Ушаглара Аллаһ һаггында һәгигәти неҹә өјрәтмәли? Ән јахшы үсуллар һансылардыр?

«Бу ҝүн сәнә әмр етдијим бу сөзләр үрәјиндә көк салсын. Бунлары өвладларынын шүуруна јахшы-јахшы јерит. Евиндә отуранда, јол ҝедәндә, јатанда, дуранда бунлар барәдә даныш» (ГАНУНУН ТӘКРАРЫ 6:6, 7).

БӘЗӘН ушагларын тәрбијәси валидејнләрә чох чәтин ҝәлир. Онлар бу мәсәләјә даир мәсләһәт ахтармаға чалышанда мәсләһәт чохлуғундан даһа да чаш-баш галырлар. Гоһумлар вә достлар мәсләһәт вермәјә һәмишә һазырдырлар. Валидејнләр китаблар, журналлар вә Интернет васитәсилә бәзән бир-биринә зидд олан мәлумат селинә мәруз галырлар.

Анҹаг валидејнләр Мүгәддәс Китабдан ушагларына нә өјрәтмәјә даир етибарлы мәсләһәтләрлә јанашы, неҹә өјрәтмәјә даир практики рәһбәрлик дә тапа биләрләр. Јухарыда ҝәтирилән Мүгәддәс Китаб парчасындан ҝөрүндүјү кими, валидејнләр һәр ҝүн имкан тапыб ушагларына Аллаһ һаггында данышмалыдырлар. Ашағыда Мүгәддәс Китаба әсасланан вә ушаглара Аллаһ һаггында өјрәтмәјә көмәк едән дөрд мәсләһәт мүзакирә олунур.

1. Аллаһын јаратдыгларындан өзүнүзә дәрс ҝөтүрүн. Аллаһын садиг хидмәтчиси Павел јазыр: «[Аллаһын] ҝөзәҝөрүнмәз кејфијјәтләри: әбәди гүдрәти вә илаһилији дүнја јаранандан бәри ајдын ҝөрүнүр вә јарадылмыш шејләр васитәсилә дәрк едилир. Буна ҝөрә дә онлара һагг газандырмаг олмур» (Ромалылара 1:20). Валидејнләр өвладларына Аллаһы танымаға көмәк етмәк үчүн Онун јаратдыглары вә онлар васитәсилә тәзаһүр олунан хүсусијјәтләри барәдә данышмалыдырлар.

Иса пејғәмбәр өз шаҝирдләрини өјрәдәркән бу үсулдан истифадә едирди. Мисал үчүн, о демишди: «Ҝөј гушларына фикир верин. Онлар нә әкир, нә бичир, нә дә анбара мәһсул топлајырлар. Бунунла белә, сизин сәмави Атаныз онлары једиздирир. Мәҝәр сиз онлардан гат-гат гијмәтли дејилсиниз?» (Матта 6:26). Бунунла Иса пејғәмбәр шаҝирдләринин диггәтини Јеһова Аллаһын мәһәббәт вә шәфгәт кими хүсусијјәтләринә јөнәлтди. Һәм дә Аллаһын бу кејфијјәтләри Өз өвладларына гаршы неҹә тәзаһүр етдирдији үзәриндә дүшүнмәјә көмәк етди.

Мүдрик Сүлејман падшаһ Аллаһын гарышгаја вердији инстинктив мүдриклијә ишарә едәрәк ваҹиб бир ибрәт дәрси вермишдир: «Еј тәнбәл, гарышгалара диггәт јетир, онларын һәјатындан ибрәт ҝөтүр. Онларын нә башчылары вар, нә нәзарәтчиләри, нә дә һөкмдарлары. Јајда азугәләрини јығар, бичин вахты өзләринә јем топлајарлар» (Сүлејманын мәсәлләри 6:6—8). Инсана зәһмәткеш олмағын, гаршысына, һәгигәтән дә, дәјәрли мәгсәдләр гојмағын, сонра да онлара наил олмаға ҹан атмағын ваҹиблијини баша салмаг үчүн чох ҝөзәл тәлим үсулудур, елә дејилми?!

Валидејнләр 1) ушагларындан һансы биткини вә ја һејваны хошладыгларыны сорушмагла, 2) һәмин биткиләр вә һејванлар һаггында даһа чох мәлумат топламагла, 3) онларын көмәјилә Аллаһ һаггында нә өјрәнә биләҹәкләрини изаһ етмәклә Иса пејғәмбәри вә Сүлејман падшаһы тәглид етмиш олурлар.

2. Иса Мәсиһи тәглид един вә өјрәтдијиниз инсанлара онун кими јанашын. Һеч ким инсанлара Исанын чатдырдығы гәдәр ваҹиб хәбәр чатдыра билмәзди. Онун тәлим методунун чох һиссәсини суаллар тәшкил едирди. О, өјрәтдији инсанларын фикирләринә вә һиссләринә сәмими мараг ҝөстәрирди (Матта 17:24, 25; Марк 8:27—29). Ејнилә, валидејнләр дә ушагларына бир чох шејләр өјрәтмәлидирләр. Анҹаг буна наил олмаг үчүн онлар Исаны тәглид едәрәк ушагларыны һиссләрини бөлүшмәјә тәшвиг етмәлидирләр.

Әҝәр ушаглар сөзә гулаг асмыр вә ја һансыса ваҹиб бир шеји чәтин гаврајырса, онда неҹә? Ҝәлин Иса пејғәмбәрин өз шаҝирдләри илә неҹә рәфтар етдијинә нәзәр салаг. Һәрдән шаҝирдләрин арасында гызғын мүбаһисә дүшүрдү вә онлар тәвазөкар олмағы һеч ҹүр өјрәнә билмирдиләр. Бунунла белә, Иса онлара сәбир ҝөстәрир вә һәлимлијин нә үчүн зәрури олдуғуну дәфәләрлә тәкрарлајырды (Марк 9:33, 34; Лука 9:46—48; 22:24, 25). Иса Мәсиһи тәглид едән валидејнләр дә ушагларына гаршы сәбирли олаҹаг, онлар һансыса өјүд-нәсиһәтин ваҹиблијини там баша дүшәнә гәдәр тәкрарлајаҹагларa.

3. Нүмунә олун. Валидејнләр Аллаһын хидмәтчиси Павелин Ромада јашајан һәмиманлыларына вердији мәсләһәтә риајәт етмәлидирләр. О јазырды: «Башгаларыны өјрәдә-өјрәдә нә үчүн өзүнү өјрәтмирсән? “Оғурлама” дејә тәблиғ едиб нијә өзүн оғурлуг едирсән?» (Ромалылара 2:21).

Бу мәсләһәт јериндә олан бир мәсләһәтдир, чүнки ушаглар валидејнләринин сөзләриндән чох әмәлләринә фикир верирләр. Валидејнләрин дедикләри илә һәрәкәтләри үст-үстә дүшәндә ушаглар онларын вердији өјүдә даһа һәвәслә гулаг асырлар.

4. Ушағы көрпәликдән өјрәдин. Һәвари Павеллә Аллаһа хидмәт едән Тимотеј ҹәмијјәтдә јахшы ад газанмышды (Һәвариләрин ишләри 16:1, 2). Бунун сәбәбләриндән бири онун «Мүгәддәс Јазылары көрпәликдән» билмәси иди. Ҝөрүнүр, Тимотејин анасы вә нәнәси она Мүгәддәс Јазылары охумагла кифајәтләнмирдиләр, һәм дә орада јазыланларын үзәриндә дүшүнмәјә көмәк едирдиләр (2 Тимотејә 1:5; 3:14, 15).

Көмәји һарадан тапа биләрсиниз?

Јеһованын Шаһидләри валидејнләрин ушагларына Аллаһ һаггында һәгигәти өјрәтмәләринә көмәк етмәк мәгсәдилә чохлу әдәбијјатлар нәшр етмишләр. Онлардан бәзиләри сырф көрпә ушаглар үчүн јазылыб. Диҝәрләри исә, валидејнләрлә јенијетмәләр арасында ачыг үнсијјәт сахламаға көмәк едә биләрb.

Әлбәттә, өвладларына Аллаһ һаггында өјрәтмәмишдән габаг, валидејнләр ушагларын верә биләҹәкләри бәзи чәтин суалларын ҹавабыны өзләри ахтарыб тапмалыдырлар. Мисал үчүн, сиз нөвбәти суаллара неҹә ҹаваб верәрдиниз: Аллаһ нә үчүн әзаблара јол верир? Аллаһын јер үзүнә даир нијјәти нәдән ибарәтдир? Өләнләр һарададырлар? Бу вә диҝәр суаллара ҹаваб тапмаг үчүн Јеһованын Шаһидләри сизә бөјүк мәмнунијјәтлә көмәк едә биләрләр. Бу, сизә вә аилә үзвләринизә Аллаһа јахынлашмаға көмәк едәҹәк (Јагуб 4:8).

[Һашијә]