрдар едир: «Дүнја вә онун еһтирасы кечиб ҝедир, амма Аллаһын ирадәсини јеринә јетирән әбәди јашајыр» (1 Јәһја 2:16, 17). Бәли, Јеһова әбәди јашадығы кими, Ону севәнләр вә Она хидмәт едәнләр дә әбәди јашајаҹаг. Мәҝәр мүвәггәти олан шејләрә мејл салмаг әвәзинә, Аллаһа вә јахынларымыза мәһәббәт бәсләмәк даһа мүдрик һәрәкәт дејилми?
18. Миссионер баҹымыз мәһәббәтини фәдакарҹасына неҹә ҝөстәрди?
18 Мәһәббәт јолундан ајрылмајанлар Јеһованы иззәтләндирирләр. Ҝәлин, Сенегалда миссионер кими хидмәт едән Сонјанын нүмунәсинә бахаг. О, Һејди адлы бир гадынла Мүгәддәс Китабы өјрәнирди. Һејди һәгигәтлә марагланмајан әриндән ИИВ (инсанда иммунчатышмазлығы вирусу) инфексијасына јолухмушду. Әри өлдүкдән сонра Һејди вәфтиз олунду, лакин бир мүддәтдән сонра сәһһәти писләшди. Ону ГИЧС диагнозу илә хәстәханаја гојдулар. Сонја данышыр: «Хәстәхана ишчиләри әлләриндән ҝәләни едирдиләр, амма онлар сајҹа чох аз идиләр. Јығынҹагдан баҹы-гардашлар көнүллү олараг хәстәханаја ҝәлиб Һејдинин гајғысына галырдылар. Икинҹи ҝеҹәни мән онун јанында галдым. Ҝеҹәни чарпајысынын јанындакы дөшәкҹәнин үстүндә кечирдим. Һәјатынын сон дәгигәсинәдәк онун јанындан чәкилмәдим. Һејдијә бахан һәким мәндән сорушду: “Ән бөјүк чәтинлијимиз ондадыр ки, ГИЧС хәстәлијинә тутуланларын гоһумлары белә, онлардан үз дөндәрир. Бәс нә үчүн сиз, онун гоһуму олмадығыныз һалда, өзүнүзү тәһлүкәјә атырсыныз? Ахы сиз бир өлкәдән дејилсиниз, һеч дәринизин рәнҝи дә бир дејил?!” Мән һәкимә баша салдым ки, Һејди мәним үчүн доғма баҹы гәдәр јахын иди. Она ҝөрә дә баҹымын гајғысына галмаг мәнә хош иди». Јери ҝәлмишкән демәк лазымдыр ки, Сонја Һејдинин гајғысына галса да, бу онун сәһһәтинә мәнфи тә’сир ҝөстәрмәди.
19. Үрәјимизә Аллаһын гануну јазылдығына ҝөрә һансы фүрсәти әлдән вермәмәлијик?
19 Јеһованын хидмәтчиләри арасында бу ҹүр фәдакар мәһәббәтә чох раст ҝәлмәк олар. Аллаһын мүасир халгына гәдимдә Исраилә верилдији кими јазылы ганун верилмәјиб. Амма Ибраниләрә 8:10 ајәсиндәки сөзләрин онларын үзәриндә јеринә јетдијини ҝөрүрүк: «Рәбб дејир, “О ҝүнләрдән сонра Исраил нәсли илә бағлајаҹағым әһд будур: Мән ганунларымы онларын зеһнинә јерләшдирәҹәјәм вә онларын үрәкләриндә һәкк едәҹәјәм; вә онларын Аллаһы олаҹағам, онлар да Мәним халгым олаҹагдыр”». Ҝәлин, биз дә Јеһованын үрәјимизә јаздығы мәһәббәт ганунуну гијмәтләндирәк вә һәр бир фүрсәтдән истифадә едәрәк мәһәббәтимизи нүмајиш етдирәк.
20. Мәсиһин гануну нәјә ҝөрә дәјәрли хәзинәдир?
20 Бу ҹүр мәһәббәт тәзаһүр етдирән үмумдүнја гардашлығы илә бирҝә Аллаһа хидмәт етмәк неҹә дә бөјүк севинҹдир! Үрәкләриндә Мәсиһин гануну олан инсанлар мәһәббәтдән мәһрум олан бу дүнјада дәјәрли бир хәзинәјә маликдирләр. Онлар һәм Јеһованын мәһәббәти илә әһатә олунурлар, һәм дә араларында ҝүҹлү мәһәббәт бағына маликдирләр. «Нә јахшыдыр, нә хошдур гардаш олуб, бир јашамаг!» Јеһованын Шаһидләри мүхтәлиф өлкәләрдә јашасалар да, мүхтәлиф дилләрдә данышсалар да, мүхтәлиф мәдәнијјәтләри тәмсил етсәләр дә араларында тајы-бәрабәри олмајан бирлик мөвҹуддур. Бу ҹүр бирликдән Јеһова да разыдыр. Мәзмурчу давам едир: «Рәбб бујуруб ки, бу мәкана [мәһәббәт телләрилә бағлы олан халга] бәрәкәт, әбәди һәјат верилсин» (Мәзмур 133:1-3).
Ҹаваб верә биләрсинизми?
• Он әмр нә дәрәҹәдә әһәмијјәтли иди?
• Һансы ганун үрәкләрә јазылыб?
• «Мәсиһин Ганунун»да мәһәббәт һансы ролу ојнајыр?
• Аллаһа вә јахынларымыза олан мәһәббәтимизи һансы јолларла ҝөстәрә биләрик?
[20-ҹи сәһифәдәки шәкил]
Сонја сенегаллы бир гызла 2004-ҹү илин вилајәт конгресиндә.