ФӘСИЛ 32

Ҹинси тәҹавүздән өзүмү неҹә горуја биләрәм?

Һәр ил милјонларла инсанлар зорланмаја вә ја диҝәр нөв ҹинси тәҹавүзә мәруз галырлар. Арашдырмалар ҝөстәрир ки, зәрәрчәкәнләрин әксәријјәтини ҝәнҹләр тәшкил едир. Мәсәлән, бәзи рәгәмләрә ҝөрә, Бирләшмиш Штатларда тәҹавүз гурбанларынын үчдә бири 18 јашына чатмамыш ҝәнҹләрдир. Букими һаллар ҝениш јајылдығындан бу мөвзуну нәзәрдән кечирмәк олдугҹа ваҹибдир.

«О, гәфил мәндән јапышды, нә баш вердијини анламаға маҹал тапмамыш мәни јерә јыхды. Мүгавимәт ҝөстәрмәк үчүн әлимдән ҝәләни етдим. Ҝөзјашардыҹы газ балонуну биртәһәр чыхарда билдим, амма ону вуруб әлимдән салды. Гышгырмаға чалышдым, сәсим чыхмады. Итәләдим, јумругладым, тәпикләдим, ҹырмагладым — бир сөзлә, һәр шејә әл атдым. Бирдән бәдәнимә бычағын санҹылдығыны һисс едәндә артыг мүбаризә апармаға ҝүҹүм галмады» Анетта

БУ ҜҮН биз ҹинси тәҹавүзүн ҝениш јајылдығы бир дүнјада јашајырыг вә әксәр һалларда бунун гурбаны ҝәнҹләр олур. Анетта кими, бәзи ҝәнҹләр танымадыглары инсанларын, диҝәрләри исә гоншуларынын тәҹавүзүнә мәруз галырлар. Буна бир нүмунә Наталинин башына ҝәлән һадисәдир. Ҹәми 10 јашы оланда јахынлыгда јашајан јенијетмә бир оғлан ону зорламышды. Натали дејир: «Мән чох горхмушдум, һәм дә утандығымдан әввәлҹә һеч кимә һеч нә демәмишдим».

Бир чох ушаглар аилә үзвләри тәрәфиндән ҹинси истисмара мәруз галырлар. Кармен дејир: «5 јашымдан 12 јашыма кими атам тәрәфиндән ҹинси тәҹавүзә мәруз галмышам. 20 јашым оланда, нәһајәт, онунла данышмаг гәрарына ҝәлдим. О, пешман олдуғуну деди, амма бир нечә ајдан сонра мәни евдән говду».

Индики зәманәдә гоншулар, достлар вә ја аилә үзвләри тәрәфиндән зорланма һаллары горхунҹ дәрәҹәдә ҝениш јајылыбa. Лакин јенијетмәләрин ҹинси истисмары һеч дә јени бир шеј дејил. Ушагларла белә гәддар давраныш артыг Мүгәддәс Китабын јазылдығы дөврдә мөвҹуд иди (Јоел 3:3; Матта 2:16). Бу ҝүн биз сон дәрәҹә ағыр бир зәманәдә — «доғмаларыны севмәјән» инсанларын арасында јашајырыг, бу сәбәбдән гызларын (һәтта оғланларын) ҹинси тәҹавүзә мәруз галмасы ади һал алыб (2 Тимотејә 3:1—3). Һәрчәнд һеч бир еһтијат тәдбири сәнин тәһлүкәсизлијинә там зәманәт вермир, амма сән өзүнү мүдафиә етмәк үчүн чох шеј едә биләрсән. Нөвбәти мәсләһәтләри нәзәрдән кечирәк.

Ајыг ол. Евдән чөлә чыханда јан-јөрәнә, әтрафына ҝөз ҝәздир. Елә әразиләр вар ки, тәһлүкәли һесаб олунур, хүсусилә дә ахшамлар. Бу кими јерләрдән мүмкүн олдуғу гәдәр узаг дур, ја да чалыш, тәк олмајасан (Сүлејманын мәсәлләри 27:12).

Јанлыш тәәссүрат ојатма. Флирт етмә, ачыг-сачыг вә ҹәзбедиҹи ҝејинмә. Елә тәәссүрат ојана биләр ки, бу, сәнин үрәјинҹәдир, ја да, ән азындан, етираз етмәзсән (1 Тимотејә 2:9, 10).

Сәрһәд гој. Әҝәр ҝөрүшдүјүн оғлан варса, һансы һәрәкәтләрин јол верилән олуб-олмадығы барәдә онунла конкрет данышb. Сонра исә гојдуғун сәрһәдләрдән ҹүзи дә олса кәнара чыхма ки, тәҹавүзә мәруз гала биләҹәјин вәзијјәтлә үзләшмәјәсән (Сүлејманын мәсәлләри 13:10).

Гәтијјәтли ол. Сәрт шәкилдә: «Јох!» вә ја «Әлини чәк!» — демәкдән чәкинмә. Севҝилини итирмәкдән горхуб сусма. Әҝәр о, буна ҝөрә сәни атаҹагса, демәли, сәнә лајиг дејил! Сән даһа јахшысына — шәхсән сәнә вә принсипләринә һөрмәтлә јанашан бир инсана лајигсәнc.

Интернетдән истифадә едәркән диггәтли ол. Һеч вахт шәхси мәлуматыны вә ја һараларда олдуғуну ҝөстәрән шәкилләр јерләшдирмәd. Әҝәр налајиг месажлар алырсанса, ән јахшысы ҹаваб вермәмәкдир. Ҹаваб алмамаг интернет позғунларыны тәсирсиз һала салыр.

Јухарыда садаланан аддымлар сәни мүәјјән мәнада горуја биләр (Сүлејманын мәсәлләри 22:3). Анҹаг дүзүнү десәк, һәр шеји нәзарәт алтында сахлаја билмәзсән. Мәсәлән, јанында һәмишә киминсә олмасы вә ја тәһлүкәли әразиләрдән һеч кечмәмәк мүмкүн дејил. Һәтта, ола билсин, евин тәһлүкәли әразидә јерләшир.

Бәлкә дә, өз аҹы тәҹрүбәндән билирсән ки, нә гәдәр тәдбир ҝөрсән дә, бундан тамамилә гачынмаг мүмкүн дејил. Ола билсин, фәслин әввәлиндә ады чәкилән Анетта кими, сәнә дә ҝүҹлү бир нәфәр гәфил һүҹум чәкиб. Јахуд да Кармен кими, ушаг олмусан, әлиндән һеч нә ҝәлмәјиб, һәтта нә баш вердијини белә анламамысан. Инди дә виҹдан әзабы чәкирсән. Бунун өһдәсиндән неҹә ҝәлә биләрсән?

Өзүнү ҝүнаһландырма

Анетта бу ҝүнә кими һәлә дә өзүнү ҝүнаһландырыр. О дејир: «Өзүмү һеч ҹүр бағышлаја билмирәм. О ҝеҹә баш верәнләр ҝөзүмүн өнүндән ҝетмир. Мәнә елә ҝәлир ки, даһа чох мүбаризә апармалыјдым. Анҹаг о, мәни бычагландыгдан сонра горхудан донуб галдым, артыг һеч нә едә билмәдим... һәрчәнд етмәлијдим».

Натали дә ејни һиссләрлә мүбаризә апарыр. О дејир: «Бу гәдәр садәлөвһ олуб инсанлара инанмамалыјдым. Валидејнләрим тапшырмышдылар ки, баҹымла һәјәтдә һәмишә бир јердә ојнајаг, амма мән гулаг асмадым. Демәк олар ки, өзүм өз башыма бәла ачдым. Баш верәнләр аиләмә чох тәсир етди. Онлара белә зәрбә вурдуғум үчүн һеч ҹүр өзүмү бағышлаја билмирәм. Ән чох бу һисслә мүбаризә апармалы олурам».

Әҝәр сән дә, Анетта вә Натали кими, өзүнү ҝүнаһландырырсанса, бу һиссин өһдәсиндән неҹә ҝәлә биләрсән? Илк нөвбәдә, бир шеји јадындан чыхартма, бу һадисәдә сәнин һеч бир ҝүнаһын јохдур. Бу мәсәләјә әһәмијјәтсиз јанашан бәзиләри тәҹавүзкара бәраәт газандырараг: «О оғландыр», јахуд да «гыз өзү буна шәраит јарадыб» кими ифадәләр ишләдирләр. Анҹаг һеч нә белә бир һәрәкәтә бәраәт газандырмыр вә һеч ким бу ҹүр амансыз давраныша лајиг дејил. Әҝәр сән дә белә дәһшәтли һадисәнин гурбаны олмусанса, әмин ол ки, ҝүнаһкар сән дејилсән!

Әлбәттә: «Сән ҝүнаһкар дејилсән», — ифадәсини охумаг асандыр, амма буна инанмаг чох чәтин ола биләр. Бәзиләри һәр шеји ичинә салыр вә өзләрини гынајараг бәдбинлијә гапылырлар. Нәзәрә ал ки, сусмағын сәнә һеч бир хејри олмајаҹаг, әксинә, тәҹавүзкарын ишинә јарајаҹаг. Сән өзүнә гаршы мәсулијјәт дашыјырсан, буна ҝөрә дә башга сечим етмәлисән.

Баш верәнләри даныш

Мүгәддәс Китабда дејилир ки, дәһшәтли фаҹиә илә үзләшән салеһ Әјјуб белә демишди: «Шикајәтимә мәһдудијјәт гојмајаҹағам, аҹы һәјатымдан данышаҹағам» (Әјјуб 10:1). Онун кими даврансан, сән дә фајда әлдә едәҹәксән. Етибар етдијин бир инсанла сөһбәт етмәјин сајәсиндә вахт кечдикҹә баш верәнләрлә барышаҹаг вә гәлб раһатлығы тапаҹагсан.

Әҝәр Јеһованын Шаһидисәнсә, јығынҹағынызын ағсаггалы илә бу барәдә данышмаг олдугҹа ваҹибдир. Севән ағсаггалын тәсәлливериҹи сөзләри әмин едәҹәк ки, сән зоракылығын гурбаны олмагла мурдарланмамысан вә һеч бир ҝүнаһ ишләтмәмисән. Ағсаггалларла сөһбәтин фајдасыны ҝөрән Анетта дејир: «Јахын рәфигәмлә сөһбәт етдикдән сонра о, мәни һәр шеји ағсаггаллара данышмаға тәшвиг етди. Онун мәсләһәтинә гулаг асдығым үчүн чох севинирәм. Онлар бир нечә дәфә отуруб мәнимлә сөһбәт етдиләр вә мәнә мәһз еһтијаҹым олан сөзләри — баш верәнләрдә ҝүнаһым олмадығыны дедиләр. Мәним һеч бир ҝүнаһым олмајыб».

Башына ҝәләнләри вә кечирдијин һиссләри бөлүшмәјин гәзәб вә һиддәтин сәни јејиб битирмәсинә јол вермәјәҹәк (Мәзмур 37:8). Бу, сәнә узун илләрдән сонра илк дәфә гәлб раһатлығы тапмаға көмәк едәҹәк. Натали дә валидејнләри илә сөһбәт етдикдән сонра бу һиссләри јашады. О дејир: «Онлар мәнә чох дәстәк олдулар. Валидејнләрим чәкинмәдән һәр шеји онлара даныша биләҹәјими дедиләр, бу да, өз нөвбәсиндә, мәнә гәзәбләнмәмәјә вә өзүмә гапылмамаға көмәк етди». Дуа етмәк дә Наталијә бөјүк тәсәлли верди. О әлавә едир: «Хүсусилә дә үрәјими башгаларына ача билмәјәндә Аллаһла сөһбәтин мәнә чох көмәји олду. Дуада мән һәр шеји сәрбәст даныша билирәм. Бунун сајәсиндә үрәјимдә сүлһ вә сакитлик һөкм сүрүр»e.

Өзүн ҝөрәҹәксән ки, алдығын јара вахт кечдикҹә сағалыр (Ваиз 3:3). Ағсаггаллар кими, «күләјә гаршы бир пәнаһҝаһ, фыртынаја гаршы сығынаҹаг» олан етибарлы достларына ҝүвән (Јешаја 32:2). Физики вә емосионал сағламлығынын гајғысына гал. Лазымынҹа истираһәт ет. Ән башлыҹасы исә, һәр ҹүр тәсәлли Аллаһы олан Јеһоваја бел бағла. Әмин ол ки, О, тезликлә јер үзүндә јени дүнја гураҹаг вә орада «шәр адамлар кәсилиб атылаҹаг, Рәббә үмид бағлајанлар өлкәни мүлк олараг алаҹаг» (Мәзмур 37:9).

[Һашијәләр]

АЧАР АЈӘ

“Ахыр ҝүнләрдә сон дәрәҹә ағыр бир зәманә ҝәләҹәк. Чүнки инсанлар худбин,.. доғмаларыны севмәјән,.. тәмкинсиз, залым, јахшылығын дүшмәни... олаҹаглар” 2 Тимотејә 3:1—5

МӘСЛӘҺӘТ

Әҝәр ҹинси тәҹавүзә мәруз галмысанса, сәнә тәсәлли верәҹәк ајәләрин сијаһысыны тута биләрсән. Мәсәлән, бу сијаһыја Мәзмур 37:28; 46:1; 118:5—9; Сүлејманын мәсәлләри 17:17 вә Филипилиләрә 4:6, 7 кими ајәләри дахил едә биләрсән.

БИЛИРСӘН... ?

Бирләшмиш Штатларда зоракылығын гурбаны олан јенијетмәләрин 90 фаизи онлары зорлајан инсанлары таныјырлар.

ҺӘРӘКӘТ ПЛАНЫ!

Баш верәнләрдә өзүмү ҝүнаһкар һисс едәндә мән... ․․․․․

Бу мөвзу илә бағлы валидејнләримә вермәк истәдијим суаллар: ․․․․․

НЕҸӘ ДҮШҮНҮРСӘН?

● Зоракылыг һадисәси барәдә нә үчүн хәбәр вермәк лазымдыр?

● Әҝәр бу барәдә сусмаг гәрарына ҝәлсән, сәнинлә вә башгалары илә нә баш верә биләр?

[232–ҹи сәһифәдәки јазы]

“Ҹинси тәҹавүз барәдә данышмаг чох чәтиндир, амма үрәјини бошалтмағын едә биләҹәјин ән јахшы шејдир. Данышмаг сәнә кәдәрдән вә гәзәбдән јаха гуртарыб, јенидән ајаға галхмаға көмәк едәҹәк” Натали

[230–ҹу сәһифәдәки чәрчивә]

«Әҝәр мәни севирсәнсә...»

Елә тип инсанлар вар ки, ҹинси зоракылыгла мәшғул оларкән ҝүҹ тәтбиг етмирләр, әксинә, мәһарәтлә гызларын һиссләри илә ојнајараг јолдан чыхарырлар. Неҹә? «Бу ҝүн һамы ҹинси әлагәдә олур», јахуд «Һеч кимин хәбәри олмајаҹаг» вә ја бу китабын 24-ҹү фәслиндә ҝәтирилән: «Мәни севирсәнсә, разылшарсан» кими ифадәләр ишләтмәклә. Әҝәр оғлан ҹинси әлагә илә севҝинин ејни шеј олдуғуна сәни инандырмаға чалышырса, онун јаланына ујма. Белә бир инсан јалныз өзүнү дүшүнүр. Сәнин һиссләрин ону гәтијјән марагландырмыр. Әсил киши исә сәнин рифаһыны өзүнкүндән үстүн тутаҹаг вә Аллаһын әхлаг нормаларына бағлы галаҹаг дәрәҹәдә ҝүҹлү олдуғуну ҝөстәрәҹәк (1 Коринфлиләрә 10:24). О, гызлара ҹинси әлагә објекти кими бахмајаҹаг. Әксинә, ҝәнҹ гадынларла баҹы кими тәмиз нијјәтлә давранаҹаг (1 Тимотејә 5:1, 2).

[233–ҹү сәһифәдәки шәкил]

Бу ағыр јүкү тәк дашымаг мәҹбуријјәтиндә дејилсән. Һиссләрини киминләсә бөлүшәрәк көмәк ала биләрсән