Фәсил 101

Бетанијада Шимонун евиндә

ИСА МӘСИҺ Јериходан чыхыб Бетанија кәндинә ҝәлир. Јол бир ҝүн чәкир. Јерихо илә Бетанија арасында тәхминән 19 километрлик мәсафә вар вә јол јохушдур. Јерихо дәниз сәвијјәсиндән 250 метр ашағыда, Бетанија исә 760 метр јүксәкликдә, Зејтун дағынын шәрг јамаҹында јерләшир. Бу балаҹа кәнд Јерусәлимдән 3 километр аралыдадыр. Јадыныздадырса, Лазарла баҹылары бу кәнддә јашајыр.

Јерусәлимә Пасха бајрамына артыг хејли адам ҝәлиб. Онлар Ганунун тәләбинә әсасән, пакланмаг үчүн габагҹадан ҝәлибләр. Ола билсин, онлар мејитә тохундугларына, јахуд диҝәр сәбәбләрә ҝөрә натәмиздирләр. Буна ҝөрә дә бајрамы гејд едә билмәк үчүн пакланма ајинини иҹра едирләр. Бу адамлар мәбәдә топлашанда дүшүнүрләр ки, ҝөрәсән, Иса бајрама ҝәләҹәк, јохса јох.

Јерусәлим Иса илә бағлы мүбаһисәләрин мәркәзидир. Һамы билир ки, дин рәһбәрләри Исаны өлдүрмәк истәјир. Бу рәһбәрләр һәтта сәрәнҹам верибләр ки, ким Исанын јерини билсә, онлара хәбәр версин. Сон ајлар әрзиндә дин рәһбәрләри дүз үч дәфә ону өлдүрмәјә ҹәһд ҝөстәрмишләр: Чардаглар бајрамында, Һәср етмә бајрамында вә Лазарын дирилмәсиндән сонра. Буна ҝөрә дә ҹамааты мараг бүрүјүб вә онлар бир-бириндән сорушурлар: «Ҝөрәсән, о бајрама ҝәлмәјәҹәк?»

Јәһуди тәгвиминә әсасән, Пасха бајрамы нисанын 14-ү гејд едилир. Иса бајрама 6 ҝүн галмыш, ҹүмә ҝүнү ахшамүстү, нисанын 8-и башлајанда Бетанијаја ҝәлир. О, шәнбә ҝүнү ҝәлә билмәзди, чүнки Гануна әсасән, ҹүмә ҝүнү ахшам ҝүнбатандан шәнбә ҝүнү ҝүнбатана гәдәр јәһудиләр үчүн јол ҝетмәк гадаған иди. Јәгин ки, Иса Бетанијада һәмишә олдуғу кими досту Лазарын евинә ҝедир вә ҹүмәдән шәнбәјә кечән ҝеҹәни орада галыр.

Нөвбәти ҝүн Бетанија сакинләриндән Шимон адлы бир нәфәр Исаҝили шам јемәјинә дәвәт едир. Бу адам әввәлләр ҹүзамлы олмуш вә еһтимал ки, Иса она шәфа вермишди. Лазар да баҹылары илә бурададыр. Марта она хас олан гајғыкешликлә гонаглара гуллуг едир. Мәрјәм исә јенә дә бүтүн диггәтини Исаја јөнәлдиб. Лакин бу дәфә онун ҝөрдүјү иш мүбаһисәјә сәбәб олур.

Мәрјәм ичиндә тәхминән 300 грам «халис нард» олан балаҹа бир габ ҝәтирир. Бу әтирли јағ чох баһалыдыр, онун гијмәти бир иллик әмәк һаггына бәрабәрдир. Мәрјәм јағы Исанын башына вә ајагларына төкүр. Сонра сачы илә онун ајагларыны гурулајыр. Јағын әтри бүтүн еви бүрүјүр.

Лакин шаҝирдләр буна һирсләниб дејирләр: «Бу бојда исрафчылыг олар?» Јәһуда Искариот да дејир: «Бу јағы баһа гијмәтә сатыб пулуну касыблара пајламаг оларды». Әслиндә, касыблар Јәһуданы марагландырмыр. О, шаҝирдләрдә олан пул гутусундан оғурлуг етдији үчүн белә дејир.

Иса Мәрјәми мүдафиә едир: «Бу гыздан нә истәјирсиниз? О, мәнә јахшылыг етди. Касыблар һәмишә јаныныздадыр, мән исә һәмишә јанынызда олмајаҹағам. О, јағы үстүмә төкмәклә мәни дәфнә һазырлады. Инанын, хош хәбәр дүнјанын һарасында тәблиғ олунса, бу гадынын ҝөрдүјү иш барәсиндә данышылаҹаг, өзү исә јад едиләҹәк».

Иса артыг икинҹи ҝүндүр ки, Бетанијададыр. Онун бурада олмасы хәбәри бүтүн әтрафа јајылыб. Бу сәбәбдән Шимонун евинә чохлу адам ҝәлир. Онлар Исаны вә Лазары ҝөрмәк истәјирләр. Чохлары өлмүш адамы дирилтдијинә ҝөрә Исаја иман ҝәтирир. Бөјүк каһинләр исә буна ҝөрә Исаны да, Лазары да өлдүрмәк истәјирләр. Ҝөрүн, бу бөјүк каһинләр неҹә пис адамдырлар! Јәһја 11:55—12:11; Матта 26:6—13; Марк 14:3—9; Һәвариләрин ишләри 1:12.

▪ Јерусәлим мәбәдиндә ҹамаат нәдән данышыр вә нәјә ҝөрә?

▪ Нәјә ҝөрә Иса Бетанијаја шәнбә ҝүнү јох, ҹүмә ҝүнү ҝәлир?

▪ Иса Бетанијада шәнбә ҝүнү кимә гонаг ҝедир?

▪ Мәрјәмин һансы һәрәкәти мүбаһисәјә сәбәб олур вә Иса ону неҹә мүдафиә едир?

▪ Бөјүк каһинләрин пис адам олдуглары нәдән ҝөрүнүр?