Јахшы достлары неҹә тапмаг олар?

Бу мәгалә, ола билсин, сизи марагландыран суаллара тохунур вә онларын ҹавабыны Мүгәддәс Китабынызда тапмаға көмәк едир. Јеһованын Шаһидләри сизинлә бу суаллары мәмнунијјәтлә мүзакирә едәҹәкләр.

1. Нәјә ҝөрә дост сечиминдә диггәтли олмалыјыг?

Инсанларын әксәријјәти башгаларынын рәғбәтини газанмаг үчүн чох вахт онлары тәглид етмәјә башлајырлар. Буна ҝөрә дә бизим достларымыз дүшүнҹә тәрзимизә ҝүҹлү тәсир ҝөстәрирләр. Демәли, дост сечимимиз бизим неҹә инсан олаҹағымызы мүәјјән едир (Сүлејманын мәсәлләри 4:23; 13:20 ајәләрини оху.)

Мүгәддәс Китабын јазылмасында иштирак едән вә Аллаһын рәһбәрлији алтында јашајан Давуд пејғәмбәр өз достларыны мүдрикликлә сечирди. О, Аллаһын хидмәтчиси кими өз нөгсансызлығыны горумагда она көмәк едән инсанларла достлуг едирди (Мәзмур 26:4, 5, 11, 12). Мисал үчүн, Јонатанла достлуг Давуда севинҹ ҝәтирирди, чүнки Јонатан ону Јеһоваја ҝүвәнмәјә тәшвиг едирди. (1 Шамуел 23:16—18 ајәләрини оху.)

2. Аллаһын досту неҹә ола биләрсән?

Јеһованын Күлли-Ихтијар Аллаһ олмасына бахмајараг, бизим Онунла дост олмаг имканымыз вар. Мәсәлән, Ибраһим пејғәмбәр Јеһоваја етибар вә итаәт етдији үчүн Јеһова ону досту кими гәбул едирди (Јарадылыш 22:2, 9—12; Јагуб 2:21—23). Әҝәр биз дә Јеһова Аллаһа етибар едиб, дедији һәр шеји јеринә јетирсәк, Онун досту ола биләрик. (Мәзмур 15:1, 2 ајәләрини оху.)

3. Нәјә ҝөрә јахшы достлар тапмалыјыг?

Әсил достлар һәмишә садиг галыр вә дүзҝүн давранмагда көмәк едирләр (Сүлејманын мәсәлләри 17:17; 18:24). Мәсәлән, Давуддан 30 јаш бөјүк, еләҹә дә Исраил тахт-таҹынын вәлиәһди олмасына бахмајараг, Јонатан Аллаһын нөвбәти падшаһ кими тәјин етдији Давуда сәдагәтлә дәстәк олурду. Һәмчинин әсил достлар сәһв давранышымызы ҝөрәндә бизә дүзәлиш вермәкдән чәкинмирләр (Мәзмур 141:5). Аллаһы севән достлар сәнә јахшы вәрдишләрә јијәләнмәјә көмәк едәҹәкләр. (1 Коринфлиләрә 15:33 ајәсини оху.)

Сәнин кими салеһлији севән инсанларла Јеһованын Шаһидләринин Падшаһлыг залында таныш ола биләрсән. Орада Аллаһы разы салмагда сәнә көмәк едә биләҹәк достлар тапа биләрсән. (Ибраниләрә 10:24, 25 ајәләрини оху.)

Лакин Аллаһы севән достларымыз да һәрдән бизим хәтримизә дәјә биләрләр. Онлардан инҹимәјә тәләсмә (Ваиз 7:9, 20—22). Унутма ки, камил дост јохдур вә Аллаһы севән достлары һәмишә гијмәтләндирмәк лазымдыр. Мүгәддәс Китаб һәмиманлыларымызын сәһвләрини бағышламаға тәшвиг едир. (Колослулара 3:13 ајәсини оху.)

4. Әҝәр «достларымыз» бизә гаршы чыхырларса, нә етмәк олар?

Бир чохлары фикир вермишләр ки, Аллаһын Кәламыны өјрәнмәјә башлајанда достларындан бәзиләри онлара мане олмаға башлајырлар. Ола билсин, белә достлар Мүгәддәс Китабын фајдалы мәсләһәтләрини вә орадан алдығын әбәди һәјат үмидини анламырлар. Сән онлара көмәк едә биләрсән. (Колослулара 4:6 ајәсини оху.)

Диҝәр тәрәфдән исә, бәзи «достлар» Аллаһын Кәламындакы хош хәбәри лаға гоја биләрләр (2 Петер 3:3, 4). Бәзиләри исә дүзҝүн давранмаг истәјини ришхәнд едә биләрләр (1 Петер 4:4). Әҝәр сән белә вәзијјәтлә үзләшмисәнсә, бир гәрара ҝәлмәлисән: ја онларла достлуғу давам етдирмәли, ја да Аллаһла достлуғу сечмәлисән. Аллаһа үстүнлүк версән, Онун тимсалында ән јахшы дост газанаҹагсан. (Јагуб 4:4, 8 ајәләрини оху.)