Фәлакәтсиз һәјат!
ӘҜӘР сизә десәјдиләр ки, тезликлә тәбии фәлакәтләрә сон гојулаҹаг, нә дејәрдиниз? Јәгин, бунун нағыл вә ја садәҹә бир хәјал олдуғуну фикирләшәрдиниз.
Тәбии фәлакәтләрин даима олаҹағыны фикирләшсәк дә, вәзијјәтин дәјишәҹәјинә әсаслы үмид вар. Лакин бу дәјишиклик инсанларын әли илә баш вермәјәҹәк. Инсанлар тәбиәтдә баш верән һадисәләри нәинки нәзарәт алтында сахламаға вә ја дәјишмәјә гадирдирләр, һеч онларын сәбәбини дә там баша дүшмүрләр. Өз мүдриклији вә мүшаһидәчилији илә танынан гәдим Исраилин падшаһы Сүлејман пејғәмбәр јазырды: «Кимсә сәма алтында едилән ишләри анлаја билмәз, нә гәдәр сәј ҝөстәрсә дә, јенә дә буну анлаја билмәз. Бир һикмәтли адам буну билдијини иддиа етсә дә, јенә дәрк едә билмәз» (Ваиз 8:17).
Әҝәр инсанлар тәбии фәлакәтләри идарә едә билмирләрсә, онда буну етмәјә ким гадирдир? Мүгәддәс Китабда дејилир ки, бу дәјишиклији јалныз Јараданымыз едә биләр. Јер үзүндә бүтүн еколожи системләри, мәсәлән, су дөвраныны, тәсис едән Одур (Ваиз 1:7). Инсанлардан фәргли олараг, Аллаһын ҝүҹүнүн һәдди-һүдуду јохдур. Буна сүбут олараг Јеремја пејғәмбәр дејирди: «Аһ Худавәнд Рәбб, бөјүк ҝүҹүнлә вә узанан голунла јери, ҝөјү јаратдын. Едә билмәјәҹәјин һеч бир шеј јохдур» (Јеремја 32:17). Аллаһ Јер күрәсини вә онун тәркиб һиссәләрини јаратдығы үчүн мәнтигәујғундур ки, инсанларын јер үзүндә сүлһ вә тәһлүкәсизлик ичиндә јашамаларынын да гејдинә О гала биләр (Мәзмур 37:11; 115:16).
Бәс Аллаһ лазым олан дәјишиклији неҹә һәјата кечирәҹәк? Јадыныздадырса, бу журналын икинҹи мәгаләсиндә гејд олунмушдур ки, дүнјада баш верән дәһшәтли һадисәләр «дөврүн јекунунун әламәти»дир. Иса демишди: «Бүтүн бунларын баш вердијини ҝөрәндә билин ки, Аллаһын падшаһлығы јахындадыр» (Матта 24:3; Лука 21:31). Аллаһын сәмави Падшаһлығы, тәбиәт гүввәләрини идарә етмәк дә дахил олмагла, јер үзүндә бөјүк дәјишикликләр едәҹәк. Јеһова Аллаһын буну етмәјә ҝүҹү чатса да, О, бу ишләри Иса Мәсиһә тапшырыб. Даниел пејғәмбәр бу һагда демишди: «Она һакимијјәт, иззәт вә падшаһлыг верилмишди ки, бүтүн халглара, милләтләрә вә дилләрә мәнсуб адамлар она хидмәт етсин» (Даниел 7:14).
Аллаһ Иса Мәсиһә јер үзүндә ҝөзәл шәраит јаратмаг үчүн лазым олан бүтүн дәјишикликләри етмәјә ҝүҹ-гүввәт вериб. Ики мин ил өнҹә Иса јер үзүндә јашајанда тәбиәт гүввәләринин она табе олдуғуну ҝөстәрмишди. Бир дәфә о, өз шаҝирдләри илә Галилеја дәнизиндә гајыгда үзәндә «ҝүҹлү фыртына гопду. Амансыз далғалар гајыға чырпынырды; гајыг батмаг үзрә иди». Шаҝирдләри тәшвишә дүшдүләр. Өләҹәкләриндән горхараг, Исаја үз тутдулар. Бәс Иса нә етди? О, садәҹә «дуруб күләји рам етди вә суја әмр етди: “Дајан! Сакит ол!” Күләк јатды, әтрафа дәрин сүкут чөкдү». Шаҝирдләри тәәҹҹүбләнәрәк дедиләр: «Бу кимдир ки, һәтта күләк вә дәниз дә она итаәт едир?» (Марк 4:37—41).
Сонралар Иса ҝөјләрә галдырылды вә она даһа бөјүк гүввә вә сәлаһијјәт верилди. Аллаһын Падшаһлығынын Падшаһы олан Иса инсанларын јер үзүндә сүлһ вә тәһлүкәсизлик ичиндә јашамалары үчүн лазыми дәјишикликләри етмәк сәлаһијјәтинә саһибдир.
Ҝөрдүјүмүз кими, бир чох проблем вә фәлакәтләр инсанларын худбинлији вә тамаһкарлығы уҹбатындан даһа да аҹы нәтиҹәләрә сәбәб олур. Бәс дәјишилмәк истәмәјән инсанлара Аллаһын Падшаһлығы нә едәҹәк? Мүгәддәс Китабда дејилир ки, Ағамыз Иса «өз гүдрәтли мәләкләри илә бирликдә ҝөјдән зүһур едәҹәји вахт... од-аловла ҝәлиб Аллаһы танымајанлардан вә Ағамыз Иса һаггындакы хош хәбәрә итаәт етмәјәнләрдән гисас алаҹаг». Һәмчинин о, «јери тәләф едәнләри тәләф [едәҹәк]» (2 Салоникилиләрә 1:7, 8; Вәһј 11:18).
Сонра «падшаһлар Падшаһы» олан Иса Мәсиһ јер үзүнүн тәбиәт гүввәләрини тамамилә идарә едәҹәк (Вәһј 19:16). О, Падшаһлығынын рәһбәрлији алтында јашајан инсанларын һәр һансы фәлакәтдән әзаб чәкмәсинә изин вермәјәҹәк. Иса өз гүввәсиндән һава вә мөвсүмләрин бәшәр өвладларына фајда ҝәтирмәси үчүн истифадә едәҹәк. Бунун нәтиҹәсиндә Јеһова Аллаһын вахтилә Өз халгына вердији вәди јеринә јетәҹәк: «Сизә мөвсүмүндә јағыш ҝөндәрәҹәјәм ки, торпаг өз мәһсулуну, ағаҹлар исә мејвәләрини версин» (Левилиләр 26:4). Инсанлар һәр һансы фәлакәтин дағыдыҹы нәтиҹәсиндән горхмајараг евләр тикәҹәкләр: «Онлар евләр тикиб орада мәскунлашаҹаг, үзүм бағлары салаҹаг, бәһрәләриндән јејәҹәк» (Јешаја 65:21).
Сиз нә етмәлисиниз?
Шүбһә јохдур ки, бир чох инсанлар кими, сиз дә тәбии фәлакәтләрин олмајаҹағы дүнјада јашамаг истәјәрдиниз. Буна наил олмаг үчүн нә етмәлисиниз? Белә бир шәраитдә «Аллаһы танымајанлар»а вә «хош хәбәрә итаәт етмәјәнләр»ә јер олмајаҹагса, онда ајдындыр ки, орада јашамаг истәјән һәр кәс Аллаһ һаггында билик алмалы вә Онун һакимијјәтини дәстәкләмәлидир. Аллаһ ҝөзләјир ки, биз Онун һаггында өјрәнәк вә Падшаһлыг барәдә хош хәбәрә итаәт едәк.
Буну етмәјин ән јахшы үсулу Мүгәддәс Китабы дәгиг арашдырмагдыр. Падшаһлығын рәһбәрлији алтында тәһлүкәсиз мүһитдә јашамаг үчүн лазым олан гајда-ганунлар мәһз Аллаһын Кәламында јазылыб. Мүгәддәс Китаб тәлимләрини өјрәнмәк үчүн Јеһованын Шаһидләринә мүраҹиәт едә биләрсиниз. Онлар сизә мәмнунијјәтлә көмәк едәҹәкләр. Бир шејә әмин ола биләрсиниз: әҝәр Аллаһ һаггында өјрәнмәјә вә хош хәбәрә итаәт етмәјә чалышсаныз, онда Сүлејманын мәсәлләри 1:33 ајәдәки сөзләрин јеринә јетмәсинин шаһиди олаҹагсыныз. Орада дејилир: «Мәнә гулаг асанларса әмин-аманлыгда јашајаҹаг, раһатлыг тапаҹаг, писликдән горхмајаҹаг».